Read Iyojwa'ja Chorote San Juan 12 Bible Online

San Juan 12 - Iyojwa'ja Chorote bible

San Juan 12

¹Jlomas ijwienjli sikio' itij'we ijwienjli tom'niji puwa netia'n kaneyi siujlieja inlakijnieye Pascua, Jesús ya'am ti ijioyi siujlieja isi' Betania, ji'wet yi'i ja Lázaro, siojo Jesús ijwiejiet, ti yikial pijia'm ti 'yalta.

²Takapijnanis'ne k'iye; Marta jlajak isiajiamk'i k'iye japo, 'yina Lázaro sekyi'i yiji japo, ti isijwane ja Jesús.

³Sekyi'i'ne jlaja María ti yamayi siojo a'la' jlokiet'e' jle' iyo'ate nardo, ti jini inkajk'i, medio litro ti laja po'. 'Yilinayik'i jawa jisietis ja Jesús, sekyi'i itime ti ilijayik'i jawa ji'wole. Jini yapiliyeyijin'ni kiajwe jlaja 'wuk yiyis kiajwe.

⁴Siojo Judas Iscariote, ti japok Jesús t'eyasajnas, jak siojo janekial ja Jesús jikiojyi japo janla'an, iyoni'ne 'ate japo ijia:

⁵—¿Yot'iyi'ni ti je tiwena siu'nie a'la' jlokiet'e' ti jini inkajk'i, jlam'ne laja po', ka tekiajlaja pet siunapo p'ijliusis japa lajaye?

⁶Siuti ji'lij kiak iyone ja Judas, jla'm iyo ka imp'elisijne'n napo p'ijliusis. Kajeyepa siuti jlam ti tijna'yi siujlieja wikiniet'aj jiwe ti i'yena, kajeyepa ti takajlane'ni pi jiwa siojopa titietajak'i'ni, japak 'neliaja pet.

⁷'Yina Jesús isiujlie ti iyo'ate: —Ene wek 'ate, 'yina ti jlam iwiakajlanit ta'a its'ioye siuti janeyi siojona jloma ti ja titijik its'ioye.

⁸Siunapo p'ijliusis jlam kiak janwo ja ke intal aska kiowe'e, jlampet ti ya'am ja ke yikiajle'e ka yi' aska kiowe'e.

⁹Siojopo Judíojos ti t'ijieyeyijpe ja Jesús ti yi'i Betániaja, 'yina siuti 'loj yamayis'ni ti ijioyisi jlajak isi'. 'Yina je jakata inta ti iyo kan'wenis ja Jesús, ijwienisieja'm ti iyo kan'wenis ja Lázaro siojo ti yapi pijia'm ti tajla'm ja a'no'.

¹⁰Iyoyis'ne 'ate siojopo pa'yijis jika anechiyasas: —'Esiji ka kia'awo ja Lázaro ka tiliana.

¹¹Kajeyepa ti jla'am ti it'imina japo Judíojos ti iliyi ti its'iuye japok i'nio', ti je ikakiuyisi ja Jesús.

¹²Je pini' japo i'nio' ijioyisi siojokia inlakijnieye Pascua ti yi' Jerusalenne. Siukia ti jlomaye'eje Jesús yi' ape'e ja malekiatiok jlas ti teje 'niji yi'i jlajak isi'. 'Yina siojopo i'winaja siukia iyone ja Lázaro, ti tane ti iniujwa'n kisie'e ti tajla'm ja a'no'. Japok iyo jika'niyejayi pet japok sekyi'i, siukia iyone ja Lázaro ti yikial pijia'm. It'imina'ne japo i'nio' ti t'ijieyeyisi ti Jesús sek jano'we, iniakasajats'i jawa wisiuk ji'wole, ti yamayis ilia'm, sekyi'i'ne ti tanisi ape'e, ti iyo'ate: —¡Inwunitieye tena'a pi Sinia'! ¡'Esiji ka Saka'niona inlesa'n, jla'am ti ji'lij iwijna'm Sinia' janoyeje, ti jlam ti Israel jika anechiyas! Iyo niwa inamtis t'ipi, ti iyo'ate: “Sion jlele, jweyetajyits'i. 'Yena' ilia'm ni aska anechiyas, 'nes yi' ape'e ni malekiatiok jlas.” Ti 'nelanjie'e t'eyasajnas je itijnisisk'i siukia iyo. 'Yina ijiatjliyi jla'am ti yiyeyi siojokia jloma ti Sinia' yikiajle pi jijweye, jiwekie'aja ti jitiej wujwisk'i siukia iyoy(...)

²⁰'Nak nojwaja'm siojopo i'nio' je Judíojos yiji japo i'nio', ti je pini', ti ijioyisi jlaja inlakijnieye Pascua yi' Jerusalenne.

²¹Japok'ne siojopo ijioyi ja Felipe, siojo ji'wet yi' Betsáidaja, yiji siujlieja ajnat Galilea, ti inip'elisine ka ina'an k'iye ti iyoyits'i 'ate: —'Ni isiecha, awoktajank'iye pet ka'wina pi Jesús.

²²Felipe yam'ne ti 'yuyi pet ape'e ja Andrés ti ijwijla'm, jak iyo'ne jla'yija ti ijwilisi ja Jesús.

²³'Yina Jesús iyo'ne 'ate ti isiujlie japo takajwejlane: —Yiyi siujlie'e jloma ti tenat'ijyipi ni I'nio' Jlas ti jijweye ja tiwenaja'm.

²⁴'Yejne'n, ka jla'm iyo wata'a, siunie ipiatatiok t'ejes 'wanjle'e siojona jlo', ti ja ke t'otie isia'm, tepa jawo ka jla' poye, 'yaka je netiajne'n ajnat kiajwe ka intal. Jlam pet ti tiwomajata kia'iyoyeyi pet, jla' poye ts'ijiye ti wakajlata.

²⁵I'nio' ni 'namaja jana ji'wasankiye, nak janetiajnat, jlam pet ni i'nio' ni ne'waja ni ji'wasankiye ape'e siu'nie ajnat, nak po ta'a pet siojona ji'wasankiye laj jlaja ti yiyi.

²⁶Siuti japoye pa jankijme'n ijiap, kanamana'a ijyik'i. Siunie jayi'i, sekjane'yi pet. Siunie Inia' janteme pet siunie janoyijk'i'm.

²⁷—“¡Wuj ti ijliak'ali po' 'nakayi! ¿Tepat'e jayo? ¿Jot'e kayo'ate, “Inia', sijwajiete ni janwo ni iwit'iaye”? ¡Ajwel'ni ja jeye, lapakawo ti 'nak it'imina ti ana'am!

²⁸Inia', ¡'esiji ka awunit a'm ni e'e! Sekyi'i ti pesiejayi siupi ina'lap tom poliyi ti iyo'ate: —Pajk'i ti ateme, 'yina jayikiajle'eje ti jayunit.

²⁹Siojopo sekyi'i ti ipi'yayis, ijwil'ne ka inkiumtijni, 'yina po'neje japo ijwil ka injlojwanik poli jleliye pa ka inkamtijniene.

³⁰Jesús iyo'ate: —Je ti ya'am kant'emina ni siunie ina'lap ti pesieje, asa'am ti it'imina, 'yaka nak ijwi'il ni ja'nesieyi.

³¹'Nak ja ti'yena 'ni ajnat. Siunie i'nio' tijniejieta'a, ti i'yena ni ajnat, ja totie kisie'e.

³²Siuti jasena pijia'm, sekjane'yi ti jayama ya'am ti jatiojne'n wikie'eyi napo i'nio'.

³³Siukiwa jlamtis iyo kiwak 'yakajanit siunie janwo ni jiliaye ti ja'na'al.

³⁴'Yina iyo'ne pet 'ate japo i'nio' ti isiujlie: —Siuniwa inamtis t'ipi niwak it'imina ti kasts'ajane pi awonaja ni Injwajieti ti Sinia' jijliujwanik ti ja ke paja ka netia'n. ¿Yot'iyi'ni ti jijwe'el pi I'nio' Jlas ja tena pijia'm? ¿Tent'i pak I'nio' Jlas, siupi jijwel'ni?

³⁵Jesús iyone'ne 'ate japo: —Je taljlitie'eje aska kiowe'e siojona kates, 'yina ja ke pajayi ka intajlanna'a aska kiowe'e. Katatayi ka askiuniek'iji'n alenjlipa ti 'yaka ask'ioye 'ni jloyeyi. Ja 'nakayeyijna'a siunie ajnatiok ja ke inesi'lietana'a ka netie'asenie'e. Ijiatjliyi siunie i'nio' yikiajli'ni nak ajnatiok, je 'yijene siupa jantajyi.

³⁶Ká akakiuye janak kates, ti je taljli'ijyi aska kiowe'e, ja 'nakayeyijna'a ti ja jloma jleleye'ase'm pet. Yiyik'i ti yama ja Jesús, inijwek'ni k'iye japo i'nio'.

³⁷'Yakajlitieje ja Jesús ti i'winkinataja siukiwa iyo pi jijweye ti yisi'liete japo i'nio', 'yina lapawo ti 'yakakiuyis.

³⁸'Yina lapakawo ti yiyi siukia jloma siupi injwejlanik jiwo Isaías iyojinipi, ti iyo'ate: “'Yaka'niona, ¿tempa je 'yakakiu 'ni saka'niye? ¿Tempapo Saka'niona i'winkijna'm pi jijweye?”

³⁹Ijiatjliyi, japoka i'nio' je t'ekiye ki iyo ti 'yakakiuyis. Lapakawo ti po'neje siu'niwa inamtis 'yit'jini'ipe pa injwejlanik jiwo Isaías ti iyo'ate:

⁴⁰“Sinia' iyojwa'n talojoye, jla'yi siupi iyone ti it'iunit'i papo ka ijnewiteje pa jlosik, ja'nakayeyi ti ja ke in'wejne'n, siu'neje ti ja ke 'najajne'n, ja'nakayeyi ti ja ke inapik'i, ka ijwiejiete pi jiliaye iyo.”

⁴¹Siupi Isaías, kiak iyone kiwa jlamtis lapakawo ti i'wi'in pi jijweye iyo ja Jesús, siu'neje ti ijwi'il siupa janwo.

⁴²'Wanjliyi, siojopo Judíojos je pini' japo its'iuye ti jla'am, kia'iyojliyi japo i'nio' anechiyasas, yameje ti je 'yakakiuyis ja Jesús. 'Yina je iyo'ni ka intanisi'ni ti kia'iyo, lapawo ti je ijwiye japo Fariséojos kajeyepa ka 'nijieyisi sek intajlata'a ka totiek'i kisie'e yi'i jawa 'najla'wetis.

⁴³Najata jla'am siunie i'yenis ka i'nio' ijnoniti jlam'ne kan'yenis ka Sinia' ijnoniti.

⁴⁴Jesús yakets'ijiap ti tamti ti iyo'ate: —I'nio' na je sakakiu, je yamkata ka ink'iuk'i'm 'yina kia'iyo je 'yakakiu siunie I'nio' ti sijliu'.

⁴⁵I'nio' ni si'we'en jla'yi ti je yamkata ka si'we'en, 'yina kia'iyo i'wi'in ni I'nio' sijliu'.

⁴⁶Yam katesk'i'm, yam ana'm ajnat'e jat'imina napo i'nio' siunapo je sakakiu ja ke inejyi ni ajnatiok.

⁴⁷“Jlam pet siunie i'nio' ni ipi'yayeta niwa yamtis 'yina je iyo, ja ke yama ka isie'e, kajeyepa ti je nak ka nia'm ape'e, 'wenajliyi pet siunie aname ti ja'mienit ni i'nio'.

⁴⁸I'nio' ni je isi'm ijyilia'm, jla'yi ti je its'iuye niwa yamtis, po' pet ni siunie ti tijna'yi ti jansa'a. Siuniwa inamtis ti amtits'iji'n, niwak jansa'a ts'iji jlaja niwa jlomas.

⁴⁹Lapawo ti je yam ka intalk'i siu'nie awo, 'wenajliyi jla'am ni Inia' siunie sijliu', nak ijliuyijk'i'm siunie awo ka ijwi'il, jla'yi ni siunie aka'neyasane.

⁵⁰'Yina siunie jika'neyasajnaye ni Inia', ts'ajane pi awone ti tejeyi jana in'wasankiye ti laj jlaja. Ijiatjliyi siuniwa amtiyi, je int'ayiji'n ti jla'am ti ijliuyijk'i'm.”