Read Iyojwa'ja Chorote Hechos 1 Bible Online

Hechos 1 - Iyojwa'ja Chorote bible

Hechos 1

¹Siukia ip'isinik inia'an, yiminik Teófilo, pajk'ipe ti ateme ti ajwe'el siuniwa Jesús iyo siu'neje ni taka'neyasane ti 'nelanjie'e,

²siu'neje ti yiyeyi jakia jloma ti yapilie poliyi. Ti majleyeyi ka nek, siojopo jijliujwajnas siojopo pajk'i ti isi'mik'i, 'yiyasane siupi jikijmayeja' ka lajk'i japa Sinia' jikimet ti 'es ti iniuyeje.

³Ts'ijiye jlampa titimajayi ti tiliana ini'wenkijnam'ne japo jijliujwajnas, ka kiak iwo ka insta siupi iniwone, ti ini'wenki'n ti 'wasa'n. Cuarenta kiwa jlomas ti kia'iyo, ti inikajanitiam'ni japo jijliujwajnas, jla'yi ti yamtiyi k'iye pi jika anechijiayas iyo pi Sinia'.

⁴Ti je yamjli'ijyi, Jesús ijwijla'm ta'a japo jijliujwajnas ka je intajlis kiu' Jerusalenne, ti iyone'ate: —K'iuyejiap jla'am siojona jloma ka neyi, siunie iyo'nase ni Inia' ti ijwi'lase'm, naka siunie iyo ti ya'am ti ajwe'lasempe.

⁵Ijiate ja Juan ti i'niat ja iniejiejni japo, 'yina ka pajata wata'a kiak ja ke iwo ti asa'am, ja inajienajyi jana Inia' jikimet ti 'es.

⁶Iyo'ne 'ate japo, siojopo nojt'iyijipi pa Jesús, ti i'yasis'ni: —Saka anechiyas, ¿jop'an ka ekiajli'ijyi napo Israel jlele ni jika anechijiayas?

⁷Jesús isiujlie ti iyo'ate: —Je'ne ti asa'am ka 'najanayi paka wonayi niwak siuniwa wask'i'nelaja jawo ni Inia', siojopa jlomaye, 'wenajliyi ti ja jlama jla'am, 'yaka jlam ti tijna'yi.

⁸Siuti jane'yase jana Inia' jikimet ti 'es ka tekiajla'asenie'e ni asjweye, ka sek atajlaye'ena'a ka kinieye'inna'a ti jawoye asamtikie' ti ja sijwela'. Ka joyenie'e Jerusalenne, ja tejwayena'a siuniwa ajnatis yiji jana Judea, siu'neje jana Samaria, wikie'eyi siuniwa isi'il tose ti yi' ape'e 'ni ajnat.

⁹'Yina yiyik'i ti tamti, jlam'ne i'yenis'ni, Jesús tikinieje pijia'm, namat'ipi japa poli japak initatajam'ne, sekyi'i ti je i'winayisk'i.

¹⁰Jlam'ne je ilitiejesi'iji ti i'yenisk'i'ni, siupi iyo pi Jesús ti yam pijia'm, jlam nesi'liet'iyijpe ti 'yakaj papo times i'nio', ji'wuye lemi, ti takasitiape'n jlam japo injlojwajnas.

¹¹Iyonat'iyijpe 'ate japo injlojwajnas: —Galilea jlele, ¿yot'iyi'ni ti astaj je liena' poliyi? Kiaka ki Jesús ti yi'iji aska kiowe'e janapimet'eje jawo'ate ti ji'wenats'i ti yam pijia'm, ka 'nestana'a.

¹²Sekyi'i ti yamat'i'nijpe ti yapilis Jerusalenne, ti tajlisi siojopa tikijnaki jle' iyo'ate Olivokiet. Je tojwape'n jla'am japa Jerusalén, pi k'iejlit'iyijipi pa tiwenaja'm pi i'nio' ti t'iskiujnijyi'n japa i'nio 'wanjlijyi'n.

¹³Ti yiyisiet'iyipi jlaja isi', yamitat'iyisipi siupi yiyits'i'ni siojopa 'wuk toj pijia'm. Pedrojimpe, jla'yi ja Juan, siu'neje pa Santiago, jla'yi ja Andrés, siu'neje ja Felipe, siu'neje ja Tomás, jla'yi ja Bartolomé, siu'neje ja Mateo, siu'neje ja Alfeo jlas jle' iyo'ate Santiago, siu'neje ja Simón tajla'm pet papo celote, siu'neje ja Santiago 'neje jlas siupi jle' iyo'ate Judas.

¹⁴Wikie'eyi pi nojwa'm jlamis initotis'ni wita'm, jla'yis'ni japo ji'yinis pa Jesús, siu'neje jlaja jlet María, siu'neje japo asejnia 'wenayi, ti iyoyis'ni t'ajlayeja'.

¹⁵'Yina po' japa jloma siupapo Sinia' jilis initotisk'i wita'm ciento veinte papo i'nio' t'ipi. Sekyi'i ja Pedro ti takasitiet'ipi, iyoyet'ipi 'ate:

¹⁶—I'lijwas, lapakawo ti yiyi jana jloma tenat'iyipi, Sinia' jikimet ti 'es iyont'iyijipi pa David ti ijwi'il pet, ti yi'i ni ji'wet, ti ijwi'il kia Judas masa. Kiak sa'yitape, ti iniutiejeje ja Jesús kawo jlamtikie' niwa Sinia' jlamtis. 'Yina je pajtaja ti iyoyeyi siunie iyo, ti iniank'iye japo i'nio' ti isimisie'e ja Jesús.

¹⁸(Papoka'ne ti tajleje siojopa wikiniet'aj ti laja siupi iyo ti wuj ti je 'es, 'yina yame'ne pi jika ajnat. 'Yina je pajtaja ti yiyeyi ki jlaj, pakayi siupa ti iniuyet'ijyimpe ji'wo' 'yite isia'm. Its'isk'i'ne, seki'i jikasjili iniuyet'ipi kisie'e.

¹⁹Siupapo Jerusalén jlele ti t'ijieyet'iyisijpe, iyoyis'ne jleye pak ajnat. Iyonisi'ne 'ate ti ji'lij jlamis Acéldama, 'Woyis Ji'wet.)

²⁰Pedro sekyi'i iyoyet'ipi'iji 'ate: —Ti awo ka astaj wujwak'i, siuniwa inamtis yiji niwa sálmojos ti iyo'ate: “Siunie ji'wet 'esiji ka wo'ate ni ajnat laj i'nioye'e.” Iyo'ate ni jikiecha: “'Esiji ka 'wenayeyi paka k'iuyeje ni jikijmaye iyo.”

²¹“'Yina awo'ate, lapakawo ti 'esiji siuti japoye pa, siojopo sa'yispe, ti i'wi'in ki iyo ti je taljli'ijyi sajap ja Saka'niona jla'yi ti 'nelanjie'e ti Juan iniejienaja'n napo i'nio', pajpe ti yiyeyi ti tikiniejayi pijia'm ja Saka'niona Jesús. Ka ne siwa'm ka noyets'e'm ti jayoki samtikie', ti jla'am Saka'niona iniu kisie'e ti tajla'm niwa a'no'l.”

²³Ijiatjliyi times'ne siojopo i'yenis'ni, jak José jle' kiecha iyo'ate Justo, siu'neje ja jle' iyo'ate Barsabás siojo jle' jikiecha iyo'ate Matías.

²⁴T'ajlat'ijyimpe, iyonat'iyisijpe 'ate pa t'ajlaye: —Saka'niona, a'am ti intant'ieje ni jlosik ni i'nio'. Awoktajank'iye ka apayiyi sik'ioye siupa a'am pajk'i ti jiki'me siu'napo times,

²⁵siunie jank'iuyeje ni jikijmaye iyo ni i'nio' ajlojwanik Judas iliyi, lapakawo ti ijioyi ni siunie yi'i, 'yu'we kajeyepa ti iyoyi ni je 'es.

²⁶'Yina itime ti iyoyis t'ajlayeja', iyoyet'iyisipi ka inlakinists'i ape'e. Matías jak itieje. Jakayi ti tiwomajayiji siojopo itijwa'm sikioye ijwienjli tom'niji injlojwajnas 'wanjle'e.