Read Iyojwa'ja Chorote Hechos 10 Bible Online

Hechos 10 - Iyojwa'ja Chorote bible

Hechos 10

¹Pope ja i'nio' jle' iyo'ate Cornelio, ji'wet yi'i jlaja ajnat Cesarea, tokis jika anechiyas Italia jlele.

²Jak i'nio' ti t'oniye 'es, iyunit pa Sinia', ji'wet jlele kia'iyojliyi. Wuj japa wikiniet'aj itijwe'e'ni ti iniuyeje papo Judíojos. Jlomas ti iyo t'ajlayeja'.

³Yit'i'yipe japa jloma ti kilie' iyoyeta'ate isia'm, ti i'winat'ipi ilia'm pa Saka'niona jijliujwanik poli jlele ti ijioyi siupa yi'i. Injlojwanik poli jlele iyone'ate: —¡Cornelio!

⁴Cornelio jla'm i'yen'ni jiwekie'e pa injlojwanik poli jlele, kajeyepa ti jnots'ijni. I'yasen'ne ti iyo'ate: —¿Yot'iyi'ni, 'Yaka'niona? Siupa injlojwanik poli jlele isiujlie ti iyo'ate: —'Esiji, Sinia' itiliaja siunie jiwoyi ti jiniuyeje napo p'ijliusis, 'yina isi'm ilia'm naka.

⁵Kajliunk'i'nejna'a siojo i'nio' jle' iyo'ate Simón, yi' Jópeje, tiwona'niji 'ate Pedro.

⁶Yi 'wet'e ja jlejwa jla'am Simón, 'nejes jiwo, ji'wet yi' kiuts'i ni i'niat lajlik'i.

⁷Ti yamat'ipi pa injlojwanik poli jlele, Cornelio tanat'iyipi papo jikawos times, ijwienjli pa ijiawo ti yimi'n pi Sinia'.

⁸Itime ti ijwijla'm wikie'eyi siupa iyo pa ti'wenkinaja, ijliuyet'ipi Jópeje.

⁹Siupa ti jlomayet'ijyi, siuti 'najlikiyeta, jlampa majleyet'ipi ka 'nesisi siupi ijioyisi, Pedro ijio ape'e siojopa 'wuk tomi pijia'm, ti iyo t'ajlayeja'.

¹⁰Pedro inil'lia'n, k'iejlit'ipa iyoyeyipi ka 'yekiu'n, ti wakal pi jlak. 'Yinit'iyijpe pa ijnieti paka neyi, ti yiyet'iyipi pi iyo pa ti'wenkinaja.

¹¹I'wi'in pa poli ti 'ajla'm, 'yakaja siupa 'yiniye pa lotakinie ti tits'ijwana'ak'i niwa jikiusi'l, ti na'm ajnat'e.

¹²Inijle'en puwa wask'i'nelaja yiji pak lotakinie, ijia puwa siuniwa t'ot 'yilis ajnatk'i, ajwejnas 'neje puwa yiji.

¹³Sekyi'i ipi'yayi siupa ina'lap ti iyo'ate: —Pedro, kima siupa jatojw, la'an.

¹⁴Pedro isiujlie ti iyo'ate: —Je'e, 'ni 'Yaka'niona, yam je atojwe paka je t'otata, siunie je 'es ka titiuwa.

¹⁵Pesiejat'iyi'iji siupa ina'lap ti iyo'ate: —Ká ajwel ka je 'esie siunie Sinia' pajk'i ti 'yotat.

¹⁶Najapiji ti kia'iyo'ni, ti yapiliet'ipi poliyi pak lotakinie.

¹⁷Pedro jitiej yini'ni 'ate siupa iyo pa i'wi'in, 'yina iyo'ate, “¿Tepat'e jawo siu'nie a'we'en?” Jlampa yiyet'iyispe 'wuk kiwit'e siupapo Cornelio kawos, ti ti'yasanisi'ni pa Simón ji'wet.

¹⁸Tanat'iyi'nijpe ti ti'yasane'ni ja Simón ti iyo'ate: —¿Ma 'nak je yi'i siupa i'nio' jle' iyo'ate Simón, ti tiwonaja 'ate Pedro?

¹⁹Jlam'ne je ilitieje'eje ja Pedro ti jitiej yini'ni 'ate siupa iyo pa i'wi'in, Sinia' jikimet takajwejlanat'ijiampe ti iyo'ate: —'Yejne'n, najape napo i'nio' iwojyin'ni.

²⁰Kasit, maj, sojmajyi'n. Ká akakiunie'e, majk'ina'a. Yam ajlo'ojwe napoka.

²¹Tisiojmayet'ijyimpe ja Pedro, yiyi ti iyonat'iyijpe 'ate: —Ya'am ti siwoyejyin'ni. ¿Yot'iyi'ni ti siwoyejyin'ni?

²²Isiujlisie ti iyo'ate: —Tokis jika anechiyas siojo jle' iyo'ate Cornelio, jikawosts'e'm. I'nio' ti 'es jitieyi'i pa Sinia', Judíojos ijiunitis, jla'yi ti 'namajasi. Sinia' jijliujwanik poli jlele ijwijla'm ka takajlunie ajak'i, ka ajo 'wete. Naj jlam jampe'ya siupa jajwejla'm.

²³Pedro ipi'ya ti kia'iyo, yame'ne jik'ioyi japa 'wuk siojopa yi'i'ni, sek ijioyits'iji'n 'ne pak ajnaj. K'iejli mot ti yamat'i'nijpe, yamk'i papo name, po' pet papo jla'yis ja Pedro sek ji'wet'e Sinia' jilis Jope jlele.

²⁴Jloma kiecha ti 'nesat'i'nijpe Cesaréaja, jlam'ne ja Cornelio its'iujwin'ni k'iye. Je pakata, siu'neje papo ijiat'i pet, siu'neje papo i'yasits'i t'ajajnajwas t'ipi.

²⁵Pedro ti yiyet'iyipi ja ji'wet ja Cornelio, yamat'ipi ilia'm, yiyi ti t'akosjlete'l itiyet'iyijimpe kiajwe ti ijwi'il ka iwunit.

²⁶'Yina Pedro je yi'nate. Inijienat'ipi pijia'm ti iyone'ate: —Kasit, kia'awo i'niok'i'm, awo'ate jiwoyi.

²⁷Jlam takamtijnienjlijyi'n ti 'yuyet'iyispe 'wuk kiajwe. I'yent'itiejpe 'ne napo jitieyiji nojwe 'wet'e.

²⁸Pedro iyonat'iyijpe 'ate papo i'nio': —Mejla'ala ka je 'najanayi ti je 'esiji napo Judíojos ka 'nojia'm papo i'nio' 'wenayeyi. Je int'ayeyiji'n 'neje siunie ti je 'esiji ka 'wenayeyi ka 'no ji'wuk kiajwe. 'Yina Sinia' ts'eyasane ka je ts'achiye paka ne'yi pa.

²⁹Tempa it'imina ti je sit'iu'ni ti a'wena ilia'm napo askawos. 'Nakayi awotajank'iye kats'ajane, ¿yot'iyi'ni ti jlanak'i?

³⁰Cornelio isiujlie ti iyo'ate: —'Neyek'i jlampa kilie' iyoye 'ate isia'm, 'yake'nijne ti awo'ni 'yejlayeja' 'ne i'wit'e. Jakayi ti inikajanitk'i'm ni i'nio' ti wuj ti isis niwa ji'wuye.

³¹Iyonk'i 'ate, “Cornelio, Sinia' ipi'yayi ni 'ajlaye, wuj ti iyoyi jitienkiujnieyeja' ti jiniuyeje napo i'nio' ti p'ijliusis.

³²'Yen papo ka ajlok'i ja Simón, siojo tiwonaja'ni 'neje 'ate Pedro, yi' Jópeje. Yi 'wet'e ja jlejwa jla'am Simón, siojo 'nejes jiwo, ji'wet yi' kiuts'i ni i'niat lajlik'i.”

³³'Yina ta'a'ne ti akajlunk'i, 'esiji ti 'nak jle'yi, siu'nie awak'i, ti Sinia' kas'we'en. Awoktajank'iye ka pi'yak siupa jajwelts'e'm, pa Saka'niona iyo'naja.

³⁴Ti Pedro 'nelanjie'e iyoye jlamtikie', kiak t'ipa iyoyeyipi: —'Yejne'n, 'nakayi k'iejliyi ti ts'ajane pa awone ti Sinia' je i'winakit paka i'nioye siunie iyo ni jlemijnaye ti yi'ne napo i'nio',

³⁵'wanjliyi ka je Judío japa, siunapo toskiye pa Sinia', iyo siunie 'es jla'yi ti iyo siunie Sinia' iyo.

³⁶“Sinia' pajk'i ti ijwijla'm napo Israel jika kia'lis siunie inka'niye ti tajle ni inkamankiye, ijwijla'm ti naka Sijwajieti Jesús Jika'niona wikie'eyi napo i'nio'.

³⁷Mejla'ala ka je 'najanayi siukia iyo ti po' ti itijwi'ni jana ajnat Judea, 'nelanjie'e iniajnat Galiléaja. Jlampa yama'niji siukia ti Juan iyo, ti lajk'ipa ka into'miye ka tiniejienaja napo i'nio'.

³⁸Ajwe'el ja Jesús Nazaret jlele, jla'am ti Sinia' jikimet ti 'es tipoyiji jla'yi pi jijweye. Ti t'iskiunieje'n ape'e 'ni ajnat, ti iyo ni 'es, ijwiejiete papo i'nio' siupa imosik iyone, wuj ti inilayiti siupa jiwet'ia iyo, lapakawo ti Sinia' jlam ti yijap, it'imina ti 'yakajli ti iyo niwaka.

³⁹Sampe ti a'wenaja ti yi' Jerusalenne, siu'neje ti yi' Judéaja. Paj ti tilianajape, ti tena'a pijia'm jlaja cruz.

⁴⁰'Yina jlomas najape ti Sinia' yikiajla pijia'm, ti tajla'm ni a'no', sekyi'i Sinia' iyo kan'wenkints'e'm ja Saka'niona.

⁴¹Je 'ne ka wikie'eyeyi ka inikajanitia'm ti 'nelanjie'e. Samkata ti ini'wenkints'e'm, lapakawo ti jla'am ti isimts'e'm ti 'nelanjie'e ka sama ka ijwila ti jla'am. Akijwanaja ti ti'yekiunieta, jla'yi ti i'yayetaja pa k'iejliyi kia'iyo akijwanaja, jlampa yiye kisie'e ti yapilie pijia'm.

⁴²Iyotaja ka iyok saka'niyejayi napo i'nio' yi' ape'e 'ni ajnat, ti jla'am ti Sinia' isi'me ka i'ye'en siupapo pajk'i ti 'yalt'ijimpe, siu'neje napo 'wasajne'n.

⁴³Pajt'ik'ipe ta'a papo jijwejlanawos ti ijwilis ja Jesús, ti iyo'ate, “I'nio' pa ja ke inkakiu, pak ja ke titiajlatajayijpe siupa jitis iyo.””

⁴⁴Pedro je iliyi ti iyo jlamtikie', ti Sinia' jikimet ti 'es yiyet'iyipi siupapo i'nio' its'iuye'ni ti iyo jlamtikie'.

⁴⁵Sinia' jilis siupapo namk'i ja Pedro, ti i'wina siupapo je Judíojos ti Sinia' jikimet tisaye ape'e, jlam jnots'inijits'i'ni,

⁴⁶jla'yi ti ipi'yayis ti ji'lija 'wenayi siupuwa iyoyi, jla'yi ti iyunitis pa Sinia'.

⁴⁷Ti Pedro ipi'yayet'ipi, sekyi'i iyo'ne 'ate: —Ajwel'ni 'esiji ka tiniejienaja'n, 'yina ti Sinia' jikimet ti 'es yiyits'i, iyo'ate awoki.

⁴⁸Takajlunie'ne ka tiniejienaja'n, ka teyinaja pa Saka'niona Jesús jle' ti Sijwajieti. Itimisi ti ijialaskinayisi ja Pedro ka 'nak inojwaja'm puwa jlomas ka sek 'wanjliye'e kiu'.