Read Iyojwa'ja Chorote San Juan 5 Bible Online

San Juan 5 - Iyojwa'ja Chorote bible

San Juan 5

¹Yi'i 'neje jakia jloma ti paja, Jesús yapilie'eje Jerusalenne, ijyiwite siojokia jloma ti Judíojos iyo jiliakijnieyeja'.

²'Yina sekyi'i siujlieja i'niat ti inajie'wet jle' iyo'ate Betzata, ti Hebréojos ji'lij, 'yakama'a ja 'wuk kiwet jlaja isi' jle' iyo'ate 'Wolepo' Ka 'Wuk Kiwet. Ijwienjli 'ni sikio' itij'we siojowa jlopalikis jlajak i'niat.

³'Loj japo je isis tijwajiape'n. Po' japo talojo', siu'neje japo je t'ojni'n, siu'neje japo t'ajwes 'yajlits'iji'n, sek iniuyi'ik'iji'n ajnat'e yi'i siojowa ji'wetis ni jla'am.[2]

⁴

⁵'Yina po' siojo i'nio' ti pajk'i ti je 'es yiji japok je isis, treinta y ocho puwa jika najkapis yiji ti yi' jlo'wit'e.

⁶Jesús ti i'winayi ti sek iniuyi'iji'n, ta'a ti 'yijene pi iyone ti k'iejliye je iyo siupi jiliaye. Iyone'ne 'ate: —¿Jiwotajank'iye ka i'nes?

⁷Isiujlie ti iyo'ate: —'Yaka'niona, lapakawo ti lajk'i'ni wekie'eja paka inki'm isiajwe ka sejni'ni jana i'niat ti ti'wesieta. 'Wanjliyi'iji ti awotaja ka yikia'm, 'nes pa sekyi'i ti iniana'aja its'ioye, inianayi'iji jla'am ti yajma'm.

⁸Jesús iyone'ne 'ate: —Kasit, kima ni ajotik, maj.

⁹'Es'ne jak i'nio' jakayi, isim'ne kiajwe ja jlotik, sekyi'i ti yama, 'esieyiji ti t'iskiujni'n. Ijyiwitajam'ni siojokia jloma ti i'nio 'wanjlijyi'n.

¹⁰Siojopo Judíojos ti i'winayis ti its'iewijin'ni jawa jlotikiwa, sekyi'i ti iyonisi'ni 'ate: —'Yejne'n, siujlie'e jloma awaki jla'ak jloma ti je 'esiji ka atejliajan'ni ni ajotik.

¹¹'Yina iyo'ne 'ate jak i'nio' ti isiujlie: —Siojo i'nio' ti sijwajiet iyonk'i 'ate, “Kima ni ajotik, maj.”

¹²Iyoyis'ne 'ate ti i'yasis'ni: —¿Ten pak i'nio'?

¹³Isiujlie japo ti iyo'ate: —T'eyi, je sitiant'ieje. Lapakawo ti je pini' japo i'nio' it'imina'ne ti je i'wink'i'ni.

¹⁴Paj ti i'wina jla'am ja Jesús yi'i jlaja 'najla'wet jak i'nio', iyone'ne 'ate ti ijliuye: —Ke ekiajle'ena'a ka awo ni akeye, 'lojwinie'e ka ijiatayiji paka awo.

¹⁵Yama ja i'nio' ti ijwile japo Judíojos ti iyo'ate: —Jakap'ampe ja Jesús ti sijwajiet.

¹⁶Kiak it'imina'ne ja Jesús ti Judíojos iyo jitiejiejwaye, ti yiniji'ni pi k'iejliyi ti i'winki'n siojona jloma ti i'nio 'wanjlijyi'n.

¹⁷Jesús iyone'ne 'ate japoka: —Jlam kia'iyo, siunie Inia' talk'i'ni ti isijme'n, 'yina kiak awo pet akijme'n.

¹⁸Jak je iyoyiji'ni siojopo Judíojos ti kat'ajayi siukia iyo, ti yiminisk'i ti iyo kanlanis ti ipi'yayis ti je janakata ti je iyo lajaye siojona jloma ti i'nio 'wanjlijyi'n, siu'neje ti ijwilis ka iniwojwa'n 'ate pi Sinia', ti inijwe'el ti pak Jinia' pi Sinia'.

¹⁹Jesús iyone'ne 'ate japoka: —Ijiate, ijiatk'i siunie jayo ti jajwi'lase'm, ti Sinia' Jlas je 'yakajli paka k'iejliyeyi pa kanlesane ka jlama. Ijiatjliyi jla'am siupi i'winaja ti iyo pi Jinia', pakayeyi wekie'e ti iyo. Wikie'eyi siuniwa Jinia' iyo, kia'iyojliyi pet ti ilisane.

²⁰Siunie Jinia' yimi'n ni Jlas, i'winkina siunie iyo. Ja ke ja'nakatajayik'i japoye'eje siojona jloma ti ja ijiatayiji ti janka'm ape'e siunie iyo 'nakayi, ti ja inesi'lieta.

²¹Iyoye'ate ni Jinia' ti i'nisatk'i pijia'm napo 'yajle'n, 'yina kiak iyo'ni pet ni Jlas, iwijna'm napo iyo kanwejna'm jana ji'wasankiye.

²²Je jlam'ne ni Jinia' ka jlama ka 'nakajanit ka ne'yi pi i'nioye, 'yina ijwienjli jla'am ni Jlas ti pajk'i ti yikiajle wikie'eyi ni jijweye, nak 'yakajanit'ne jla'am ni i'nio',

²³ja 'nakayeyi ti ja tiwunitie ka iwoyena'a 'ate ni Jinia' ti intonitieye tena'a. I'nio' ni je iyunit ni Jlas, ja ke injwe'el ka pakataja ka inwunit pi Jinia' ti ijliu'.

²⁴“Ijiate, ijiatk'i siunie jayo ti jajwi'lase'm, ti siunie i'nio' ti its'iuye siunie ajwe'el, jla'yi ti je 'yakakiu siunie sijliu', itiej jana ji'wasankiye ti laj jlaja. Nak ja ke tisiejek'i lapakawo ti tijwajyi ni jota jiliayeja', yiyeja'm pet jana in'wasankiye.

²⁵Ijiate, ijiatk'i siunie jayo ti jajwi'lase'm, ti po' siojona jloma siujlie'e awakieja'm, ja wikie'eyeyi napo i'nio mases t'ipi ti pajk'i ti 'yajle'n jampe'yayi ni jla'lap ni Sinia' Jlas. Siunapo jampe'yayi napok 'wasanajana'a.

²⁶Iyoye pet 'ate ni Jinia' ti tajle jana in'wasankiye, kiak iyo'ni pet ni Jlas ti pajk'i ti yikiajle ni jijweye ka inwejna'm napo i'nio' jana ji'wasankiye.

²⁷Siu'neje ti yikiajle ka 'nakajanit napo i'nio', ti jla'am ti I'nio' Jlas.

²⁸“Ke k'iejliyeyijna'a paka awoyeyi ka ijnots'inajyits'i siunie ti jajwi'lase'm. Ti japoye jana jlomaye siunapo ti pajk'i ti 'yajle'n ti ja wikie'eyeyi ti jampe'yayisi siunie jla'lap jawo ni Sinia' Jlas,

²⁹jla'yi ti janok'i kisie'e ti jantajli niwa a'no'ol. Siupapo iyot'iyipi siunie 'es napok janapits'i pijia'm ti ji'wasankiye ti laj jlaja japoye. Jlam pet siupapo iyo ni je 'es, kiak janwo'ojyi ja'nesk'i pijia'm ti jantayi ka tisiejekik'i.”

³⁰Jesús iyoye'eje 'ate: —Ya'am je akajli ka yama ka itiajlatk'i ka iyo pi k'iejliyeyi. Siunie ti akajanit'i ape'e napo i'nio' ti Inia' yikialk'i, ijiate awo. 'Yina 'es ti awo, 'yaka je ya'am ka intalk'i ka yama, najata jla'am ti awo siunie iyo ka iyo ni sijliu'.

³¹“Siuka yama ya'am ka inijwe'el, siunie jajwi'il laj lajaye.

³²'Yina po' siunie sijwe'el, naka Inia', nak ijiate ti laja po' ni jlamtik.

³³“Ti jikajlunieyi'ni ja Juan ka ti'yasaja'n, siunie iyo ti isiuj'liase'm nak ijiatk'i.

³⁴'Yina je naka ka ts'esi puwa jlamtisie' pa ka ne'yi pi i'nioye ka sijwe'el. Awo ti ja 'nakayeyijna'a ka ajwaye.

³⁵Juan iyoye'ate jana kates ti yata'm ape'e 'ni ajnat, siunie jla'al inkaja'yi ejlowekie'e ti je itioyi'i.

³⁶'Yina po' 'neje siunie jwamjla'a ti 'yaka'm ape'e ja Juan ti sijwe'el: 'naka siu'nie awo. Siunie awo ti Inia' ijliuyijk'i'm, naka'ne ti 'yakajanit ti sijliu' ni Inia'.

³⁷“Siunie i'nio' ti sijliu' kiak iyojliyi pet sijwe'el. 'Yina ka kia'iwo ka ape'yaye pi jla'lap, ni'ne ka 'wena,

³⁸lapakawo ti nak it'imina ti jikakiunieyi siuniwa yamtis, ti ya'am ti sijliu' ni Inia'.

³⁹Wuj ti ji'yena' niwa inlesajna' kajeyepa ti jijwelayeta ka atajlayiji jana in'wasankiye ti laj jlaja, jlam'ne siuniwa inlesajna' niwak sijwe'el.

⁴⁰Ka kia'iwo ka joyek'i, ka'wena' jana as'wasankiyeja'.

⁴¹“Ejlowekie'e ti je seminata napo i'nio', je awoyi ijliak'aliye.

⁴²Sitiant'ie'ase ti je jlemina' pi Sinia'.

⁴³Awo ti ya'am ti aname niwa jlamtis ni Inia', 'yina ka kia'iwo ka 'wenayi'ni ilia'm ka kima'yi. Jlam'ne ka na'm pa ka name puwa ka jlamtisie', pak ji'wenayi'ni ilia'm ti jikima'yi ilia'm.

⁴⁴¿Tepa t'e jawo ka je sakakiuye siunie ajwe'el, ti asama'yasa'm ti jininekiajlayi ti jiniwunitie, jlam'ne ka woyejyi'n jla'am ka ijnonitie' pi Sinia' ti pakata?

⁴⁵“Ká atejnisieyijna'a jitieyi'i ni Inia' ka yama ka itiajlat'ase'm. Siunie jla'm ijiatayi Moisés, ti jinijijwiyejyin k'iye siupi iyont'iyisipi, janakaye jla'am.

⁴⁶Siuka ka je akakiuye siupi Moisés iyot'iyipi, kiak iyotaja'ni pet siuniwa ajwe'el ka je sakakiuyeyeta, kajeyepa siupa Moisés t'ipi ya'am ti sijwe'el.

⁴⁷Siuti jikakiunieyi pi ijwilt'ipi, ¿tepa jawo ka k'iuyeyi siunie ajwe'el?”