Read Iyojwa'ja Chorote San Juan 2 Bible Online

San Juan 2 - Iyojwa'ja Chorote bible

San Juan 2

¹Jlomas najape poyet'ipi ja tijwa'yi yi'i jlaja isi' jle' iyo'ate Caná, yiji jlaja ajnat Galilea. Siujlieja Jesús jlet yiji japo i'nio',

²Jesús jla'yis japo t'eyasajnas sek yiyits'i kajeyepa ti ti'yasaja kajnoyi siojokia inlakijnieye ilisane siojo tijwa'yi.

³'Yina siuti nojwat'ijyipi ki at'es, jlet iyone'ne 'ate ja Jesús: —Nojwi ki at'es.

⁴Jesús iyo'ne 'ate ti isiujlie jlaja jlet: —Jla i'nioki, ¿yot'iyi'ni ti kiak jiwonk'i?, ti je yijliyi'ijyi siojona 'yaka jlomaye.

⁵Iyone'ne 'ate siojopo iniuyisieje'ni ja tijwa'yi: —K'iuyeyijna'a siupi janwo'nase.

⁶Ijwienjli sikio' itij'we ijwienjli tom'niji jawa inatiwa sisaj sekyi'i, siunapo Judíojos i'niat isiayisiamk'i'ni ti inilejes iyo siunie jike'. Cincuenta lítrojos pi ijniujli ti i'niat tisiayek'iji'n, iyot'iyi jawa setenta pi ijniujli.

⁷Jesús iyone'ne 'ate siojopo inkawos: —I'niat sayets'iji'n niwak inatiwa. Ipionitisik'i'ne kiwa inatiwa,

⁸sekyi'i Jesús ijliuye siojopo inkawos, ti iyo'ate: —Sayeyi k'iye pi jwamjla'a siojo jika anechiyas pet siunapo inkawos, tonieyi. Ijiatjliyi yamayisiji.

⁹Siojo jika anechiyas siojopo inkawos ijyijlitam'ne jlam'ne i'niat ti 'nelanjie'e siukia ti iyo at'esa'. 'Yina je 'yijene siukia taj'le ti 'nelanjie'e. Japokata jla'am inkawos 'yijene pi iyone, kajeyepa ti jlamis ti isiayisk'iji'n kiwa inatiwa. Siojo jika anechiyas siojopo inkawos i'yase'ni siupi tijwa'yi,

¹⁰ti iyo'ate: —¿Yot'iyi'ni? Jlam'ne tiniajnatajie'e siunie 'es at'es, ijiatjliyi ti pajata, ti jitiej je isisietajats'i'ni napo i'nio' jiwekie'aja ti tikimaja siunie je ijiat ka 'esie k'iye siunapo ijioyi jana inlakijnieye. Ijiate wat ti 'es siukia at'es ti jitiujmate pijia'm sik'ioye ti jiwents'e'm. Amta ti jiniajnat siunie 'es ti jiwents'e'm, ijiate ti 'es wata'a ti jilisa'n it'imina ki iyo.

¹¹Jakayi ti Jesús yi 'ne Canaja, ti yiji jlaja Galilea. Naka ti 'nelanjie'e iyoyeyi ka in'wenki'n siunie iyo ni jijweye. 'Yina ti i'wina siojopo t'eyasajnas, je 'yakakiuyis.

¹²Yam'ni'ne ti ijioyisi jlaja Capernaum ti itimisieyi siukia iyoyisi, jla'yiki jlaja jlet siu'neje japo ji'niayi ijwienjliyi siu'neje japo t'eyasajnas. Sek 'wanjliyits'i paj ti jlomas nak nojwaja'm ti sek yiyits'i.

¹³Ti majleyeyi ka neyi siojokia jloma siunapo Judíojos jiliakijnieye, Jesús yam'ne ti ijioyi siujlieja ajnat jle' iyo'ate Jerusalén.

¹⁴'Nes'ne ti ijioye kiajwe siujlieja 'najla'wet. Sek i'wi'ne'ne japo ti takawejnajne'n. Po' japo iwin'ni jawa wakiajas, po'neje japo iwin'ni jawa ojwos, siu'neje japo jikiecha 'yutits'i'ni jawa jika wikijnies t'ejes yi'i siojo ji'wetis'ni pet.

¹⁵'Yina isimi'ne siojowa nejia' sekyi'i ilisane'ne ti iyo jik'ajnata'. Ijiut'ne kisie'e wikie'eyi siojopo yi' kiajwe jlaja 'najla'wet, ijwiene'e jawa jiliajwas sontas, siu'neje jawa wakiajas. Isiajiek'iji'n jawa jika wikijniest'ejes japo i'nio' siojopo jikiecha 'yutits'i'ni, yajmatk'i isia'm siojowa yinisi'ni ape'e jawa wikijnies t'ejes.

¹⁶Iyone'ne 'ate siojopo iwin'ni jawa ojwos: —¡Mayeyi kisie'e niwaka! ¡Ká awonayi inak ji'wukie jana Inia' 'wuk!

¹⁷Siojopo t'eyasajnas jitiej wujwayi siukia iyo kiwa inamtis t'ipi ti tip'esina ti iyo'ate, “Je jlase' ni awo ti isiowe yapili'ni jana a'wuk ti sikiwita.”

¹⁸Siojopo Judíojos ti i'wina siukia iyo ja Jesús, iyoyis'ne 'ate ti i'yasisi'n: —¿Ten siupi ja'wenkints'e'm ti jawoyi, 'nakayeyijna'a ti ja kasts'ajane siunie jitiajle'e ni ajweye?

¹⁹Iyo'ne 'ate ti isiujlie japo: —Siuti janetiajnatajyi'n siujlie'e 'najla'wet, jlomas ja najapeja ka yikiajlana'aja pijia'm.

²⁰Iyo'ne 'ate siojopo Judíojos ti isiujlie: —¿Tepi jiwo'ojyi? 'Yejne'n, ti tilisanajayi jla'ak 'najla'wet cuarenta y seis kiwa jika najkapis kiwa yiji ti jiwekie'aja ti wakal. ¿Ti jijwe'el ja najapeja puwa jlomas ka atemayijna'a ti ja ekial pijia'm?

²¹Jlamp'an'ne nakayep'antajpe ni t'ajwes ti ijwil'ni, ti ijwi'il siujlieja 'najla'wet.

²²Jak je iyoyi siojopo t'eyasajnas ti yiyeyi siojokia jloma ti Sinia' yikial pijia'm ti tajli ki a'no', jitiej wujwayispe siukia iyoyi ja Jesús, it'imina'ne ti je takakiunisi siukiwa inamtis ti yi'i ki ji'wet, siu'neje kiwa jlamtis ja Jesús.

²³'Yina ti Jesús je taljlijiajme jlaja Jerusalén, ti ijyiwitajam'ni siojokia inlakijnieye jle' iyo'ate Pascua, je pini' japo je 'yakakiu ti i'winis siukia iyo ti i'winki'n ti kiak je iyo paka in'wenis.

²⁴Jesús je 'yuyijk'i siupi iyo japo i'nio', 'yaka itiant'ieje siunie iniwonisi.

²⁵Ijiate lajatak'ipa ka injwejla'm ki iyo ki jlosik japo i'nio', kajeyepa jlam ti itiant'ieje ni jlosik iyo ni i'nio'.