Read Iyojwa'ja Chorote San Lucas 12 Bible Online

San Lucas 12 - Iyojwa'ja Chorote bible

San Lucas 12

¹Jlampa 'lojwat'ipi papo i'nio', ti initotisiji siupa yiyits'i, jla'm ini'nomajliyis. Jesús iniajnat papo t'eyasajnas ti iyone'ate: —Joskiyeyi napo Fariséojos ti je ijiat pa kanjwelis, ti iyo 'ate ni woyejes ijliasat pijia'm.

²Kajeyepa ti ja lajak'ipa ka je tilienaja ape'e, siunie tijwelata ka tip'ona ape'e. Kia'iyojliyi siunie tijwelata ka tijwekie, ja 'naka'aja pet ape'e.

³Jak je iyoyiji siupuwa asamtis t'ipi ti jlenayiji ni ajnaj, ja tipe'yakiena'a ti janejyi pet ni jloma. Amtis siuniwa ti je jlamite pijia'm, siu'neje ni ti jip'ojna'm ni aka 'wuk kiwet ti jlamti'ni, ja tanajayipe ape'e ti ja tijwela.

⁴“I'lijwas, jajwi'lase'm ti ja ke ijnots'inayi siunapo i'nio' ti ijiate ti 'yijene ti ila'an pa, 'najata wek jla'am ti 'yijene pi iyone ti iliajne'n papo.

⁵'Yejne'n, jajwi'lase'm siunie jla'm ijiate ti ja ajoskiyeyi. Joskiyeyi jla'am siunie 'yijene pi iyone ti jajna'la jana a'wasankiye jla'yi ti jijweye po' ka intateje siunie inlaye 'wet ti laj jlaja, naka ti jlama ijiatayi ka joskiyeyi.

⁶“'Yejne'n niwa ajwejnas jilis, ijwienjli sikio' itij'we niwa tiwena'ni ti timesk'i wek niwa wikijniest'ejes jana laja, je wujwata. 'Yina Sinia' je iyo ka inkiwaliyi'i ka injwanjli japa ka inkama ape'e, jeyi.

⁷Asja ika'm ape'e niwak ajwejnas jilis. Jijwela' ka je 'najane paka wone niwa as'wole, je ijlie'en ti 'yijene pi iyone pa nojwa'm. Ke poye paka woyeyi ka k'iejliyeyi paka je injweyeyi.

⁸“Jajwi'lase'm ti japoye ni janijwejla'm napo i'nio' ti jawo'ate, “Nak akk'i pet ni I'nio' Jlas”, kiak janwo'ojyi pet ni I'nio' Jlas, janjwejla'm napo Sinia' jijliujwajnas poli jlele, kanwoyena'a 'ate, “Ijiate 'nak tal pet siwa'm.”

⁹Jlampet siunie ti ja ke ijweye napo i'nio' janijwejla'm ti jawo'ate, “Siupa Jesús je sitiant'ieje ya'am”, kia'iwoyeyinie'e pet ni I'nio' Jlas, janjwejla'ajme napo Sinia' jijliujwajnas poli jlele, jayoyena 'ate, “'Nak je sitiant'ieje”.

¹⁰“Sinia' jamp'elisi'n jiwek siunie i'nio' ti ji'lij ja ke 'esieyi ni I'nio' Jlas, inetiajnatana'a ni jitis jota iwo. Jlampet ni i'nio' siunie ti ji'lij ja ke 'esieyi pet janak Sinia' jikimet ti 'es, nak Sinia' jlajma ijiatayi ti ja ke imp'elisi'n, ja ke inetiajnat ni jitis iyo.

¹¹“Siuti ja tikinie'ase ti ja ijnokieyiji napo ijnosikis jiwos, ni'ne ka ijnokiji napo anechiyasas, ni'ne ka ijnokieyiji napo i'ye'en napo jitis wus, ká awo jlak'aliye siupa jawo ti ja amti astepe'e, siupa as'lej janojwata'yi.

¹²Je ijiate ka je 'najanayi siunie as'lej janojwata'yi, kajeyepa ti janak Sinia' jikimet ti 'es ti janoye'ase'm ti ja i'neyasana.”

¹³Po' pa i'nio' siupa yit'ijyipi papo i'nio', ti iyone'ate pa Jesús: —Inka'neyasajnawo, jloye wata'a ni isilia ka iwenk'i'm siuniwa wask'i'nelaja isimet pet ti tijnak'i'm.

¹⁴'Yina Jesús isiujlie ti iyo'ate: —'Ni isiecha, je ya'am siunie i'nio' ni i'ye'en napo jitis wus, je yam'neje siunie jikijmaye ti yikiajli'ni napo niwa wask'i'nelaja ti tijna'yik'i.

¹⁵Sekyi'i ti kiak t'ipa iyonayipi papo i'nio': —Joskiyeyi, ká awoye asjlak'aliye ka woye ka'wena' niwa wask'i'nelaja. Je niwaka ka intajle jana in'wasankiye, kan'we'en ni jwajla'a.

¹⁶Sekyi'i ti yamtiyet'iyipi k'iye papo i'nio' siunie ti i'yejnap jiwekie'e pa ti iyo'ate: —Pojompe pa i'nio' inkaja, je jlase' pa jlak ti ilienat'i'yijpe yi'i jla'am pa jika ajnat.

¹⁷Siupa i'nio' itienkiun'ni ti iyo'ate, “¿Tepat'e jayo? Ti lajk'ipa kayi'ne ni yak ti jalie'ne, ti jalisa'n.”

¹⁸Ti itienkiun'ni siupa jawoyi, sekyi'i iyo'ne 'ate, “K'iejliyeyi'ne ti ts'ajane siunie jayoyi. Jalie'nik'ina'a niwa ikapiski, sekjane'yi ka its'iosinitiajamk'ina'a ka yikialtak'ina'a pijia'm, ka ijiosajamna'a ni yak ti jalie'ne, siu'neje niwa isijmatis ijia 'neje.

¹⁹Ka kiak iyoyeyinie'e 'ate, ‘'Esiji, je jlase' 'ni a'we'en ti 'otat, ja 'lojwa puwa najkapis jajnolk'i, ka jiwekie'ejana'a ka no'we. Ja 'yakama ti ja'yekiu'n, jla'yi ti ja i'ya i'niati, siu'neje ti jayo iliakijnieyeja'.”’

²⁰“'Yina Sinia' ijliuyi'ni ti iyo'ate, “¡'Ne'lia'm! Siu'nie ajnaj ja'na'al, siuniwa wask'i'nelaja jlents'e, ¿tempa ja jikimita'?””

²¹Jesús yiyik'i ti kiak t'ipa iyoyeyipi: —Kiak iyo siunie i'nio' ijios niwa jikijmatis siu'neje ni jlak. 'Yina Sinia' naka ti iyone'ate, “Wuj ti p'ijliusie.”

²²Paj ti Jesús kiak t'ipa iyonayipi papo t'eyasajnas, ti iyo'ate: —'Nak ajwe'el ti awo'ate, ká awoye asjlak'aliye, kajeyepa ti jiwoye'ijyi 'ate, “¿Tent'ipa jatiujw?”, siu'neje ti jiwoye 'ate, “¿Tent'ipa ja'yuts'i?”

²³Siojona as'wasankiye laja 'yaka'm ape'e siunie jitiujw. Siunie 'ajwes 'yaka'm pet ape'e siunie jit'iuts'i.

²⁴'Yejne'n, siuniwa t'isiukis je 'wena ka inkawijnajne'n, ni'ne ka inkima ni jlak ka ila'ne. Ka sek ine'yi ka injwosaja'm puwa jikapiskiye paka ipiatatiok t'ejes 'wanjle'e, ni'ne ka niwakaye ipiata jlo', siu'neje niwa ijia inkas, je ti'wena ka poye puwa jikapiskiye. 'Yina jlam jla'am pa Sinia' ti 'yakojniejne'n. ¡'Yejne'n ti asa'am, asja 'yaka'm ape'e niwak ajwejnas!

²⁵Ti asa'am, ¿tepat'i yi'i paka 'najane paka wone ka jwamjla'aja ka injlasate'n pa jlaj yi'i japa ji'wasankiye, ka jla'm inilankine pi jitienkiujnieyeja'?

²⁶Siuti ji'we'en ti je 'yaka'n ka 'najane paka wone ka jwamjla'a ka kia'iwo ka ajlasate'n, ¿yot'iyi'ni ti jla'm jinilankine wek ni ajlak'ali ape'e siuniwa wask'i'nelaja 'wenayi 'neje?

²⁷“'Yejne'n siuniwa a'la' jlokie, je ti'wena ka inkimk'iji'n, ka kia'iwo ka ti'wena ka injlejni'n, 'yina jlam yamjli siupi iyo ti ja wakajla. Siupa anechiyasjimpe Salomón, ijiate je niliajayeta puwa ji'wuye 'yuts'iji'n, 'yina je ijlien'ni niwa a'la' jlokie.

²⁸Jlajmiliet ti Sinia' kiak iyone ti ilisa'n niwa a'la' jlokie yi' ojwe 'nakayi, je 'esiji ti tijwosajatak isia'm jana inka'we, sekyi'i ti nojwayik'iji'n ti jwat yi'i. Ti asa'am jla'm ijiate ti ja wujwa ti jan'ye'nase'm, janwe'nase'm siunie ja'wuyejyi. ¿Yot'iyi'ni ti je ijiat ka astaj womayiji?

²⁹“Ke injlak'alayeyijin'ni siupa jatowa, jla'yi siupa ja'yayejyi.

³⁰'Yina je 'wena puwa ka iwoyi jijliak'aliye napo i'nio' yi' ape'e 'ni ajnat. Siunie Asna' 'yijene ta'a pi iyone siunie jisitiana'.

³¹Astankiujnieye siunie 'es amitape aswa'am, ti astaj ja enaye 'ate naka Sinia' jika anechijiayas, 'nakayijna'a pet ti ja'wena' 'niwaka.

³²“Nijweyitie, asa'am ti iliajwasts'ase'm siuniwa 'wolepo' ti je in'lojwa, siunie Asna' wuj ti ipini'yase'm janwojwana anechiyasisa' ka awayetiejenie'e ni jika anechijiayas pet.

³³Wena'ni siuniwa ji'wena askijmatis. Siojona ja lajaye ka wenajiamk'ina'a pet siunapo i'nio' p'ijliusis. Enajyits'i niwa aselijyis siuniwa ji'niayi itio'yi, akijmatis ti ja ke paja ka netia'n ts'ijiye poliyi.

³⁴Siuniwa yi'i niwa askijmatis, siunie askiowe sek yi'i pet.

³⁵“Niwakajlanitie, et'iajap ni a'wu', ke ena'yate jana aska kates ka 'no'me.

³⁶Niwonayi 'ate siunapo inkawos ti inijijwijyisink'iye ni jika anechiyas, ti yapilieta ti tajle jana inlakijnieye. Jak je iyoyiji ti yiyetaje ni 'wuk kiwet, i'yasayi papo jikawos, ka kia'iwo ka jwatajayi'i'ni, ta'a ti 'yajlinitis k'iye.

³⁷Wuj wata'a ti tipejnik'i siunapo inkawos ti je imiak'iji'n ti 'nesata ni anechiyas. Ijiatk'i siunie ajwe'lase'm, 'yejne'n, je jwel ka anechiyas je intane, jan'yase ka intaye ape'e japa inak totieja ape'e, je jwel ka je jlama jla'am ti jansajiamk'i k'iye pi jlak puwa jika teti'l siuti jan'yekiujni'n.

³⁸Jikiowe 'esi'i'ni siunapo ti iliat ilia'm ni jika anechiyas ti 'nesata pa ajnaj iyo, ni'ne ti 'nes ti ajnaj kiowe, ni'ne ti 'nes ti jloma iniu ts'iji, kajeyepa ti tipejnik'i ti jlamis.

³⁹“'Yejne'n, siunie jika'niona jana 'wuk, ka 'najane paka wone ti yiyetaja siunie jankajlan kiajwe jana ji'wuk, jijwel ka inmata'a kajeyepa ti jan'yena jla'yi ti jan'yejnink'iye.

⁴⁰Kiak janiwonayi pet ti asa'am, niwakajlanitie, kajeyepa ti ja'nes ni I'nio' Jlas, ja ke titijnisiejenk'iye ka 'nesta.”

⁴¹Yiyik'i wek pa Jesús ti kia'iyo, Pedro i'yasat'ijyimpe ti iyo'ate: —'Yaka'niona, siunie jlamtiyi, ¿samkatat'e ti jijniejietts'e'm ti kasjwe'el, ni'ne ka pajlata napo i'nio' ti jijwe'el?

⁴²Saka'niona isiujlie ti iyo'ate: —¿Tempi i'nio' ti inkawo ti 'es jla'yi ti jlosik yiji'ni? 'Naka ni jika anechiyas jan'yenkina siunapo ijia jikawos 'neje ji'wet'e, siupa jloma ti lajata'yise pa anechiyas, ti jlam ti tekiajlaja kan'yena papo ijia, jak je iyoyiji yiyi siojopa jloma tetijnaja kanwe'en pi inak, sekyi'i iwinajamk'i papo ijia.

⁴³'Esiet'itie pet siunie tiwonaja siunie i'nio' ti jika anechiyas i'wi'in ti 'nesata, kajeyepa ti iyoyi siupa ji'lij pa jika anechiyas.

⁴⁴Ijiatk'i siunie jayo ti naka siunie inkawo ti 'es, je jwel ka anechiyas je inekiajle wikie'eyi siuniwa jikijmatis ji'wet'e kan'yenkina.

⁴⁵Jlam'ne pet ka kiak iniwone nak inkawo, ka intelajank'iye pi jika anechiyas, sekyi'i ti je 'esie kan'yena papo jikawos, jikawos pet ti ti'yenkinaja, wikie'eyi siu'neje papo asejnia, wuj ti iliaki papo jikawos pi iyone. 'Yakamaja ti ti'yekiu'n jla'yi ti i'ya', ijiuma pa i'nio'.

⁴⁶'Yejne'n, yit'iyi siojopa jloma ti isiwaliyiji'ni ti joyeta ka 'nes pa anechiyas, jla'yi ti je 'yijene siojopa inetitinki yiyi siojopa ja'nesi. Pakayi'ne ti 'nesa, wuj ti isie' pa jikawo, tajakie'ni pa i'nio', ijiutieyi siunapo i'nio' kia'iyo ti je isis ti kakiujnietas.

⁴⁷“Siunie i'nio' inkawo, ti jlam ti 'yijenataja siunie jika anechiyas iyo ka woyi, 'yina ti je iniwakajlanit jla'yi ti je its'iuye pa tiwonataja, nak wuj ti ja tisiejek'i ti ja tajak'ni.

⁴⁸Jlampet siunie ti je 'yijene paka wone, 'yina iyoyi ni je 'es, nak ja ke ijiatayiji ka tisiejek'i. Siunie wuj t'ipi japa tiwenaja'm, kiak jawo'ojyi pet ja wujwa japa jat'ajlaja. Siunie ti wuj ti intaj tiwomaja, nak ijiate ti ja talaskinaja pet.”

⁴⁹Jesús yine 'neje ape'e ti iyo'ate: —Ti ana'am, aname ajnat'e ni jwat. ¡Ka iyojlit'iyipa ka ink'a pijia'm ta'a!

⁵⁰Ka pajatana'a jayiyi siunie ti ja ijiatayi ti ja ke 'esie, 'naka 'ni siu'nie silia'an, jla'yi ti akjliyi.

⁵¹¿Jijwelat'e ka inkama 'napo i'nio' yi'ne ajnat'e siuti ana'am? Jeyi, siuti a'nes atajietk'i wita'm 'napo i'nio'.

⁵²Siu'nie jloma, jla'yi ti jlam yamjliyi ts'ijiye, ti japoye napo i'nio' siunapo ijwienjli 'ni sikio' itij'we napo ji'wet jlele jla'am jantats'i wita'm. Ja najapeja ti jlamis janiwo'om, ti jantayits'i ilia'm siunapo times, siunapo times jantayena'aja pet ilia'm siunapo najape.

⁵³Siunie jinia' janta pet ilia'm ni jlas, siunie jlas jantayena'aja pet ilia'm ni jinia'. Jlampet siojona asejnia janta pet ilia'm jana jlase', siojona jlase' jantayena'aja pet ilia'm jana jlet. Siojona jikant'e jana i'nioki janta pet ilia'm jana jijwelis, siojona jijwelis jantayena'aja pet ilia'm jana jikant'e.”

⁵⁴Jesús iyonat'iyi'ijijpe 'ate papo i'nio': —Ti ji'wena'yi ilia'm jana poli 'niji ijio'we ni kilie', jiwoye'ate, “Jantomet'ni”, ijiatjliyi tonamet.

⁵⁵Jlampet ti iniwukieta jiwoye'ijyi 'ate, “Ja kio'yoyeje'n”, ka jla'm awoyeyi wata'a.[5]

⁵⁶¡Ijnoski'lanajyi'n! Ijiate 'najanayi ti ji'yena' siuniwa k'iejliyi ti 'lan poliyi, jla'yi ti 'najanayi pi jiwonayi siuniwa yi' pet ajnat'e, ¿yot'iyi'ni ka je 'najanayi paka wonayi siuniwa wask'i'nelaja siunie jawo niwa jlomas atayeje?

⁵⁷“¿Yot'iyi'ni ti je ni'ye'en a'am ka woyi ni siunie 'es?

⁵⁸Siunie ates poyi ilia'm ti janek'ia ti jajnoyiji siunapo jiwos pet ti kia'iyoyetaja, siuti je inekialjli'ijyi kiojyi napoka, jlam woni'ni 'ate ka aninekiajli wita'm ni akiecha, ka'yena' asa'am siunie jiwoyeyi. Siunie i'yena napo jitis wus ti ja ajyi kiojyi sekjane'yi ka inekiajlayinie'e pet napo ijiawos ka ijiatayijijna'a ka ajyi jana insat jiwe.

⁵⁹Awo'ate, ja ke ano kisie'e 'wenajliyijna'a ka ajwel ka akat'i'n atepe'e, paj ka nojwa'ana wekie'e japa aka wikiniet'aj.”