Read Iyojwa'ja Chorote Hechos 11 Bible Online

Hechos 11 - Iyojwa'ja Chorote bible

Hechos 11

¹Siojopo injlojwajnas siu'neje papo Sinia' jilis yi'i jlaja ajnat Judea, ti t'ijieyet'iyisijpe papo i'nio' ti je Judíojos ti iyoyi pa inamtik.

²'Yina Pedro yapiliet'ipi Jerusalenne, siupapo Judíojos sek ji'wet'e ti Sinia' jilis iliakiyis ja Pedro

³ti iyoyits'i 'ate: —¿Yot'iyi'ni ti jloyi'ni, jla'yi ti jikijwane'ni, siunapo je Judíojos?

⁴Sekyi'i ja Pedro ijwijla'm wikie'eyi siupa iyo ti 'nelanjie'e, ti iyo'ate:

⁵—Ti a 'niji yi'i jlaja ajnat Jope, awo 'yejlayeja', sek a'yi'ne ti po' kia si'wenkinaja. Siunie a'we'en iyo'ate ni lotakinie ti isaja, ti tits'ijwana'ak'i niwa jik'iote ijniujlits'i, ti na'm ajnat'e, paj ti yiyeyi siojo a'yi.

⁶A'yenaja'm ti awo ka'wi'in siojowa yiji, 'yina a'we'en jawa wask'i'nelaja ti inijle'en, po' jawa jwesis, po' jawa t'ot 'yilis ajnatk'i, po 'neje jawa ajwejnas.

⁷Ape'yayeyi ni ina'lap ti pesieje, ti iyonk'ijpe 'ate, “Pedro, jlam woni'ni 'ate, kima siupa jatojw, la'an.”

⁸Akiujli'ni pet ti awo'ate, “Je'e, 'ni 'Yaka'niona, ya'am je atojwe paka je t'otata, siunie je 'esiji ka titiuwa.”

⁹Pesiejayi'ijyi siupa ina'lap tom poliyi, ti iyonk'ijpe 'ate, “Ká ajwe'el ka je 'esie siunie Sinia' pajk'i ti 'yotat.”

¹⁰“Najapeji ti kia'iyo'ni, sekyi'i ti yapilie poliyi siojowa a'we'en.

¹¹Paj ti 'nesat'i'nijpe japo i'nio' najape ti tal Cesaréaja, ti siwoyisijyin'ni, ijio ts'e a'yi'ni.

¹²Sinia' jikimet takajwejlank'i'm ti iyo'ate, “Pedro, ke int'o'nina'a k'iye siunapo i'nio' na'ma. Majk'ina'a.” “Ijiatjliyi akk'i'ne, ijwienjli sikio' itij'we ijwienjli tom'niji japo si'lijwas 'yunin'n ijyik'i sek ji'wet'e. Ayi ja ji'wet siojo i'nio' takajlunk'i, “'Oyeyi”.

¹³Sekyi'i ijwilats'e'm siupa iyo ti i'wi'in pa Sinia' jijliujwanik poli jlele ti takasitiape'n ti iyo'ate, “'Yenijyi'n paka jlok'i ja Simón ka iname, tiwonaja'ni 'neje 'ate Pedro.

¹⁴Jla'am jajwe'la'm siunie iyo niwa Sinia' jlamtis, ja'nakayeyijna'a ka ajwa', jla'yi napo a'wet jlele.”

¹⁵Ti 'nelanjie'e amti'yi, 'yina Sinia' jikimet ti 'es tisa'yi ape'e, iyo'ate ti 'nelanjie'e yiyets'ipi pet.

¹⁶Sekyi'i itiej wujwayi niwa Saka'niona jlamtis ti iyope 'ate, “Ijiate ti Juan iniejiejne'n napo i'nio' ti iniejiejni ni i'niat, 'yina ya'am kiak ja ke iyo, janiejiejni ki iyo jana Sinia' jikimet ti 'es.

¹⁷“Siuti Sinia' jla'am ti iwijna'm naka, iyoye pet 'ate ti sa'am ti je akakiuk ti iwints'e'm, ¿tent'ik'i'm ka itiumik'i'ni pa Sinia' siupa iyo kawo?”

¹⁸Siupapo Sinia' jilis ti ipi'yaye ja Pedro ti kia'iyo, its'iuyet'iyisk'ipe 'ate, iyunitisie pa Sinia' ti iyo'ate: —¡Ijiatp'aneje ti Sinia' iyo pet ka iwo jlosikis ink'iejyisa', ka poye jana ji'wasankiye ti laj jlaja, napo je Judíojos!

¹⁹Jlampa titimajat'iyijpe pa Esteban ti tiliana, iyoyeyi siupa iyo papo i'nio' Sinia' jilis, ti wuj ti inilayiti, ti tejeye ilia'm siupa iyoyisi. Jak je iyoyiji'ni po' papo i'yiltan'ni 'niji yi'i japa Fenicia, ijia papo i'yiltane japa ajnat jle' iyo'ate Chipre, ijia papo ijio Antioquíaja. Yiyi siupa i'yiltanisi jlam ijwiljlijia'm puwa Sinia' jlamtis, papokata tijnayits'i papo Judíojos.

²⁰'Yina po' pet siupapo tal Chípreje, siu'neje papo tal Ciréneje, ti tijnayits'i pet jlaja isi' Antioquía, ti iyoyis jlamtikieyi siupapo je Judíojos ti ijwi'il pa Jesús ti Saka'niona.

²¹'Yina Saka'niona jijweye yijap, jak je iyoyiji'ni ka je 'lojwa papo i'nio' iyo jlosikis ink'iejyisa', ti je 'yakakiuyis pa Saka'niona.

²²Sinia' jilis siupapo yi' Jerusalenne, ti t'ijieyeyisi pet ijliuyis'ne ja Bernabé, yi'i jlaja ajnat Antioquía.

²³Wuj ti inkaj'ni ja Bernabé ti 'nesa sekaja, lapakawo ti i'wi'in ti ijiatk'i siupa iyo ti Sinia' jikap'ijliuskiye yiji jlajak isi'. Bernabé 'yakela papo ti iyo'ate: —Ká akalakijiena ti jikinieyi ki iyo ni inamtik, ke ink'asayi pijia'm.

²⁴Bernabé ijiate jla'am ti itienkiuni pa Sinia', jla'yi ti Sinia' jikimet ti 'es tipoyiji, it'imina ti 'loj papo i'nio' ti isieneje pa Saka'niona.

²⁵Paj ti Bernabé yamat'ijyi ti iyojyi'n pa Saulo ti yi' Társojo.

²⁶I'win'ne ti yamat'iyijpe ti ijioyi Antioquíaja. Ijwienjli pa najkap ti itij'wisia'm ti yiyisiap papo Sinia' jilis, 'loj papo ini'neyasajne'n. Pakayik'i'ne papo i'nio' yi' Antioquíaja ti 'nelanjie'e iyo jleye papo Sinia' jilis ti iyone 'ate “Sijwajieti jika kia'lis”.[3]

²⁷Pakat'iyik'ipe siupapo Sinia' jijwejlanawos tal Jerusalenne ti ijioyis 'niji Antioquíaja.

²⁸Ijwienjli'ne siupa jle' iyo'ate Agabo, paka'ne ti takasit, Sinia' jikimet ti 'es yamtijie'n, sekyi'i iyo'ne 'ate: —Siu'niwa jlomas nel'lia japoye, jantejw ape'e 'ni ajnat. Ijiate, ti yiyeyi puwak jlomas po' pa nel'lia ape'e pa ajnat, pakayi ti Claudio iyo anechiyas wujwa' yi'i japa ajnat Roma. Jlajmiliet ti Sinia' jilis 'yijenayi pa iyone, iyo'ni ka inoyeje papo ijia yi'i Judéaja, k'iejliyi pi i'wi'in ti iyo ka nene. Sekyi'i siupa k'ie puwa ijiutis wita'm, iwinisiam'ne ja Bernabé jla'yi ja Saulo, ti ijliuyisi papo Sinia' jilis yi' Judéaja, ka tekiajlaja papo kijilas kanwenk'i papo ijia.