Read Iyojwa'ja Chorote San Lucas 17 Bible Online

San Lucas 17 - Iyojwa'ja Chorote bible

San Lucas 17

¹Jesús iyonat'iyijpe 'ate japo t'eyasajnas: —Ja ke lajak'ipa siupa jant'emi'nase ka awoyeyi ni ake', 'yina awo'ate, ¡wuj wata'a ti ja p'ijliusieja naka ni siunie ti itiojna'm napo ijia ni je 'es!

²Ja 'esieyiji siuka kiak tiwonataja ta'a, ka tilie'nitie ji'woyi jana sisaj siojona kiojieti. Ka je i'we'en ape'e siunie jiliayeja' ts'ijiye, sekjane'yi ka titietajayijamna'a ni i'niat lajlik'i, ka kiak iwotajanie'e ka intojna'm ni jike' pa janjwanjli siu'napo sajmela'aja'n.

³Siuti kia'iyo, ¡Joskiyeyi! “Siunie akiecha ti jane'na'm ni je 'es, jloye'ni. Siuti jantant'ieje ti je 'es ni iyo'na jla'yi ti ilik'i, netiajnat siuni iyo'na, p'elisi'n.

⁴'Wanjliyi ka ijwienjli sikio' itij'we times tom'nijijayiji'ni ka kiak iwo'naja, ka ine'na'm ni je 'es, ka intejwik'i japa jlomaye, 'yina jajno'wa'ni ti janwo'ate, “Itis po' ajelia'm, alek'i”, paj ka neyeyipi jana ijwienjli sikio' itij'we times tom'niji ti janinekial'ni, 'esijyi ka netiajnat ni jitis iyo, p'elisi'n.

⁵Siojopo injlojwajnas i'yasat'iyisijimpe pa Saka'niona ti iyoyits'i 'ate: —Womeje sik'ioye ni sitienkiujnieye ti 'es ka wents'e'm.

⁶Saka'niona isiujlie ti iyo'ate: —Ka poye siunie astankiujnieye ni 'es 'wanjlit'itie ka wo'ate jana jlojlase' jana mostaza ti samjlie'e, je jwela ka je akajlajyi ka wonayi 'ate ka ne'yi japa a'laye, “Taj'le ni jle'yi, jlase ni i'niat lajlik'i”, siojona a'la' jana jlamti'yi jank'iu'wa'm ni jiwone.

⁷Siuti asa'am ti po' ni askawo ti k'iejli 'nes ti tal awasoki, ti iliyetaja ti isijme'n ti iwiets'ilat pijia'm ni ajnat, ni'ne ti i'yenk'i puwa aslajwas, ¿ma jawonayi 'ate ti ja'yasayi, “Weje'n, 'yekiu'n”?

⁸Kiak ja ká awone, 'wenajliyi ti jawone'ate, “Nisiamaja'ni ka 'otate paka tiujw, ja teme ka atoniek'inie'e, niwakajlanit ka 'yenk'i'm siuti ja'yekiu'n jla'yi ti ja'yaje pa k'iejliyi. Ja timeje ka jiwekie'ajana'a pet ka 'yekiu'n ti a'am”.

⁹Ka pakaye 'neje wek ka anikanitiejeye awejna'm pa akawo ti itimataja siunie jikijmaye ti isimataja'n ak'ioye.

¹⁰“Kiak jiwoyeyi ti asa'am ti Sinia' jikawosts'ase'm. Ti jitimayetaja ni askijmaye ni Sinia' ijliuye'ase'm, ka kiak awoyeyipi 'ate, “Sinia' jikawosts'e'm jiwek. Siunie tijliukits'e'm ka iyoki, awoki, lajk'ipa jikiechaye”.”

¹¹Jesús yama'aja ti ijio 'niji yi'i jlaja Jerusalén, jijwalk'i jawak ajnatis Samaria siu'neje jlaja Galilea.

¹²Ti yiyet'iyipi siupuwa isi'il jilis ji'wetis t'ipi papo i'nio', sek taj'le siupapo i'nio' inkiso'l jitio' yi'ik'i, siupapo itijwa'm niwa sikioye ti yisitis k'iye. Tojwe siupa takasitisijyi'n.

¹³Tank'i wita'm ti i'yasisk'i'ni, ti iyo'ate: —¡Inka'neyasajnawo Jesús, kasp'elisijne'n wata'a!

¹⁴Jesús ti i'winat'iyipi, ijliuye'ni ti iyone'ate: —Maye'ni, ni'wenkinayi napo pa'yijis. Yamat'iyis'nijpe. Pa yit'iyits'ipe 'nayiji ti isisiet'ipi, 'yina netian'ne siupuwa ijiok'i'ni jiwatis.

¹⁵Ijwienjli'ne siupa ti ini'yenat'ipi, ti netia'n siupuwa ijiok'i'ni, yapi'ne jlam isia'm, tanayi'ni ti iyunit pa Sinia'.

¹⁶Yiyi wek pa Jesús, ti t'akosat'iyijpe kiajwe ti jinikanitieyi iwijna'm. Siupa i'nio' tal Samaria.

¹⁷Jesús iyone'ate: —Ajwelp'an ka intejwjliya'm niwa sikioye siojopo ti tijwajyi siukia jiwet'ia iyo. ¿Najapo siojopo ijwienjli sikio' itij'we ijniujlits'i tom'niji?

¹⁸¿Ijiatp'aneje ti lajk'iyi pa ka inapimet, ka iwo ka iwunit pa Sinia', ijwienjliyet'i jla'am siu'nie i'nio' ti je Judío ti yapimet?

¹⁹Sekyi'i kiak iyoni'ni pak i'nio', ti iyone'ate: —Neppijia'm, maj. Lapakawo ti atankiujnieye po', nak it'imina ti 'nes.

²⁰Siupapo Fariséojos i'yasis'ni pa Jesús, iyonisi 'ate: —¿Nit'it'iyijna'a ka 'nes pa Sinia' jika anechijiayas? Isiujlie'ne ti iyo'ate: —Ja ke iwo'ate siunie ti 'yaka ti ti'wena, ka 'nesta.

²¹Ja lajak'i pa ka wo'ate, “Siu'nie yi'ne”, ni'ne ka wo'ate pa, “Siusie yits'iji”. Kajeyepa ti pajk'i ti yiye aska kiowe'e.

²²Sekyi'i iyonat'iyijpe 'ate japo t'eyasajnas: —Jana'm siojona jloma ti ja jalasajyink'iye ka'wena' siupa ka k'iejliyeyi paka inajne'n k'iye ni I'nio' Jlas ti ja 'nes, 'yina ja ke a'wena'.

²³Japoye napo janwo'ate, “Siu'nie yi'ne”, ni'ne kanwo'ate, “Siusie yi ts'ijiye”. Ja ke inets'e paka wo ka nekk'i.

²⁴Kajeyepa ti jawo'ate ni tak'ajyi, ti jlal tal 'niji yi'i ni taj'le ni kilie', jla'yi ni siunie ijio'we, kiak janwo ni ji'niayi ni I'nio' Jlas ka napitiemet.

²⁵'Yina jana'an kiu' ti ja wujwa ti janilayiti siunie ja tiwonaja, siunie janwone siunapo i'nio' yiji pet 'nak siu'nie jloma, ti janlakiyis ti ja ke inkimis ilia'm.

²⁶Kiak jawoyiyi iyot'iyipi siupuwa jlomas yit'iyipi pet pa Noé, ka inapitiemet ni I'nio' Jlas.

²⁷Papo i'nio' 'es ti ti'yekiujni'n, 'es ti i'yayis kajeyepa ti its'iyisie, jlam tijwa'yijlits'iji'n papo i'nio', paj ti yiyet'iyipi ti Noé yamaja'm japa kasejkana. Yiyet'iyipi pak siupa pejla, ti ijiate jla'am ti isieje'n, paka'ne ti iliajne'n papo i'nio' t'ipi.

²⁸'Wena ja ke inwoyi iyot'iyipi siupuwa jlomas yit'iyipi pa Lot. Papo i'nio' ti'yekiujni'n jla'yi ti i'yayis, tik'iajwajyi'n, ijia papo takawejnajne'n, takawijnajne'n, ijia papo ilisane puwa ji'wuki'l.

²⁹'Yina ti yajmiwek pa Lot ti tajla'm japa Sodoma, 'nakayet'ipi 'ni jwat ti na'm isia'm, siu'nie azufre ti tisa'yi ape'e papo i'nio', pak itij'we'ne.

³⁰Kiak jawo ti ja 'nakaj ni I'nio' Jlas.

³¹Janak siojona jloma, i'nio' ni yi' ape'e jana ji'wuk, siojona tomi pijia'm, 'esijyi ka je insojmajyi'n ka ineki puwa jikijmatis. I'nio' ni yi' jiwasoki ti isijme'n, 'esijyi ka je inapi 'wete.

³²Ataj enayi 'ate siojopa Lot jik'iemjla t'ipi.

³³Jajwi'lase'm ti siunie i'nio' ti ja initejna'm ni jiliaye, nak janetia'n. Jlampet siunie i'nio' ti ja ke initejna'm, ja nakaye'e pet ni janjwa'.

³⁴“Jajwi'lase'm ti pak siupa ajnaj, siunie jlotiojwa po', janjwanjli ni ja tikinieje, siunie jikiecha sek ja tiliki wek.

³⁵Siupapo asejnia times ti tikiojwajne'n, janjwanjli jana tikinieje, janjwanjli'ne siojona sek ja tiliki wek.”[8]

³⁷Jesús t'eyasajnas ipi'yaye ti kia'iyo, i'yasat'iyisimpe ti iyo'ate: —'Yaka'niona, ¿tepat'e jane'yi ka kiak iwotajanie'e? Isiujlie ti iyo'ate: —Je istieyiji siunie ijio'we niwa t'isiukis, sekyi'i na 'ya'al.