Read Iyojwa'ja Chorote San Lucas 21 Bible Online

San Lucas 21 - Iyojwa'ja Chorote bible

San Lucas 21

¹Jesús i'yen'ni papo i'nio' inkasi' ti itietijisi'ni siupuwa jijwa'al jla'am puwa tiwoki 'wajieta' pa Sinia' yi'i japa 'najla'wet.

²I'yenat'i'nijpe'eje siojopa ask'ilieki ti p'ijliusie siojopa itietek'i isia'm, ti times jiwekie'e puwa wikijnies t'ejes, ti laj lajaye.

³Iyoyet'ipi 'ate: —Ijiatk'i siu'nie jayo, siujlieja itietek'i isia'm siujlie'e ask'ilieki ti p'ijliusie, siojona itiete'e'ni napo ti iyota 'wajieta' pa Sinia', 'yaka'm ape'e siojopa yine japo inkasi' jla'am.

⁴Kajeyepa siojopa yinisi, janak siojona 'wanjle'e ti isimisia'm, jlam'ne pet siujlieja ask'ilieki ti p'ijliusie i'niajanayi wek jla'am siojokia jakiakata ti jlak jota lajaye.

⁵Po' papo jitiej ijiutie japaka 'najla'wet ti iyoyits'i 'ate: —'Yenapit niwa sisajas, isis wata'a, siu'neje niwa name'ni napo i'nio' kia'iyojliyi ti iyoyisi 'wajieta' pa Sinia' ti wuj ti 'yotatis jana 'najla'wet. Jesús iyonat'iyijpe 'ate:

⁶—'Yejne'n, wikie'eyi siuniwa ji'wena', je tojwa'a siojona jloma siuniwa sisajas ja lajak'i japa ka 'wanjliye ape'e japa jikiechaye. Jano'we ti janetiajne'n.

⁷I'yasat'iyisimpe pa Jesús ti iyo'ate: —Inka'neyasajnawo, ¿nit'it'iyijna'a ka ineyi naka? Siuka ijiatatajana'a ka je tojwa'a, ¿ten siupuwa jana'an ka 'nakaj?

⁸Jesús isiujlie papo ti iyo'ate: —Joskiyeyijna'a, ja lajak'ina'a paka ink'emi ilia'm paka jikiechaye. Kajeyepa ti ja ke piniye napo ja'nes ti janiteyini ki yi' ijio'we, ti janwo'ate, “Ya'am ti Injwajietik'i'm siunie Sinia' jijliujwanik,” kanwoyena'a 'ate, “Yiyi jla'ak jloma.” Ká akiniets'ina'a.

⁹Siuti ja ajieyeyi ni inwak ti ja ne'yisia'm, siu'neje napo i'nio' ti janta'yi ilia'm napo jika anechiyasas, ke ijnots'ijnayits'inie'e, jlam kiak jawo niwak jana'an ti ja'nakaj, 'yina tojliyi'ijyi siunie jane'yiyi ni jlaja niwa jlomas.

¹⁰Jlam yinjliyi ape'e ti iyo'ate: —Siunapo i'nio' yijits'i niwa ajnatis janilajne'n. Jlampet siunapo anechiyasas kia'iyo janilajne'n, ti janilane napo ijia anechiyasas.

¹¹Siunie ajnat ti jan'wesi, ja pansajak'i, kiak jawo ja ke jlasiye ni nel'lias ti japoye, inlaye kia'iyojliyi ti janejyits'i puwa ajnatis. Siupapo i'nio' jan'we'en puwa ja k'iejliyeyi ti ja 'lan poliyi, ti ja ke tijweyeje, ja ke lisa' niwa ja'nakaj ta'a k'iye niwak jlomas.

¹²“Siuti ja ke inejliyi'ijyi kiu' niwaka siunapo i'nio' janki'mase'm, jantaye aselia'm, ka inekiajliyinie'e napo jlosikis jiwos, ti ja'notiets'i a'laja'm. Ti asa'am ti jlekieyi siunie awo, ja ijnokieyiji napo i'nio' anechiyasas, siu'neje napo anechiyasas wus.

¹³Siuti kiak janwo, ka jla'm awonayijna'a 'ate ti jawoye asamtikie' ti ja sijwela'.

¹⁴Ká ajwela ka awakajlanitie ta'a siupa a'lej jawonayi ti ja amtiye astepe'e,

¹⁵'yina ja yama ya'am ti jawi'nase'm ni siunie as'lej jawonayi, siu'neje na 'najankijnieye, 'nakayeyijna'a siunapo astajiejwas ja ke into'ma aselia'm, 'wenajliyijna'a ti ja injwel ka inkiuj'liase'm, 'yina ja ke injlana'ni.

¹⁶“Je jwel ka je inekiajlajayi napo astajiejwas, siunapo asnawot, siunapo as'nayi ijwienjliyi, siunapo asa'm ijia asa'am, siu'neje napo asjajnajwas. Napoka napo ti janekiajlayi. Ja poye siunapo ti asa'am ti ja tilianaja'n.

¹⁷Siuti jikinieyi siu'nie awo, siunapo i'nio' yi' ape'e 'ni ajnat ja wikie'eyeyi ti jane'wa'ase'm ya'am ti jat'imi'nase.

¹⁸'Yina awo'ate, tiwet'ianaja ka injwanjlik'i paka as'woliye ka netia'n ja lajak'i pa.

¹⁹¡Jwajla'a paka woyeyi 'nakayeyijna'a ka 'yakana siojona jla'm ijiate jla'am ti as'wasankiyeja'!

²⁰“Siuti kiak jawo ja'wena' jana Jerusalén ti tokis siunapo 'loj janjwayisiap, ja'wena' ká atejnisiejap'e ti ja ke pajayi ti janetiajne'n.

²¹Ja'wena' ti kiak janwo, siu'napo ji'wet ka intajlayisiamna'a, jlampet siunapo yi' ojwe, 'esiji ka je inapi isi'i, siunapo yiji jana Judea ka nek'ni ka 'yiltane niwa tikijnakiyis.

²²Kajeyepa janakaye siojona jloma ti ja tisiejek'i'yi napo, japak siojopa jloma ti ijwi'il niwa inlesajna' t'ipi yi'i ni ji'wet.

²³“¡Janak siojona jloma siunapo asejnia ti isiu'ujniejne'n, siu'neje napo ti itipisiejne'n napo jilis sajmela'aja'n, wuj ti jap'ijliusisa'! Kajeyepa ti ja wujwa ni jlajlasa ape'e 'ni ajnat, siu'neje ni jiwak ni Sinia'.

²⁴Ja poye siunapo sijnatis jitio' ja tikienaja ti ja tilianaja'n, ja poye napo ja tiwoki inkipijnasa', ti ja tikiniejeje siunapo i'nio' yiji jana ajnat 'wenayi. Siunapo i'nio' je Judíojos int'asak'i'nina'a jana Jerusalén, ijiatjliyijna'a ka inetiejenie'e siojona jloma tenaja ka Sinia' inwota 'ate, “¡'Esiji, leyi!””

²⁵Jesús iyoyet'ipi'iji 'ate: —Ja poye siuniwa ja'nakaj ti ja nejyi na kilie', poye'eje niwa ti ja nejyi na we'la, ts'iji yi'i niwa katese'l kia'iyojliyi. Ja wujwa ti jajnots'ijnits'i napo i'nio' ape'e 'ni ajnat, ti ja ke injweyisie siunie jla'lap ni i'niat lajlik'i kajeyepa ti ja jwesiejak'i, ti janwo 'wukijlimpejesie ti janwakiats'i pijia'm.

²⁶Jitiej ja ke inlesank'i'ni napo i'nio' siunie janwo 'ni ajnat, ti jitiej janenisi'ni 'ate ni jiwet'iaye, siunie jijweye na poli kiak janwo jan'wesiji.

²⁷Jiwekie'ejana'a ni I'nio' Jlas ka ti'wena ilia'm ti jana'm isia'm, ti janejyi jana poli, ti janejyi ni jijweye iyo, siu'neje ni iyo ti ja tiwunitie.

²⁸Jlampa ijnejlitieyi'nina'a ka 'nakaj niwaka, ¡ka sek atajlaye'yina'a pet ti jani'netie'yi ape'e, ka anejiena'ats'i pijia'm niwa asete'l, kajeyepa ti ja ke tojwa'a ti ja ajwaye!

²⁹I'yejnap'ne jiwek siu'nie ti iyo'ate pa Jesús: —Ji'wena' jana higok, ni'ne ka ne'yi japa jikiechaye a'laye.

³⁰Ti ji'wena' niwa jik'ase'l, je int'ayeyiji'n pet, ti janawopa.

³¹Nak kia'iyo ka 'wenatiena'a siuniwa ajwel'ni, 'wena ja ke atejnisieyi'i ti janak jloma ti ja'nes ni Sinia' jika anechijiayas.

³²“Jlajme awo ti ajwe'lase'm, niwak ja'nakaj, siuti ja ke inejliyi kiu' siojopa jloma ni jiliayeja' napo i'nio' ti jano'we, yiji pet 'nak jloma awaki.

³³Siunie poli siu'neje 'na ajnat janetia'n, 'yina niwa yamtis ka pajana'a pet ka netia'n ti ja ke ino'we.

³⁴“Ni'notatayiji, ká aninenayi 'ate siunie ajosik iyo ka woyi, ká a'yaye ni'ne ka wujwa ka woye asjlak'aliye niwak wask'i'nelaja jlalasajyink'iye ka'wena', 'nakayeyijna'a ka je inesi'lieta janak jloma ti ajwe'el,

³⁵kawo'ate jana inkatsala'a ti iniujwa'm pa. Kajeyepa ti ja wikie'eyeyi napo i'nio' yi' ape'e 'ni ajnat jantej'w ape'e naka.

³⁶Ká anikiwalinitie, 'wenajliyi ka awoye asts'ajlayeja' tejwa niwa jlomas, 'nakayeyijna'a ti asjweye japoye, jla'yi ti jajwayejyi wikie'eyi niwaka ajwel'ni ja'wena', jant'emina'a ka akajlayi ka aye jitieyi'i ni I'nio' Jlas.”

³⁷Siupi iyot'iyipi pa Jesús, ti jlomayeta ti ijioyi'ni jlaja 'najla'wet ti taka'neyasa'n, jlampet ti ajnajata ijiojwen'ni tikijnakija'm yi'i siojopa tikijnaki jle' iyo'ate Olivokiet.

³⁸Wikie'eyi papo i'nio' ti ijioyisi'ni jlaja 'najla'wet ti k'iejli motieta ti its'iuyisi pi iyo ti taka'neyasa'n.