Read Iyojwa'ja Chorote San Juan 19 Bible Online

San Juan 19 - Iyojwa'ja Chorote bible

San Juan 19

¹Pilato ijliuye japo tokis ka inkimits'i ka ink'ajas'ni.

²Isimisie'ne jawa k'itienis ti ijwinisik'i ti iyonisi 'ate siujlie'e jika wonta ni anechiyas, ti 'yutieyisia'm jlaja jletik ja Jesús, i'yuyenisk'i'ne siojo lotakinie isiat.

³Yikiajlayisiap'ni ti iyoyis 'ate: —¡Atejwila'a'm, Judíojos jika anechiyas! Sekyi'i ti ipiejayis'ni jitiokio'we.

⁴Pilato yapilie'eje kisie'e, ijwijlam'ne japo Judíojos ti iyo'ate: —'Yejne'n, aton kisie'e, 'nakayeyi ti ja'najanayi ti je a'we'en paka jitisa' siu'nie i'nio'.

⁵Sekyi'i tiniamaja'ne kisie'e ja Jesús, k'itienis takapajlatajak'i'ni jlaja jletik, ti'wujienaja'ni siojo lotakinie isiat. Pilato iyo'ne 'ate: —¡'Yejne'n, ekiaj'lase siu'nie i'nio'!

⁶Siojopo pa'yijis jika anechiyasas, siu'neje japo i'yena jlaja 'najla'wet, ti i'winayits'i ilia'm, iyoyis'ne 'ate ti tanisi ape'e: —¡K'iejwat'e japa cruz! ¡K'iejwat'e japa cruz! Pilato iyo'ne 'ate: —Kima'yi asa'am, k'iejwata'yi japa cruz, siuti ya'am je a'we'en paka jitisa'.

⁷Judíojos isiujlie ja Pilato ti iyoyis 'ate: —Po' na saka'neyasajnaye, 'yu'we ka tiliana siu'nie i'nio', kajeyepa siunie saka'neyasajnaye iyo jitisa' ti ijwi'il ka Sinia' jlasa'.

⁸Pilato ipi'yayi ti kia'iyo, kat'aja ti jnots'ijni.

⁹Yapi'ne 'wuk kiajwe, i'yasen'ne ja Jesús ti iyo'ate: —¿Tepi jitiajli? Jesús je iyo ka inkiujlie.

¹⁰Pilato i'yase'n ti iyo'ate: —¿Jop'an ka je akiulk'i'm? ¿Je 'najane ti it'iuni po' ka 'yakajliu'n ajap ka ink'iejwata'a japa cruz, ni'ne ka iyo ka iniujwa'n kisie'e?

¹¹Sekyi'i ja Jesús isiujlie ti iyo'ate: —Siunie at'oni ti yi'a, ka je intal Siniayi je 'najane paka wone ka siniujwa'n kisie'e. Jak je iyoyiji'ni siunie ti sekial ka ama ka si'ye'en, jitis 'yaka'm ape'e siunie iyo ni ates.

¹²Sekyi'i ja Pilato ti iyoyetajayi'n siupi ka inwone ka inojwa'n kisie'e ja Jesús. Siojopo Judíojos iyo'ne 'ate: —¡Ka anojwantana'a kisie'e, ka akojwayena'a ni saka anechiyas Roma jlele! ¡Kajeyepa siunie iniwojwa'n anechiyasa' iyoye'ate ti jla'am ti teje'yi ilia'm ni saka anechiyas!

¹³Siuti Pilato ipi'yayeyi, takajlunieyi ja Jesús ka titiona kisie'e. Sekyi'i ti tanayi ti ti'yena siupa jitis iyo, yi'i siojo tenaja'a'ni napo ti kia'iyo, Hebréojos ji'lij iyo'ate Gabata, ti iyo'ate Sisajas ti T'otata Ape'e.

¹⁴Jakiak siojokia jloma ti je toj'we siujlie'e Pascua, siukia ti 'najlikisie. Pilato iyone'ne 'ate japo Judíojos: —¡'Yenajyi'n ni aska anechiyas!

¹⁵Iyoyis'ne 'ate ti tanisi ape'e: —¡La'an! ¡La'an! ¡K'iejwat'e japa cruz! Pilato i'yasen'ne ti iyo'ate: —Jlam'ne asa'am ti aska anechiyas, ¿jiwoyeyi'iji ka ts'iejwat'e japa cruz? Siojopo pa'yijis jika anechiyasas isiujlie ti iyo'ate: —¡Lajk'ipa ka jikiechaye ka saka anechiyasa', ijwienjli jla'am ni saka anechiyas ni Roma jlele!

¹⁶Sekyi'i'ne ja Pilato ti yikiajlayi japo i'nio' ja Jesús ka ink'iejwatits'i jlaja cruz, 'yina yamisi'ne.

¹⁷Jesús titilkinaja'ne jlaja jika cruz, ti tikiniejayi. Paj ti yiyeyi siojo ajnat jle' iyo'ate Ijnetik Jleli 'Wet, siunapo Hebréojos iyonisi 'ate Gólgota.

¹⁸Sek tena'a ti tik'iejwata'a jlaja cruz, tijwanaja'a siojopo times, ijwienjli ja titiujmataja ji'lieme ijwienjli 'neje siojo titiujmataja jijweyeje.

¹⁹Pilato takajlunie'ne ka tilisanaja siukiwa inamtis ka tena'a jlaja jika cruz ka iwo'ate, “JESÚS TI NAZARET JLELE, JUDÍOJOS JIKA ANECHIYAS”.

²⁰Siojowa inamtis tilisanaja tajla'm napo Hebréojos, Roma jlele, Griego ji'lij. Jak je iyoyiji japo Judíojos i'yen'ni 'ne; siojo tena'a ja Jesús ti tik'iejwata'a jlaja cruz je tojwape'n jlaja isi'.

²¹Siojopo pa'yijis jika anechiyasas ijliuye ja Pilato ti iyo'ate: —Ká awonena'a 'ate, “Judíojos jika anechiyas”, wonena'a jla'am 'ate, “Inijwe'el jla'am ka Judíojos jika anechiyasa'”.

²²'Yina Pilato isiujlie ti iyo'ate: —¡Siunie 'ete'e, yi'i ni yi'i!

²³Siojopo tokis, ti itimayisi ti its'iejwatits'i jlaja cruz, inijnojlietayisi kiwa ji'wuye ja Jesús ti inik'isajasi, ti ijniujli ki nojwa'm ti ijniujlits'i. Isimisie'ne siukia ji'wu' siukia isaja tatijla wek jikiusk'i,

²⁴iyoyis'ne 'ate ti initajlatayisi: —Je 'esiji ka iyok jijwala', jla'am ijiate jla'am ka iliakijnie ape'e, jajnewite pi jajnewite pak jikimitayijijna'a. Sekyi'i ti yiye kisie'e siuniwa inamtis t'ipi ti iyo'ate: “Inik'isajasi kiwa ji'wuye, tiliakinits'i ape'e siukia ji'wu' tatijla wek jikiusk'i.” Kiak siukia iniwonisi japo tokis.

²⁵Siujlieja Jesús jlet sekyi'i, yi'i jlaja cruz, siu'neje jlaja jikitia jla'am jlaja jlet, siu'neje jlaja María Cleofas jik'iemjla, siu'neje jlaja María Magdala jleliki.

²⁶Siuti Jesús i'winayi jlaja jlet ti yijap siojo t'eyasanik ti wuj ti yimi'n, i'yase'ni jlaja jlet ti iyo'ate: —¡Asejnia, wone asa' naka!

²⁷Sekyi'i i'yase'ni siojo t'eyasanik ti iyo'ate: —¡Wone eta' janaka! Jakayik'i'ne siojo Jesús t'eyasanik María ijioyi'ne ji'wete.

²⁸Yam'ne 'niji kiwaka, Jesús 'yijene pi iyone ti itime wikie'eyi siukia iyo. Iyo'ne 'ate: —Siki'im. Siuti kia'iyo, ti iyojonk'iye ka ijiatak'iyi siuniwa Sinia' jlamtis.

²⁹'Yina po' siojo tetik wuj tipoyi ki at'es ti tosijyi. T'otiejam'ne japa inkats'ili jak at'es, ti tits'ijwana'a ki a'la' jle' iyo'ate hisopo, sekyi'i tena'ne jikiwiti.

³⁰Jesús its'iujwam'ne, sekyi'i iyo'ne 'ate: —'Esiji, atejwi. Sekyi'i jletik iniajmana isia'm, ti 'yala.

³¹Jakiak siojokia jloma ti tome'e jla'a i'nio 'wanjlijyi'n. Siojopo Judíojos ti anechiyasas je iyoyisink'iye papo i'nio mases ka 'wanjliyek'i pijia'm ape'e puwa jika crusis, jla'yi ka neyi puwa ka jlomas 'nak nojwaja'm. 'Yina siojokia jloma i'nio 'wanjlijyi'n, ijyiwitajam'ni jakia Pascua, jakiak jloma ti wuj ti tilisana. It'imina'ne ti ijioyisi ja Pilato, ti iyonisi 'ate: —Kajlunie siunapo yi'ik'i pijia'm niwa jika crusis ka jlekijna akiajatajiamk'i, ja titimaja ka tenajana'a ajnat'e.

³²'Yina Pilato ijliuye'ne japo tokis ka kiak inwonisi. Yiyi ti kiak iyonayisiji iniajnatis'ne siojo ti tiniajnata ti tena pijia'm. Itimisi ti jlekijna isiajatamk'i, yamayisi'iji ja jikiecha tome jlep'e ja Jesús.

³³Ti ijliasayisi ja Jesús, i'winis'ne ti pajk'i ti 'ya'al. Jak je iyo'ni ka jlekijna inkiajatamk'i.

³⁴Siojo tokis kiecha isiene jlaja jika k'ok ti 'yita'm ja Jesús, ts'e jlawe'e. 'Yina 'woyis siu'neje ki i'niat ki tajla'm ti itiya kisie'e.

³⁵Siunie i'nio' i'winaja, nak ijwi'il ti yamtik'i, 'yina ijiatk'i siunie iyo niwa jlamtis. Kia'iyo 'yijene pi iyone ti ijiatk'i siunie yamtiyi, ti iyo ka je akakiuye.

³⁶Lapakawo ka kiak je iwo ti yiyi ti iyo ka ine kisie'e siuniwa inamtis t'ipi ti iyo'ate, “Ja ke ine'yina'a paka jleliye ka tikiajataja'm.”

³⁷Iyo 'neje 'ate niwa inamtis t'ipi, “Jla'am jan'yenisi'ni siukia 'yitisia'm.”

³⁸Pope ja i'nio' jle' iyo'ate José, Arimatea jlele, yamk'ijin'ni ja Jesús, 'yina inijweki kajeyepa ti je ijwiye japo Judíojos siojopo anechiyasas. Ijioyi'ni ja Pilato ti iyo'ate: —Ke enk'i'm ka yiki ki t'ajwes masa ki Jesús. Pilato iyo'ne 'ate: —Ijiatp'ane, mayi. 'Yina José yami'ni, sekyi'i ti yamayi.

³⁹Nicodemo kia'iyo 'nes 'neje, siojo ijioyipi ja Jesús ti ajnaj. Ti itiuni kiwa t'ajwes ki Jesús najapeji ti itijwa'm niwa sikioye pi jikiojieti t'ipi siojo jini inkajk'i, mirra ti tijlijnataja ki áloe.[5]

⁴⁰Siojo José jla'yi ja Nicodemo isimisie'ne ja lotakiniewa ti yikiajlisi wita'm kiwa t'ajwes masa ki Jesús. Ijwienisi'i 'ne siojo jini inkajk'i, iyonisi 'ate napo Judíojos, ti itijis k'iye pi jikiecha masa ti 'yalata.

⁴¹'Yina po' siojo inwasok je tojwape'n siojo tena'a ja Jesús ti tik'iejwata'a jlaja cruz. Jaka siojo inwasok po' ja a'no' ti lajlijyi'ijyi kajeyepa ti ink'ie'.

⁴²Sek tena'a'ne ki t'ajwes masa ja Jesús, kajeyepa ti je tojwa, jla'yi ti je toj'we siojokia jloma ti i'nio 'wanjlijyi'n.