Read Iyojwa'ja Chorote San Marcos 7 Bible Online

San Marcos 7 - Iyojwa'ja Chorote bible

San Marcos 7

¹'Nesa'ni papo Fariséojos, siu'neje papo taka'neyasane pa Moisés jika'neyasajnaye, tajla'm jlaja ajnat Jerusalén, ti ijioyi ja Jesús.

²Siuti i'winayis japo Jesús t'eyasajnas jikioye je ilij ti majleyeyi kan'yekiujni'n, iwit'ianisi'ne ti je iyo siupa iniwonisi.

³Kajeyepa ti siunapo Fariséojos, napok Judíojos, siu'neje napo ijia yame siupa iniwonisi papo jika kijilas t'ipi, ti siuti jikio' je ilij je ti'yekiujni'n. Jika kijilas mases iyone 'ate ti 'yiyasa'n, “Siunie i'nio' isi'me pi k'iejliyi ti insot, nak kiak iyoye'ejyi pet ti t'ojli jitieyi'i pa Sinia', 'yina Sinia' 'nachiye.”

⁴Jak je iyoyiji ti 'nesata'ni ti tajlis inak ji'wuki, je nesi'li'yi kan'yekiujni'n siuti je iyoyisi siupa iniwonist'iyipi ti je inilejes kiu'. Je najata, 'yina je pini 'neje niwa ijia, iyoye 'ate siunie ti je 'yaka'm ape'e ti ilijamk'i niwa jika teti'l ti i'yayisiamk'i, siu'neje puwa jlatiwa ti wikijnies, siu'neje puwa isatis, siu'neje puwa jlo'witis.

⁵It'imina papo Fariséojos siu'neje papo taka'neyasane pa Moisés jika'neyasajnaye ti iyot'iyisijyin'nipe ja Jesús ti iyonisi 'ate: —¿Yot'iyi'ni napo 'eyasajnas ti 'yaka'm ape'e siunie t'oniye iyot'iyipi kiapo saka kijilas mases, 'yina ti iyo kan'yekiujni'n jla'am nesi'liyits'i, jlam'ne ka inajnatis ka jikio' inlejes kiu'?

⁶Jesús isiujlie ti iyo'ate: —Jlamp'an je iyopi pa injwejlanik jiwo t'ipi Isaías ti injwela ti ijnoski'lanajyi'n, ti iyo'ate, ti 'yiti' pa jip'esinik: “Siunapo i'nio' ti ijwi'l ka siwunitis, jla'm ji'lijik'i wek jlam'ne ki iyo ni jlosik je jnanjli'ni ijiap.

⁷Jlajmi wek ka ijwe'el ka yama ka siwunitis, jlam'ne tajleje napo i'nio' jika'neyasajnaye.”

⁸Jiliyeyi siunie Sinia' takajluntieje kawo napo i'nio', 'yaka jiwoyeyi siunie iyo pit napo i'nio', ti je isiwaliyi'i siupa t'oniye iyot'iyipi kiapo saka kijilas mases.

⁹'Yina Jesús yinayi'iji ape'e ti iyo'ate: —Siuti ijiate ti jit'iotata siunie iyot'iyipi kiapo aska kijilas mases, nak it'imina ti jiliyeyi niwa Sinia' jlamtis.

¹⁰Siupa Moisés t'ipi iyo'ate: “Emi'n ni ana', siu'neje jana et”, 'yina iyo 'neje 'ate, “Siunie i'nio' imiesin'ni pa jinia' siu'neje jana jlet ka poye paka jiwet'iaye, nak je tiniaye'e pet.”

¹¹Siu'neje ti jijwela' ka 'esieyiji ka wone'ate pa jinia' siu'neje jana jlet, napo i'nio': “Mam pet paka iyone ka iwijna'm pet siu'nie a'we'en, 'yina ti pajk'i ti ekiajle pa Sinia'.”

¹²Jak je iyoyiji siuti kia'iyo, jijwelaye ka 'esiek'i siunie ti je itis napo jiniewot.

¹³It'imina ti je woye lajaye niwa Sinia' jlamtis, 'yina ti niwaka jla'm ti inteliajayi ka kinieyi, t'oniye t'ipi papo aska kijilas. Paj ka ineyeyinie'e siunapo aska kia'lis tomi pijia'm. Je niwakata, 'yina 'loj 'neje siuniwa jiwoyeyi ti kia'iyo.

¹⁴Jesús sekyi'i ti tanayi papo i'nio', ti iyone 'ate: —K'iuyek'i'm, tejnisiek'inie'e siu'nie jayo:

¹⁵Siuniwa tal kisie'e ti ijiojwa'm ni i'nio', je niwaka ka inkajyi'n ni i'nio' ka je 'esie jitieyi'i ni Sinia'. Jla'm ijiate jla'm siuniwa tajla'm ni jlosik ni i'nio' ti 'yakajyi'n.[4]

¹⁷Siuti tajlayi papo i'nio', siojopo t'eyasajnas jla'am i'yasen'ne siupi ijio'we pa taka'neyasane, ti yinisi kiajwe japa 'wuk.

¹⁸'Yina isiujlie ti iyone 'ate: —¿Kiakp'an jiwoyeyi pit je tijnisiek'i? ¿Je 'najanayi ti siunie tal kisie'e ti ijiojwa'm ni i'nio', je 'yakajyi'n ka nak int'emina ka je 'esie jitieyi'i ni Sinia'?

¹⁹Kajeyepa ti je ijiojwa'm ni jlosik ni i'nio', 'wenajliyi jla'am jana jits'i', sekyi'i ti ijliamayi. Jlam'ne Jesús nak ijwilata ti siuniwa inkas je niwaka ka int'emina ka je 'esie pa i'nio' ti itiujw.

²⁰Sekyi'i ti iyoye'eje 'ate: —Siunie tajla'm ni i'nio' jlosik, nak jla'm ijiate ti it'iojlinit.

²¹Kajeyepa ti jitiowiji, ka iyot'e 'ate ni jlosik ni i'nio', sek taj'le siunie: ti jitienkiujnieyejes je isis, ti ijiuski'lan'ni ni i'nio' asejnia kiak iyojliyi, inkajlajnaye, inkalankijnieye.

²²Siunie 'nelijieye, siunie ti itiliaja pa k'iejliyi ti jikiecha jikimet, siunie iyoyi ni i'nio' ti je 'es, ink'eminkiye, siu'neje ni ti inisayi niwa jiniliaja wask'i'nelaja, siu'neje na ti yiyiji'ni pa jikiecha, siunie ti initonit.

²³Siuti netia'n ni jlosik 'es, sekyi'i 'yakajyi'n ni i'nio' it'iminayi ti t'ojli.

²⁴Sektaj'le ti tejeye'eje 'niji yi'i puwa isi'il yiji japa ajnat jle' iyo'ate Tiro. Siuti 'nes'ni, ta'ajimpe ti yamit kiajwe japa 'wuk, lapakawo ti je iyotaja ka ti'niejenaja paka tiwonaja, 'yina ijialasata wat paka iniwone ka inijweki'n.

²⁵Je paja wat ti 'nesajampe siojopa i'nioki, jlase' japa jitiej je 'es, ti t'ijieyeyi. Sekyi'i t'akosjlete'l itiyeyijin kiajwe ja Jesús.

²⁶Siojopa i'nioki sek je 'wet'e, siojopa ajnat Fenicia ti yiji japa Siria japak tajle. 'Yina wuj ti inip'elisine ja Jesús ka inojwa'n kisie'e siupa yiji japa jlase'.

²⁷Jesús isiujlie ti iyo'ate: —Ene kiu 'ate napo ti ijiat ti inlese ka inane kan'yekiujni'n, kajeyepa ti je 'esiji ka talaja jikiojyi ni jlak, ka sekjane'yi ka tiwenaja'm niwa alenas.

²⁸Siojopa i'nioki iyo'ate ti isiujlie: —Ijiatataja wek 'ni 'Yaka'niona, 'yina siuniwa alenasata, 'yina je iyojliyi pit ti itiujwk'i'ni niwa jikas jijwa'l napo jika'nionas ti iniuk'iji'n ti yi' kiajwe siojopa tejeyits'i ape'e.

²⁹Ti Jesús ipi'ya ti kia'iyo, 'yina iyo'ne 'ate: —Ka jla'm awo wat. Maj ka api, apili japa ase'. Siojo imosik yiji jlaja ase' tajli.

³⁰Sekyi'i ti yama japa i'nioki, siuti 'nes, siupa Jesús iyone ti tajli siupa yiji, ijiate kiak iyo japa jlase' ti 'es.

³¹Sekyi'i ti Jesús yama'aja ti tal Tírojo, ti iniujwap japa ajnat Sidón. Paj ti yiye 'niji jlaja i'niat Galilea, ti yiji japa ajnat jle' iyo'ate “Itijwa'm Sikioye Isi'il”.

³²'Yina sekyi'i ti tikiniejayi siupa i'nio' je tipechi'ni siu'neje ti 'ne'liajliyiji'ni, inip'elisinisi ja Jesús ka jikioye ne'n ape'e.

³³Jesús ijwienjliyiji'n siupa ijioyiji pak i'nio', sekyi'i ti jijwuki 'yutiek'i puwa jik'iot tiojwa'l. Itime ti kiak iyone sekyi'i ti isimayi pa jlats'ilis ti 'yilink'i pa jipajnat pak i'nio'.

³⁴Siuti ti i'yena poliyi, sekyi'i ti jiyel iyoma, iyonayi 'ate pak i'nio' t'ipi: —¡Efata! (Ti iyo 'ate, ¡Ni'najlinitia'm!)

³⁵Pakayi'ne ti 'ajlak'iji'n puwa jik'iot tiojwa'l, siu'neje ti 'yakajak'i ti tamti, lapakawo ti 'es.

³⁶Jesús ijwijla'm papo i'nio' ti iyone'ate: —Ke sijwelanie'e. 'Wanjliyi kiak iyonataja, 'yina je iyoyisjliyi ti ijwilis.

³⁷Lapakawo ti yisi'lietk'i papo i'nio', sekyi'i ti iyoyis'ne 'ate: —¡Ijiat ti 'es wat siu'nie iyoyi, 'yina 'wanjlip'ane ka je impechi'ni pa ti 'yijene pi iyone ti ipichijien'ni, siunie 'ne'lia kiak iyojliyi ti 'yijene ti yamtijie'n!