Read Iyojwa'ja Chorote San Lucas 16 Bible Online

San Lucas 16 - Iyojwa'ja Chorote bible

San Lucas 16

¹Jesús ijwilat'ijiampe'eje siu'nie japo t'eyasajnas, ti iyo'ate: —Pojompe pa i'nio' jwajla'a i'wi'in, jikawo pa po'. Ijia takajwejlani'ni ti iyo'ate, “Ijiuski'lan wata'a ni akawo, siojona jlekiajle jlam pak iyonits'i'ni.”

²Jika anechiyas tani'ni pak i'nio', ijwijlam'ne ti iyo'ate, “Po' japo takajwejlank'i'ni ti ijwil je 'es ka akijme'n. 'Nakayi awojonk'iye ka 'wenkink'i'm siupa aka jlomas ji'wet ti jikimataja'n, sek jla'a ti jikijmen'nijiap.”

³“Itienkiun'ni'ne siupa inkawo ti iyo'ate, “¿Tepat'e jayo ti ja tilinkinak'i ni isijmaye? Ti laja ijwiyeja' ka ilisane paka iwiesokie, ka ikawijna'n, jla'yi ti ts'ajwel ka 'yelk'i'ni papo, ka tiwok i'wiejieta'.”

⁴Ti itienkiun'ni sekyi'i iyo'ne 'ate, “Kiakp'an janiwoninie'e, 'yina 'wanjliyi ka 'yaka anechiyas sot kisie'e, japoye'eje papo janki'm ijyilia'm ka iyotajanna'aja isijma'weta'.”

⁵Sekyi'i ti tanat'ik'i'nijpe siupapo jikapia' yiyits'i pa jika anechiyas, ijwienjli'ni pa tane paj ti nojwat'i'yijpe. Sekyi'i siupa iniajnat ti i'yase'n iyone'ne 'ate, “¿Tepi k'ie japa akapia' yiyi ni 'yaka anechiyas?”

⁶Isiujlie ti iyo'ate, “Tres mil lítrojos pa impe' pa 'yakapia'.” Sekyi'i siupa inkawo iwijnam'ne pa imp'esinik tejeye pa jikapia' pa jikiecha ti iyo'ate, “Siu'nie jip'esinik tejeye jakia akapia'. 'Yejne'n, 'nakayi maj weje'n jlam woni'ni 'ate ka alesane pa jikiechaye mil quinientos jiwekie'e japa ja 'ete'e.”

⁷Itime ti i'yasayi'iji pi jikiecha, ti iyo'ate, “¿Tepi jiwo pet a'am? ¿Tejnapa akapia' yiyi ni 'yaka anechiyas?” Isiujlie ti iyo'ate, “Veinte mil kílojos pa ipiatatiok t'ejes 'wanjle'e japa 'yakapia'.” Sekyi'i iwijnam'ne pa imp'esinik tejeye pa jikapia' pa jikiecha ti iyo'ate dieciseis mil jiwekie'aja.

⁸“Sekyi'i iyo'ne 'ate pa anechiyas, ti i'wi'in pa jikawo ti 'yijen jlosiki, “Siunie i'nio' ti ijiuski'la'n 'yijen ji'niayiji siunie jawo ka 'esieyi papo ijia jla'yi ti jla'am”.” Jesús kiak iyo'ni: —'Wanjliyi ijiate, napo i'nio' ti ajnat jlele pet 'yijejne'n, jak je iyoyiji ti i'ye'en siunie iyo ni jikijmatis 'ne ajnat'e 'yaka'm ape'e pet siunapo yiji jana 'esi.

⁹Jayo'nase 'ate, 'esiji ti jikienayi niwak jikijmatis pet ni ajnat ni je 'es, ja'nakayeyijna'a ti japoye napo asjajnajwasa', 'wanjliyijna'ape ka no'we niwa askijmatis 'ne ajnat'e, 'yina ja 'ajla ask'ioye ts'iji yi'i niwa 'wukiu'ul siuniwa je paj ka netia'n.

¹⁰I'nio' ni ilisaniji ni siunie jwamjla'a ti je tikiwitaja ni i'nio', kiak janwone ni siunie wuj ja'notatiji. Jlampet siunie ti je 'yotatiji ni jwamjla'a ti je tikiwitataja, kiak jawone ni wuj ja ke 'notatiji.

¹¹Siuti kia'iyo ti je lisaniji siuniwa wask'i'nelaja yi' ajnat'e ti je 'es, ¿tempa jitiej jawo'ma'm ka poye siuniwa akijmatis ti ijiate jla'am ti laj jlaja?

¹²Siuti je lisaniji siunie ti je akimet, ¿tempa janwe'na'm siunie akimitayi?

¹³“Je ti'wena wek napo inkawos ka ne'yi paka intemisiete papo jika anechiyasas, kajeyepa ti janjwanjli siupa ja ne'waja'm janjwanjli siupa janemi'n, siu'neje ti janleyi pa janjwanjli, janjwanjli'ne siupa ja ke intajlap. Je 'najanayi paka woyeyi ka ijiatayiji ka awoye aska'nionaja pa Sinia', lapawo ti jlemina' niwak wask'i'nelaja askijmatis ti ji'wena'.”

¹⁴Siupapo Fariséojos ti ipi'yayisie pa Jesús ti kia'iyo, iliakiyis'ne, lapawo ti ijyiwiteje ti papoka janajata jla'am ti 'yuyits'i jana wikiniet'aj.

¹⁵'Yina kiak t'ipa iyonayipi: —Asa'am ti jijwela' insisie jitieyi'i napo i'nio', 'yina mejla'ala ka Sinia' je 'najane paka wone niwa askiojwa'l. Kajeyepa siunie ijiunit napo i'nio', nak Sinia' iwit'iane.

¹⁶“Siunie Moisés jika'neyasajnaye, siu'neje niwa jilisajna' t'ipi papo injwejlanawos, laja po' yiyi pet siunie yi'i ni Juan inajiejnawo. Sektajlap'e ti tiwok jika'niyeja' napo i'nio' ni Sinia' jika anechijiayas, 'yina wikie'eyi ti ini'netisi ti iyo ka 'noyisi.

¹⁷“Nak je istieyiji ni poli jla'yi na ajnat kanleyi ka ti'wena, jlam'ne siunie Moisés jika'neyasajnaye siojona jikajwukis ijwienjli ja nak istieyiji'ni ka je inek'i.

¹⁸“Siuti po' ni i'nio' ti ili'ni jana jik'iemjla, sekyi'i yiyi jana jikiecha, yija'm siunie jimawo, ti iliaki ni iyo siunie ilisaniji ti tijwa'yits'iji'n. Kia'iyojliyi ti po' siunie yiyi siojona asejnia ti pajk'i ti takalajan'ni, kia'iyo yija'm siunie jimawo, ti iliaki siunie iyo ti ilisaniji ti tijwa'yits'iji'n.”

¹⁹Jesús itiujmat ape'e siu'nie ti taka'neyasa'n, ti iyo'ate: —Pojompe pa i'nio' inkaje', ka kia'iwo ka jiniliajaye siupuwa lotakijnies iyo 'wuyeye, wikie'eyi puwa jlomas ti iyo'ni jiliakijnieyeja', kia'iyojliyi ka wo'ate ka jiniliakiye siojopa jiliakijnieye ti ilisanataja.

²⁰Kia'iyo pojompe'eje pa i'nio' wuj ti p'ijliusie, jle' iyo'ate Lázaro, je pini' puwa jiwatis ijiok'i'ni, yijin'ni ts'e yi'i pa jika 'wuk kiwet pa i'nio' inkaje',

²¹kajeyepa ti iyotaja ka intojw siupuwa jikas jijwa'al siupuwa iniuk'ijin'ni ti tal ape'e japa jlak ijiut'ni ape'e. Jlam 'niwakajlit'ipi pet niwa alenas ti iniep'uyits'i puwa jiwatis pi i'nio'.

²²“Yit'iyipe japa jloma ti 'yalat'ipi pak p'ijliusie, siupapo injlojwajnas poli jlele nami'ni ti ijioyiji pa Abraham ti yi'i pa Sinia' ji'wet. Siupa i'nio' inkaje' ti 'yalat'ipi pet, 'yina titijik'ne k'iye.

²³Ijioyi siupa ijio'we'ni napo 'yajle'n, inlaye 'wet wuj ti jlajlas po' pa i'nio'. Tojwe pa yi'i ti i'wine pa Abraham, ti jitiej yikiajlat'ipi pijia'm, ti yijap pa Lázaro.

²⁴'Yina 'yakets'iyet'ijiappe ti tan'ni, ti tane'ni pa Abraham, ti iyo'ate, “¡Atajla'm Abraham, sip'elisin wata'a! ¡Jloye ni Lázaro ka 'notia'm ni i'niat jana jijwuki jlase' jlaj, ka namik'i kants'atitk'i 'ni ipiajnat, je siliayi siu'nie jwat ti ajyi!”

²⁵Abraham isiujli ti iyo'ate, “Yas, atajkiamkiu' wunitk'i, ti in'wasa'n wujwat ti 'es kajeyepa ti jwajla'a je sitia'n. Jlampet ni Lázaro wuj ti je 'espe pet ni yiyi. 'Yejne'n siuti 'nak yi'i 'yakama, tijwajyi siukia jiwet'ia ti inilayiti, jlampet ti a'am jlejyi ni alaye.

²⁶'Wanjliyi po' siunie tom selia'm ti je jlase' isajk'i, je i'yaka'n nakaja paka poye paka 'nak intaj'le ka ijno'wase, kia'iyojliyi pet paka poye paka nak intajli ka jnots'e.

²⁷“Sekyi'i siupa i'nio' inkaje' iyo'ne 'ate, “Atajla'm Abraham, wuj ti anip'elisi'na, ka ajlo' ni Lázaro ts'iji ji'wete ja papa,

²⁸ijwienjli sikio' itij'we japo i'niayi ijwienjliyi sekyi'i, japoka'ne japo ka 'esieyiji ka injloye'ni ka 'najanisi pet ti je 'esiji ka 'nak ijnoyits'i, siu'nie ji'wet 'ni inlaye.

²⁹'Yina Abraham isiujli ti iyo'ate, “Jla'm ijiattaja ka lajak'ipa ka neyisi siuniwa ilisant'iyijpe pa Moisés, siu'neje niwa jilisajnat'ipi papo injwejlanawos. ¡'Esiji kank'iuye siunie iyoyi!”

³⁰Iyo'ne 'ate pak i'nio', “Ijiatataja wek atajla'm Abraham, siuka poye pa i'nio' ka inapi pijia'm ka intal a'noyi ka ijnoyi, ininekialtaja'ni wek.”

³¹Abraham jla'm iyojlit'ipi 'ate, “Siuti je iyo kank'iuyisie pa Moisés, ka pokaye 'neje wek papo injwejlanawos t'ipi, 'wanjliyi ka poye pa i'nioye ka inapi pijia'm ka intal a'noyi, ja ke ink'iuyisie”.”