Read Iyojwa'ja Chorote Hechos 16 Bible Online

Hechos 16 - Iyojwa'ja Chorote bible

Hechos 16

¹Pablo ijioyis 'niji yi'i japa Derbe, siu'neje japa Listra, sek i'winits'i'ne siojo i'nio' jle' iyo'ate Timoteo. Kia'iyo inamtik jiwo, jlet japa Judía ti iyoyi pa inamtik. Sinia' jilis siupapo sekyi'i i'winis jak jwemik ti 'es, 'yijen jlosiki, jak je iyoyiji'ni ja Pablo ti iyo ka ina'asi. Siupapo Judíojos ti 'yijenayi pa iyone ti je Judío pa jinia', it'imina'ne ja Pablo ti iyo ka tejwak'i pa t'isie'n jiwa ja Timoteo, ka ijiatayiji ka Judíoja'.

⁴Isi'il pa iniuyits'i ti t'iskiunk'iji'n, ijwilayisia'm papo i'nio' siupa iyo japo injlojwajnas jla'yi siojopo i'nio' jle' po' i'yena japo ijia Sinia' jilis yiji jana Jerusalén, ka kiak iniwonisi siupa iyo ti ijwijla'm.

⁵Jlam ini'netjliyists'i ape'e siupa jitienkiujnieyejes ti 'es ti iyoyisi, jak je iyoyiji ka je 'lojwa papo i'nio' ti iyoyi pa inamtik, jlomas ti iyomeje'ni.

⁶'Yina ti Sinia' jikimet ti 'es je itiliak'i k'iye ja Pablo siu'neje japo jla'yis ka ijnoyisi jlaja Asia, jak je iyoyiji ti iniuyis 'niji yi'i jlaja Frigia, siu'neje jlaja Galacia.

⁷Paj ti yiyeyis 'niji yi'i jlaja Misia. Sekyi'i ti iyoyeyisi ka intayis 'niji Bitíniaja, kia' iyoye'ijyi siojopa Jesús jikimet je itiliak'i k'iye.

⁸'Yakamits'i ape'e jlaja Misia, yamitisi jlaja isi' Troas.

⁹Ti ajnaja Pablo jijwejlik poye, i'wi'in pa Macedonia jlele ti takasiti'n ape'e ti iyone'ate, ti inip'elisini ti ijialas'ni: —Ká akamna'a sitipe'e ti awak Macedóniaja, noyijts'e'm wata'a.

¹⁰Ti kasts'ajanayi ki iyo ki Pablo jijwejlik, jlam awokiek'i'ni 'ate ti aniwakajlanitie ti jajiok Macedóniaja, lapakawo ti jlam je awoki ti kassetia'n pa Sinia' ka iyok samtikie' ka ijwila niwa jlamtis ti isis.

¹¹Awaki jlaja kasejkana ti atajlaja jlaja isi' Troas. Sekyi'i ti anitajakie ts'iji yi'i jlaja isi' siujlieja i'niat itijwape'n jle' iyo'ate Samotracia, jloma kiecha ti awakieyi siujlieja isi' jle' iyo'ate Neápolis.

¹²'Yina sek atajla'a ti ajokie 'niji yi'i jlaja Filipos, isi' ti Románojos wuj ti ijiunitis, kajeyepa ti Roma jlele papok yiji jlajak ajnat. Sek kas'wanjliye'e paj ti jlomas 'nak nojwaja'm ti sek awak'i.

¹³Siojokia jloma ti i'nio 'wanjlijyi'n, akinieja'ni ti ajoki ja tewuk, tojmap ts'ijiye jlaja isi', yi'i 'ni japo Judíojos ti iyoyetajas t'ajlayeja'. Ti awakieyi, asejniayep'ajne napo a'wena ti initotk'i wita'm. Sekyi'i ti awakiek'iji'n, awokieyi siunie awoki ti amtiyeje k'iye na Sinia' jika'niye ti 'es.

¹⁴Jakayi'ne siujlieja i'nioki jle' iyo'ate Lidia, Tiatira jleliki, iwin'ni niwa lotakijnies siuniwa isis ti lasasi'ni wat ape'e. Itienkiuni pa Sinia' jlajaka, 'yina its'iuye'ni ja Pablo ti tamti ti iyo jlamtikie', sekyi'i isim'ne ilia'm, jla'yi ti 'yajlinitk'iye siupa Sinia' iyoneje.

¹⁵Tiniejiena'ne, kiak iyojliyi japo ji'wet jlele. Inip'elisints'i ti kas salas'ni ti iyo'ate: —Siuti ja ijiatayi ti si'wena' ti awoyi ni inamtik, naja'ni 'eji'nase'm ka ijiok i'wite, sek 'wanjliye'yi kiunie'e. Je kaswen'ne.

¹⁶Po' jakia jloma ti akinie'ni ti ajoki siojo ininene'e'ni japo ti iyo t'ajlayeja', sek a'wena'a'ne jlaja jlosie ti imosik yiji, jijweye iwijna'm ka 'nakajanitk'i ape'e papo i'nio' siupa iyoyi. Inkipinki jlajaka jlosie, wuj laja wikiniet'aj 'yakajli siojopo i'yena, ka lajak'i jlajak siujlieja jlosie siupa iyo ti isimataja'n.

¹⁷'Yina ti awokieyi ni sikijmaye ti askiuniejak'iji'n, tajla t'ipi si'niak'i ti nam sek'i ti tan'ni ti iyo'ate: —¡Siu'napo i'nio' 'napok jikawos pa Sinia' ti lajk'ipa ka ijnojliji, iyo jika'niyeja'ase siunie 'nayi ijioyi jana in'wasankiye!

¹⁸Je ijwienjliyiji ka kiak je iwo'ni, ti nam'ni sek'i, paj ti Pablo 'netajayi. Sekyi'i ti tejeye ilia'm, iyone'ne 'ate siupa imosik pa yiji: —Etijnape pa Saka'niona Jesús jle' ti Sijwajieti, ¡tajli siujlie'e asejnia! Ka pajayi wata'a ti iniuye kisie'e siupa yiji, jlajaka asejnia.

¹⁹Siojopo i'yena jlajak asejnia, ti i'winayis ti lajk'i japa ka iwo'ni jika wikijnies t'ejesa', sekyi'i isimits'i'ne japo Pablo jla'yi ja Silas. Yamisiji'ni japo anechiyasas ti iyo'ate,

²⁰ti yinisi jitieyi'i, yi'i jlaja aj'leje'n siujlieja tijnajia'm jikiowe'e jlaja isi': —Siu'napo Judíojos wuj ti ikajyi'n jla'a si'wet.

²¹'Yiyasanisi napo i'nio' siunie iyo ni jikeyis pet, ti Roma jlelets'e'm je sake' ka iyoki.

²²Takapajla'ne ape'e japo Pablo jla'yi ja Silas, ti t'ekiyisieyi. Wuj ti jwesis japo anechiyasas, sekyi'i takajliunisie'ne ka tilienajats'i jawa ji'wuye, ka t'otiek'i a'laja'm ka tak'ajanaja, ka tikienaja pa a'la'.

²³Wuj ti tisiejek'ik'i, jak je iyoyiji ke tak'ajaki'n. Titimaja ti totieja 'wuk kiajwe t'otiek'i a'laja'm, takajliunieyisi ka wujwa ka ti'yenaja.

²⁴Kajeyepa ti ipi'yayis pa jika anechiyas ti ijliuye ka ti'yenajaja, jak je iyoyiji ka ijnoyisi jik'ioyi japa insat jiwe, yi'i siupa insat t'otiejam'ni, japak siojopa jisietis t'otiejamk'i japo Pablo.

²⁵Ti ajnaj kioweja ja Pablo jla'yi ja Silas, iyoyisie t'ajlayeja', jla'yi ti yinits'i kiwa Saka'niona ka'leja, 'yina japo yiji jlaja insat jiweje its'iuyisi'ni jiwekie'e.

²⁶Jlam nesi'lieyi, 'yaka jejat'ipi wata'a ti ajnat ti'wesiye, ti pansak'i i'wisinayi'ni siojo to'm ajnat'e k'iye jlaja insat jiwe. T'ekiyejamk'i kiwa 'wuk kiwitawa, jakayi siukiwa wikijnies t'aka japo t'otiek'i a'laja'm, ti t'ekijyits'i.

²⁷'Yina ti t'oyet'ijimpe siojo 'wuk kiwet jiwo, ti i'wina ti 'ajlamk'i kiwa 'wuk kiwitawa, sekyi'i ti itiona kisie'e ki jitisajnat ti iyotaja ka ini'net, kajeyepa ti itijnistieje ka sek je ine'yi siojopo t'otiek'i a'laja'm.

²⁸Pablo i'wine wekie'e ti kiak iyonayi: —¡Ká anilanna'a, awak 'neye anitajak!

²⁹'Nayiwo jla'm iyoye'ni 'ate, ti takajliunijyin'ni jakia kates. T'osiyeyi ja yi'i japo Pablo, kititiyeyi'ni lapakawo ti jnots'ijni, yiyi ti t'opiyeyi kiajwe.

³⁰'Yina takasitie, yamayi kisie'e japo Pablo ti i'yase'n ti iyo'ate: —'Napo 'yaka anechiyasas, ¿tepat'e ka iniwontaja ka ijwie' pet?

³¹Pablo isiujlie ti iyo'ate: —Tankiuni pa Saka'niona Jesús, jajwa'a; a'wet jlele kia'iyojliyi janjwajyi'n.

³²Ijwilayija'm kiwa Sinia' jlamtis, ijwiene'e japo ji'wet jlele.

³³Siukia ti ajnaj kioweja, jlam jla'am ja 'nayiwo ti ilijits'i kiwa ink'ajnatis ji'wetis. Itime sekyi'i ti Pablo iniejiena ja ijiawo siu'neje japo ji'wet jlele.

³⁴Sekyi'i ti yamayi 'wete ti 'yakojniejne'n. Wuj ti inkase'n jla'yi japo ji'wet jlele, kajeyepa ti ink'ie' siupa iyo ti ininekiajlis.

³⁵K'iejli mot japo anechiyasas ijliuye'ni japo jikawos ka ijnoyisi siojo i'yena jlaja insat jiwe, ka jikio' inla'nik'i japo Pablo.

³⁶Yam'ne ja i'yena jlaja insat jiwe ti ijioyi ja Pablo, yiyi ti iyonayi 'ate: —Jon ka anoyek'i kisie'e, iyo'ojyi japo anechiyasas. Maye'nina'a, 'esiji.

³⁷Pablo iyone'ate japo ijiawos: —'Yejne'n, ti sa'am Románojosts'e'm, jlam kask'ajaki'n jiwekie'e, jlam'ne je 'yaka siupa ka titiajlatats'e'm ka sitis inwo, jitieyi'i napo i'nio', je iyo ka inka'm ape'e siunie jike' iyo pa ti kia'iyo. ¿Yot'iyi'ni ti ijwilis ka kasnojwa'n kisie'e? ¡'Esiji ka jlamayis ka namts'e ka kasnojwa'n kisie'e!

³⁸'Yina yam'ni'ne japo ijiawos, yiyi japo anechiyasas, ti ijwilaja'm siupa Pablo 'lij. Siuti 'yijenayisi pa iyone, japo Pablo ti Roma jlele, kiak je ijwiyisk'i'ne.

³⁹Yam'ni'ne japo anechiyasas ti ijioyisi japo Pablo, ti yi' insat jiweje, inip'elisijni ka netiajnat siupa jitis iyo. Tiniujwanak'i'ne kisie'e, ti iyonisi 'ate: —K'iuts'e'm wata'a, maye'ni tajlajyi siujlie'e isi'.

⁴⁰Ti iniuyek'i kisie'e ti tajlis insat jiweje, sekyi'i tijnayisi siujlieja asejnia jle' iyo'ate Lidia, ti ijioyis ji'wete. I'win'ne japo ijia Sinia' jilis seka'a. Itime ti 'yakela, sekyi'i ijwilaja'm niwa Sinia' jlamtis sekyi'i ti yama'ni ti itimayisi.