Read Iyojwa'ja Chorote San Lucas 6 Bible Online

San Lucas 6 - Iyojwa'ja Chorote bible

San Lucas 6

¹Siojopa jloma ti i'nio 'wanjlijyi'n, Jesús yikiajli'ni pa inwomik, jla'yis japo t'eyasajnas. Siojopo t'eyasajnas itionat'ijyits'ijpe puwa jitiajlas pa ipiatatiok t'ejes 'wanjle'e jiwats'o, ti itiuwis.

²'Yina Fariséojos po' papo sekyi'i, papoka'ne ti i'yase'n pa Jesús, ti iyo'ate: —¿Yot'iyi'ni ti jiwoyeyi siunie je 'esiji ka tiwoki ti yiyetaja siojona jloma ti i'nio 'wanjlijyi'n?

³Jesús isiujlie papo ti iyo'ate: —¿Tepi iyo siupi iyot'iyipi pa David, je 'najanayi? David siu'neje papo jla'yis pot'ipi japa jloma ti inil'liajne'n,

⁴yamat'ipi ti 'yuyi puwa woyejes, siupuwa t'otataje k'iye pa Sinia', ti yi' kiajwe japa 'najla'wet. Isima'ne, sekyi'i itiujw, isijwanayi siupapo jla'yis. Papokata jla'am papo pa'yijis ti 'est'iyijipi jla'am ti itiuwis puwak woyejes.

⁵Jesús iyo'ne 'ate ti yinat'iyijpe ape'e: —Siojona jloma i'nio 'wanjlijyi'n yi' kiajwe ni I'nio' Jlas jijweye.

⁶Siojopa jloma ti i'nio 'wanjliyet'ijyi'ne, Jesús taka'neyasa'n kiajwe japa 'najla'wet. Sekyiyet'iyijpe siupa i'nio' ti jikio' 'yalk'i tom jijweye.

⁷Jlam'ne papo Fariséojos, siu'neje papo taka'neyasane siupa Moisés jika'neyasajnaye, jlam yamisk'ijin'ni, ti iyo kan'wenisieje ka injwajiet pa i'nioye, ka neniji siojopa jloma ti i'nio 'wanjlijyi'n, ti iyo ka pakaye ka intajlatisie.

⁸Ti Jesús 'yijene pi iyone siupa jikiowe iyonisi, sekyi'i iyone'ne 'ate pak i'nio': —Neppijia'm, jon 'ne kiu'. Iniyet'ipi pijia'm pa i'nio', sekyi'i ti takasitiet'ipi.

⁹Iyo'ne 'ate papo i'nio': —Ja'yasa aswa'am, ¿tent'i jla'am siupa 'esiji ka tiwoki siojona jloma ti i'nio 'wanjlijyi'n, nakat'e ni je 'es, ni'ne ka jiliaye intajleje? ¿Ka ijwajiete pi jiwet'ia, ni'ne ka i'mate?

¹⁰Jitiej yikiajlat'iyipi siupapo tijwajiape'n, sekyi'i iyone'ne 'ate pak i'nio': —'Akajni 'ni akio'. Je iyo ka inka'm ape'e siupa i'nio', iyo'ni siupa tiwonaja, sekyi'i 'es'ne.

¹¹Siupapo i'nio' sekyi'i wuj ti jwesis. Inijlok'ijin'ni'ne ti iyoyits'i 'ate: —¿Tepat'e ka iyonaja 'ni Jesús?

¹²Pak siupa jloma ti Jesús ya'am ti ijio ape'e siojopa tikijnaki, ti iyo t'ajlayeja'. Itijw siupa ajnaj ti takamtijniene pa Jinia', ti iyo t'ajlayeja'.

¹³K'iejlimot ti tanat'iyipi japo t'eyasajnas, pakayi'ne ti isi'mik'i siojopo itijwa'm niwa sikioye times tom'niji ti iyone jijliujwajnasa'.

¹⁴'Napoka'ne siu'napo: Simón, ti jlamt'ipi'iji jla'am pa Jesús ti iyo jleye, ti iyo'ate Pedro, Andrés siojo jikilia jla'am, Santiago, Juan, siu'neje ja Felipe, Bartolomé,

¹⁵siu'neje ja Mateo, Tomás 'neje, Santiago siupa Alfeo jlas, siu'neje ja Simón Celote,

¹⁶Judas siupa Santiago jlas, siu'neje pa Judas Iscariote ti janekial pa Jesús.

¹⁷Jesús yapi'ne ajnat'e ti taj'l ape'e japa tikijnaki, jla'yis japo t'eyasajnas. Yiyisi siupa ajnat ijniul wita'm, sekt'ipa yajapat'iyijits'ijimpe. Initaj seka'a siojopo t'eyasajnas ijia t'ipi, siu'neje papo tal Judéaja, ti kia'iyo 'loj, siu'neje papo tal Jerusalenne, siu'neje papo i'nio' tal jikiusk'i jlaja ajnat jle' iyo'ate Tiro, siu'neje jlaja Sidón.

¹⁸Ijioyisi pa Jesús ti its'iuyisi, jla'yi ti iyo ka Jesús injwajiete siupuwa jiwet'ia iyot'iyipi papo i'nio'. Siupapo jitiejt'e je isispe, papok'ne siupapo ti isis ti tijwajyi pi jiwet'ia iyo.

¹⁹'Yina siupapo i'nio' wikie'eyi ti iyoyistaja pet ka inkiesits'i pa Jesús, lapakawo ti i'wi'in siupapo i'mieniti'n, ti pak isiene pa jijweye ti tal jiwa'm.

²⁰Jesús jitiej yikiajlat'iyipi japo t'eyasajnas, sekyi'i iyone'ne 'ate: —Sinia' wuj ti imp'elisina ti asa'am ti imp'elisisa'. Lapakawo ti tijna'yase'm ni jika anechijiayas ni Sinia'.

²¹“Sinia' wuj ti imp'elisina ti asa'am ti inel'lianajyi'n 'nakayi. Lapakawo ti je ijiat ka je inep'isiejyinna'a. “Sinia' wuj ti ip'ilisijne'n 'nakayi siunapo ti asa'am ti je paj ka je apajyi'n. Lapakawo ti je ijiat ka je askiyets'ijinna'a.

²²“Sinia' wuj ti imp'elisina ti asa'am, siunapo i'nio' ti ne'wa'ase'm, siuti ja inokiosats'i kisie'e, siu'neje ti inlakiye, siu'neje ti ja ke iwo asjaye, siunie jiwoyeyi ti jikinieyi ni iyo ni I'nio' Jlas.

²³Siojona jloma ti kiak jawoyeyi, nikanitiejyi'nna'a, jonitienie'e ni Sinia', siunie asjwajieti ti yi' poliyi. Lapakawo ti 'wena je ijio'we siupa iyot'iyipi papo jitise'l t'ipi papo i'nio', pa iyone papo injwejlanawos t'ipi.

²⁴“¡Jlampet ti asa'am ti jwajla'a ji'wena', aswet'ia japoye, ja wujwa wata'a ti jamp'elisisa', 'yina ti janek 'niji ti ji'wena' siunie 'es ti yi'ase!

²⁵“¡Siupet ti asa'am ti inep'isiejyi'n 'nakayi, kia'iyo wuj ti jamp'elisisa', kajeyepa ti aswet'ia japoye, ja inel'lianajyin'ne! “¡Jamp'elisisa' wata'a, ti asa'am ti paja ka je ask'iyek'ijin'ni jiwekie'e asa'am. Siunie aswet'ia jawoyi, ti asajlas japoye'ne pet ti jantajle ti laja anikanitieyeja'!

²⁶“¡Ja imp'elisisa' wata'a, asa'am ti ijnonitieja. Aswet'ia japoye, 'yina kiakji'n iyoyipi papo jitise'l t'ipi papo i'nio', ti ijiunitis siupapo je ijiat ka injwejlanawosa'!

²⁷“Jlampet ti asa'am ti jik'iuyek'i'm, jayo'nase pet 'ate: 'Namajayi siunapo teje'yi aselia'm. Wonayi pet 'ate siunie iyo'nase ti teje'yi aselia'm, ti ja ekiajlayi pet ilia'm ni 'es.

²⁸Siunapo ipiejwuyi'ase'm ti iyo ka aswet'ia poye, ekiajlayi pet ilia'm ni 'es, ti jantaj'lase. Siunapo inlakiye, 'ajlanapi ti jajwelayi pi Sinia'.

²⁹Siuti akiecha jampaj, 'ne yi'i ni ak'iolo', jante'ma ka atojmatayi ni ak'iolo' kiecha. Siuti akiecha jajna'la ni a'wu', siunie tomi pijia'm, e'nate ka ijna'la siunie jitiujmate isia'm.

³⁰Siuti akiecha t'ajle'a'm pi k'iejliyi, ke ejna'm. Kia'iyojliyi ti akiecha po' pi ijia'la, ejlowekie'e ka je ekial.

³¹Siupa jiwoyejyink'iye ka tiwona'ase, kiak wonayi napo as'lejwas.

³²“Siuti napokataja siunapo ineminajyi'n ti asemijnaye ja ena'yi, ¿tent'i pet siupa 'es ti jajwi'il, ka ijwila ti jiwoyeyi? Ji'wena' siunapo inke' jiliajnis, 'yina kiak iniwonisi pet, i'ye'en siunapo iyojonk'iye, napok yiminayis pet.

³³Siuti ji'yenayijits'i napoka siunapo i'ye'nase'm, ti ji'yenayi, ¿tent'i pet siupa 'es ka ijwi'il, ka ijwila ti jiwoyeyi? Siunapo inke' jiliajnis, kiak iniwonisi siunie jiwoyeyi.

³⁴Ni'ne ka napokataja ka 'yenayijits'i siunapo, ti ji'wena ti po' na jank'iuyet ji'wet'e, siupa t'ajla'ase'm, ti jiwenajia'm. ¿Tent'i pet siupa 'es ka ijwi'il, ti jajwila ti jiwoyeyi? Kiak iyojliyi naka siunapo i'nio' inke' jiliajnis, kiak iniwonisi siunie jiwoyeyi, i'yenijits'i siunapo 'yaka po' na ti jank'iuyet ji'wet'e, siupa t'ajla pi jikiecha pi k'iejliyi, ti jitiej iyomk'i.

³⁵“'Esiji ka i'namajayi siunapo teje'yi aselia'm, ataj ka awomats'i ka ajwela ka k'iuyet ji'wet'e paka k'iejliyeyi, ka awoye lajaye. 'Nakayeyijna'a ti ja ke jlasiye siojona as'wajietiye, jla'yi ti Sinia' ti wuj jilisa'ase'm jlam ti jikap'ijliuskiye yi'ne siunapo i'nio' je 'esijiyi, siu'neje napo jwesis.

³⁶Kap'ijliuskiyejyi'n, niwonayi'ate ni Asna' ti takap'ijliuski jla'am.

³⁷“Ká alakiye napo as'lejwas pi k'iejliyi ti ji'wenayi, 'nakayeyijna'a ka Sinia' je inkajanitie'yi astepe'e pet siunie jiwoyeyi. Ká atajlatayi pa k'iejliyeyi ti ji'wenayeje pi akiecha. Sinia' ja ke intajlat'ase'm pet paka k'iejliyeyi siuti jiwoyeyi. Nip'elisinapi 'nakayeyipe pet ti Sinia' janwe'nase'm pet pi k'iejliyeyi.

³⁸Wenajia'm napo as'lejwas pa k'iejliyeyi, 'nakayi ti Sinia' janwe'nase'm pet pi k'iejliyi, ja 'etsakaja siunie Sinia' janwe'nase'm. Jampoyi siojopa elichi, jampatajanie'e jajnojlietiji pet siupi jiwonayi napo as'lejwas ti janwe'nase'm.”

³⁹Jesús yijnapeje jiwek siunie, ti iyo'ate: —¿'Est'iyiji siunie i'nio' ti talok ka into'on ni jikiecha ti kia'iyo talok pet? ¿Jot'itie ka jiliaye je inoyi wita'm ka inok'isia'm japa kiaweja'?

⁴⁰Je ti'wena pa siunie i'neyasanik ka int'a'n ape'e paka jika anechiyasa. Ijiat itieje jla'am ti yamata ape'e pet siunie t'eyasanaja, jiwekie'eja ti ijniujliji ni jika anechiyas.

⁴¹“¿Yot'iyi'ni ti ji'yenayi ni akiecha siunie yiji jana jitiete, jlam'ne jop jlosili jiwekie'e ni jitiolkiot, jlam'ne ka ani'yejne'n pet ti po' ni yiji jana atate, ti jla'm ijiate jla'am ti wu'we ni atolkiot, ti ijiate ti a'lawaja ni yiji jana atate?

⁴²Ni'ne ka awone 'ate ni akiecha, “Se'nate ja ijialas ni atolkiot.” ¡Ijiate wata'a ti ijnoski'la'n! Najnat ka aton kisie'e ni yiji jana atate ti atolkiot, sekjane'yi ka jiwekie'ejana'a pet ka 'esieyiji ka 'yene ni jitiolkiot ni akiecha, kajeyepa ti ja 'esieyiji ti ja'yen ts'ijiye.

⁴³“Je ti'wena japa ka a'laye ka jla' je inses, ti 'es japa jitisiuk. Ka kia'iwo 'neje ka poye japaka jla' inses, ti je 'es japa jitisiuk.

⁴⁴Niwak 'yakajanit jla', jla'a a'la' ti 'es, ni'ne ti je 'es. Je jla' siujlie'e ti te' siuniwa higok jla', ni'ne ka titiajlajaja'm niwa ts'ejnietio' ti tilienajata siojona a'la' jlel po'.

⁴⁵Kia'iyo siunie i'nio' ti 'es, jlamtis je niliaja pet, kajeyepa siunie 'es yiji ni jlosik. Jlampet ni i'nio' ni je 'es, jlamtis je isis pet, kajeyepa je 'es na jlosik. Siunie tipoyiji ni jlosik ni i'nio', niwaka'aja ti tamtiyeta ni i'nio' ti talk'i ni jikiwet.

⁴⁶“¿Yot'iyi'ni ti jiwonak'i 'ate, “'Yaka'niona, 'Yaka'niona”, ti je k'iuyek'i'm siunie ti ajlotieja'ase'm?

⁴⁷'Yejne'n, jajwi'lase'm siunie a'yejnap, ni i'nio' ti ijiok'i ti iyoyi siuniwa yamtis ti ipi'ya:

⁴⁸iyoye'ate siunie i'nio' ti iyo ka inlesane jana ji'wuk. Iniajnat ti taka'an, ti itiji siupa jane'ne japa ji'wuk, paj ti tojwaja yiyeyi siojopa sisaj, sek yina'a ape'e japa ji'wuk paka. Siuti yiyetaja ti i'niat itiyak'i pijia'm, 'yina je ikaj'le pet japa 'wuk, ikajlitieje ti i'niat itiejata'a, lapakawo ti po' siupa to'm isia'm k'iye japa 'wuk, jak je iyoyiji ka injlane'ni.

⁴⁹Jlampet siunie je iyoyi siuniwa yamtis ti ipi'yayeta, iyoye pet 'ate siunie i'nio' ji'wuk ilisantaja, 'yina ti lajk'ipa ka into'm isia'm k'iye ka 'net pijia'm. Siuti i'niat i'yujlietajk'i pijia'm itie'e japa 'wuk, je ijwietanit ta'a'ne ti itiete isia'm. Sekyi'i netiajnen'ne japa 'wuk masa.”