Read Iyojwa'ja Chorote San Lucas 9 Bible Online

San Lucas 9 - Iyojwa'ja Chorote bible

San Lucas 9

¹Jesús ijiutiet'ik'ipe wita'm siojopo t'eyasajnas ti itijwa'm niwa sikioye times tom'niji, jijweye iwijnamk'i, jla'yi ti yikiajle ka inkajlisi pet ka inokiosk'i kisie'e puwa imose'l ti yijits'i papo i'nio', jla'yi ti ja injwajiete'n papo je isis.

²Ti ijliuye'ni, iyonat'iyijpe 'ate: —Maye'ni, mayeyiji'n ni Sinia' jika anechijiayas ti jajwela', jwajietajyi'n napo je isis.

³Siuti ja akinie'ni, ká atonie paka k'iejliyeyi 'najk'i — ka akiajata pa, ni'ne ka eliye japa, ni'ne ka woyeja' japa, ka wikiniet'aja japa, ka a'lonitie puwa as'wuyeye, siupuwa jatonie.

⁴Ja 'oye'yi pa ja 'oye'yi, ji'wet siupa jloyeyi, sek i'wanjliye'yijimpe, paj ka awayeyets'ipe siupuwa jlomas jininenajyi.

⁵Siuti japoye papo ti ja ke inki'm aselia'm, siupa isi' jloyetaja, sekjane'yi ka tajlayeyijpe, sekjane'yi ka asatis apatajiets'ipe k'iye, 'nakayi ti jan'wenis ti ijiate ti jiwet'ia japoye, kajeyepa ti je isimits'i aselia'm.

⁶Ijiatjliyi yamat'i'nijpe ti iniuk'i'ni siupuwa isi'il jilis, ti iyoyis jlamtikie' pa Sinia' jika'niye ti 'es, jla'yi ti ijwiejiete'n papo i'nio' je isis.

⁷Siupa anechiyas t'ipi Herodes[4] ti t'ijieyet'iyijpe ti tijwela'ni pi Jesús, jla'yi ti t'ijieyeyi wikie'eyi siupuwa iyot'iyipi jla'am pa Jesús, je 'yijene pa ka inwone jitienkiujnieyeja' ape'e, kajeyepa ti po' papo ijwi'il ka pakaye Juan inajiejnawo ka inapi pijia'm,

⁸ijia papo ijwi'il ka pakaye injwejlanik jiwo Elías ka 'nese'n pakaja, ijia papo ijwil ka pakaye siupapo injwejlanawosjimpe inian'ni ka 'nes pijia'm.

⁹'Yina Herodes iyo'ate: —Je 'esiji, yampe ti jletik ala'ne ki Juan. ¿Tenat'ijyi siu'nie i'nio' 'yina ti jle' poyi, jla'yi ti poyi siuniwa iyo? It'imina'ne pa Herodes ti iyo ka in'weneje pet pa Jesús.

¹⁰Ti 'nesat'i'nijpe japok injlojwajnas, ijwilisiam'ne pa Jesús ti yiyeyisi wikie'eyi siupuwa iyoyisi ti t'iskiunk'iji'n. Jesús i'winakit'ne siupa ijioyiji, ti iyone 'ate: —Naja'ni jajiok Betsáidaja.

¹¹Siupapo i'nio' ti t'ijieyeyisi yamat'i'nijpe ti ijiutisik'iji'n. 'Yina Jesús je takama'yi ilia'm, jlam ijwiljlijia'm pet ni iyo ni Sinia' jika anechijiayas, ijwiejietjlijyi'n papo je isis.

¹²Ti no'otie t'ipi siojopo t'eyasajnas ti itijwa'm niwa sikioye times tom'niji ijioyet'iyisipi ti iyonisi 'ate: —Jlam woni'ni 'ate, nijwejla'm napo i'nio', jloye ka ijnoyi siuniwa isi'il je kastojwape'n, ka inwoyisijyi'n pa ka ijnoyits'iji'n, jla'yi ti jan'yekiujni'n kiu wata'a pet. 'Wanjliyi lajk'iyi pa ka k'iejliyeyi ka winaja'm 'ni awak'i.

¹³'Yina Jesús isiujlie'ne ti iyo'ate: —Wenajia'm asa'am paka intowis. Isiujlisie ti iyo'ate: —Ijwienjli sikio' itij'we wek 'niwa woyejes yits'e, times 'neje wek 'niwa si'yus. ¿Jijwelp'anta ka iyokijyi'n k'iye paka jlaka k'iye siu'napo i'nio', ti je pini'?

¹⁴Kajeyepa ti cinco miljimpe papo i'nio'. Sekyi'i Jesús ijliuyeyi papo t'eyasajnas ti iyone 'ate: —Jloyeyi napo i'nio' ka inek'iji'n, cincuéntajape papo 'wena janitotiji.

¹⁵Ijiatjliyi kiak t'ipa iyonayipi japo t'eyasajnas, yiyek'iji'n papo i'nio'.

¹⁶Sekyi'i Jesús isimat'iyipi siupuwa woyejes ijwienjli sikio' itij'we, siu'neje puwa si'yus ti times, i'yenat'ipi poliyi, iyoye jinikanitieyeja' ape'e, itime ti its'isajamk'i. Yikiajlayi japo t'eyasajnas ka inwenk'i papo i'nio'.

¹⁷Ti'yekiunieje'n papo i'nio', paj ti yip'isieje'n. Siojopo t'eyasajnas yamat'iyisk'i'nijpe siupuwa jijwa'al 'wanjle'e, paj ti itijwa'm niwa sikioye times tom'niji puwa tenajats'i ti tipoyitiejek'i.

¹⁸Yit'iyipe japa jloma ti Jesús inijwankite'n ti iyo t'ajlayeja', jlam'ne japo t'eyasajnas yijap, Jesús i'yasat'ijyimpe japo t'eyasajnas ti iyo'ate: —¿Tent'ipa itijnisieje napo i'nio' ka yama?

¹⁹Isiujlie ti iyo'ate: —Po' napo i'nio' ijwi'il ka Juan inajiejnawoye'a'm, ijia napo ijwil ka Elíassa'a'm, po 'neje napo ti ijwil ka injwejlanik jiwoye'a'm ka papokaye siupapo iniant'i'nijpe, ka inapi pijia'm.

²⁰'Yina iyo'ate: —¿Tepi jiwoyeyi pet ti asa'am? ¿Ten pet pi jijwela' ka yama? Pedro isiujlie'ne jla'am ti iyo'ate: —A'am ti Injwajieti'a'm siunie Sinia' jijliujwanik.

²¹Jesús ji'lij 'yitiajapk'i japo t'eyasajnas ti iyone 'ate: —Ká ajwelajiamna'a paka ne'yi pa i'nioye.

²²Yine 'neje ape'e ti iyo'ate: —Siunie I'nio' Jlas ja ke inka'm ape'e siunie ja tiwonaja, ti wuj ti janilayiti ni ja tena'a. Siunapo kijilas, siu'neje napo pa'yijis jika anechiyasas, siu'neje napo jiwos pet ni Moisés jika'neyasajnaye, napok jankaj ti jane'wajasi, sekjane'yi ja tiliana. Jlomas janajapeja sekjane'yi inapiliena'a pijia'm ti jantajli ni a'no'.

²³Sekyi'i ti ipijlanitieye ape'e papo i'nio' ti kiak iyone: —I'nio' ni iyo pet ka ijna ijyik'i, ka je wujwakiunie'e ka neki siuniwa jitienkiujnieyejes iyone ti jla'am, jlomas ti jantejlia jana jika cruz, ka inamana'a ijyik'i.

²⁴I'nio' ni janite'en ka jiliaye poye, nak janetia'n. Jlampet siunie ti ja ke inite'en ti jiliaye jane'yi ape'e ki iyo niwa yamtis, nak janjwa'.

²⁵¿Tent'ipa ja 'esieyi ni i'nio' siuti jankajli siuniwa wask'i'nelaja yi' ape'e 'ni ajnat, ti ja 'naka ti jlama ti janetia'n?

²⁶I'nio' ni ja'najwelk'i siu'neje niwa yamtis ti ja'najwejle, I'nio' Jlas kiak janwo'ojyi pet ja'najwe'l ape'e, ka 'nesta ti ja ke jlasiye ni jijweye janwo, ti jantajleje ni Jinia', siu'neje napo injlojwajnas poli jlele ti isis.

²⁷Jlam je awo siunie jayo'nase ti asa'am pa ja inojwajia'm ti jleye'ne, ja ke i'nalajyi'n 'yina paj ka ineyeyinie'e siojona jloma ti jitiete jan'we'en ni jika anechijiayas ni Sinia'.

²⁸Jlampa jlomas ijwienjli sikio' itij'we najape tom'niji puwa yam'niji pakayi ti jitiej ijiutie siupa janwo, Jesús yam'ne ti ijio ape'e japa tikijnaki ti iyo t'ajlayeja'. Tane ja Pedro jla'yi pa Santiago, siu'neje ja Juan.

²⁹Jlampa t'ajlat'ipi, siupa jloniyet'ipi 'wena k'iejlit'iyijpe, jlampet siupa ji'wu' kat'ajat'iyijpe ti lemi, 'esiet'itie pa k'iejliyi.

³⁰Jlam jnots'inijits'i'ni japo t'eyasajnas ti i'winayisi siupapo i'nio' times ti ijwienjli takasitisiap'eje'n pa Jesús ti takamtijnienisi. Papokajimpe papo Moisés siu'neje pa Elías,

³¹yiyis jikiowe'e siupa jla'al siojopa kates ti tal poliyi. Jitiej ijiutisie siupa jiliaye jawo jla'am pa Jesús, ti jane' Jerusalenne.

³²Jlam'ne pet ja Pedro siu'neje japo jla'yis jika ijnieti poyeta, 'yina inilayitisi wekie'e. It'imina ti je imiak'iji'n, i'winis siupi iyo ti initataja'm siupa jloniye kiecha, jla'yi ti i'winis siupapo i'nio' times ti yijap pa Jesús.

³³Jlampa tajlat'iyisijpe pa Jesús siupapo i'nio', 'yina Pedro iyone'ne 'ate pa Jesús: —Inka'neyasajnawo, 'esp'an ka 'nak iwiek'i. Jalisanajajna'a puwa 'wukiu'l jilisa' ka najapeja, janjwanjlina'a siojopa ti jajna'ya'm pet, siojopa jikiecha jajna'yi pet ni Moisés, jikiecha 'neje japa jajna'yi ni Elías. Pedro je ijiat pa kanjwe'el siupuwa iyo puwa jlamtis, kajeyepa ti yisi'liet siupa iyo pi i'wi'in.

³⁴'Yina ti je iliyi ti tamti'ni, jlampa tajlat'ipi 'niji siojopa poli, sekyi'i japaka'ne ti it'imina ti je 'yakajayi, kajeyepa ti yiyisi, sekyi'i ti wuj ti jnots'ijnits'i ti i'winayis ti kia'iyo.

³⁵Japaka'ne siojopa tojma'm siupa jla'lap siupa tamti, ti iyo'ate: —'Nak siu'nie yas, ti ya'am ti aki'me. K'iuyeyi.

³⁶Yiyik'i wek siupa ina'lap, siojopo t'eyasajnas je i'winayisi papo Moisés, siu'neje pa Elías ka nejiap pa Jesús. Ijwienjli jla'am pa Jesús ti 'yakaje. Pak siupa jloma je iyo ka intanisi'ni, siupa iyo ti i'winis.

³⁷Yit'iyipe'eje japa jloma, ti tajlits'i ape'e japa tikijnaki, je pini' siupapo yisitis k'iye siupa jano'we pa Jesús.

³⁸Tajlat'ipi ts'e jikiowe'e papo i'nio' siupa i'nio' ti i'yask'i'ni pa Jesús, ti iyo'ate: —Inka'neyasajnawo, sip'elisin wata'a. 'Yejne'n pet 'ni yas ijwienjli,

³⁹siunie iyone siupa yiji. Yejlat'ni sekyi'i ti jiyel initiajnata'aja, paj ti je 'esieyi'iji ni jlats'ilis jikiwiti. Ijiate wata'a ti iliaki, jla'yi ki iyo ti jikio' je k'as.

⁴⁰Itiejen wujtaja'ajyi napo 'eyasajnas, 'yina je 'yakajlisi.

⁴¹Jesús iyo'ne 'ate ti isiujlie ti ipi'yayet'ipi ti kia'iyo: —¡Ijiatt'iyiji 'napo yi'ne ti laja astankiujnieyeja', jla'yi ti je insisie! ¿Jot'e ka k'ieyeyik'i'ni ka je itiaj'lasap, ka inilayit'iase? Namkiame kiu'ne pa as.

⁴²Siupa jwemik ti ijioyeyi, yamat'ipi isia'm paka jla'am siupa yiji ti sek itiete'eje'n jiwekie'e, sekyi'i ti jiyel netiana. 'Yina Jesús tamti'yi'ne siupa yiji, ijwiejiet'ne pak jwemik, sekyi'i yikiajlayi pa jinia'.

⁴³Jlam jnots'inijits'i'ni papo i'nio' ti i'winis pi iyo pa Sinia' jit'iuni ti jla'am ti wuj. 'Wanjliyi papo i'nio' ti jitiej yinisi'ni 'ate siupa iyo pa Jesús i'winki'n, sekyi'i Jesús iyone'ate japo t'eyasajnas:

⁴⁴—K'iuyek'i'm, mayina'yisia'm siuniwa yamtis. Siunie I'nio' Jlas ja tekiajla kiojyi napo i'nio'.

⁴⁵'Yina ti Sinia' je iyojliyi'ijyi ka 'najanisi paka iwonisi, it'imina'ne ti ka poye paka jitienkiujnieyeja' ka intejnisisie ka kia'iwo. Jla'yi ti isipits'i pa Jesús ka in'yasis'ni siupa iyoyiyi.

⁴⁶Pak it'imina japo t'eyasajnas ti iyo'ate, ti inijwelis: —¿Tent'i siupa jwajla'a ti t'an'ni wat pijia'm?

⁴⁷Jlam'ne pa Jesús, ti itijnisieyi ti kiak jitienkiujnieye iyone japo t'eyasajnas, isimayi pa kia'le yina'ni jlajap.

⁴⁸Kiak t'ipa iyonayijipi: —I'nio' ni janki'm ilia'm siunie kia'le iyoye'ate siunie na'm ijyik'i, ijiate ya'am ti isi'm ijyilia'm. I'nio' ni isi'm ijyilia'm, nakayep'ajne pet siunie ti isi'm ilia'm siunie I'nio' sijliu'. Jla'm ijiate jla'am siunie i'nio' je 'esijiyi ti lajk'iyipa kawo ti jane askiowe'e, nak ijiate ti t'an pijia'm.

⁴⁹Juan iyonat'iyijpe 'ate pa Jesús: —Inka'neyasajnawo, a'wena ja i'nio' ti iniujwa'n kisie'e jawa imose'l, ti isiene ki e'e. Je enaja 'ate kajeyepa ti je tal siwa'm.

⁵⁰'Yina Jesús isiujlie ti iyo'ate: —Ena wek'iate, kajeyepa ti nak asa'yi siuti je teje'yi aselia'm.

⁵¹Jlampa jet'ipa tojwa ape'e ka inapi poliyi pa Jesús, wuj ti ijialas ape'e ti iyo ka inek, ka ijnoyi siujlieja ajnat Jerusalén.

⁵²Iyoyet'ipi jikawosa' ti iyoyeyi ka inek ka iwakajlanit ta'a k'iye siupa janajapeje'n yi'i jlaja Samaria.

⁵³'Yina siupapo Samaria jlele je iyoyis ji'weta', lapakawo ti 'yijene pi iyone ti Jesús teje 'niji yi'i jlaja Jerusalén.

⁵⁴Siojopo t'eyasajnas, Santiago siu'neje ja Juan, i'winis ti kia'iyo, sekyi'i iyoyis'ne 'ate: —'Yaka'niona, ¿'est'iyiji ka 'yejlaja pa jwat ka intal poliyi, ka intej'we siu'napo i'nio'?

⁵⁵Jesús tejeyet'ipi ilia'm japok t'eyasajnas, isilajat'iyijpe.

⁵⁶Sekyi'i ti yamat'iyis'nijpe ti ijioyis 'niji yi'i puwa ji'wetis t'ipi papo i'nio'.

⁵⁷Yit'iyipe 'nayiji, po' pa i'nio' iyone 'ate pa Jesús: —'Yaka'niona, awotaja pet kayik ajak'i, ajnat siupa jajojwi.

⁵⁸Jesús isiujlie ti iyo'ate: —Siuniwa yosis jijwa'l po' wek jla'am, ajwejnas kia'iyojliyi jlopis po' wek. Siunie I'nio' Jlas je kia'iyo, laj ji'wukie ka ine'yi ka ima'a, ka ininop'it.

⁵⁹Jesús iyonat'iyijpe'eje 'ate siupa jikiecha: —Na'm ijyik'i. Isiujlie ti iyo'ate: —Ejlo'o kiu', janiajnat kiu' ka ip'io'ne ki ika kijil masa.

⁶⁰Jesús isiujlie ti iyo'ate: —Ejlo'okiu wek, ena'ate siunapo 'yajle'n ka imp'o'ne pet napok jika amejyi. Naj woyi pet amtikieyi ni Sinia' jika anechijiayas.

⁶¹Jikiecha 'neje pa iyo'ate: —'Yaka'niona, awotaja ka yik ajak'i. Ejlokiu' janiajnat kiu' ka inijwele japo i'wit jlele.

⁶²Jesús isiujlie ti iyo'ate: —I'nio' siunie ti jla'm i'yenjli'ni ji'wechaja ti isimataja'n ti iwiets'ilat pijia'm ni ajnat, ti isie'e jana wakiajas jlojnate, nak siunie je 'yakajli ni jikijmaye iyo ni Sinia' jika anechijiayas.