Read Iyojwa'ja Chorote San Juan 13 Bible Online

San Juan 13 - Iyojwa'ja Chorote bible

San Juan 13

¹Jlampa ijwienjliye jakia jloma tomk'iye ka neyi siojokia inlakijnieye Pascua, Jesús pajk'i ta'a ti 'yijene pi iyone ti yiyi japak jloma ti janek ti jantaj'le 'ni ajnat, ti jani'wene pi Jinia' poliyi. Jesús yamjliyi ti 'namaja japok, siojopo tijna'yi pet, yi' ajnat'e, tajlap'e ti 'nelanjie'e, paj ti yiyeyi pi jlaj yi'i.

²Jlampa itimayi pi imosik ja Judas Iscariote ti iwijna'm pi jlosik je 'es, ti iyo ka inla'an ja Jesús. Jesús 'yijene ti tal Siniayi, siu'neje ti janapili pi Sinia', siu'neje ti Jinia' pajk'i ti jijweye yikiajle. Jlajmiliet, siuti ti'yekiujni'n, Jesús iliejni'ni ja ji'wu' tomi pijia'm, isimayi siojo intokio' tilijiki'i'ni, ti its'ijwane jlajap.

⁵Sekyi'i ti i'niat isiayeja'm ja tetik, iyoye ka jisietis inlejk'iji'n japo t'eyasajnas. Siojo intokio' tilijiki'i'ni jak isiene'ne ti ilijk'i'ni.

⁶'Yina ti iyoyetaja ka inlej jawa Simón Pedro jisietis, sekyi'i iyo'ne 'ate: —'Ni ika'niona, ¿isietis jalejk'iji'n ti ya'am?

⁷Jesús isiujlie ti iyo'ate: —Siu'nie awo, je intant'iejayi, je ijiate ka je 'najanayi.

⁸Pedro isiujlie'ne pet ti iyo'ate: —Ja ke iwi'na'm ka paja 'niwa isietis ka lejk'iji'n. Jesús ti isiujlieyi'iji, iyo'ne 'ate: —Siuti je wo ka ilijk'iji'n niwa asatis, ja ke ayejenie'e siu'napo isimet pet.

⁹Simón Pedro iyone'ne 'ate ja Jesús: —Ijiatp'ane, ja ke 'niwakatajana'a niwa isietis ti alejk'iji'n, jwane'e 'niwa isioye ka lejk'iji'n, siu'neje jli ijyitik ka leje.

¹⁰Jesús isiujlie'ne pet ti iyo'ate: —Siuti itime ni i'nio' ti inie'yi i'niati, ijiatjliyi je yikiajle'e ka ina'yi i'niati kajeyepa ti itime, najataja ti jisietis ilijk'iji'n. Siuti asa'am kiak jiwoyeyi, ijiate je inwikie'eyetaja ka insisie.

¹¹Siuti Jesús iyo'ate, “Je inwikie'eyetaja ka insisie”, kajeyepa ti 'yijene ta'a pi iyone siojo yi'i ja janla'an.

¹²'Yina ti itimayi ti ilijk'iji'n jawa jisietis, sekyi'i ti ji'wu' yikiajlayi, yapilie'eje ts'e yi'i jlaja jlak yinisi ape'e. Yiyeje'n sekyi'i iyo'ne 'ate ti i'yasa'm japo t'eyasajnas: —¿Mi jitijnisiets'i siunie awo'nase?

¹³Siuti asa'am as'lej je lienayijk'i'm ti jiwoye'ate “Ika'neyasajnawo”, siu'neje ti jiwoye 'ate “Ika'niona”. Ijiate jlam je woyeyi, kajeyepa ijiatk'i siunie jiwoyeyi.

¹⁴Jlajmiliet ti inka'neyasajnawok'i'm, jla'yi ti inka'nionak'i'm, siunie awo ti alejk'iji'n niwa assatis, 'yina kiak janiwonayi pit: leja' pet niwa jisietis napo as'lejwas.

¹⁵Jla'm anane ask'ioye ti a'wenki'nase'm, ka kiak aniwonayiji siunie awo.

¹⁶¿Tepi yi'i pi i'nio' t'a'n ape'e pa jika anechiyas ti jla'am ti inkawo, siu'neje ni i'nio' tijliuk ka injwe'el ka t'a'n ape'e siupi ijliu'?

¹⁷Siuti ja 'najanayi, ka ajejlitayeyijna'a pet ka woyeyi, ja'wenayena'a ti wuj ti 'es, je jwe'el ka je inkasajyi'n.

¹⁸“'Yejne'n, je ajwe'el ka inwikie'eyeyi, je sit'iayiji'n siunapo aki'mik'i, lapajawo ti janeyi siojona jloma ti siuniwa inamtis t'ipi siunie iyo, ti iyo'ate, “Siu'nie i'nio' akijwane, nak teje ijyilia'm”.

¹⁹Ajwe'lase'm ta'a, janakayeyi ti ja 'najanayi ta'a, 'wanjliyijna'ape ka'wina siuti kiak jawo, lapajawo ti ijiate ja'najanayi ti je 'wenayi pi kiechaye ti ya'am.

²⁰Ijiatk'i siunie jajwi'il ti awo'ate, Siunie i'nio' isi'm ilia'm ni siunie ajlo' pet, nak isi'm ijyilia'm. 'Yina jlam pet ni isi'm ijyilia'm, nakaye pet ti isi'm ilia'm siunie I'nio' sijliu' pet.”

²¹Jlampa yiyeyik'i ti tamti, sekyi'i ja Jesús iyoyeyi siukia iyo ti iliate siukia iyo ti wuj ti jijliak'ali po', sekyi'i ti yinayi ape'e ti 'yakajanitiek'iyi, ti iyo'ate: —Ijiatk'i siunie jayo, ti ijwienjli ni siunie ti asa'am ja siwe'en.

²²Sekyi'i japo t'eyasajnas ti ini'yena, 'wena japo jitiej yikiajle pi jikiecha, kiajatak'i'ni lapakawo ti je 'yijenisi siojo jane'yi ja Jesús ijwi'il.

²³Ijwienjli'ne siojo Jesús wuj ti 'namaja, ti je itionit ti ti'yekiujni'n,

²⁴Simón Pedro ijliuyeyi jaka kan'yase'n ja Jesús ja yi'i siojo ijwil'ni, sekyi'i ti jikio' yejayiji'ni ti ijliuye.

²⁵Ijliasayi ja Jesús, sekyi'i i'yasen'ne ti iyo'ate: —'Yaka'niona, ¿tepa yi'i paka?

²⁶Iyo'ate ja Jesús ti isiujlie: —'Yejne'n, jats'iatiti 'ni woyewa, 'yina siupi jawijna'm japakaye. Ijiatjliyi, jlam iyoni'ni 'ate ti its'iatiti, iwijnam'ne ja Judas, Simón Iscariote jlas.

²⁷Siukia ti Judas isima ilia'm ja woye ti tiwenaja'm, jakayi ti imosik ijioyeja'm pi jikiowe. Sekyi'i Jesús iyone'ne 'ate: —Jlam woni'ni 'ate, siupi jawoyi.

²⁸Ka kia'iwo ka intejnisisie siojopo tejeyi wita'm ti isijwane siukia iyo ja Jesús.

²⁹'Yina ijia itijnistiejesi ka poye paka kanwejnamk'i japo p'ijliusis, ni'ne ka neki paka intajieta siojokia inlakijnieye, kajeyepa ti jlam ti tijna'yi siujlieja ineli wikiniet'awe.

³⁰Yiji wek kiojyi ki woye, sekyi'i ti yama ja Judas. Jlampa ajnaja.

³¹Jlampa pajak'i ja Judas ti ya'am, Jesús iyo'ne 'ate: —Ja'nakaja'ne 'nakayi siuni iyo ni jijweye ni I'nio' Jlas, ti ja tonitie, 'yina siunie Sinia' kiak jawo'ojyi pet; ja'naka'aja pet ni jijweye iyo, ti ja tonitie, lapawo ti ya'am ti jat'imina siupa ja tiwonak'i.

³²Siuti I'nio' Jlas i'winki'ne ki iyo ti tonitie pa Sinia', kiak janwo pet ni Sinia' jan'wenki'ijne pet ki iyo ni jijweye iyo pet, ja ke pajayi wata'a.

³³'Napo ilis ti yimijna'ase'm, je pi itioyeyi'i niwa jlomas ti jatiaj'lase'm. Je jwela' ka je siwoyejyin'ni, ka woyena'a 'ate awone japo Judíojos ti kiak awone, ti awo'ate, “Siunie jajiojwi ja ke a'yakanayi.”

³⁴“Jaliyi'asap siu'nie i'lij ti ink'ie': 'esiji ka nineminape. Jawo'ate awo ti ya'am ti ts'ama'ase, kiak wonayi napo as'lejwas, ka ninemina'.

³⁵Siuti jawoyeyi naka, ti janikimayi ni asemijnaye, sekjane'yi kan'wenayena'a pet siunapo i'nio' yi' ape'e 'ni ajnat ti asa'am ti 'yiyasajna'yase'm.”

³⁶Simón Pedro i'yase'n ja Jesús ti iyo'ate: —'Yaka'niona, ¿tepat'e jajojwi? —Siunie jajiojwi — iyo ja Jesús ti isiujlie — je 'esiji ka nam kiu' ijyik'i 'nakayi. Je ijiat ka je ana'm ijyik'i ka pajata.

³⁷Pedro iyone'ne 'ate ja Jesús: —'Yaka'niona, ¿yot'iyi'ni ti jijwe'el ti je 'esiji ka yikta'a ajak'i 'nakayi? Jlam'ne siwakal ta'a ti iliaye jane'yi atepe'e.

³⁸Jesús isiujlie ti iyo'ate: —¿Mi ijiate siunie jijwe'el, ti inwakal ka alaye ine'yi itipe'e? Ijiate siunie jayo ti jajwi'il, ka majletiejejna'a ka nap ni ajwenta, ja najapajayiji ti janikakiu'ni, ti jajwe'el ja ke intant'iejk'i.