Read Iyojwa'ja Chorote San Juan 21 Bible Online

San Juan 21 - Iyojwa'ja Chorote bible

San Juan 21

¹Yama 'niji siukia iyo, Jesús inikajanitieja'ajme siojopo t'eyasajnas, jikiuts'i siojo tewuk iliyi jle' iyo'ate Tiberias. Kiak iyopi kiaka.

²Japoka sek inita'a, Simón Pedro, siu'neje ja tamitaja'a'ni ti iyo'ate Timesi Tomás, Natanael siojo tal Canaja ti yiji jlaja Galilea, siu'neje japo Zebedeo jilis, jla'yis siojopo ijia times, Jesús t'eyasajnas.

³Simón Pedro iyone'ne 'ate ti i'yase japo ijia: —Jayik, jayo'o. Ijia isiujlie ti iyo'ate: —Naj. Ja'yunina ajak'i. Yam'ni'ne tisiojmayeyisia'm jlaja kasejkana, kiak siukia ajnaj ti lajk'iyi pa ka in'wenis.

⁴Ti jloma iniuye ts'ijiye, ja Jesús sek yiye'e jikiuts'i ja i'niat. Siojopo t'eyasajnas ti i'winayisi 'yina je itiant'iejesi'ne.

⁵Jesús i'yasayi japo ti iyo'ate: —Kia'lis, ¿mi je 'wenayi pa? Isiujlisie ti iyoyis 'ate: —Lajk'iyi pa.

⁶Jesús isiujlie japo ti iyo'ate: —Tatayeja'm 'niji asjweyeje jana aska 'nijiak jit'io, 'nak ja'wena'ne. Kiak iyonayisi, 'yina tojliyi ti je 'yakajlayeyisi pijia'm ti 'lojwa jawa yiji jlaja 'najak jit'io.

⁷Sekyi'i'ne siojo Jesús t'eyasanik ti jleminik iyone'ne 'ate ja Pedro: —¡Saka'niona p'an! Simón Pedro ipi'ya wekie'e ti iyo'ate, “Saka'niona p'an”, jla'm iyoye'ni 'ate ti yikiajlits'i jawa ji'wuye, kajeyepa ti 'najleje'n, yama ti yikiwaja'm ja i'niat.

⁸Siojopo ijia Jesús t'eyasajnas je tajlisi jlaja kasejkana ti yapilieyis kisie'e ti itionayis jikiusi, je tojwat jikiuts'i.

⁹Ti tisiojmayeyisk'iji'n, i'winayisi jitieyiji ja jwat ti 'nisa'a, si'yus siu'neje jlaja woye ti pajk'i ta'a ti tena ape'e.

¹⁰Jesús i'yas'ne ilia'm ti iyo'ate: —Toniemit puwa 'nak janojwaja'm siupuwa jilianajyi'n.

¹¹Simón Pedro yam'ne sekyi'i ti tisiojmayeja'm jlaja kasejkana, itiona kisie'e tipoyi jawa si'yus, ciento cincuenta y tres jawa si'yus wus 'najli. 'Wanjliyi 'lojwata jawa si'yus yiji jlaja 'najak jit'io, 'yina je its'isk'i.

¹²Jesús tani'ni'ne japo t'eyasajnas ti iyo'ate: —Joniemit, ja'yekiunie. Lajk'ipa ka ji'lij je inkip'e japo t'eyasajnas ka in'yase'n ka wo'ate, “¿Te'na'm?”, kajeyepa ti itiant'iejesi ti jaka Jika'nionajas.

¹³Jesús ijliasayi, sekyi'i isimayi jlaja woye, iwinak'i; kiak iyonjliyi ja si'yus.

¹⁴Sekyi'i ti najapajayiji ja Jesús ti ini'wenkijna'm japo t'eyasajnas, tajlap'e ti 'nelanjie'e iniuye kisie'e.

¹⁵Ti itimayisi ti ti'yekiujni'n, Jesús i'yase'n Simón Pedro ti iyo'ate: —Simón, Juan jlas, ¿mi ijiatt'iyi ti jika'm ape'e napo a'lejwas ti semi'n? Pedro isiujlie ti iyo'ate: —Ji'yu, 'najane ti emi'n. Jesús iyone'ne 'ate: —Ijiatp'ane, kojniejnenna'a niwa iliajwas 'wolepo' lis.

¹⁶Jesús yikiajlayi'iji ti i'yase'n ti iyo'ate: —Simón, Juan jlas, ¿mi semi'n? Isiujlie ti iyo'ate: —Ji'yu, 'Yaka'niona, am 'najane ti emi'n. Jesús ijwijlam'ne ti iyo'ate: —'Yena niwa iliajwas 'wolepo'.

¹⁷Jesús yikiajle'e'ne ti i'yase'n, sekyi'i ti najapajayiji ti iyo'ate: —Simón, Juan jlas, ¿mi semi'n? Pedro sekyi'i ti je inkajayi ka inkiujlie'ni, 'yina kajeyepa ti najapajayiji ti i'yas'ni ka ijiatayiji ka inemi'n. Isiujlie'ne ti iyo'ate: —'Yaka'niona, am ti 'najane wikie'eyi niwa wask'i'nelaja. 'Najane 'neje ti emi'n. Jesús iyone'ne 'ate: —Mayijinie'e pi jlak yi'i niwa iliajwas 'wolepo'.

¹⁸Ijiatk'i siunie jajwi'la'm, am ti jwemik'ia'm ti jiwo ka ak paka ajojwi, jiwoye a'wuye. 'Yina siuti ja kijila'm ja 'akajnie k'iye ni akio', 'yina ja 'wenayeyi siupi ja'nojienk'ipi ja a'wuye, jajnokijipi ja ijnokiji, siupi je am ka awo ka ajojwi.

¹⁹Ti kia'iyo ja Jesús itiant'iejeniti jla'am ja Pedro siupi jiliaye jawo, sekjane'yi ti jajnonitiapeje pi Sinia' siupi jiliayeja'. Itime ti kia'iyone, ti tanayi: —¡Naj, na'm ijyik'i!

²⁰Pedro i'yena 'wechaja, i'win'ne ilia'm siojo Jesús t'eyasanik siojo ti wuj ti yimi'n. Jaka siojo ti te'wayiji ti ti'yekiujni'n, siojo ti i'yase'n ti iyo'ate, “'Yaka'niona, ¿ten siupi janekial?”

²¹Pedro i'wijni wek ilia'm, sekyi'i i'yasen'ne ja Jesús ti iyo'ate: —'Yaka'niona, ¿nit'i pi ja k'iejliyeyi siupa jiliayeja' siu'nie i'nio'?

²²Jesús isiujlie ti iyo'ate: —Siuka iyo ka 'wasanajle ka iyapitiemet, ejlo wekie'e, je a'm ala. Naj, na'm ijyik'i.

²³It'imina ti wikie'eyi siojopo Sinia' jilis ijwi'il siojo Jesús t'eyasanik ti ijwilta ka je i'naleje. 'Yina Jesús je ijwi'il ka je i'naleje, 'najata jla'am ti iyo'ate, “Siuka iyo ka 'wasanajle ka iyapitiemet, ejlo wekie'e, je a'm ala.”

²⁴'Naka'ne 'ni ijwi'il niwa wask'i'nelaja, jla'yi ti ip'isi'n. Kasts'ajane ti ijiatk'i siunie ijwi'il.

²⁵'Loj niwa ijia Jesús 'yotate. 'Yina ka tipejlanitie ka tip'esijna' ajwelta ka lajayi 'weta ape'e 'ni ajnat puwa ka imp'esijnaye ka tenajajle wita'm.