Read Iyojwa'ja Chorote San Marcos 8 Bible Online

San Marcos 8 - Iyojwa'ja Chorote bible

San Marcos 8

¹Pojompe japa jloma ti yikiajlayi'i papo i'nio' ti initaj ti je pini', pakayi ti inil'liajne'n, 'yina Jesús tane'ni japo t'eyasajnas ti iyone 'ate:

²—Wujwat ti ap'elisi'n 'napo i'nio', kajeyepa ti jika jlomas najapeja p'an ti yiyis ijiap, 'yina 'etsakaja 'neje ti itijwits'i kiwa jikas.

³Siut'itie ka ijliu'ni ka inapi'ni ti inil'liajne'n, ent'a ja ke ineyis ji'wete ka noyik'iji'n 'nayi jikiowe'e, 'yina ti po 'neje napo ti ijiat ti tosk'iye.

⁴Siojopo t'eyasajnas isiujlie ti iyo'ate: —¿Tepat'e jayonaja ka 'yakojnienaja'n, jlam'ne ji'we'en ti laj i'nioye'e 'ni awak'i?

⁵Sekyi'i Jesús i'yasen'ne japo t'eyasajnas ti iyo'ate: —¿Tepa nojwa'm puwa woyejes jilis yi'ase? Isiujlie ti iyo'ate: —Ijwienjli sikio' itij'we times tom'niji.

⁶Sekyi'i ti takajlunieyi ka nek'iji'n papo i'nio', sekyi'i ti yina jikiojyi puwa woyejes ti ijwienjli sikio' itij'we times tom'niji, 'yina jinikanitieyi iwinayi pa Sinia'. Itime ti its'isajaja'n, sekyi'i ti yikiajlayi japo t'eyasajnas ka iwenk'i papo i'nio'.

⁷'Nak nojwaja'm 'neje puwa si'yus jilis, 'yina Jesús kiak iyonjliyi ti jinikanitieyi yikiajle pa Sinia', sekyi'i ti yikiajle japo t'eyasajnas ka iwenk'i papo i'nio'.

⁸No'we papo i'nio' ti ti'yekiujni'n 'yina yip'isi'n. Siojopo t'eyasajnas yamk'i'ni puwa jikas jijwa'al 'wanjle'e ti ijiosa'm puwa jijwa'al, ijwienjli sikio' itij'we times tom'niji puwa tipoyijk'i.

⁹Ijlienayi ka neyi puwa cuatro mil pa nojwaja'm papo i'niojimpe ti ti'yekiujni'n. Sekyi'i Jesús isieja jikiojiamk'i papo i'nio' ti itijwi'l ti iyoyeyi kanek.

¹⁰'Yina tisiojmayisiam'ne japa kasejkana ti jla'yis japo t'eyasajnas ti tejeyis 'niji yi'i japa ajnat jle' iyo'ate Dalmanuta.

¹¹'Yina 'nesa'ni papok Fariséojosjimpe ti ijioyi ja Jesús, ti iniewitisijin'ni ti ijyijlitis ti iyonisi 'ate: —Jejlitkiame kiu' ka'wenkints'e'm paka k'iejliyeyi, 'nakayi ti jake 'yakakiuk ti jijwe'el jitiajleje pa Sinia' ni ajweye iyo.

¹²Jesús jiyel iyom'ne sekyi'i iyo'ne 'ate: —¿Yot'it'iyi'ni siu'napo i'nio' yiji pet siuniwa jlomas ti jwesiejenk'iye ka ti'wenkinaja'm paka k'iejliyeyi paka tiwonaja? Ya'am awo'ate, ja lajak'i paka ti'wenkinaja'm.

¹³Sekyi'i ti tajlayi papoka, tisiojmayeja'm japa kasejkana ti yapilis i'niat ji'wechaja.

¹⁴Siojopo Jesús t'eyasajnas jitiej je wujwa ka intonis pa jlak, 'yina japajata jiwek woye ijwienjli yiji japa kasejkana.

¹⁵Jesús iyone'ate japo t'eyasajnas ti ijliuye: —'Yejne'n, joskiyeyi siunie ijliasat pijia'm niwa woyejes ti tajle napoka Fariséojos, siu'neje na Herodes ni tajle pit.

¹⁶'Yina iyo'ne 'ate japo t'eyasajnas ti ipi'yayis ti kia'iyo: —Lajk'iyi japaka woyeja' japa ka itiunie'ni, it'imina ti kia'iyo.

¹⁷'Yina Jesús 'yijene siupi jitienkiujnieye iyone japo t'eyasajnas, jak je iyoyiji'ni ti iyo 'ate: —¿Yot'iyi'ni ti jiwoyeyi astankiujnieyeja' siunie ti lajk'i pa ka tonie'ni? ¿Jet'i 'najanayi, ka nakaye 'neje ka tejnisiek'i? ¡Ijiate wat ti int'onie!

¹⁸Siuniwa astate poyeta ka 'wenajyi'n, ask'iote kia'iyojli poyeta ka pechiye'ni. ¿Ma astaj wujk'i?

¹⁹Siukia ti awe'nase'm japo ti ayijnies 'najli cinco mil ja nojwaja'm kiwak ijwienjli sikio' itij'we woyejes. ¿Tepa nojwaja'm kiwa jijwosajia'm kiwa jijwa'l 'wanjle'e ti jikiniets'i'ni? Iyo'ate ti isiujlie: —¡Itijwa'm niwa sikioye times tom'niji!

²⁰—Jlampet ti akojniejne'n japo i'nio' cuatro mil ja nojwaja'm kiwa woyejes ijwienjli sikio' itij'we times tom'niji, ¿tepa nojwaja'm kiwa jijwa'l tipoyijk'i siukiwa jijwosats'i kiwa jikas jijwa'l 'wanjle'e? Iyo'ate ti isiujlie: —¡Ijwienjli sikio' itij'we times tom'niji!

²¹Sekyi'i kiak iyone'ni: —¿Je tijnisiek'iyi?

²²Paj ti yiyet'iyispe 'niji yi'i jlaja ajnat jle' iyo'ate Betsaida, pakayi ti tikiniejayiji pa talok ja Jesús, ti inip'elisinisi ja Jesús ka ink'iejts'e.

²³Ijiatjliyi Jesús isim'ne jikio'yi pak talok, sekyi'i ti yamayi kisie'e ti itiajlajni jlaja isi'i. Sekyi'i ti jlats'ilis 'yilinayik'i ape'e puwa jitiete, siu'neje ti jikioye yi'n ape'e puwa jitiete sekyi'i ti iyonayi 'ate ti i'yase'n: —¿Mi jwamjla'a ti ji'wejne'n?

²⁴'Yina ijyijlitayi ti i'yen ts'iji, sekyi'i iyo'ne 'ate: —A'wenatak'i'ni jiwek napo i'nio' 'yina ti je ijiate ka 'nakaja, iyo'ate niwa a'la' napo i'nio', ti t'iskiunk'iji'n.

²⁵Sekyi'i ti yikiajlayi'iji ti jikio' yi'n ape'e puwa jitiete, 'yina sekyi'i ti 'esieyiji ti i'yen ts'iji jitiej tojwak'i. 'Yina je pa iyoye 'ate ti je ijiat ka 'nakaj siupuwa ti i'yenk'i'ni, lapakawo ti 'es pa i'nio'.

²⁶Jesús ijliu'ne ka napi, sekyi'i iyo'ne 'ate: —Maj ti ja api, 'yina ká apijliamna'a jana isi'.

²⁷Yam'niji kiaka, 'yina Jesús jla'yis japo t'eyasajnas ti ijioyits'i puwa ji'wetis jilis papo i'nio' je tojwape'n siojopa isi' jle' iyo'ate Cesarea de Filipos. Jesús yine 'nayiji ti i'yase'n japo t'eyasajnas ti iyone 'ate: —¿Ten siupa ijwi'il ka yama napo i'nio'?

²⁸Isiujlie ti iyo'ate: —Po' napo i'nio' ti injwe'el ka Juan inajiejnawoye'a'm, ijia napo injwe'el ka ama siupa Elías, po 'neje napo ti injwe'el ka ama siunie, siupapo injwejlanawos t'ipi.

²⁹'Yina Jesús iyo'ne 'ate ti i'yase'n japo t'eyasajnas: —¿Tepi jiwoyeyi pet ti asa'am, siupa jijwela' ka yama? Pedro isiujlieyi jla'am ti iyo'ate: —A'm ti Injwajieti'a'm siunie Sinia' jijliujwanik.

³⁰Jesús ijliuye'ne japo t'eyasajnas ti iyone 'ate: —Ke sijwelanie'e.

³¹Sekyi'i Jesús iyo jika'niyeja' ti ijwijla'm japo t'eyasajnas ti iyone 'ate: —'Yejne'n, siunie I'nio' Jlas je jwela ka je inilayiti. Siunie janwone siunapo i'nio' anechiyasas, siu'neje napo pa'yijis jika anechiyasas, napoka 'neje napo taka'neyasane ni Moisés jika'neyasajnaye, jane'wajasia'm sekjane'yi ka inlanayisna'a. Jlam'ne pet ti jla'm, janejyi puwa jlomas janajapeja sekjane'yi janapiliena'a pijia'm ti jantajli ni a'no'.

³²Jesús ikajanitk'i ta'a k'iye siupa janwo. 'Yina Pedro ti ipi'yaye ti kia'iyo, sekyi'i yamayi kiu wat ts'iji ti ijwienkite'n ti ijliutieje'ni ka kiak je iwoyi.

³³Jesús tejeyi'ni japo t'eyasajnas, sekyi'i ti kiak iyonayi ja Pedro ti isilaja: —¡Sitioniti'n, imosik ti sitiejiejwa! Atankiujnieye je wone 'ate iyo ni jlosik iyone ni Sinia', jiwoyi ni jlosik ni i'nio'.

³⁴Sekyi'i ti tanayi japo t'eyasajnas papoka 'neje jla'am papo i'nio', ti iyone 'ate: —I'nio' ni jane'yi ni jawo kayo 'yiyasanikie', ka jnotieyikiunie'e ts'iji siunie ti jla'm ti itiliaja ka woyi. Ka intejliajana'a jana jika cruz sekjane'yi ka inamana'a ijyik'i.

³⁵Kajeyepa ti siunie janite'en ka kiak tiwonaja ni siunie inilayiti, nak janjla'an pet. Jlam pet siunie ja ke initejna'm ni jiliaye jawoyi, 'yina ti lapakawo ti ya'am ti ijiate ti jat'imina ti iyoyi siunie 'es kawoyi, siu'neje ni inka'niye ti 'es, nak janjwa'a pet.

³⁶¿Ma ja 'esieyi ni ka inkajli niwak wask'i'nelaja yi' ape'e 'ni ajnat, 'yina siuti kiak janwo janetia'n ti jla'am?

³⁷¿Tepat'e jak'ieye 'neje japa intej'we ka inkat'ini jitipe'e ka ji'wasankiye poye?

³⁸I'nio' ni ja'najwelk'i ka sijwe'el, jla'yi ki iyo niwa yamtis jitieyi'i papoka i'nio' ti je isis yiji siu'niwa jlomas awak'i ti iyoyi ni jike', 'yina siunie I'nio' Jlas ti janapimet, ti siupi jit'iuni pi Jinia', siu'neje papo jijliujwajnas poli jlele ti isis ti janamik'i, kiak jawo ja'najwejle.