Read Iyojwa'ja Chorote San Juan 18 Bible Online

San Juan 18 - Iyojwa'ja Chorote bible

San Juan 18

¹Ti itimayi ti iyo t'ajlayeja', yam'ne ti jla'yis japo t'eyasajnas ti tomis ji'wechaja ja i'niat ji'niayi jle' iyo'ate Cedrón, ijioyeyisia'm siojo inwasok sekyi'i.

²Judas, siojo iwi'in ja jika'niona, jlam ti itiant'ieje kajeyepa ti je piniyeyiji ti sek ijioyits'i'ni, ti jla'yis'ni siojopo ijia Jesús t'eyasajnas.

³'Yina 'nes'ne ja Judas ti ajnaj jla'yis japo ijiawos siu'neje japo i'yena jlaja 'najla'wet. Siojopo pa'yijis jika anechiyasas japok ijliuk'i, japoka 'neje jla'am japo Fariséojos, ti iyoyis jikio' jleliye, jla'yi ti iyoyis jika katesila.

⁴'Yina Jesús pajk'i ta'a ti 'yijene pi iyone siukia ja tiwonaja, it'imina'ne ti iniuye kisie'e, iyo'ne 'ate: —¿Tempi jiwoyejyin'ni?

⁵Isiujlisie ti iyo'ate: —Siojo Jesús Nazaret jlele. Jesús isiujlie japo ti iyo'ate: —Ya'am. Judas, siojo iwi'in ja jika'niona, yiji japo i'nio'.

⁶Jesús ti iyoye 'ate, “Ya'am”, jiwe ijliasatayik'iji'n japo i'nio', sekyi'i ti yamak'i isia'm.

⁷Sekyi'i ti Jesús yikiajlayi'iji ti i'yase'n japo i'nio' ti iyo'ate: —¿Tempi jiwoyejyin'ni? Kiak iyoye'ijyi pet ti isiujlisie: —Awoktajayin'ni siojo Jesús Nazaret jlele.

⁸'Yina Jesús kiak iyonayiji'ijyi japo, ti iyo'ate: —Pajk'i ti ajwe'lase'm ti awo'ate, “Ya'am”. Siuti ya'am ti siwoyejyin'ni, ena'yate siunapo ya'yis ka nek'ni.

⁹Sekyi'i ti yiye kisie'e siukia ti Jesús iyo'ate, “Siunapo jiwenk'i'm, lajk'ipa ka injwanjli kanetiane.”

¹⁰Jlam'ne siojo Simón Pedro ti jitisajnat tiok po', itiona kisie'e, ijwiejayi jlaja jik'iote siojo jle' iyo'ate Malco, pa'yijis jika anechiyas jikawo.

¹¹Jesús iyone'ne 'ate ja Pedro: —¡Ekialk'i ni atesajnat tiok! Siuti Inia' si'yayijni 'naka siu'nie pajyi, ¿yot'iyi'ni ka je i'yaje?

¹²Siojopo ijiawos jla'yi ja jika anechiyasis, siu'neje japo i'yena jlaja 'najla'wet, isimits'i'ne ja Jesús, sekyi'i ti ilie'nitisie.

¹³Iniajnatis ti ijioyisiji ja Anás, siojo Caifás jikant'ek, ti jak jlameje ti jika anechiyasis japo pa'yijis siukia najkap.

¹⁴Caifás jaka siojo iyone'ate japo Judíojos, “'Esiji ka injwanjli paka tiliana ape'e napo ijia.”

¹⁵Simón Pedro jla'yi siojo Jesús t'eyasanik jikiecha 'wanjlejap'ni isia'm ja jika'niona ti tokiji jlaja pa'yijis jika anechiyas ji'wuk. Siojo Jesús t'eyasanik jikiecha ti pa'yijis jika anechiyas itiant'ieje, it'imina ti t'ajlinitie k'iye ti 'yuyijk'i ja Jesús.

¹⁶'Yina Pedro 'wanjli jlam kisie'e yi'i ja 'wuk kiwet. Jak je iyoyiji'ni siojo Jesús t'eyasanik, ti titiant'ieki, ijioyi'ni siujlieja i'yena ja 'wuk kiwet, iyone'ne 'ate: —'Esiji ka 'ajlinit k'iye siunie i'nio'.

¹⁷Siujlieja asejnia i'yasen'ne ja Pedro ti iyo'ate: —¿Am 'neje ti t'eyasanik'ia'm siojo i'nio'? Pedro isiujlie ti iyo'ate: —Je'e, je ya'am.

¹⁸'Yina ti techaja'n jakayi, siojopo ijiawos siu'neje japo i'yena jlaja 'najla'wet, t'ajlet ijlianisi'i'ne, 'yina kiak tejeyits'i'ni'ne. Pedro kia'iyo sekyi'i teje'yi'ni pet ki jwat.

¹⁹Siojo pa'yijis jika anechiyas i'yas'ni ja Jesús, ti i'yaseje'n japo t'eyasajnas, siu'neje ni iyo ni jika'neyasajnaye.

²⁰Jesús isiujlie ti iyo'ate: —Siuti amti je anijweki, eni'ni jitieyi'i wikie'eyi napo i'nio', jla'yi ti aka'neyasanata eni'ni kiajwe siuniwa 'najla'wetis je wus, siu'neje jana wuj, siu'neje niwa yi'i 'ni napo Judíojos ti initotietak'i wita'm. 'Yina lajk'ipa ka yi'i ka inijwek ti amtiyeta.

²¹¿Yot'iyi'ni ti si'yase'n? 'Yase'n siunapo sipe'ya'nijne, napok janjwe'la'm siunie iyo ni 'eyasane'ni. Napok 'yijene siunie ajwe'el.

²²Ti Jesús kia'iyo, siojo i'yena jlaja 'najla'wet sekyi'i ti ipiaj'ne ja Jesús, ti iyone'ate: —¿Kiak jiwo ti jikiujlie ni pa'yijis jika anechiyas?

²³Jesús isiujlie ti iyo'ate: —Siuti jijwe'el ka je 'esiek'i siunie awo, jwelik'i siupi awo ti je 'es. ¿Yot'iyi'ni ti sipa?

²⁴Anás ipi'yaye wekie'e, ta'a ti takajlunie ka tikiniejeje ja Caifás, tilie'nitie'ne ti tikinieje.

²⁵Pedro siuti je t'eki kisie'e ti teje'yi'ni ja jwat. Jak je iyoyiji'ni siojopo yijap i'yasen'ne ti iyo'ate: —¿Me am 'neje ti t'eyasanik'ia'm 'neje siojo i'nio'? Sekyi'i Pedro iyo'ne 'ate, ti inikakiu: —Je'e, je ya'am.

²⁶Sekyi'i siojo pa'yijis jika anechiyas jikawo, siojo Malco jikiecha, siojo Pedro ijwiejepi jlaja jik'iote, yijap japo. Iyone'ne 'ate ja Pedro: —Awo ka amjliye'eje ti a'we'na ti jlejiap ts'e yi'i ja inwasok.

²⁷Pedro yikiajlayi'iji ti inikakiu, 'yina yiyik'i wekie'e yapa ja ajwenta.

²⁸Ti jloma 'yakajaja'n, Jesús tokiji'ni siojo yi'i ja Caifás, sek titiajlaja'a ti tikiniejeje siojo anechiyas Roma jlele. Siojopo Judíojos je 'yuyisk'i, 'yina ti iyo ka je inetiajnatis siukia jikeyis ti iyo'ate, “Siupa ka 'no kiajwe siojona je Judíojos ji'wuk, nakaye'eje siunie i'nio' ti t'ojli, je tiwenaja'm ka inkijwane siunapo ti'yekiujni jana Pascua.”

²⁹Kiak it'imina ja Pilato ti iniuye kisie'e. Sekyi'i iyo'ne 'ate: —¿Tempi jitiajlatayi siu'nie i'nio'?

³⁰Iyoyis'ne 'ate ti isiujlisie: —Siuka 'esie pakawo, 'yina jlam je anamataja'a'ni.

³¹Pilato iyone'ne 'ate japo: —Kima'yi, asa'am ja in'wesieyi pi jawonayi ti ja'yena' siupi jitis iyo, iyo jla'am ni aska'neyasajnaye iyo ka woyeyi. Judíojos isiujlie ti iyoyits'iate: —Sa'am ti Judíojosts'e'm, asa'am je wents'e'm ka kiak iyonaja ka ne'yi paka iliana.

³²'Yina sekyi'i'ne ti yiye kisie'e siukia iyopi jla'am ja Jesús ti inijwe'el, siupi janwo ti ja tiliana.

³³Pilato yapilie'eje kiajwe jlaja 'wuk, sekyi'i ti tanayi ja Jesús. I'yasen'ne ti iyo'ate: —¿Mi a'am Judíojos jika anechiyasts'a'm?

³⁴Jesús isiujlie ti iyo'ate: —¿A'am t'e ti atankiujnieye, ni'ne ka poye paka injwe'la'm?

³⁵Pilato isiujlie ti iyo'ate: —¿Yamt'i mi Judíok'i'm ti a'lej kiak jiwone? A'wetijwas a'am siu'neje napo pa'yijis jika anechiyasas, napok yikialk'i ka'ye'en. ¿Ten siupi jiwoyi?

³⁶Jesús isiujlie ti iyo'ate: —Siunie tijnak'i'm ti awo anechiyasa' je tal 'ne ajnat'e. Siut'itie ka intal 'ne ajnat'e, jlam potie'ne papo ka ijnotiji'n ijyik'i ka je siwenis, je kia'iyotaja'ni ka sekiajlaja napo Judíojos. Siunie tijnak'i'm ti awo anechiyasa' je tal 'ne ajnat'e.

³⁷Siuti Pilato ipi'ya, iyo'ne 'ate: —Ijiatp'ane 'yakaj ti anechiyasts'a'm. Jesús isiujlie ti iyo'ate: —Ijiate siunie jiwo ti sijwe'el ti anechiyask'i'm. Ya'am anam'ne ajnat'e, jla'yi ti a'yiji'n, 'nakayi ti jayamtiyi siunie ijiatk'i. Wikie'eyi siunapo yiji siunie ijiatk'i its'iuk'i'm.

³⁸Pilato iyo'ne 'ate: —¿Ten siupi ijiatk'i? Pilato iyotaja ka inojwa'n kisie'e ja Jesús, 'yina Judíojos je yina'ate. Siuti Pilato iliyeyi ti i'yas'ni ja Jesús, iniu'ne kisie'e. Sekyi'i ijwijla'm japo Judíojos ti iyo'ate: —Je a'we'en siupi ka jitis iwo siu'nie i'nio'.

³⁹Siuti asa'am po' ni aske', ti jiwayetaja siojona aslakijnieye Pascua anojwa'n kisie'e pi inkipinik ijwienjli. ¿Mi jlemina' ka iniujwa'n kisie'e ti asa'am Judíojosts'ase'm ni aska anechiyas?

⁴⁰Sekyi'i inikiul'ne japo ti iyoyits'i 'ate ti tanisi ape'e: —¡Je'e! ¡Ká anojwa'n kisie'e! ¡Nojwa'n jlam kisie'e ni Barrabás! Barrabás jak i'nio' kalankijieta.