Read Iyojwa'ja Chorote San Juan 15 Bible Online

San Juan 15 - Iyojwa'ja Chorote bible

San Juan 15

¹Jesús jlam yinjliyi ape'e ti iyo'ate: —Ya'am siojona ti ijiate jla'am ti ts'ejniek jit'io, jlam pet ni Inia' nak i'yena pet.

²Siuti i'wi'in ni jik'as ni je 'es, je iyo jlaye, nak ijwiejaje. Jlam pet siuniwa jik'ase'l ti isis ti iyo 'ni jlaye, niwak ijiatayiji ti i'yena, sekyi'i ti yisitak'i ilia'm ti ilisa'n.

³Siuniwa yamtis ti awo'nase ti 'eyasanayi, niwak it'imina ti insisie.

⁴Si'niayi janjwanjli, jawo'ate awo'nase ti ya'am je alejliyi'iji ti ani'nopijiet'ase. Siunie jik'as jana ts'ejniek jit'io, ka lajak'i jana jitisiuk, je 'esiji ka iwo jlaye, kajeyepa lajk'i japa ka intajle. Kiak iyo'ni pet ti asa'am siuti si'niayi je ijwienjli, lajk'i pet pa ka intaj'l aswa'm ka 'esie ka woyeyi.

⁵“Ya'am siojona ts'ejniek jit'io, asa'am ti jik'ase'lase'm. I'nio' ni je paj kanleyi ti ini'nopijietk'i, siupet ti ya'am kia'iyojliyi ani'nopijiet'ase, nak poye niwa tajla'm siuniwa isis ti iyo, niwak siuniwa jla'. 'Yina siuti siliejk'i je ji'yakana' paka woyeyi.

⁶Jlam pet ni i'nio' ni je iyo ka jlam kiajatajak'i'ni ka ini'nopijiete wita'm, janakaye pet na ja tijliuk kisie'e, ja tiwonajayi 'ate iyo niwa jik'ase'l jana ts'ejniek jit'io ti yi'liayetajats'i. Sekyi'i ti totieja wita'm ti jwat t'otieja'm.

⁷“Siuti je paj ka aleyeyi siunie jiwoyeyi ti jini'nopijietak'i, jla'yi siuti ja ke aleyeyi ti jiwoyeyi niwa yamtis, 'ajlayi siupi k'iejliyi pi jisitiana', ja tiwena'ase'm.

⁸Siuti kia'iyo, ti po' niwa tal aswa'm siuniwa isis siunie jiwoyeyi, siunie Inia' wujwa pet ti tonitie, jla'yi ti ja'nakaja pet ti asa'am napoka ti ijiate ti 'yiyasajna'yase'm.

⁹Wuj ti ts'ama'ase, iyoye pet 'ate siunie Inia' ti 'namak'i. Je pajana'a ka leyeyi siunie yimijnaye ti e'nase'm, ka woyeyi.

¹⁰Siuti jawoyeyi siuniwa yamtis, ja ke ineyi ts'iji ka leyeyi siunie yimijnaye ka woyeyi, ka awoyena 'ate awo ti ak'iuye niwa jlamtis ni Inia' jla'yi ti ja ke ineyi ts'ijiye ka iliyi ni jlemijnaye.

¹¹“Kiak awo'nase ti awotajank'iye pet ka sinikanitieyi injwanjli, jla'yi ka impo'ase pet ni asnikanitieyi.

¹²Siu'nie i'lij ti jawi'nase'm iyo'ate: 'esiji ka anikimayi siunie asemijnayeja' wonayi 'ate awo'nase ti emina'.

¹³Siunie inka'namankiye ti ijiate jla'am ti t'an pijia'm, naka na ti 'yakajli ti inilayiti ti jikie po' ape'e papo t'ajajnajwas.

¹⁴Asa'am 'yijejnajwasts'ase'm siuti jawoyeyi siunie ajloye'ase'm.

¹⁵Je awo 'yakawosa'ase'm. Ataj enayi 'ate, siunie inkawo siunie iyo ni jika anechiyas je 'yijene. It'imina ti kiak awo'nase ti 'yijejnajwasts'ase'm ti lapajawo ka kiak je iwo ti wikie'eyi siuniwa tajle ni Inia' ti yikialk'i, ti ijliuyijk'i'm ka 'yiyasanayi, pajk'i ti ekiaj'lase pet.

¹⁶Je 'nej 'ninta ka asama ka akimak'i'm, ya'am ijiate ti aki'mase'm. Sekyi'i awo'ne ka ijliuye ka akinie'ni, ka je piniye siupuwa ka asaye ka intajla aswa'm ja ke int'eki. Ja'nakayeyi pet ni Inia' ja k'iejliyeyi siupi jisitiana' ti ja 'ajlayi, janwe'nase'm kajeyepa ti jasetina.

¹⁷“'Naka siu'nie ajlo'wase'm kawoyeyi: ka aninemina'.”

¹⁸“Siuti ji'wena' ti ne'wa'ase'm siunapo yi'i ni ajnat, 'wena ká atejnisieyi'i, ti ya'am ti siniajnatis ti ne'wajask'i'm.

¹⁹Siut'itie ka atajlayi ni ajnat jla'm ijiataja ka i'nama'ase pet siunapo i'nio' yi' ape'e 'ni ajnat, ka kiak inwonata'ase pit iyone siunapo ti iyojonk'iye. 'Yina ya'am ti akima'yase'm ti atajle kiowe'e siunapo yiji ni ajnat, jak je iyoyiji'ni ka je ine'wa'ase'm siunapo yiji ni ajnat, lapakawo ti 'wena'ase'm.

²⁰Ataj wunitiets'i siunie awo'nase'ejyi ti awo'ate, “Jikawo je ika'm ape'e ni i'nio' ni anechiyas.” Siuti jlam sakojwaki'n ta'a, 'wena je woyeyi, kiak jawoyeyi pet. Siuti jlamt'i kiak awo ta'a, ti tik'iukk'i'm ni siunie iyo niwa yamtis, kiak inwoyenie'eje pet ti asa'am, ja tik'iukie'asemna'a siupi ja asamtikie'.

²¹Niwaka siuniwa janwo'nase napo i'nio', lapawo ti ya'am ti jat'imi'nase, ti je itiant'iejesi ni Siunie sijliu'.

²²Je jlamtajas ka jitisa', ka je inia'am ti amti'yi, 'wenajlitieje ti ka yama ka itisa'. 'Nakayi lajk'ipa ka jitiej i'no'we, ka inip'onisi ki iyo niwa jloski'la.

²³'Yina je 'wena pet siunapo ne'wak'i'm, napok ne'waja'm ni Inia'.

²⁴Lajtak'iyi pa ka jitis iwo, ka lajak'iyi pet pa ka ilisane jikiowe'e ti jlamis, ki iyo siunie a'wenki'n, ti lajk'i pa ka kia'iwo, ni awoyi. 'Yina i'winisieta niwaka, yamjliyi ki iyo ti ne'wajask'i'm, jla'yi ti ne'wajasi ni Inia'.

²⁵'Yina jlam je iyo ni siunie iyonisk'i, lapakawo ti yiyeyi siojona jloma ti siupuwa iyo niwa inamtis t'ipi ti iyo'ate, “Jlam'ne lajatak'i pa ka intajlatisk'i'm ti ne'wajask'i'm.”

²⁶“Je ijiat ka je i'nes siojona asp'ota ti ijiate jlam ti Sinia' jikimet ti jajliu', ti jantajle ni Inia'. Janaka'ne ti ja sijwe'el.

²⁷'Yina asam'neje ti ja sijwela', lapakawo ti jleye ta'a ijiap ti 'nelanjie'e.