Read Iyojwa'ja Chorote San Lucas 14 Bible Online

San Lucas 14 - Iyojwa'ja Chorote bible

San Lucas 14

¹Siojopa jloma ti i'nio 'wanjlijyi'n, Jesús ijio 'wete siupa Fariseo ti anechiyas t'ipi, ti isijwane ti ti'yekiu'n. Jlam'ne papo ijia i'yen'ni.

²'Yina sekyi'i 'neje siupa i'nio' t'ipi ti t'ikie'ni jitieyi'i pa Jesús.

³Jesús sekyi'i i'yasat'ijyimpe siupapo Fariséojos, siu'neje papo taka'neyasane pet siupa Moisés jika'neyasajnaye, ti iyo'ate: —¿Mi 'esiji ka tenajaje siojona jloma ti i'nio 'wanjlijyi'n ka tijwajieta pa, ni'ne ka jeye?

⁴'Yina lajk'ipa ka inkiujlie. Yamat'iyipi pak i'nio' ti je 'es, sekyi'i ijwiejiet'ne, ijliuyet'iyijpe ka nek.

⁵Sekyi'i ti kiak t'ipa iyonayijipi papo Fariséojos: —¿Tepat'e yi'i ti asa'am, ti jlas pa ni'ne ti jiliajwa wakia siunie inkijmayewo, ti iniuk'i isia'm pa kiawe, ti jloma ti i'nio 'wanjlijyi'n, ma je t'ositieje ka inton kisie'e?

⁶Lajk'ipa ka 'najane paka wone ka inkiujlie pet.

⁷Jesús ti i'winayi siupapo i'nio' 'yaka ti ti'yasajets'i, ti iyoyeyi kan'yekiujni'n, ti tijnayits'i siupuwa in'wetis isis ji'wetis papo i'nio' anechiyasas, kiak t'ipa iyonayijipi:

⁸—Siuti tijwa'yiyetapa ti i'yajts'a, ká amite siuniwa in'wetis ti isis, ji'wet napo i'nio' anechiyasas, 'lojwinie'e ka poye pa siunie ti ijiate ti janka'm atepe'e ti anechiyas pet.

⁹Jajno'wa siunie i'yajts'ase ka joyeyi japa jiliakijnieye, ka woyena'a 'ate, “Joskilia'm ni akiecha ji'wet jana jle'yiji'n.” Sekjane'yi ka wujwana'a ka i'najwel'ni, ka akiena'a ti ja ajyijyi'n jlaja papo, yi'i puwa in'wetis tome jlaja.

¹⁰“'Yejne'n, siuti japoye pa jan'yajts'a ka joyi japa jiliakijnieye, 'esijyi ka a'yiji'n siuniwa in'wetis tome jlaja. 'Nakayeyijna'a jana'am siunie ti i'yajts'a ka woyena'a 'ate, “'Ni isiecha, we'eje'n siuniwa in'wetis inia'an.” 'Nakayijna'a jan'we'en siunapo jlejiape'n ti jitie'yi jana inak totieja ape'e ti ijiate kiak jiwo anechiyasts'a'm pet.

¹¹Kiak iyo siunie i'nio' ti initonit, ja ke tiwok lajaye, jlampet siunie i'nio' ti je initonit, nak ja wujwa pet ti ja tiwok lajaye.

¹²Sekyi'i pa Jesús iyonat'iyijpe 'ate pak siupa tane papo ijia ka ijnoyi japa jiliakijnieye: —Siuti jikapijna'n, ká a'yase napo ajajnajwas, ni'ne ka napokaye a'wetijwas, siunapo a'm ijia, siunapo jwajla'a i'wi'in. Kajeyepa ti kiak janwo'na pet ka inkapijnantajna'a pet kanlesantajasi japa jiliakijnieye, ka ineniejenie'e pet siunie jiwone ti jikojniejne'n.

¹³Siuti jalesane jana alakijnieye, ane siunapo i'nio' p'ijliusis, siunapo laj jweyeja', siunapo je t'ojni'n, siu'neje napo talojo'.

¹⁴'Nakayeyijna'a ka Sinia' inwe'nase'm siunie 'es jikap'ijliuskiye, kajeyepa ti ja ke inkajlisi ka kiak inwo'nase pet ka inejni siunie jiwone, sekjane'yi ti ja'we'en janak akaja siupa jloma ka inotiek'i kisie'e siunapo isis jla'am ti ja intajli ni a'no' ti janapits'i pijia'm.

¹⁵Ti its'iuyesi'ni siupapo teje'yi ape'e japa inak totieja ape'e, ijwienjli'ne siupa tamti ti iyone 'ate pa Jesús: —¡Ja wujwa ni nikanitieyeja' siunapo i'nio' ts'iji yi'i ni Sinia' jika anechijiayas ti janikijwa'n!

¹⁶Jesús iyone'ne 'ate paka ti ipi'yayeyi ti kia'iyo: —Pojompe pa i'nio' ti iyo liakijnieyeja', ka kia'iwo ka lakiyi'i pa jipenik ti ilisane, kajeyepa ti 'loj papo i'nio' ijliuye ka ijnoye ti iyo liakijnieyeja'.

¹⁷Ti yiyet'iyipi ti iyo kan'yekiujni'n, ijliuyet'ipi pa jikawo ka injwele ti wakal pa impenik siupapo i'yasits'i, ti iyo'ate, “'Esiji, wakal. Naja'ni.”

¹⁸'Yina wikie'eyi ti ijwil ka je intemisi pi k'iejliyi ti jla'm ininenits'i'ni wekie'e. Siupa iniajnat ti ijiotaja iyoyet'ipi 'ate, “Anip'elisi'na 'ni isiecha, ká atajlatk'imna'a ti je akajli ka yik. Je pajk'iyi ti ateme ti aki ja iwiesok, jota'yene.”

¹⁹Siupa jikiecha iyo jla'am 'ate, “Anip'elisi'na 'ni isiecha, ká atajlatk'imna'a ti je akajli ka yik. Jawaka jla'am jawa wakiajas inkijmayewos, aki 'neye, k'iejliyi jota ijyijlite.”

²⁰Siupi jikiecha iyo'ate, “Je pajk'iyi ti ajwa'yi, it'imina ti je akajli ka yik.”

²¹“Ijiatjliyi, yapi'ni wek siupa inkawo ti ijwile pa jika anechiyas iyo papo ijiotajats'i. Sekyi'i jwesie'ne pa anechiyas, iyo'ne 'ate ti ijwijla'm pa jikawo, “Maj ka ajloni niwa isi'il jika'wulis siuniwa wus, siu'neje niwa sajmela'aja'n, niwak nok'i ka akk'i'ni siunapo i'nio' p'ijliusis, siunapo laj jweyeja', siunapo je t'ojni'n, siu'neje napo talojo'.”

²²Yam'ne siupa inkawo, 'yina paj ti 'nesat'ipi, ijwilayi pa jika anechiyas ti iyo'ate, “Ateme, 'ni 'yaka anechiyas, siunie jijliuk'i'm ka iyoyi, 'yina mawata'a je ijlien'ni jana 'wuk.”

²³Siupa jika anechiyas isiujlie ti iyo'ate, “Majkiunie'e, ekiajli'ni ni 'la'an, jalas'ni paka 'wenta ka nam'ne ka ijnok'i, ijiatjliyijna'a ka impoyi 'ni i'wit.

²⁴Ajwe'lase'm ti siunapo ti anajnatta ti antajats'i ja lajak'iyi paka isijwane.”

²⁵'Loj papo i'nio' yamk'i pa Jesús; tejeyet'ipi ilia'm, sekyi'i iyone'ne 'ate:

²⁶—I'nio' ni jajnok'i ja ke inkajli ka iyo 'yiyasanikie' siuti jlemijnaye ja ke inka'm ape'e napo jiniewot iyone ti yimi'n, ti ja semi'n pet. Iyone ti yimi'n jana jik'iemjla, siunapo jilis, siunapo ji'niayi ijwienjliyi, ayinie ni'ne ti janaka asejnia, jla'yi ti jla'am siunie iyo ti ininemi'n.

²⁷Siunie i'nio' ja ke intejlia jana jika cruz, ka ina'm ijyik'i, kia'iyojliyi nak ja ke ikajli ka inwo 'yiyasanikie'.

²⁸'Yejne'n, siuti asa'am ti japoye pa janlesane siojona 'wuk ti toj pijia'm, ¿jot'itie ka je inajnat ka intankiun'ni, kan'ye'en siupa jak'ieye japa jantejwe'e ka wakajla japa 'wuk?

²⁹Ka kiak je inwone, kanjwelat'itie kankima, jan'we'en ti ja ke ijnoj'li ape'e siojopa itiejieta, janleyi ti janlesane, ijia inlakiyeta,

³⁰ka woyet'itie 'ate, “'Yejne'n pet siunie i'nio' pajk'ipe ti isimataja jana 'wuk, mam ka inteme.”

³¹“Ni'ne ka poye siunie anechiyas ti janek'ilia'm siupa jikojwa ti anechiyas 'neje, ti janilajne'n, kiak iyojliyi, ¿jot'itie ka jitiej je inene'ni 'ate, ti jan'ye'en papo jika tokis ti diez mil pa nojwaja'm, ka intayi pa jikiecha ti jika tokis 'loj jla'am, veinte mil siupa nojwaja'm, ti name?

³²Je int'ayeyiji'n siunie jawo, siupa anechiyas janjlo' papo jikawos, ti i'wi'in ti tojjli'ijyi ilia'm papo jitiejiejwas, ka neki pi ji'lij pa jika anechiyas ti jawo'ate, “¿Tepat'e ka iyotaja ka ikajmak 'nakayi?

³³“Kiak iyo ni i'nio' ti je ijiut 'niji siuniwa i'wi'in, ja ke ikajli ka inwo 'yiyasanikie'.

³⁴“Siunie sijwonie 'es ti jitiusi je no'we,[7] jlam'ne pet ti nojwata'a, lajk'iyi paka tiwonaja ka inapi'li ka tosiyeje'ijyi.

³⁵Ka najataja wek ni ajnat ka 'esieye pet, ka k'iejliyeyi 'neje pa. Lajk'ipa jikiechaye ka tiwonaja, ja titietaja. “Siuti ask'iot tiojwa'l po', k'iuyeyi 'naka.”