Read Iyojwa'ja Chorote Hechos 15 Bible Online

Hechos 15 - Iyojwa'ja Chorote bible

Hechos 15

¹Pak siupa jlomat'ipi siupapo i'nio' tal Judéaja ti ijioyis 'niji Antioquíaja, 'yiyasajne'n papo i'nio' ti iyo'ate: —Siuti ja ke ajwankita ka woyeyi siunie iyo ni Moisés jika'neyasajnaye, ti tejwak'i ni t'isie'n ni kia'le, ja ke 'najanayi siupa janiwonayi ka ajwaye.

²Pablo siu'neje ja Bernabé wuj ti iniewiteje'n papo i'nio', jak je iyoyiji'ni yiyits'ijiye, jlamayis ti tikima'ak'i siu'neje papo ijia ka ijnoyi japo injlojwajnas siu'neje papo ti ijiatt'iyijipe ti Sinia' jilis yiji jlaja Jerusalén, kan'yenis pak siupa iyoyisi ti initajlatisi.

³Sinia' jilis siojopo yiji jlaja Antioquía japok ijliu' japo Pablo. Iniuyeyits'i jawa ajnatis Fenicia, siu'neje jlaja Samaria, ti ijwilk'i papo siupa iyo papo je Judíojos, ti iyo jlosikis ink'iejyisa'. Wuj ti inkase'n japo i'nio' Sinia' jilis ti 'yijenayi pi iyone.

⁴Pablo siu'neje ja Bernabé ti 'nesat'iyis'nijpe Jerusalenne, siojopo Sinia' jilis siu'neje japo injlojwajnas, siu'neje japo i'yena japo ijia Sinia' jilis, japok wuj ti 'es ti i'ye'n ilia'm. Sekyi'i ijwijla'm wikie'eyi siupa Sinia' iyone.

⁵Po' siupapo Fariséojos ti yame pet siupa Jesús iyoyi. Papoka'ne siupapo takasitk'i ti iyoyis 'ate: —Siunapo i'nio' je Judíojos, 'yina ti iyoyis jlosikis ink'iejyisa', 'esiji ka woyi siunie Moisés jika'neyasajnaye, ti t'isie'n jiwa tejwak'i.

⁶Initotisk'i'ne wita'm wikie'eyi siojopo jle' po', siu'neje japo injlojwajnas, ti i'yenis paka.

⁷Jlampa je k'iejeyeyi'i ti tamtits'iji'n, Pedro takasit'ne ti iyo'ate: —I'lijwas, 'najanayi ti siuti a' aska kiowe'e, Sinia' pajk'i ti isimk'i'm ti ijniejietk'i'm siunie isijmaye ka yikiji siunapo 'wanjli witame ti iyoyi ni je 'es niwa Sinia' jlamtis, ja 'nakayeyi pet ti jantant'iejesi ni Sinia'.

⁸'Yina Sinia', ti itiant'ieje 'niwa inkiojwa'l, i'winki'n ti inka'a ti jlamis, kajeyepa ti iwijna'm jana Sinia' jikimet ti 'es, iyoye'ate iyo ti iwints'e'm.

⁹Kiak iyoyeyi, siunie iyonts'ejepi, ti ilij ni sosik, ti ijiatayiji ti atankiunieje.

¹⁰'Yina ¿yot'iyi'ni ti jlejlita pa Sinia' ti jitilkinayi napo jilis siunie je akajlaja ka yoki, jla'yi papo sitiselt'ipi kiak iyoyisi je ikajlisi?

¹¹Lapakawo ti je akakiunieje ti ajwaye ka lajak'i pa Saka'niona Jesús ti Sijwajieti ti kasp'elisijne'n, iyo'ate iyoyisi.

¹²Itime ti tamti japoka, ti takasitie t'ipi pet ja Pablo jla'yi ja Bernabé. Ijwil pet pa Sinia' iyone, ti 'yakajli ti ilisane siupuwa a'tisk'iji'n wask'i'nelaja, siu'neje puwa iniank'iye siupuwa ja'nakaj ts'ijiye, jitieyi'i papo i'nio' je Judíojos. Ti yiyeyi puwaka yaka jla'm iwo japo i'nio' 'yakamaja ti its'iuyisie.

¹³Ti iliyet'iyijpe, tamtiyet'ipi pet ja Santiago[8] ti iyo'ate: —I'lijwas, 'yejne'n.

¹⁴Ape'yak 'na Simón ti ijwilts'e'm ti 'nelanjie'e Sinia' ip'ilisijne'n napo i'nio' je Judíojos, ti iyoyeyi ka iwo jika kia'lisa'.

¹⁵Ka 'wena jno'we wata'a siunie iyo niwa inamtis, siupapo injwejlanawos t'ipi ilisane, ti iyo'ate:

¹⁶“Janek 'niji siu'nie ka yapiliemetna'a, iyo pa Saka'niona. Je ijiat ka je iyikial pijia'm jana David ji'wet, ti iyo anechiyasa'. Jalisane siukia iwiesk'i, sekjane'yi ka yikiajlayina'aja ka iyo jijweyeja'.

¹⁷'Nakayijna'a siunapo ijia i'nio' ja siwoyisijyin'ni, 'yina wikie'eyi siunapo je Judíojos siupapo tilisana.

¹⁸Kia'iyo siuniwa jlamtis pa Saka'niona, jla'am ti 'yakajanit niwaka wask'i'nelaja ti 'nelanjie'e.”

¹⁹Santiago iyo'neje 'ate: —Ya'am ajwel'ni 'esiji ka je yinaja'm siunie ji'niayi iyo napo i'nio' je Judíojos, siunie iyo ti iyoyis jlosikis ink'iejyisa'.

²⁰'Esiji ka sip'esinik itietajaja, ka 'najane paka wone siuniwa je 'yu'we ka iwoyisi, 'esiji ka ileyisi. Iyoye'ate siunie 'nisie'n ti titiejietaja pet ti t'otata k'iye niwa topa, siu'neje ni wuj ti je 'es iyoyi napo asejnia jla'yi napo ayijnies, ti 'yaka'm ape'e ni iniwonisi, siu'neje ni ji'woyis niwa k'iejliyi ti 'yal ta'a pakaja.

²¹Jlam pajk'i ta'a ti po' napo yamtijie'n, ti tijwela ape'e napo i'nio' na Moisés jika'neyasajnaye, yi'i puwa 'najla'wetis yijits'i puwa ajnatis, ti yiyetaja siojopa jloma i'nio 'wanjlijyi'n.

²²Ti itimayi ja Santiago ti tamti, siojopo injlojwajnas siu'neje japo i'nio' jle' po', wikie'eyi japo Sinia' jilis, iyoyet'iyisipi ka inkimits'i japo ti i'yejni'ni siojopo yiji, ka iwoyis jla'yija ja Pablo, jla'yi ja Bernabé, ti ijioyis 'niji yi'i jlaja Antioquía. Isimits'i'ne ja Judas, siukia jle' kiecha iyo'ate Barsabás, siu'neje ja Silas, times napoka ti wuj ti ijia jitiej iyoma.

²³Itiunkinisi siu'nie jip'esinik ti iyo'ate: “Asampey i'lijwas, asam ti je Judíojosts'ase'm, ti as'wet pet jana Antioquía; asam'neje as'wet jana Siria, siu'neje napo ti jleyejyi jana Cilicia. Wuj ti atejwila'ase. Sam ti injlojwajnasts'e'm. Sam'neje ti kijilasts'e'm pet.

²⁴Ajieyeje ti po' papo ijio'wase ti tajla'm jla'a si'wet ti je inena'yate, ti injlak'alitie siunie iyo niwa inamtis jiniliaja ti inkajyina siunie astankiujnieye iyo. Je sa'am ka intalts'e siunie iyoyisi.

²⁵It'imina'ne ti anikiujlie ti awokieyi ka ijliuk siu'napo si'lijwas, ka'nonink'i napo si'lijwas ti wuj ti kasts'amaja, Pablo jla'yi na Bernabé.

²⁶Jlamis ti je inite'en, 'wanjliyi ka k'iejliyeyi paka jiwet'iaye, ka ne'yi ape'e pa Saka'niona Jesús ti Sijwajieti, ti iniuyisieje.

²⁷“Ijiatjliyi ajlok'ne napoka si'lijwas Judas jla'yi na Silas, napok ti janama'ase ti janjwe'lase'm wikie'eyi siuniwa wask'i'nelaja, ja'nakayeyijna'a ti ja 'najanayi pet pa jawonayi.

²⁸'Yina lapakawo ti kiak iyo jana Sinia' jikimet ti 'es, jla'yi pet ti sa'am, je 'esiji ka k'iejliyeyi paka ijiosa'ni asek'i, ka iyok asjlokie, najata jla'am siunie 'esiji ka woyeyi.

²⁹Siunie t'isie'n, siuniwa k'iejliyi, ti pajk'i ti wakal ti t'otata k'iye siuniwa je ijiat ka diosisa', ká atowa. Kia'iyojliyi ni ji'woyis ni k'iejliyi ti 'yal ta'a pakaja. Ká akima siunie wuj ti je 'es, siunie iyo na ayinie jla'yi jana asejnia, ti 'yaka'm ape'e siunie iyoyi. Siuti ja ke akinieyi niwaka, ijiate ja 'nesieyiji'n. “'Nak nojwaja'm 'niwa samtis. 'Esiji ka Sinia' ine'yasap.”

³⁰Ti itimat'iyisijpe siupuwa jlamtis ti ilisanisi, sekyi'i ti inijwelat'iyipi japok, siojopo yame pa imp'esinik, yam'ni'ne ti ijioyis Antioquíaja. Ti 'nesat'i'nijpe, siojopo Sinia' jilis initotk'i'ne wita'm, sekyi'i ti yikiajlayisi siupa imp'esinik titiunkinaja.

³¹Itimisi ti yamtijienis, je jlase' pi iyo ti inkase'n, lapakawo ti iniuyeje siupuwa inamtis yi'i pa imp'esinik.

³²'Yina ja Judas jla'yi ja Silas, ti po' pa yiyisi ti Sinia' iyojwa'n jijwejlanawosa', it'imina'ne ti wuj ti 'yakela japo ijia.

³³Jlomas 'nak nojwaja'm ti yijap japo ijia, sekyi'i ti ja nek'nijne, ijia isiejayis jikiojia'm ti iyo'ate: —'Esiji ka Saka'niona ine'yasap, ti jakinie'ni. Yama'ni ti yapilis Jerusalenne.[9]

³⁵Pablo ti jla'yi pet ja Bernabé 'wanjliye'eje pet Antioquíaja, ti 'yiyasajne'n japo i'nio', jla'yi ti iyoyis jlamtikie', siu'neje japo jla'yis.

³⁶'Nak nojwaja'm kiwa jlomas yam'niji, Pablo iyoni'ne 'ate ja Bernabé: —Ajwelta ka ijioki kiu'ujwe japo si'lijwas, japo ajoki 'neye ti awok samtikie', ka itijwajats'iyi niwa isi'il pa iyoyet'iyisi'iji siu'nie jloma japo si'lijwas.

³⁷Bernabé iyotaja jla'am ka ina'asi ja Juan Marcos,

³⁸'yina Pablo je itiliak'i ti kia'iyo, lapakawo ti i'wi'in ti yiyis Panfíliaja ti Marcos tajla, ti iliyi seka'a pa jikijmaye.

³⁹Wuj wata'a siupa iyoyisi ti je ijniul wita'm japo Pablo, paj ti ini'wenakitiet'iyispe. Bernabé jla'yi pet ja Marcos ti yamisk'i japa kasejkana ti ijio Chípreje,

⁴⁰Pablo iyo pet jla'yija' ja Silas. Sinia' jilis wuj ti 'yejlanis'ni ka Sinia' inoyeje ti yamat'i'nijpe.

⁴¹Iniuyis 'niji yi'i jlaja Siria, ijiuti ape'e jlaja Cilicia, wuj ti iniuyeje japo i'nio' Sinia' jilis.