Read Iyojwa'ja Chorote San Lucas 19 Bible Online

San Lucas 19 - Iyojwa'ja Chorote bible

San Lucas 19

¹Jesús jlampa 'yuyeyi jlaja isi', ti yiyet'iyipi.

²'Yina sek ji'wet'e siupa i'nio' jle' iyo'ate Zaqueo, siupapo isi'm ilia'm niwa inkat'ijnieyejes jika anechiyas, i'nio' ti inkaje'.

³Jla'am ijialas kan'we'en pa Jesús, lapakawo ti je itio', ka lajak'i 'neje wek papo i'nio' ti je pini' ti nojweje, it'imina ti je i'yakane pet.

⁴Zaqueo yam'ne ti iniank'iye pa Jesús siupa jano'we, sekt'ipa yiye'e'nijpe k'iye ti i'yulk'i japa a'la', ti ijialas pet kan'we'en.

⁵Ti Jesús yiyet'iyipi japak a'la', sekyi'i iyo'ne 'ate: —Zaqueo, jlam woni'ni 'ate: Sojmajyi'n. Awojonk'iye ka ijio a'wete siu'nie jloma.

⁶Jla'm iyoni'ni 'ate ti tisiojmajyi'n pa Zaqueo, wuj ti inkaj'ni ti Jesús ijioyi.

⁷Je 'esiji ti ti'wenaja pa Jesús siupa iniwone, je 'yakanitk'i'ne wita'm, sekyi'i iyoyis'ne 'ate: —'Yejne'n, 'est'iyiji ti tijnayi ni i'nio' ti kia'iyo, ti inke' lianik.

⁸Sekyi'i pa Zaqueo takasit'ne ti iyonat'iyijpe 'ate pa Jesús: —'Yaka'niona, siu'nie jloma jajyiwitajna'm pet k'iye napo i'nio' p'ijliusis ni k'ie na a'we'en. Jlampet siojona ajale napo ti akajlan kiajwe, janak jayikiajle, ja'yakajmate wat ape'e siuti jajnojlits'i niwa jayikiajle.

⁹Jesús iyo'ne 'ate: —Siu'nie jloma Sinia' ijwiejiet siu'nie i'nio', jla'yi napo ji'wet jlele, 'naka 'ni tajla papo Abraham t'ipi.

¹⁰Siunie I'nio' Jlas napok name, siunapo netiajne'n, ti iyo ka injwajiete'n.

¹¹Po' papo i'nio' ipi'ya pa Jesús ti ijwi'il niwaka, jlampa ijlienayisi jlaja Jerusalén, ti ijwilis ka ijiatayiji ka je pajak'iye ti ja'nes siupa Sinia' jika anechijiayas, ti ja'nakaj. Pak it'imina ti yijnapeje wek siunie ti iyo'ate:

¹²—Pojompe pa i'nio' anechiyas janek ti jajnoyi siojopa ajnat ti tojwe, lapakawo ti t'ajlaja ti ink'ieye siupa jle' ja tena'a ti janwo anechiyasa'. Jlomas nak ja nojwaja'm ja 'nejts'eje.

¹³Ti iyoyeyi ka nek, tanat'iyipi siupapo itijwa'm niwa sikioye jikawos, ti yikiajle japa wikiniet'aj ti 'etsakajk'i'nine, sekyi'i iyone'ate, “Kijmanajyinna'a siujlie'e jawi'nase'm. Awojonk'iye ka k'iosinitieyija'm, jajotieyik'i'ni paj ka 'nisana'a.”

¹⁴Siupapo i'nio' sek ji'wet'e, yi'i siojopa ajnat yi'i, je iyoyisink'iye jla'yi ti ne'wajasi. It'imina'ne ti ijliu' siupapo isimits'i jlamis ka inkajwelanis, ti iyoyits'i 'ate, “Je awokink'iye ka iwo anechiyasa' sik'ioye.”

¹⁵“Je tik'iukie'ne papok takajwejlantaja, tikima'a'ne jla'am pak i'nio' ti tiwoki anechiyasa', sekyi'i ti yapiliet'ipi jika ajnate. 'Nes ti tanat'iyipi papo jikawos siupapo iwijna'm japa wikiniet'aj, ti i'ye'en siojopa 'yaka'm ape'e.

¹⁶'Nes'ne siupa iniajnat ti i'yase, yiyi ti kiakt'ipa iyoyeyipi, “Siojokia wikiniet'aj jiwenk'impe pet, itijwaja'meje niwa sikioye jla'a ti akajmate ape'e.”

¹⁷Anechiyas isiujlie ti iyo'ate, “'Esiji, 'yakawo ti 'es, ajosik po'. 'Yejne'n ti jit'iotatiji a'am siojokia je wujwata, jayojwa'n pet anechiyasa' ti ja'yena siuniwa itijwa'm niwa sikioye isi'il.”

¹⁸'Nesat'ipi siupa tomik'i, pak iyo'ne 'ate ti yiyeyi, “'Yaka anechiyas, siojokia wikiniet'aj jiwenk'impe pet ka isijmajne'n, ijwienjli sikio' itij'we jiwek jakia akajmate ape'e.”

¹⁹Iyo'ate pa anechiyas ti isiujlie, “'Esiji, ja'yena pet niwa ijwienjli sikio' itij'we isi'il ti jawo pet anechiyasa'.”

²⁰“'Nesat'ipi siupa jikiecha 'neje, pak iyo'ne 'ate, “'Yaka'niona, ekiaj'la jla'a siujlie'e jiwentak'impe pet, ti jlekie ajoti wita'm kia lotakiniewa ti 'otin'ni.

²¹Kajeyepa ti itiej 'wanjle a'm siunie iyo ni akijmaye, ti sikiwita ka ajalk'i, siojopa ka 'yakajmate ape'e. Je sijwe'ya'm kajeyepa ti jlale'ni napo siojona jikajata'ni napo akawos ti isimk'iji'n, siunie jiwomik napo kia'iyojliyi jilie'ne'ni a'am, jlam'ne je am ka akawijna'n.”

²²“Sekyi'i pa anechiyas isiujlie'ne ti iyo'ate, “¡'Yakawo ti je 'es, niwak it'imina niwa amtis, ki jiwo ti ates po' ijyilia'm! Jlam'ne jijwel ataj 'wanjlek'i'm siupi iyo pi isijmaye, ti jijwel ajajlane'ni siojopa jikajata'ni napo, jijwel ajajlane'ni ni jiwomik napo ti je ya'am ka 'yut isia'm.

²³¡Jlam'neja wata'a ti je jlen ts'e yi'i jana wikiniet'aj 'wuk jlaja ika wikiniet'aj! Kajanitt'itie wek ka kiak awone ka ekialk'i siojopa its'iosinitiaja'm jana wikiniet'aj 'wuk, ti isijmajne'n.”

²⁴“Sekyi'i ijliuye'ne siupapo sekyi'i ti nojweje ti iyone'ate, “¡Jalayi siojona wikiniet'aj yiyi, ekiajlayi siunie ti its'iosinitiaja'm jla'am jakia itijwa'm niwa sikioye!”

²⁵Iyo'ate ti isiujlieyisi pet, “'Yaka'niona, ¿yot'iyi'ni ti ja tiwenaja'm ti po' siojona yi kiojyi, siojona itijwa'm niwa sikioye ti its'iosinitiaja'm?”

²⁶Pak anechiyas iyo'ne 'ate, “Jajwi'lase'm, siunie pota'a jana yiyi, nak japoye'eje jana ja tiwenaja'me, jlampet siunie ti lajk'iyi japa ka ineyi, kia'iyojliyi pet ja talaja'aja siojona je wuj ti yiyi.

²⁷Jlampet siupapo je iyojon its'ioye ti awo anechiyasa', mayets'i'ni, 'nak enayi'i ka alanajyin'ne itieyi'i”.”

²⁸Jesús yiyik'i ti tamti ti iyoye'ijyi ka nek ti jajno Jerusalenne.

²⁹Jlampa ijlienayisi'ni siojowa isi'il Betfagé siu'neje jlaja Betania, ti 'yakama'a siujlieja tikijnaki ti jle' iyo'ate Olivokiet, sekyi'i ti ijliuye japo times t'eyasajnas,

³⁰ti iyone 'ate: —Maye'ni, jlonieyi siunie ji'wet napo i'nio' 'yakamats'e'm, ja 'oyeyi wek ka sek ja'wenaye'yina'a ni malekiatiok jlas, ti je 'yakayane ka tiwak'i ape'e. Lanajyinie'e, sekjane'yi ka anamayeyik'inie'e.

³¹Siuti japoye papo jan'yasajyi'n ti jawo'ate, “¿Yot'iyi'ni ti jilienajyi ni iliajwa?”, wonayina 'ate, “Saka'niona isitia'n.”

³²Yamat'i'nijpe siojopo t'eyasajnas, ka 'wena iwo wata'a siupa Jesús iyone ti ijwijla'm, ti yiyeyisi.

³³Je itimista'aja ti ilienisi'ni pa malekiatiok jlas, jika'nionas yiyet'iyisipi sekyi'i iyonisi'ne 'ate: —¿Yot'iyi'ni ti jilienajyi 'ni iliajwa?

³⁴Iyoyis'ne 'ate: —Saka'niona isitia'n.

³⁵Itionat'iyis'nijpe ti yamisiji pa Jesús, sekyi'i ti iyoyet'iyispe jika apekiaye puwa ji'wuye. Yiyisiji ti yinat'iyispe ape'e, Jesús yi'ne ape'e.

³⁶Ti yama pa Jesús, papo i'nio' its'inat'iyisimpe k'iye puwa ji'wuye ajnat'e, ti its'ink'i siupa 'nayi iniu'we.

³⁷Jlampa jet'ipa tojwa'ape siupa 'nayi taj'l ape'e siujlieja tikijnaki siujlieja jle' iyo'ate Olivokiet, sektajla'a papo i'nio' ti tanak'i wita'm. Siupapo i'nio' yamk'i, ti inkask'i wita'm ti iyunitis pa Sinia', kajeyepa ti i'winis'ni pa Jesús, siupi iyo puwa i'winki'n, ti je kia'iyo puwa kan'wenis'ni.

³⁸Kiak t'ipa iyoyeyisipi: —¡'Esiji ka Sinia' iwejna'm ni 'es ni anechiyas ti 'nes, ti name ni Saka'niona jle'! ¡Inwunitieye tena'a ni Sinia' ts'iji poliyi, jla'yi ti inkamankiye po'!

³⁹Siupapo Fariséojos po' papo sekyi'i yiji papo i'nio', papoka'ne siupapo iyonisi 'ate pa Jesús: —¡Jloye siunapo na'm ajak'i ka ileyisi ti tank'i wita'm!

⁴⁰Jesús isiujlie ti iyo'ate: —¡'Yejne'n, ka ijliuye kank'iuyits'i 'ate, siuniwa sisajas kiak janwo jantank'i wita'm!

⁴¹Jesús jlampa majleyet'iyipi jlaja Jerusalén, i'yen'ne ape'e ti yapat'ipi,

⁴²ti iyoyet'ipi 'ate: —¡Jlam'ne ka intant'ieje siu'nie jloma ni namtaja'a ni akamankiye! 'Yina 'nakayi tijwekia'm, je 'najane paka wone ka 'we'en.

⁴³Awoyi kajeyepa ti jana'am siuniwa jlomas ti ja a'tiesiek'iji'n ni jane'ya, siunapo atajiejwas janwasok'iajap ti ja awaye kiowe'e kant'ekitie'ase.

⁴⁴Ja inetiajnatajyi'n, paj ka inojwaye'yina'a, siunapo asles kia'iyojliyi. Ja lajak'iyi japa ka sisaja ka 'wanjliye ape'e jikiechaye, jano ajnat'e. Kiak janwo wikie'eyi siuniwa amtiyi, kajeyepa je intant'ieje siojona jloma ti Sinia' ijiota'a.

⁴⁵Jlampa itimayi'iji pi iyo, Jesús 'yuyet'ipi kiajwe japa Sinia' ji'wuk. Sekyi'i ti yokios kisie'e wikie'eyi siupapo takawejnajne'n.

⁴⁶Iyonat'iyijpe 'ate: —Siuniwa Sinia' jlamtis yi'i ni ji'wet iyo'ate, “Siujlie'e i'yuk, 'najlaye 'nejie'e ni ji'wet.” ¡Jlam'ne ti asa'am jiwoyeyi kajlajnatas ji'wukie!

⁴⁷Wikie'eyi puwa jlomas ti Jesús taka'neyasan'ni yi'i japa Sinia' ji'wuk. Jlam'ne pet siupapo pa'yijis jika anechiyasas, siu'neje papo taka'neyasane pet pa Moisés jika'neyasajnaye, siu'neje papo anechiyasas ijia yiji jlaja isi'.

⁴⁸Ijialasista pa kanwonisi kanlanis, yamjliyi ti iyoyisijyi'n siupa ka inwonisi ka 'esiejape'n. Lapakawo ti etie ti tamti pa Jesús papo i'nio' wuj ti its'iuyisie.