Read Iyojwa'ja Chorote San Lucas 24 Bible Online

San Lucas 24 - Iyojwa'ja Chorote bible

San Lucas 24

¹Siojopa jloma inia'ne jana inkijmaye, k'iejli mot, ti yamat'i'nijpe siojopo asejnia, ti yapilisi pa jika a'no'. Puwak itiunis siupuwa ilisanis'ni ta'a, siupuwa jini inkask'iji'n.

²Jlampa yiyet'iyisipi pa a'no', i'yent'itiej'nijpe siojopa sisaj tip'onatajaja'm, sek k'iejliyiji pa totieje.

³Yamisieta jik'ioyi pa a'no', ti je i'winis pa t'ajwes pa Saka'niona Jesús.

⁴Kawojliyisi pa, je 'yakaj paka jitienkiujnieye inwonisi. 'Yaka jla'm iwoyisi ti i'winat'iyispe, siupapo times i'nio' ti sek takasit'ik'iji'n siupa yiyits'i, ji'wuye puwa ijiat ti isis, siupa k'iejliyiji'n intaj je ijwi'yi.

⁵Jnots'ijnits'iyi, sek t'opiyeyisi'iji'n wek, 'yina papok i'nio' iyoyis'ne 'ate: —¿Yot'iyi'ni ti jlekiajlajyi'ni 'niwa t'o'l kiapo i'nio mases, ti jiwoyetajyin'ni siojo ti 'wasa'n?

⁶Lajk'ipa ka ne 'neye. Iniu kisie'e, tajli niwa a'no'l. Ataj wunitiets'i siojo iyopi ti je tal Galiléaja, ti iyo'ate,

⁷“I'nio' Jlas ja tekiajlaja napo i'nio' ti je isis ti iyoyi ni jloski'la, jank'iejwatits'i jana cruz, jlomas ja najapeja ka inoyena'a kisie'e ti jantajli ni a'no'.”

⁸Jiwekie'ejat'ipi ti jitiej wujwa siupa iyot'iyipi pa Jesús.

⁹Ti yapiliet'i'nijpe sekyi'i takajwejlanayisi siojopo itijwa'm niwa sikioye ijwienjli tom'niji injlojwajnas siupi iyo ti i'winis, je japokata siu'neje papo i'nio' t'ipi.

¹⁰'Yina siojopo injlojwajnas 'yakakiuyeyits'iji pet. Iyonat'iyisijpe 'ate japo asejnia ti takajwejlanistaja: —Ma 'es pi jiwoyeyi, jlajmi woyeyi. Siojopo asejnia japokajimpe japo María Magdala jleliki, siu'neje jlaja Juana, siujlieja María 'neje Santiago jlet. Po' 'neje papo ijia jla'yispe.

¹¹

¹²Pedro yamat'ipi wek ti i'yene pa a'no', je iyo ka je int'osi. Yiyi ti t'akanat'iyi'nijpe ti i'yentaja'ni jik'ioyiyi, pajata'ne jla'am pa lotakinie ti i'wine siupa tekiajlaja wita'm, sek yi'i wek. Yapiliet'ipi wuj ti jnots'ijni ti i'wina pet ti kia'iyo.

¹³Japak siojopa jloma ti Jesús iniu kisie'e, japo times i'nio' siojopo jla'yist'i'nijpe jla'am pa Jesús, ti yamat'i'nijpe pet ti ijlias 'niji yi'i jlaja Emaús, isi' jlase' t'ipi ni'ne ka itijwa'm niwa sikioye ijwienjli tom'niji kilómetroja pa k'iejliyiji yi'i pet jlaja Jerusalén.

¹⁴Jitiej ijiutisie 'najk'i siupa iyot'iyiyipi paka ti kia'iyo.

¹⁵'Yina ti takamtijniejne'n, Jesús 'yakets'iyeje'n ape'e ti t'iskiunk'iji'n sekyi'i ti jla'yisa'.

¹⁶'Wanjliyi i'winisieta, 'yinit'iyijpe ka poye pa kanto'm ilia'm pa jlosik, it'imina ti je itiant'iejesi.

¹⁷Jesús i'yasat'ijyimpe ti iyo'ate: —¿Tempa ataj jlotieyi 'najk'i? Sekyi'i yajapayisk'iji'n kiu', 'yakaja'a ti je inkase'n.

¹⁸Iyo'ne 'ate siojo jle' iyo'ate Cleofas ti isiujlie: —¿Amkatat'e ti jlejyi jana Jerusalén ti je 'najane pa ka wone siukia iyo ki po'?

¹⁹Jesús iyo'ne 'ate ti i'yase'n papoka: —¿Tepit'i iyoyiyi paka? Sekyi'i iyoyis'ne 'ate: —Siukia tiwonaja'ne kia Jesús Nazaret jlele, injwejlanik jiwo ti jijweye po', Sinia' wuj ti ijiuniti siukiwa ilisane, siu'neje kiwa iyo jlamtikie', pajlat napo i'nio' ti ijiat ti yiminis.

²⁰Siunapo pa'yijis jika anechiyasas siu'neje napo saka anechiyasas jlam ti iwinis ka tiliana, it'imina'ne ti tik'iejwata'a jana cruz.

²¹Atejnisiejap'antajape ka jlama ka i'manit napo Israel jika kia'lis ka injwajiete'n. 'Nakayi najapaja kiwa jlomas yamk'i.

²²Asejnia siojopa talts'e awak'i kaskelit siukia motk'i ti 'nesa'ni ti tajlis a'noyi, ti ijwilts'e je i'winis ka nejyi pa a'no'. Ijwilts'e ti po' papo injlojwajnas poli jlele inikajanitia'm, ti iyoyi pet jika'niyejayi japoka asejnia ti Jesús iniu kisie'e, 'wasa'n.

²³

²⁴Jlampet ti sa'am po' japo jitiej iniayisi pa yi'i pa a'no', ijiate ka 'wena iwo wata'a siupa iyo japo asejnia ti i'winayis pet, 'yina je i'winis pa Jesús.

²⁵Sekyi'i Jesús kiakt'ipa iyonayipi: —¡Ijiatp'aneje ti int'oniejyi'n, ti jikakiunieyi siuniwa ijwi'il papo injwejlanawos t'ipi!

²⁶¿Jet'imi 'esiji ka jitiej inok'i ti wuj ti janilayiti siunie tiwonaja siunie Injwajieti ti Sinia' jijliujwanik, siuti je yijliyi'ijyi ti jawo anechiyasa'?

²⁷Sekyi'i ti yamtiyek'iji'n k'iye siupa iyo niwa Sinia' jlamtis, ti ijwi'il jla'am pa Jesús. Iniajnat pa Moisés iyo kiwa ilisant'iyijpe, paj ti yiyeyi papo injwejlanawos t'ipi iyo pet puwa ilisane.

²⁸Ti yiyeyisi siupa isi' siupa ijioyisi, Jesús ijwil ka jnajyiyi siupa jajnojwi.

²⁹It'imina'ne ti kiak iyonisi: —K'iuts'e'm ti ja ke iwina, ká ajalas ka ak, no'ot majleyeyi ka ajnaja. Jesús its'iuye'ne japoka, sek 'wanjle'e'ne siupa ajnaj, yamak'i siupa ijioyits'i.

³⁰Jlampa tejeyeyits'i ape'e japa inak totieja ape'e, Jesús isimat'iyipi japa woye, iyoye jinikanitieyejayi pa Jinia', its'isajaja'n, sekyi'i ti iwinayi.

³¹Sekyi'i ti jiwekie'aja ti itiant'iejesi, kajeyepa ti 'yiniye ka t'eki ape'e siupa iyo ti laj jlosikiejets'i'ni. 'Yina Jesús ininetiajnata t'ipi.

³²Ininekiajlayisi siupa iyo ti iyoyis 'ate: —Siuti anamak'i ni 'nayi, ti takamtijnien'ni sik'ioye, ti ijwilts'e'm niwa Sinia' jlamtis yi'i ni ji'wet, po' ni awoyi ti alate ti ts'ajkaj'ni.

³³Ta'a t'ipi ti tejeyis ji'niajk'i, ti yapilis Jerusalenne. Yiyi siojopo itijwa'm niwa sikioye ijwienjli tom'niji injlojwajnas,

³⁴ijwilisiam'ne ti iyo'ate: —¡Ijiatp'aneje ti yapi pijia'm ja Saka'niona, ini'wenkijna'm ja Simón!

³⁵Kiak iyoyet'iyi'ijyi pet siojopo times, ti takajwejlajna'm japo ijia, siupa i'nio' ti yisitk'iye, siu'neje ti jiwekie'aja t'ipi ti itiant'iejesi ti paka Jesús, ti its'isajaja'm japa woye.

³⁶Jlam'ne je ilitajasi'iji ti jitiej ijiutisie, ti Jesús inikajanitieja'm japo t'eyasajnas jikiowe'e. Itijwil'ne jik'ioye ti iyo'ate: —'Esiji ka akamaja'.

³⁷'Yina ti wuj ti jnots'ijnits'i, ilianayi'ik'i ijwil'ne ka jisiak'ala pa Saka'niona pa ka in'wenis.

³⁸Jesús iyone'ne 'ate; —¿Yot'iyi'ni ti ijnots'inajyits'i? ¿Yot'iyi'ni ti kiak jiwonayi niwa asosikis, ti askakiujnieye po'?

³⁹'Yenajyi'n 'niwa isioye, siu'neje 'niwa isietis. Kiesak'i'm 'nakayijna'a ti ja 'najanayi pa jawonayi ti ya'am. Si'wanjli wita'm ti 'isie'n po', jla'yi ti yili po', je iyoye 'ate ni insak'al ti laj t'isiena', jla'yi ti laj jleliye.

⁴⁰Iyojlitieje ti i'winkinaja'm japo puwa jikioye, siu'neje puwa jisietis.

⁴¹Mawat 'wanjliyi siupi iyo ti 'yakakiuyis, kajeyepa ti jnots'ijnits'i, jla'yi ti wuj ti inkase'n. Jesús i'yasen'ne japo ti iyo'ate: —¿Lajk'i pet paka k'iejliyeyi pa ka tiujw?

⁴²Iwinisiam'ne pa si'yus jiwa ti tisiniana t'ipi.

⁴³Isimat'ipi ilia'm, sekyi'i itiujw'ne jitieyi'i japo t'eyasajnas.

⁴⁴Ti itimat'iyijpe sekyi'i iyonat'iyijpe 'ate: —Siukia awo 'neye, ki tiwonak'i, siuniwa ajwe'lasem'ne ta'a ti je atal aska kiowe'e, ti awo'ate, “Janeyi siojona jloma ti ja'nakaj siunie iyo ti sijwe'el ni Moisés jika'neyasajnaye, siu'neje niwa yi'i pet niwa jilisajna' t'ipi pet papo injwejlanawos, jla'yi ti yi'i niwa sálmojos.”

⁴⁵Sekyi'i ti jiwekie'aja t'ipi ti itiant'iejesk'i, kajeyepa ti jlam jla'am ti iyo jlosikie' ka 'najane kiwa Sinia' jlamtis yi'i ni ji'wet,

⁴⁶ti iyoyet'ipi 'ate: —Siuniwa Inamtis yi'i ni ji'wet ijwi'il ni Injwajieti ni Sinia' jijliujwanik ja wujwa ni jijliak'ali, janekieyinie'e ti ja tiliana, 'yina jlomas ja najapeja ka inoyena'a kisie'e.

⁴⁷Sekyi'i ji'lij iwijna'm pet napo jika kia'lis ka wo jika'niyejayi napo ijia ka wone'ate, “Woye asosikis ink'iejyisa', 'nakayeyijna'a ti Sinia' jamp'elisina', ka je intajlat'ase'm ni aske'.” 'Yina iyo jla'am niwa Sinia' jlamtis ka tiniajnata napo Jerusalén jlele ka tiwok jika'niyeja' yiji 'niwaka, 'yina paj ka ineyeyinie'e siunapo i'nio' yijits'i wikie'eyi niwa ajnatis.

⁴⁸Asa'am ti askimet ti ja akinieyiji'n ti ja ajwela 'niwaka ni siuniwa ji'wena'.

⁴⁹Je ijiat ka je ijliu'wase ti jane astepe'e siojona Inia' pajk'i ti ijwilt'ipi. Ká atajlakiunie'e 'ne yi'i jla'a Jerusalén, ijiatjliyijna'a jla'am ka atajatiejna'a siunie asjweyeja' ti jantal poliyi.

⁵⁰Jesús yamat'iyijpe japo t'eyasajnas, ti ijioyi kisie'e ti tajla'm jlaja isi', je tojwape'n jlaja Betania siojo ijioyi'i. Yiyisi siojo ijioyits'i, Jesús jikioye t'ipa ijieyet'ik'ipe pijia'm, ti iwijna'm pa 'es japo t'eyasajnas.

⁵¹'Yina je iliyi ti jikioye yink'i ape'e ti iwijna'm pa 'es japo t'eyasajnas, ti tikiniejayi pijia'm ti toki poliyi.

⁵²Itimisi ti iyunitis ti yapiliet'iyispe Jerusalenne, wuj ti inkase'n pa ijioyisk'i'ni.

⁵³'Yina je iliyisi ti ijioyisi'ni japa 'najla'wet ti iyunitis pa Sinia'.