Read Iyojwa'ja Chorote San Juan 9 Bible Online

San Juan 9 - Iyojwa'ja Chorote bible

San Juan 9

¹Ajnat siojo iniu'we ja Jesús, sek i'wi'ne siojo i'nio' talok ta'a ti k'iejli yiji'n.

²Siojopo t'eyasajnas jla'am ja Jesús i'yase'n ti iyo'ate: —Inka'neyasajnawo, ¿yot'iyi'ni ti kia'iyo ni jiwet'ia, ti talok ta'a ti k'iejli yiyet'ijyimpe? ¿'Nakat'iyi jla'am ti iyo jikeye napo jiniewot, ni'ne ka jlama jla'am?

³Jesús isiujlie ti iyo'ate: —Je 'naka ka jike' int'emina ni'ne ka napokaye napo jiniewot, 'wenajliyi siunie iyo ka 'nakaj ti Sinia' 'yijene pi iyone ni jiwet'ia iyo.

⁴Alenjlipa ti jlomajli'ijyi, 'esijyi ka isimaja ni jikijmaye ni I'nio' sijliu'. Je pa tojwa'a siunie ti ja ajnaja, ti ja lajak'ipa ka inkajli ka inkijme'n.

⁵'Esijyi ti ajli'ijyi 'ne ajnat'e, ti ya'am ti akajanit'i ape'e napo yi' ape'e 'ni ajnat.

⁶Yiyik'i wekie'e ti kia'iyo, sekyi'i ti ijwiets'iunie ajnat'e, 'yina ti its'iatitieje'ni siukia ajnat ja iyone, sekyi'i ti 'yilinak'i ape'e jawa jitiete ja talok.

⁷Itimeje ti iyonayi 'ate: —Maj, joyi siujlieja i'niat Siloé. Le'e ni atokio'. (Siunie ti iyo'ate Siloé iyo'ate, Tijliuk.) Yam'ne siojo i'nio' ti talok ti ijioyi jlajak i'niat. Yiyi ti ilija'a ja jitiokio', yaka jla'm iwo ti i'winaja'n.

⁸Siojopo ji'wetijwas siu'neje japo ti i'winis'ni ti t'alk'i'ni japo pi k'iejliyi, iyoyeyis 'ate ti ininekiajlisi ti ini'yasis: —¿Mi 'naka 'na yijin'ni'ne ts'e, ti t'alk'i'ni japo ka tiwok ji'wajieta'?

⁹Po' japo iyo'ate: —'Naka. Siojopo ijia iyo'ate: —Iyo'itieje ti ijyiwitk'i. Siojo jlameje iyo'ne 'ate: —Ijiate, ya'am.

¹⁰Sekyi'i i'yasayisi'n ti iyo'ate: —¿Yot'iyi'ni jiat'eje ti ji'wejne'n?

¹¹Isiujlie ti iyo'ate: —Siojo i'nio' jle' iyo'ate Jesús, siunie iyonk'i, ijwiets'iujne'n, sekyi'i its'iatiti ki ajnat. 'Yilin'ne ape'e 'niwa itiete, sekyi'i sijliu'ne i'niate siujlieja jle' iyo'ate Siloé, ti iyonk'i 'ate, “Maj, joyi siujlieja i'niat Siloé, le'e ni atokio'.” Ijiatjliyi ak'ne, 'yina ti atemayi, sek a'yi ti a'wenap'ajne'n.

¹²Iyo'ne 'ate japo i'nio' ti i'yasis'ni: —¿Tepa yi'i pak i'nio'? Siojo i'nio' iyo'ate: —T'eyi, pa yit'iyi.

¹³Siukia jloma ti Jesús its'iatiti ki ajnat ti jlats'ilis ijline, ti i'wijnajne'n jak talok, jakiak jloma ti i'nio 'wanjlijyi'n. It'imina'ne ti tokiji japo Fariséojos jak i'nio',

¹⁵i'yasisin'ne ti iyo'ate: —¿Tepat'e iyo ti 'nelanjie'e in'wejnajne'n? Isiujlie japo ti iyo'ate: —Its'iatiti ki ajnat ti jlats'ilis ijline. Sekyi'i kiak 'yiline'ne ape'e 'niwa itiete. 'Yina siuti itiokio' aleja'a, sekyi'i ti a'wenaja'n.

¹⁶Siojopo ijia Fariséojos iyoyis'ne 'ate: —Yaka jet'i intal Siniaye siupi i'nio' 'yina siuti je ilisa'n siujlie'e jloma ti 'es, i'nio 'wanjlijyi'n. Jla'am iyojli 'ate japo ijia: —¿Yot'iyi'ni ka kia'iwo puwa kan'wenki'n ka kassesi'liet, siuka inke' jilianikie? Sekyi'i'ne ti inik'isaja japoka.

¹⁷Yikiajlayisi'iji ti i'yasis'ni jak i'nio' ja talokpe, ti iyoyits'i 'ate: —¿Tepi jiwo pet ti a'am, siupi i'nio' in'wejnajne'n? Isiujlie japo ti iyo'ate: —Ya'am awo'ate, injwejlanik jiwo jaka.

¹⁸Lapakawo ti je k'ask'i siukia iyo ti takakiunisi japo Judíojos, ti ijwilis ka je jakaye jak i'nio' ti talokpe, jla'yi ti takakiunisi ti i'wijne'n, it'imina'ne ti takajlunisi japo jiniewot.

¹⁹Iyoyis'ni 'ate ti ti'yasanisi: —¿Mi asas 'ni siu'nie? ¿Ijiate ti jlam talok ta'a ti k'iejli yiyeje'n? ¿Tepit'i iyo ti i'wijne'n 'nakayi?

²⁰Siojopo jiniewot iyo'ate ti isiujlie: —Ijiate kasts'ajane pi awonaja 'yaka sas, ti 'nelanjie'e yiyeje'n jlam talok ta'a.

²¹'Yina siuti 'es jla'yi ni iyo ti i'wijne'n, nak janjwe'el ti jla'am. 'Yasa'ni, isijlijie'e, ja 'nakaj jla'am siupa janwo ti janijwe'el.

²²Siuti ji'lij kiak iyone japok jiniewot jak i'nio' lapakawo ti je ijwiye japo Judíojos, kajeyepa ti pajk'i ti inipe'yayis ti iyoyits'i 'ate, “I'nio' ni janwo'ate Jesús nak Injwajietiwo ti Sinia' jijliujwanik, nak ja tijliukiepe”.

²³It'imina'ne ti kiak iyo japo jiniewot ti iyo'ate, “'Yasa'ni, isijlijie'e, ja 'nakaj jla'am siupa janwo ti ja inijwe'el.”

²⁴Japo Judíojos yikiajlayisi'iji ti tanisi jak i'nio' ja talokpe, sekyi'i iyonisi'ni 'ate: —'Yejne'n, sa'am awok'iate jike' po' pak i'nio'. ¿Tepi jiwo pet ti a'am? Ká ajwelts'e'm pi jiniliakie jitieyi'i pi Sinia'.

²⁵Isiujlie japo ti iyo'ate: —Je awo'ate ijiuski'la'n, ni'ne ka jeye. Nakata pet siunie ajwe'el ti ya'am, ti awope talokie 'nakayi ts'esie.

²⁶Yinayisi'iji ape'e ti i'yasis'ni: —¿Tepi iyo'naja ti i'wejnajne'n?

²⁷Isiujlie japo ti iyo'ate: —Pajatak'i ti ajwe'lase'm, 'yina je jik'iuyek'i'm. ¿Yoti'iyi'ni ti jiwoye ka yikiajle'e? ¿Ent'a kiak jiwoyeyi, jiwo ka akiniets'i pet?

²⁸Iyoyis'ne 'ate ti iliakiyis, ti ipi'yayis ti kia'iyo: —¡Nakp'an jlekk'i pet, sa'am akinieje pet pi iyot'iyipi pa Moisés!

²⁹Siupi Moisés kasts'ajane pi awonaja ti Sinia' tamtit'iyi'nijpe, jlam pet siuni i'nio' tiwet'ianaja ka ti'niejenaja siupi taj'le.

³⁰Siojo i'nio' isiujlie japo ti iyo'ate: —¡Kat'ajat'iyi wekie'e ka je 'najanayi siupi taj'le! ¡Awo ka jlamjliye ti sijwajiet it'imina ti a'wejne'n!

³¹Jejie'e kast'ayiji'n ti siunapo i'nio' ti jloski'la po' Sinia' je its'iuye, napokata jla'am siunapo ijiunit, jla'yi ti iyo siunie iyo kanwo.

³²Je tipe'yak jiwekie'e ka ne'yi paka injwe'el paka 'najane pa kanwone pi i'nioye ka in'wejnajne'n ka talokie, ka intajlap'e ti k'iejli yiji'n.

³³Siut'itie ka je intal Siniayi, ka je inkajlataja ka inlesane siunie iyo.

³⁴Sekyi'i kat'ajayi ti jwesis, iyonisi'ne 'ate jak i'nio': —Jlam'ne ki iyo ti k'iejli impoye, ake' tipoyi awa'm. ¿Jijwelt'e ka kasts'eyasajne'n? Yiyisik'i wekie'e ti kia'iyo, sekyi'i ti tijliukie.

³⁵'Yina Jesús t'ijieyi ti tijliuk jak i'nio' ja talokpe, siuti ini'wenayi'iji, sekyi'i iyone'ne 'ate ti i'yase'n: —¿Mi je kakiu siunie I'nio' Jlas?

³⁶Isiujlie ti iyo'ate: —'Yaka'niona, ¿tent'i pak i'nio' ka je 'yakakiu?

³⁷Jesús isiujlie ti iyo'ate: —K'iejli je 'we'en, ya'am ti akamtijniena.

³⁸Sekyi'i'ne ja i'nio' takosjlete'l itiyeyiji'n kiajwe, iyo'ne 'ate: —Je akakiu, ni 'yaka'niona.

³⁹Sekyi'i Jesús iyo'ne 'ate: —'Yejne'n, ti ana'm ajnat'e napok aname, siunapo talojo ti ja'wijnajne'n; jlam pet siunapo ijwil ka je talojoye jayojwa'n talojoye.

⁴⁰'Yina siojopo Fariséojos ti sekyi'i iyoyis'ne 'ate ti jwesis, ti ipi'yayisie: —¿Kiakt'i awoki pet, talojot'ets'e'm pet?

⁴¹Jesús iyo'ne 'ate ti isiujlieyi pet: —Jlamt'itie ka ijiatayi ka talojoye'ase'm, ka lajata astesa'. Siuti jijwela' ti je talojoye'ase'm, nak it'imina ti astes po'o.