Read Iyojwa'ja Chorote San Lucas 18 Bible Online

San Lucas 18 - Iyojwa'ja Chorote bible

San Lucas 18

¹Jesús yamtiyi siu'nie ti jla'm i'yejnap jiwek, ti 'yiyasajne'n japo t'eyasajnas ka je inleyisi ka inwoyis'ni t'ajlayeja'.

²Iyone'ne 'ate: —Pojompe pa i'nio' i'ye'en napo jitis wus yi'i japa isi', ti jlam je jnots'ina pa Sinia', ka pakaye 'neje wek ka imp'elisi'n paka i'nioye.

³Yi'i japak isi' po' japa i'nioki ti ask'ilieki, ti yapili'ni pa i'ye'en napo jitis wus, ti iyo'ate, “Sip'elisin wata'a, noyijk'i'm. Awotajank'iye ka ts'esi wita'm siojo awo itiejiejwaye.”

⁴Jlampa je k'iejeyeyi'i pa i'ye'en napo jitis wus ti je i'yejne'n japak ask'ilieki, paj ti jitienkiujnieye kiak t'ipa iyonayipi 'ate, “Ya'am a'ne ti je sijliena'ni, je sots'ina pa Sinia', je awo lajaye napo i'nio'.

⁵Siojona ask'ilieki je iliyi ti yapik'i'ni, ts'etaja ilia'm. Ja 'yen'ne siupi iyo, janiuyeje'ne, janleyi'ne ti yapik'i'ni, lapakawo ti ts'etaja ilia'm.”

⁶Saka'niona yine ape'e ti iyo'ate: —Jlamtis kia'iyo pak i'ye'en napo jitis wus ti je i'nio'.

⁷'Yina, ¿tepi iyo pet pa Sinia'? ¿Jot'e ka je inoyeje napo ti jlam ti jilis, ti jlomas niwa ajnajas ti t'ajle? ¿Jot'imi ka k'iujwap ka paja?

⁸Je'e. Jajwi'lase'm ti ja ke ink'iujwap ka paja'ni ape'e ti janoyeje. 'Yejne'n, siuti ja'nes, ka inapitiemet ni I'nio' Jlas, ¿jot'e kan'we'en napo i'nio' ape'e 'ni ajnat ti ja ke inleyi ni jitienkiujnieye ti japoye, siunie 'es?

⁹Jesús yamtiyet'iyi'ijyi siu'nie ti jla'm i'yejnap jiwek k'iye siupapo i'nio' ijwil ka ijiatayiji kanses, ti iliaki napo ijia ka je insesijiyi. Iyo'ne 'ate:

¹⁰—Times napo i'nio' ijio kiajwe jana 'najla'wet, ti janwoyis t'ajlayeja'. Ijwienjli pa Fariseo, siupa jikiecha pak isi'm ilia'm niwa inkat'ijnieyejes.

¹¹Siupa Fariseo takasit'ne ti iyo t'ajlayeja', ti iyo'ate, “Sinia' inikanitieye awe'na'm ti ya'am je awo'ate siunapo kajlajnatas, siunapo 'yuyi'ni napo ijia jwa'yis, siunapo iyoyi siunie ti wuj ti je 'es, je awo'ate iyo siusie isi'm ilia'm niwa inkat'ijnieyejes.

¹²Wikie'eyi kiwa inkijmayejes timesiji'ni ti awo 'yejlayeja', aninel'liajanit'ni, siojona 'yakaja ti sitisiejata, janak atajlaja'm pet siojona a'yaka'n itijwa'm niwa sikioye ti ekiajle pa Sinia'.”

¹³Kiak iyo pa Fariseo ti iyo t'ajlayeja'. Sek k'iejliyiji pet pa yiji siupa isi'm ilia'm niwa inkat'ijnieyejes, 'wenajliyi pet ti t'ot ipiaja'n ti iyo'ate, “¡Sinia' sip'elisi'n ti ya'am ti 'yake' po'!”

¹⁴Jesús sekyi'i iyo'ne 'ate: —Jajwi'lase'm ti siupa i'nio' ti yapiliet'ipi ijiate Sinia' ip'ilisi'n, jlampet pa Fariseo je ilik'i ti jitis po'. Siunie i'nio' initonit ja tijliasata isia'm, jlampet siunie inijlasat isia'm ja tijliasata pet pijia'm.

¹⁵Kia'iyo Jesús, papo i'nio' yamtajasiji'ni papo kia'lis sajmela'aja, ka jikio' nenk'i ape'e. 'Yina je 'est'ipi ti i'winayi siojopo t'eyasajnas. 'Yakawonisie'ne papok i'nio' t'ipi.

¹⁶'Yina Jesús je iyo jla'am paka iwone japo, tanayi papo kia'lis, sekyi'i iyo'ne 'ate, ti ijwijla'm japo t'eyasajnas: —Ena'yate napo kia'lis ka ijnok'i. Ká akawonayi. Kajeyepa ti kia'iyoyi siunapo i'nio' yiji na Sinia' jika anechijiayas siu'napo kia'lis.

¹⁷I'nio' ni ja ke iniwone 'ate ni kia'le siuti isi'm ilia'm ni Sinia' jika anechijiayas, ja ke 'noyi.

¹⁸Ijwienjli'ne siupa, papo anechiyasas t'ipi, i'yase'n pa Jesús ti iyo'ate: —Inka'neyasajnawo ti i'nes a'am, ¿tepat'e ka iniwontaja ka yiyi pet janak in'wasankiye ti laj jlaja?

¹⁹Iyo'ate pa Jesús ti isiujlie: —¿Yot'iyi'ni ti kiak jiwonk'i, ti jijwel ts'es? Ijwienjli jlam pa Sinia' ti 'es.

²⁰'Najane siuniwa Sinia' ijliutiejets'e'm ka iyoki ti iyo'ate, “Ká akima siunie amawo ti jiliaki siunie ajwa'yijaye ti ijiatk'i, ká ala'an ni akiecha, emi'n ni ana', et kia'iyojliyi, ká awo sintiyeja'm ni akiecha.”

²¹Siupa i'nio' isiujlie ti iyo'ate: —Ti k'iejli awo jwemikie' ta'a pet ti awoyi niwaka.

²²Jesús ti ipi'ya ti kia'iyo, sekyi'i iyone'ne 'ate: —Mawat ijwienjli ni netia'n. Wen'ni siuniwa wask'i'nelaja niwa ji'we'en, tej'wena'a siojona ja lajaye ka wenajamna'a napo p'ijliusis, jane ts'ijiye niwa akijmatis poliyi. Ka jla'm ijiatayijna'a ka naj, ka anamana'a ijyik'i.

²³Sekyi'i pa i'nio' je inkaj'ni, kajeyepa inkaje'.

²⁴Jesús iyo'ne 'ate ti i'winayi ti kia'iyo ti je inkaj'ni: —¡Wuj wata'a ti istie' kan'yakajna'm siunapo i'nio' inkasi' ka 'noyi ni Sinia' jika anechijiayas!

²⁵'Yejne'n, siojona jikiayi kosoki po' je istieyiji ka 'noyi na k'itie'en jitiete jlase'. 'Yina jlamt'i ijiatayiji ni i'nio' inkaje' ti istie' kan'yakajna'm ni Sinia' jika anechijiayas.

²⁶Siupapo ipi'ya ti kia'iyo pa Jesús iyonisi 'ate ti i'yasisi'n: —¿Tepa jane'yi pa janjwa' siuti kia'iyo?

²⁷Jesús isiujlie papo ti iyo'ate: —Siunie je 'yakajli napo i'nio', Sinia' 'yakajli jla'am.

²⁸Tamti'ne pet ja Pedro ti iyo'ate: —'Yaka'niona, ti anamajape ajak'i, jlam sek aleki'i wek jawa sikijmatis si'wet'e.

²⁹Jesús isiujlie'ne ti iyo'ate: —I'nio' ni jlam sek iliyi'i wek japa ji'wuk, siojopa jik'iemjla, siu'neje napo ji'niayi ijwienjliyi, jinia' jlet kia'iyojliyi, siunapo jilis, ti ijiate ti iniuyeje ni Sinia' jika anechijiayas, jajwi'lase'm ti ja ke piniye siuniwa jan'we'en 'ne ajnat'e, 'yina janeyi pet siojona jloma jana'am, siojona ji'wasankiye ti laj jlaja, ja poye.

³¹Jesús i'nialkit japo t'eyasajnas pa ijioyiji japo itijwa'm niwa sikioye times tom'niji, iyonat'iyijpe 'ate: —'Yejne'n, ti jajiok Jerusalenne, lapakawo ti janeyi siunie iyot'iyipi papo injwejlanawos t'ipi siunie iyo niwa ilisane, ti ijwil ni jawoyi ni I'nio' Jlas.

³²Ja tekiajlaja napo i'nio' Roma jlele, napoka'ne siunapo ti wuj ti janlakiyis, japoye ni siunie janwonisi, janjwats'iunisk'i'ni,

³³janajas'ni paj ka lanayisna'a. 'Yina jika jlomas janajapeja ti janejyi ni a'no', sekyi'i ka inoyena'a kisie'e ti janapi pijia'm.

³⁴Siupapo t'eyasajnas je itijnisisk'i siunie iyo lapakawo ti jlam je iyo ka 'nakajanitk'ijine k'iye, it'imina ti lajk'iyi paka iwo ka intant'iejesk'i siunie iyo ni jika anechiyas.

³⁵Jlampa Jesús majleyet'iyipi siujlieja isi' Jericó, sekt'ipa yiye'epe siupa i'nio' ti talok, ti t'alk'i'ni papo ka tiwok ji'wajieta'.

³⁶Ti ipi'yak'i'ni jiwek siupapo i'nio' ti je pini' ti iniuyisiap'ni, iyo'ne 'ate: —¿Yot'iyi'ni ti je piniyi papo i'nio' ti ape'yak'i'ni jiwek ti iniu'ni ijiap?

³⁷Tijwelajam'ne ti iyo'ate: —Namisk'i ni Jesús, Nazaret jlele.

³⁸Ipi'ya wek papo ti kia'iyo, sekyi'i ti tanat'i'nijpe ti iyo'ate, ka kia'iwo ka lakiyi'i: —¡Jesús, David jlas, sip'elisi'n!

³⁹Ijliuyet'itieje'nijpe siupapo iniajnin'ni k'iye ka inkama wek: —¡K'iu'wate! 'Yina kat'ajat'iyijpe ti 'yakets'ijiap ti tan'ni ti iyo'ate: —¡David jlas, sip'elisi'n!

⁴⁰Jesús ipi'yayi wek ti yajapat'ijyimpe, sekyi'i iyo'ne 'ate: —Namayi 'ne. Tikimajat'ipi jikio'yi ti titionaja, Jesús i'yasen'ne ti iyo'ate:

⁴¹—¿Tempa jiwojonk'iye ka iyo'na, ka iniuye'a'm? Iyo'ne 'ate siupa talok ti isiujlie: —'Yaka'niona awotajank'iye pet ka'wijne'n.

⁴²Jesús kiak t'ipa iyonayipi ti iyo'ate: —¡'Wejne'n! Atankiujnieye po', nak it'imina ti jijwa'.

⁴³Je yiyi puwa ka jlomasa' pa talok ta'a t'ipi ti 'es pakayi, 'esieyiji ti i'yen kisie'e, yamk'i'ne pa Jesús siupi ijiojwi, jla'm iyunitjli pa Sinia'. Kia'iyojliyi siupapo i'winaja wikie'eyi ti iyunitis pet pa Sinia'.