Read Iyojwa'ja Chorote San Lucas 7 Bible Online

San Lucas 7 - Iyojwa'ja Chorote bible

San Lucas 7

¹Ti Jesús itimayi ti takamtijniene papo i'nio', yamat'ipi ti ijio 'niji yi'i jlaja Capernaum.

²Sekyi'i'ne pak tokis jika anechiyas Roma jlele, pak jikawo siupa ti wuj ti je 'es, ijlienat'ipi ka 'na'al.

³'Yina siupa tokis jika anechiyas, ti ipi'yayek'i'ni papo ti jitiej ijiutisie pa Jesús, takajlunie'ni ka toki k'iye. Ijliuyet'i'nijpe siupapo Judíojos ti jle' po' ka inip'elisinisi, ka ina'asiyis pa Jesús, ka injwajiet pa jikawo.

⁴Yamat'i'nijpe, yiyisi ti kiak t'ipa iyonayisipi ti ijwilisia'm, wuj ti inip'elisinisi, ti iyo'ate: —'Esiji ti janoyeje siojo tokis jika anechiyas,

⁵kajeyepa ti wuj ti iyojwi'n sik'ioye ti sa'am Judíojosts'e'm, jlampe ti takat'i'n ape'e jlaja 'najla'wet ti 'nelanjie'e t'otatajayijpe.

⁶Jesús yamk'i'ne siupapo name siupa tokis jika anechiyas. Jlampa jet'ipa tojwayi'nijpe wata'a siupa ji'wet yi'i, ijliuyet'ipi ilia'm siupapo t'ajajnajwas ti ji'lij iwijna'm, ka iwone 'ate: —'Yaka'niona, ká anijlak'alinit'ni its'ioye, 'wanjliyi je 'yuk'i'm ka ajo kiajwe jlaja i'yuk.

⁷Tempi it'imina ti je awo ka ijio'wa, ka yama'ayi pet. 'Esijyi ka amti'yi wekie'e, ja 'esie 'ni ikawo.

⁸Kia'awo po' napo 'yaka anechiyasas ti a kiajwe pet, siunapo 'yakawos pet ti ya'am ti tokis jika anechiyask'i'm yi' isiajwe. Jak je iyoyiji siuti awone 'ate, “Maj je t'o'ni”, yama'aja. Ni'ne ti awone 'ate, “Jomet”, kia'iyojliyi nama'aja ti ane. Ni'ne ti ajloyeje pi k'iejliyi, ijiatjliyi its'iuk'i'm, ilisanayi.

⁹Jlam jnots'iniji'ni pa Jesús ti ipi'yayet'ipi ti kiak iyoyi, sekyi'i tejeyet'ipi ilia'm siupapo i'nio' jla'yis, iyone'ne 'ate: —Ijiatk'i siunie jajwi'lase'm ti 'yakajlitieje ti 'napokayeta Israel jlele ka kia'iwo wata'a paka 'wi'in ka wo'ate siu'nie i'nio', ti ijiate jla'am ti jitienkiujnieye po', ijwienjliyi jla'am.

¹⁰Jak je iyoyiji'ni siupapo jikawos siupa tokis jika anechiyas, ti yapiliet'i'nijpe, jlampa 'nesat'i'nijpe i'winisie pa i'nio' ti 'es, jlam'ne pajk'i ta'a ti je 'nesjli'ni kiu'.

¹¹Jesús jlampa itimat'iyijpe, yam'ne ti ijioyi siujlieja isi' jle' iyo'ate Naín, jla'yis japo t'eyasajnas, siu'neje papo i'nio' ti je pini'.

¹²Ti majleyet'iyipi jlaja isi', i'winat'iyispe ilia'm papo i'nio' ti yamisi siupa i'nio masa, ti k'iejli yamistaja a'noyi ti jantejesk'iye. Pakajampe pa jlas ijwienjli siojopa asejnia ti ask'ilieki. 'Yina 'loj papo i'nio' sek ji'wet'e yamisk'i ti yapisi.

¹³Ti Jesús i'yejne'n japa ask'ilieki, wuj ti ip'ilisin'ni, sekyi'i iyone'ne 'ate: —Leyi ti jlap'ni.

¹⁴Yamat'iyipi siupa ijno'wet tena ape'e, sekyi'i isiets'e'ne. Yajapak'iji'n siupapo itijlia. Pakayi ti Jesús iyone 'ate pak i'nio masa: —Jwemik, a'am ti ajwel'ni ti awo'ate, ¡neppijia'm!

¹⁵Yiyet'ijyimpe pak jwemik, tamtiye. Sekyi'i Jesús yikiajli'ne japa jlet.

¹⁶Siupapo i'nio' ti i'winat'iyispe, wuj ti jnots'ijnits'i. Sektaj'le papo i'nio' ti iyunitisie pa Sinia', ti iyoyits'i 'ate: —¡Injwejlanik jiwo wuj 'ni a'wena ti yi' sikiowe'e! Kiak t'ipa iyoyeyisipi'iji 'ate: —¡Sinia' name 'napo jika kia'lis ti janoyeje!

¹⁷Paj ti itijwaja'ni siujlieja ajnat Judea, siu'neje puwa isi'il iniujwape'n siupa iyot'iyipi pa Jesús.

¹⁸Ti Juan inajiejnawo 'yijenat'iyijpe pet pi iyone wikie'eyi kiwaka, kajeyepa ti t'eyasajnas jla'am ti ijwijla'm, tane'ni papo times t'eyasajnas,

¹⁹papok'ne ti ijliuyi pa Jesús ka i'yasisi'n ka iwonisi 'ate: —¿Mi a'am ti pajk'i ti injwela'ni ti ja'nes, ni'ne kapoye pa jikiechaye ti jats'iukin kiu'ujwe k'iye?

²⁰Yamat'i'nijpe ti ijioyisi pa Jesús, yiyisi ti kiak t'ipa iyonayisipi: —Juan inajiejnawo jlam kasjlok'iji ka i'yasa'a, ti iyo'ate, “¿Mi a'am ti pajk'i ti injwela'ni ja'nes, ni'ne ka poye pa jikiechaye ti jats'iukin'neje k'iye?”

²¹Ijyiwitisi ti Jesús 'loj papo ijwiejiete'n siupapo je isis, i'mieniti'n papo i'nio' jitiej je isis, je pini 'neje papo i'nio' ti talojo' ti ijwiejiete'n.

²²Iyo'ne 'ate pa Jesús ti isiujlieyi: —Maye'ni, jwelayi pi Juan siuniwa iyo niwa jipechiyeyi, siu'neje ni ji'wena', ti siunapo talojo' i'winaja'n 'nakayi, siunapo je t'ojni'n t'iskiuniek'iji'n 'nakayi, jlampet siunapo inkiso'ol jitio' yi'ik'i netiana kiwa ijiok'i'ni. Siunapo ti je tipechijyimpe ka jwejlikie ti alk'iji'n niwa jik'iot tiojwa'l, jlampet siunapo i'nio mases 'wasanajan pet. Siunapo i'nio' ti p'ijliusis tiwok pet jika'niyejayi siuniwa Sinia' jlamtis ti isis.

²³“Ikap'ijliuskiye e'ne siunie i'nio' ijiate ti je iliyi ni jitienkiujnieye ti jitiej iyomk'i'm.”

²⁴'Yina yam'ni jiwekie'e siupapo Juan jikawos t'ipi, Jesús iyoyet'iyipi ka inamtiyi k'iye papo i'nio' pa Juan, ti iyo'ate: —¿Tenpe siupa ji'yenayi, ti jloye 'niji yiji ni ajnat laj i'nioye'e? ¿Sisejt'imipe pi ji'wena' ti jlajwu iliaki'ni?

²⁵¿Nakat'e siunie i'nio' siunie ji'wuye isis? 'Najanayi siunapo i'nio' ji'wuye isis najata pet ti iyoyisi ti iyoyis'ni jiliakijnieyeja', yi' kiajwe niwa anechiyasas ji'wuki'l ti isis.

²⁶Kiujliek'i'm, ¿tent'ipi siupa ji'yenayi? ¿Ma injwejlanik jiwot'ipi? Ijiate, paka 'yina 'yaka'm ape'e pa injwejlanik jiwo.

²⁷Juan naka siunie ti iyo'ate niwa Sinia' jlamtis, ti ijwi'il: “'Yejne'n, ajlo' siunie, ti ya'am ti ika'niyewo, ka ina'an ak'ioye, ka iwakajlanit ak'ioye siupa jano'we.”

²⁸Jajwi'lase'm, je ti'wena paka i'nioye ape'e 'ni ajnat ka inka'm ape'e ja Juan. 'Yina jlam pet siunie ti ijiate ti je 'esijiyi ti yiji ni Sinia' jika anechijiayas, nak 'yakama'aja pet ape'e.

²⁹“Wikie'eyi siojopo ipi'ya'ne ja Juan, siojopo isi'm ilia'm puwa inkat'ijnieyejes kia'iyojliyi, iyoyis'ne 'ate, “Ijiatp'aneje jla'am niwa Sinia' jlamtis ti 'es jla'am”. Ininekiajlisi'ni ja Juan sekyi'i ti iniejienaja'n.

³⁰Siojopo Fariséojos, siu'neje japo taka'neyasane siukia Moisés jika'neyasajnaye, je iyoyisink'iye siunie Sinia' iyotaja ka iwone ti jota inoyeje, it'imina ti je iyo ka ininajiejne'n pet, ka Juan inajiejne'n.

³¹“¿Tent'ipa ka'yejnap napo i'nio' siu'niwa jlomas? ¿Tent'ipa 'yiniye?

³²Iyot'e 'ate siunapo kia'lis ti yiyits'i na jiliakijnie'wet ti aj'leje'n, ti yik'iji'n ti tiliakijni'n. I'yase napo t'ajajnajwas ti iyo'ate, ¡Si'woso'l alanajata, 'yina je jiliakinie! ¡Enajatajats'i siuniwa saka'laja ti k'ijliajats'i, 'yina je jlapajyi'n!

³³“Kajeyepa 'nes ja Juan, ti je ti'yekiunieta, ka kia'iwo 'neje ka i'yaje ni at'es, jiwoyeye'ijyi 'ate ti jijwela', ¡Imosik yiji!

³⁴'Yina ti 'nesa'aja pet 'ni I'nio' Jlas, ti ti'yekiu'n jla'am jla'yi ti i'ya jla'm i'niati, nak jijwelaye'eje ti jiwoye'ate, ¡Jlak je iliatk'i, 'yata 'neje! ¡Iyo t'ajajnajwasa' siunapo i'nio' inke' jiliajnis, siu'neje napo isi'm ilia'm puwa inkat'ijnieyejes!

³⁵“Siunie t'ajankijnieye ni Inia', 'yaka ti yiji siunapo i'nio' ti iniuk'i ni ji'niayi.”

³⁶Pojompe siupa ijwienjli papo Fariséojos ti ijioyi pa Jesús ti ijialas ka ijnoyi 'wete pa Jesús, ti iyo ka inkijwane ti ti'yekiu'n.

³⁷'Yina sekt'ipa yiye'epe siojopa asejnia, ti je inilesanijiyi ti iyoyi pi jike', seka'a yi'i japak isi'. T'ijieyi wekie'e pa Jesús ti yi' wet'e pak Fariseo, ti isijwane ti ti'yekiujni'n, yamat'ipi ti ijioyi, itiu'un siupa a'la' jlets'i ti jini inkajk'i, jiwe japa sisamak.

³⁸'Yina yapayi'ni ti 'nesayi, yamitayi puwa jisietis pa Jesús, jitiet t'e' t'ipa itionatat'ik'i'nijpe puwa jisietis. Sekyi'i ti ji'wole ilijayik'i, yi'liak'i'ne ti its'iuye'ni, itime ti isiayeja'm siupa a'la' jlets'i ti jini inkajk'i.

³⁹Pak siupa Fariseo Jesús ijioyi, ti i'winat'iyipi, 'yina iyo'ne 'ate ti yini'ni jikiowe'e, “Jlamt'itie ka ijiatayi ka injwejlanik jiwoye siu'nie i'nio', jlam kiak je iyotaja'ni siojona asejnia ka inkie'ne, kajeyepa ti 'yijentaja paka inwone ti siojona asejnia je 'es, ijiate ti iyoyi ni jike'.”

⁴⁰Pakayi'ne ti Jesús iyone'ate pak Fariseo: —Simón, po' ni jajwi'la'm. Simón isiujlie ti iyo'ate: —'Esiji, jwelkiamk'i'm kiu'.

⁴¹Jesús iyo'ne 'ate ti ijwijla'm: —Pojompe pa i'nio' ti iyo jikapia'aye papo ijia ti times. Quinientos japa iwijna'm siupa inia'an, siupa jikiecha iwijna'm japa cincuenta.

⁴²'Yina ti je yamits'i ape'e japa jikapia'yis ka inenisi ka intes pa jikiechayis, je iyo'ni ka int'ajla papo ijia, lapawo ti ip'ilisijne'n. Kiulk'im'nena'a, ¿tepa yi'i siupa ijiate ti janemine?

⁴³Simón iyo'ne 'ate ti isiujlieyi: —Atejnistieje ka pakaye siupa ti tip'elisinaja. Jesús iyo'ate: —Ka jla'm awo wata'a.

⁴⁴Jitiej itieteje'ni siojopa asejnia, sekyi'i ti iyonat'iyijpe 'ate pa Simón: —'Yenkiamin kiu' siujlie'e asejnia. Ti 'nelanjie'e 'oye kiajwe jla'a a'wuk, ka kia'awo ka wenk'i'm paka i'niata ka isietis ilijik'iji'n. Je iyoyeyi jla'am jlajak siujlieja asejnia, jitiet t'e' itiojnatak'i'ni 'niwa isietis, ji'wole 'yilinayik'iji'n ti ilijk'iji'n 'niwa isietis.

⁴⁵Siuti a'am, je kiak jiwo ka sits'iu'ni ka 'nikik'i. Iyo siujlieja asejnia, jajatak'i ti k'iejli 'oye 'wuk kiajwe ti its'iu'ni 'niwa isietis, ti je iliyi ti sits'iu'ni.

⁴⁶Impe' je t'iliniji'ni jla'a ijyitik, 'yina je iyoyeyi jla'am 'yilinaja'ni jla'am siukia a'la' jlets'i ti jini inkajk'i.

⁴⁷Je int'ayijin'ne, siuti jayo'naja 'ate, siuniwa 'loj niwa tip'elisinaja ape'e jikeyis, nak ijiate ti jlemijnaye po', jlam pet ni i'nio' ti je 'loj siuniwa tenaja ape'e ti tip'elisina, kiak iyo pet je wuj ni jlemijnaye ti yiyi.

⁴⁸Sekyi'i iyone'ne 'ate japak asejnia: —Siunie ates iyo ti titiajlata'a'm, tinitiajnata kajeyepa ti imp'elisina.

⁴⁹Siupapo i'nio' ti isijwanisi yikiajlayisi'i ti ti'yasanisi'ni, ti iyo'ate: —¿Tent'ipa ijwil ka iniwone, ti ijwil ka inetiajnat pa jikeye pa i'nio'?

⁵⁰Jesús iyone'ate japa asejnia: —Atankiujnieye ti 'es ni it'imina ti i'nes. Maj, kama ti ja ak.