Read Iyojwa'ja Chorote San Juan 11 Bible Online

San Juan 11 - Iyojwa'ja Chorote bible

San Juan 11

¹Pope ja i'nio' jle' iyo'ate Lázaro, isi' siujlieja Betania jlajak ji'wetis, siojopo jikitiawot María siu'neje jlaja Marta.

²María siujlieja ti siunie jini inkajk'i 'yilinijk'i jawa jisietis ja Saka'niona, jla'yi ti ji'wole isiene ti ilijik'i.

³'Yina ja Lázaro ti je 'es, sekyi'i japo jikitiawot takajlunieyi ja Jesús ka toki, ka tiwonaja 'ate: —'Yaka'niona, 'ajajnajwa ja je 'esi.

⁴Jesús iyo'ne 'ate ti yiyeyi ki inka'niye: —Siupi jiliaye iyo, je nak kaneki kanla'an, 'wenajliyi siunie iyo ka 'nakaj ni Sinia' jijweye, jla'yi ni Jlas.

⁵Jesús wuj ti 'namaja japo Marta siu'neje jlaja ji'yijnia, Lázaro kiak iyojliyi.

⁶Ijiate Jesús t'ijieyetaja ja Lázaro ti je 'es 'yina times puwa jlomas ti 'wanjleje'n yi'i siojo yi'i.

⁷Siukia ti jloma kiechaye'eje, iyone'ne 'ate japo t'eyasajnas ti i'yasayisi: —Naj kiu'ujwe 'niji Judéaja.

⁸Isiujlisie'ne pet ti iyo'ate: —'Yaka'neyasajnawo, jeye pajk'i japo Judíojos ti iyotaja ka inlanis, ti sisajas iyo ka inkie'na. ¿Yot'iyi'ni ti jiwo ka apili?

⁹Isiujlie japo t'eyasajnas ti iyo'ate: —'Yejne'n, jet'imi 'etsaka niwa inetitinki yiji jana jloma ijwienjli. Siuti kia'iyo, i'nio' t'iskiujnijyi'n ni jloma, ijiate tepa jawo kant'opi'ni isia'm, 'yaka janaka jla'am siojona kates ti 'yakajanit ape'e 'ni ajnat.

¹⁰Jlam pet ni i'nio' ti t'iskiujnijyi'ni ni ajnaj, ijiate tepa janwo ka je int'opi'ni isia'm, 'yaka siojona kates lajk'ipa kanejyi.

¹¹Jesús yine'ne ape'e ti iyo'ate: —Siupa ts'ajajnajwa Lázaro imia'a, 'yina siuti jayik ka 'yujwata'nina'a.

¹²T'eyasajnas isiujlie ti iyo'ate: —'Yaka'niona, siuti jijwel imia'a, ent'a ja 'esie.

¹³Jlam'ne Jesús ijwi'il ti Lázaro 'ya'al. Siojopo t'eyasajnas ijwilta ka nakaye ti ijiate ti ijnieti.

¹⁴Sekyi'i Jesús iyo'ne 'ate ti 'yakajanitiek'iyi: —Lázaro 'ya'al.

¹⁵Lapakawo siuti sek je a'yi ts'ajkaj'ni pet, nak ja'nesieyi ti asa'am, 'nakayeyijna'a ja ke akakiunieyi. Naja'ni ti ja'yenaja.

¹⁶Sekyi'i'ne ja Tomás, jak siojo Jesús t'eyasanik 'ne'eje, ti tiwonaja'ni 'ate Timesi, ti ipi'yaye ti kia'iyo ja Jesús, tanayi japo ijia t'eyasajnas ti iyo'ate: —Naja'ni pet, kiak jayoki, siliaye janoyi wita'm pa jiliaye janwo.

¹⁷Ti Jesús yiyeyi, 'yina i'wi'in ti jlampa ijniujliejets'i kiwa jlomas yamk'i ti pajk'i ti yi' ajnat kiajwe ja Lázaro.

¹⁸Betania, siujlieja Lázaro 'wet, je tojwape'n jlaja Jerusalén, najape jawa kilómetrojos ja k'iejlajap'e.

¹⁹'Loj japo Judíojos ijioyi japo Marta siu'neje jlaja María ti jika ameyik poye, ti yapisi.

²⁰Ti Marta t'ijieyeyi ja Jesús ti na'am, yam'ne 'najk'i k'iye ti ya'am ilia'm, 'yina María 'wanjle isi'wet'e.

²¹Marta iyo'ne 'ate ti isiutieyi ja Jesús: —'Yaka'niona, ka 'nak a'yi ta'a je 'yalta'ne siukia 'yini.

²²'Yina 'wanjliyi ijiate kia'iyoyeta, lapakawo ti ts'ajane ti Sinia' janwe'na'm siupi k'iejliyi ti ja 'ajle.

²³Jesús isiujlie ti iyo'ate: —Je ijiat ka je inapi pijia'm ki a'yini.

²⁴Marta iyo'ne pet 'ate: —Ijiate nak ts'ajane pi awone ti siukia 'yini janapi pijia'm ka netiejenie'e siojopa jloma ti ja wikie'eyeyi napo 'yajle'n janapits'i pijia'm, ka netiena'a jlaja niwa jlomas.

²⁵Jesús sekyi'i iyone'ne 'ate ti ipi'yaye ti kia'iyo: —Ya'am siunie ti yapilietak'i pijia'm napok 'yajle'n, siu'neje ti ya'am in'wasankiyek'i'm. Siunie je sakakiu, 'wanjliyi ka 'na'al, 'yina ja'wasana.

²⁶I'nio' ni 'wasanjli'ijyi ape'e 'ni ajnat siuti ja ke sakakiu, je pajna'a ka 'na'al. ¿Ma je sakakiuyeyi?

²⁷Iyo'ne 'ate: —Ijiate, 'ni Ika'niona, je akakiu ti a'am ti Injwajieti a'm ti jitiajle pi Sinia', jla'yi ti Jlajts'a'm pi Sinia', pajk'i ti kasts'ajane pi awonaja ti jla'am ti ja'nes 'ne ajnat'e.

²⁸Ti Marta iliyeyi ti takamtijnie'n, yama ti ijioyi jlaja ji'yijnia María, 'yina tisiemsiemiyi ti ijwijla'm ti iyo'ate: —Saka'niona 'nes, iyota ka joyi.

²⁹María ipi'ya wekie'e jlaja jikitia, sek tajla'a ti ya'am ti ijioyi ja Jesús.

³⁰Jesús je 'yutieje'eyi ja isi', je tal ts'e yi'i siojo ini'wene'e jlaja Marta.

³¹Jlam'ne siojopo yi 'wet'e jlaja María ti yiyisiap'ni, ti i'winayisk'i ti takasit jlaja María, sek tajlayits'i pet, ti yamisk'i, lapakawo ti itijnistiejesi kajno a'noyi kanape.

³²María yiyi wekie'e ja Jesús, takosjlete'l jitiyeyiji'n kiajwe, ti iyo'ate: —'Yaka'niona, siuka 'nak a'yi, jlam je 'yalta'ne ki 'yini masa.

³³Jesús i'yejne'n jlaja María ti yap'ni, ti kia'iyojli siojopo Judíojos jla'yis. Je jlase' ki iyo ti a'tiek'i, sekyi'i jiyel iyom'ne.

³⁴Ti'yasane'ne siojo tenat'iyijpe ti iyo'ate: —¿Tepa jlena'yi pa t'o'? Iyo'ate ti isiujlisie: —Naj ka'yenaja, Saka'niona.

³⁵Sekyi'i ti yapa ja Jesús.

³⁶Siojopo Judíojos ti i'wina ti yap'ni, sekyi'i iyoyis'ne 'ate: —¡'Yenayi'n pet, ijiat ti yimint'eyi!

³⁷Po' japo ijia iyo'ate: —'Naka 'ni ijwiejiet'ne ja talok, ¿jet'i 'yijeneje paka wone ka i'manit ki Lázaro?

³⁸Jesús yikiajlayi'iji siukia iyo ti jiyel iyo'om ti yiyeyi ja a'no', ijliasayi'ni jlaja kiawe. Tiwoki p'ota jlaja sisaj ti wuj.

³⁹Sekyi'i ti iyo'ne 'ate: —'Omaja ts'ijiye ni jip'ot. Marta, siujlieja Lázaro jikitia ape'e, iyo'ne 'ate: —'Yaka'niona, atejnistieje ka insotieje, kajeyepa ijniujliejets'i kiwa jlomas yamk'i ti yi' ajnat kiajwe.

⁴⁰Iyo'ne 'ate ja Jesús ti isiujlieyi: —¿Jlam'ne ajwe'la'm ti awo'ate ka je sakakiutiejna'a ja'we'en ni Sinia' jijweye?

⁴¹Ijiutieyis ts'iji siujlieja sisaj tip'onajaja'm ja t'o' yi'i. Sekyi'i Jesús i'yena poliyi, iyo'ne 'ate: —Inia', ka ijiatayijia'm ti jik'iuk'i.

⁴²Sitiant'ieje ti je jikam'ni itipe'e siunie awoyi. 'Yina awotajank'iye siu'napo yi'ne i'nio' ka impe'yayis, jla'yi ka 'esieyi, ja 'nakayeyijna'a ka je inkakiuyis ti a'am ti sijliu'.

⁴³Yiyik'i wekie siukia iyo ti tamti, iyo'ne 'ate ka kia'iwo ka lakiyi'i: —¡Lázaro, no kisie'e!

⁴⁴Kiaka i'nio masa iniuye kisie'e, 'wanjliyi'i siukiwa tilie'nitiejek'i kiwa jikioye, siu'neje kiwa tits'ijwanak'i kiwa jisietis, kia'iyojliyi siukia jitiokio' siukia lotakinie tip'onaja'a. Sekyi'i Jesús ijliuye japo ti iyo'ate: —Lanajyits'i siuniwa tilie'nitiejek'i, ena'yate ka nek.

⁴⁵Siojopo Judíojos ti ijioyisi jlaja María ti yapisi, ti i'winis siukia Jesús iyo it'imina'ne ti 'loj siojopo je 'yakakiuyisie.

⁴⁶'Yina je lajk'i pet siojopo ijwi'il ja Jesús ti ijwile japo Fariséojos siukia Jesús iyoyi.

⁴⁷Sekyi'i'ne siojopo Fariséojos initotiek'i wita'm, siu'neje japo pa'yijis jika anechiyasas, siu'neje japo ijnosikis jiwos. Initotis'ne wita'm, ti iyoyits'i 'ate: —¿Tepat'e jayonaja? 'Nak siu'nie, je jlase' siuniwa a'wena ti iyo ti i'winki'n.

⁴⁸Siuti jayina 'ate, ka najatajana'a jlam ti ja ke inkakiu napo i'nio', sekjane'yi siunapo anechiyasas Roma jlele inama'nina'a ti janetiajnate'n jana si'wuk ti ajok'ni kiajwe, jla'yis napo saka kia'lis pet.

⁴⁹Kiaka najkap ti Caifás ti yi'i ti iyo pa'yi jika anechiyasa' ti wuj. Jaka'ne siojo ti iyone'ate japo ijia: —Ijiatp'aneje ti je 'najanayi.

⁵⁰Ataj p'an je wujwayiji siunie ti janjwanjli ni ti janinekial ape'e napo, nak ja 'esieyi ti ja ke inetia'n wikie'eyi napo i'nio'.

⁵¹Caifás je jla'am ka jlamtisa', siukia iyo ti tamti, 'yina ti jla'am ti pa'yijis jika anechiyas, it'imina ti Sinia' jlam ti yamtijie'n ti ijwi'il ja Jesús ti janiwe'n ape'e napo i'nio' siunapo Judíojos.

⁵²Je ka napokataja, 'yina siu'neje napo Sinia' jilis netiajne'n ape'e 'ni ajnat, ka ji'wet injwankit.

⁵³Jakayi'ne ti tiwokieyi ka tiliana, iyoyis'ne 'ate, “'Esiji ka tiliana 'ni Jesús.”

⁵⁴It'imina'ne ja Jesús ti jeye kat'aja ka ini'wenkijnam'ni japo Judíojos. Tajla'm jlaja Judea, sekyi'i ti tejeye 'niji yi'i jlaja isi' jle' iyo'ate Efraín, 'yakama'a ja ajnat mami'yi. Sek yiyeyits'i, ti jla'yis japo t'eyasajnas.

⁵⁵Jlampa je tojwa'a siojokia jiliakijnieye japo Judíojos Pascua 'loj japo i'nio' tajlits'i jawa ajnatis ijioyisi yi'i jlaja Jerusalén. Jike' iyonisiji'ni ti yiyetaja, ti inilej siupi iyo pi jike', ti iyoyis jitienkiujnieye ink'iejyisa'.

⁵⁶Ti'yasanisi'ni'ne ja Jesús yi'i jlaja 'najla'wet. Iyoyis'ne 'ate: —¿Tepi iyo? ¿Mi jajnoyi jli siliakijnieye ni'ne ka jeye?

⁵⁷Siojopo Fariséojos, siu'neje japo pa'yijis jika anechiyasas pajk'i ta'a ti ijwila ape'e japo ti iyo'ate: —Siupi ja 'najane pi janwone siupi yi'i pi Jesús, injwelats'inie'e, sekjane'yi ka inajayinie'e ka isima'a.