Read Iyojwa'ja Chorote San Juan 16 Bible Online

San Juan 16 - Iyojwa'ja Chorote bible

San Juan 16

¹“Jla'm ajwe'lase'm ta'a niwaka, ja'nakayeyi ti ja ke anetiajnata siunie astankiujnieyejak'i.

²Awojlitieje ti japoye jana jloma ti ja ijnotiejak'i kisie'e ti ja intajlajayi kiajwe niwa 'najla'wetis. Ja'wena'ajyi ti japoye siojona jloma ti japoye napo ti asama ti ja tilianaja'm, siupapo janlanajyi'n janjwelis ka pakaye Sinia' ka inoyeje siupi iyo.

³Niwak siuniwa janwo napo i'nio', lajk'ipa ka intajle ti naka, ti je itiant'iejts'e ti sa'am, ya'am jla'yi ni Inia'.

⁴Ajwe'lasem ta'a, 'nakayi 'wanjliyina'ajpe ka neyi janak jloma, siunie iyo niwa ajwe'lase'm ja ke inesi'lieta ka ataj enayeyijpe 'ate siunie janwo ni ajnat. “Jla'am je ajwe'lase'm ta'a naka ti 'nelanjie'e, lapawo ti je sitiana' ka kia'awo, ts'etsaka ti a'yasap.

⁵'Yina 'nakayi jayik, jayapili ni siunie sijliu'. Tiwet'ianaja ka injwanjli wata paka si'yas'ni ka 'najane paka wone siunie jajiojwi.

⁶'Wenajliyi ti je inkasajyi'n ti sipe'yaye ti kia'awo.

⁷Ijiatk'i siunie jayo ti jajwi'lase'm, ti siunie ti jayik nak ja'nesieyi. Jlam ti kiak jawo, ja ke iyik, ja ke inamana'a pet siojona asp'ota ka ne'yasap. Jlam ti jayik, sekjane'yi ka namana'a janaka siojona ajwe'el, ti jajliu'.

⁸Siuka 'nesta janaka Sinia' jikimet ti 'es, ka 'nakajanitiena'ape napo i'nio' siunie iyo niwa jikeyis, jla'yi ti po' siunie 'nayi tejeyi ts'iji ti i'nio' iyo ka 'esie, jla'yi 'neje ti Sinia' je ijiat ka je i'ye'en ni jitis iyo ni i'nio', niwak ja'nakajaniti ape'e.

⁹Siunie jloski'la napo i'nio' yi' ape'e 'ni ajnat, naka ti sakakiuyis.

¹⁰Siunie ti jayik jla'yi ti ja ke si'wena', nak ja'nakajanit ti ts'es.

¹¹Jlam pet siunie ti Sinia' jan'ye'en napo i'nio' siupi jitis iyo, naka pet ti siunie i'nio' ti isie'e 'ni ajnat, ja 'nakaj ti pajk'i ti tisiejek'i.

¹²“Mawat je atejwta'aja kisie'e siuniwa ijia, 'wanjliyi je 'najanatieje, 'wanjli'itieje kajwi'lase'm.

¹³Jlam ijiate ka 'nesta janaka ti ijiateje ti Sinia' jikimet ti 'es, janak ja into'nase siunie ki iyo ni ijiatk'i. 'Yina ja ke jlama ka jlamtisa' siunie jawo, janjwel pet siunie iyo ni ipi'yayi, ja'najanki'nase ta'a siunie jawo puwa ja'wena' ts'ijiye.

¹⁴Ja wujwa ti ja siwunit, siuniwa janjwe'el ya'am ti jantalk'i, sekjane'yi ka injlasata'anie'ase ka intant'iejayi pet.

¹⁵Wikie'eyi siuniwa yiyi ni Inia', isijmatis 'neje pet. It'imina ti kiak awo'najase ti awo'ate: siojona Sinia' jikimet ti 'es siuniwa janjwe'el ya'am ti jantalk'i, sekjane'yi ka injlasata'anie'ase pet, ka 'najanayi pet paka wonayi.

¹⁶“Ja ke pajayi wat siunie ti ja ke si'wena', 'yina jlomas 'nak janojwaja'm, ka si'wenayena'aja.”

¹⁷Po' japo t'eyasajnas 'nak nojwaja'm, iyoyis'ne 'ate ti ini'yasis: —¿Tepit'e ijio'we kiaka ti iyonts'e 'ate, “Ja ke pajayi wat siunie ti ja ke si'wena', 'yina jlomas 'nak janojwaja'm ka si'wenayena'aja, ti jatial 'niji yi'i ni Inia'”?

¹⁸¿Tepat'i iyo ti iyo'ate “Ja ke pajayi wat”? Je kastant'iek'i siupi ijwi'il.

¹⁹Jesús itijnisieje ti t'eyasajnas iyo ka i'yasisi'n, it'imina'ne ti iyo'ate: —“Ja ke pajayi wat siunie ti ja ke si'wena', 'yina jlomas 'nak janojwaja'm ka si'wenayena'aja.” ¿Nakt'e jininekiajlayi, ti jiwoyejyink'iye ka 'najanayi?

²⁰Ijiate siunie jayo ti jajwi'lase'm, ti japoye siojona jloma ti ja apajyi'n. Asajlas japoye, jla'yi ti janetia'n siunie asnikanitieyi iyo. Ja jlam'neja pet siunapo i'nio' yi'i 'ni ajnat ja wujwa ti ja inkasaja'n. Ja ejloye wekie'e, 'wanjliyi ka kia'awoyeyi ti ja ke inkasajyi'n. 'Yina lapawo ti siuniwa asjlak'ali iyo jank'iuye'e pet siunie asnikanitieyi.

²¹'Yejne'n, siojona i'nioki ti jlas janejyi'n, je ijwiyeyiji'ni, 'yaka inilat yiyi siojopa jloma ti janejyi'n pi jlas. Siuti yiyetaja'n paja'nine ti yi' kisie'e pi kia'le, je jlase' ni iyo isiwaliyeyi'i'ni siupi ji'wok iyo 'yaka inka'a pi jlas ti k'iejli yi'i 'ni ajnat.

²²Kiak jiwoyeyi'ni pet ti asa'am, asjlak'ali poye 'nakayi. 'Yina siuka yapitiemet, ti ja'ye'nase, ja pakayeyi ti ja ke jlasiye ni asnikanitieyi siunie ja'wena', ti ja ke poye paka ijna'lase.

²³Janak siojona jloma ti ja ke ekiajlayi'ne ka si'yasayiji'n paka k'iejliyeyi. “Ijiatk'i siunie awo ti awo'ate, siunie Inia' siuti ja 'ajlayi pi k'iejliyeyi, janwe'nase'm siuti jasetina.

²⁴Awakie yi 'nijiye ti je setina ka k'iejliyeyi paka 'ajlayi. ¿Yot'iyi'ni ti je t'iejlayi? Janwe'nase'm 'nakayi ti ja ke jlasiye siunie asnikanitieyi ti ja'wena'.”

²⁵“Siuniwa iyo niwa ajwe'lase'm niwak siuniwa jla'm ejnap jiwekie'e. 'Yina je ijiat ka je ineyi siojona jloma ti ja ke asetiana' ka kiak tiwona'ase. Ka jnieyetak'iyijna'a ti ja 'yakajanit'iase'm ki iyo ni Inia'.

²⁶Nak siunie jloma, ti ja 'ajlayi pi k'iejliyi pi jasetiana' ni Inia', ti jasetina. Ja ke yama'ne ka 'yasane ask'ioye pa,

²⁷'yaka jlam jla'am ni Inia' ti 'nama'ase. Tepa jawo ka kiak je iwo ti asam pet ti i'namajak'i, jla'yi ti je sakakiuye ti ya'am ti atajle ni Sinia'.

²⁸Ti anamape atajla kiu jitieyi'i ni Inia', ti ana'me 'ni ajnat. 'Nakayi jatiaj'leje 'ni ajnat ti jayapili ni Inia'.”

²⁹Sekyi'i japo t'eyasajnas iyo'ne 'ate: —'Esieyiji'ni ti je 'yejnap pa k'iejliyeyi, 'yakajak'i 'neje.

³⁰A'wena 'nakayi ti 'najane wikie'eyi niwa wask'i'nelaja, 'wanjliyi ka lajak'ipa ka in'yas'ni, ka in'yase'ni paka k'iejliyeyi. Nak it'imina ti je akakiukie ti ijiatp'ane ti jitial Siniayi.

³¹Jesús isiujlie pet ti iyo'ate: —¿Je t'i pa sakakiuye 'nakayi?

³²'Nakayi yiyi janak jloma, siujlie'e jloma ti ja inetianajyi'n, ja apilie'ek'ina'a niwa as'wetis, ka sijwanjliyena'a pi ja siliyeyi'i. Mejla'ala ka ijiatayi ka sijwanjli, 'yina po' ni Inia' yi' ijiap.

³³“Wikie'eyi siuniwa ajwe'lase'm jant'eminajna'a ka akamankiye atajlayiji ti je sakakiuye. Ja ke jlasiye ni asjlak'ali ape'e 'ni ajnat. 'Yina ke ajlasatayijna'a isia'm siunie jiwoyeyi, 'yina pajk'i ti 'a'n ape'e ki iyo ni yi'i 'ni ajnat.”