Read Iyojwa'ja Chorote Hechos 17 Bible Online

Hechos 17 - Iyojwa'ja Chorote bible

Hechos 17

¹Pablo jla'yi ja Silas iniuyisk'i jaka 'nayi siojo teje'ni yi'i jlaja isi' jle' iyo'ate Anfípolis, siu'neje jlaja Apolonia, paj ti yiyeyis 'niji yi'i japa Tesalónica, isi' ti wuj. Siupapo Judíojos t'ajla'wet po' japa sekyi'i, yi'i japak isi'.

²Pablo siupa iniwone, ti yiyetaja japa isi', 'yuyi'ni japa 'najla'wet, ti yiyetaja siojopa jloma ti i'nio 'wanjlijyi'n. Kiajatak'i'ni puwa jlomas paj ti itijwa isia'm puwa i'nio 'wanjlijiyis najape, iyone'ne 'ate papo i'nio': —Sinia' jlamtis yi'i 'ni ji'wet ijwi'il pa Sinia' jijliujwanik ti Injwajieti, ti ja wujwa ti janilayiti siupa ja tiwonaja ti ja tiliana. 'Yina jano kisie'e ti jantajli pa a'no'. Siunie Jesús ti je pajk'i ajwel'ni, nak Injwajieti ti Sinia' jijliujwanik.

⁴Po' papo Judíojos siupapo je takakiunisi niwak inamtis, papoka'ne siupapo iyo jla'yisa' japo Pablo, siu'neje ja Silas. Je papokata, po'neje papo Griégojos, ti ijiunitis pa Sinia', ti je 'yakakiuyis. Je pini 'neje siupapo asejnia ti jle' po' ti tonitie.

⁵Siupapo Judíojos kakiujnietas tanat'iyipi siupapo i'nio' jlam sek yik'i'ni yi'i japa isi', ti kajlojoties, ijliuye'ne ka ijwesinis papo i'nio'. Ijioyis'ne ji'wete pa i'nio' jle' iyo'ate Jasón, ti iyoyistajyin'ni ja Pablo ti iyotajas ka intonis kisie'e kan'wenis, kanekiajle papo i'nio'.

⁶Ti je i'winis ja Pablo, jiwak yikiajlets'i'ne pa Jasón, siu'neje papo Sinia' jilis, ti itione papo anechiyasas. Iyoyis'ne 'ate ti tanisi ape'e: —Siu'napo i'nio' 'napok 'yakajyi'n napo i'nio' yi' ape'e 'na ajnat, ti je 'yaka paka woyisi, yiyep'anis 'neye.

⁷¡'Naka jla'am 'na Jasón ti iyo 'weta' ti yin jlajap! ¡Je iyo lajaye siunie saka anechiyas Roma jlele siunie iyo ka iyoki, kajeyepa ti ijwilis ti po'neje siupa anechiyas jikiecha, siupa jle' iyo'ate Jesús!

⁸Kat'ajat'iyijpe papo i'nio' ti ipi'yayis ti kia'iyo je ijwiyeyijits'i'ni.

⁹Takat'in'ne jitipe'e pa Jasón sekyi'i inkio' tiliena'a'ne 'yakama'ne papo i'nio', sekyi'i iliyeyisi.

¹⁰Jlampa ajnaja siupapo Sinia' jilis jla'm iyonayisi'ni 'ate iyoyeyi ka ijloyis ja Pablo siu'neje ja Silas 'niji yi'i japa isi' jle' iyo'ate Berea. 'Nes'ni ti yamitayisi ti ijioyisi japa Judíojos t'ajla'wet.

¹¹Siupapo Judíojos jlamp'an je iyo'ate siupapo yi' Tesalónicaja, ti wuj ti t'ojni'n, ti jlam jeye jlamis 'es ti isimits'i niwa Sinia' jlamtis, 'yaka itiliajasi it'imina ti its'iuyisie. Jlomas ti i'ye'en puwa inamtis, ti ijialas ka 'najanisi ka ijiatayi siupa iyo ja Pablo puwa yamtiyi.

¹²'Loj papo je 'yakakiuyis, Griégojos 'nijiye ti je 'yakakiuyis, siu'neje papo asejnia ti jle' po' ti tonitie, ayijnies kia'iyojliyi po'.

¹³Siupapo Judíojos Tesalónica jlele ti 'yijenayisi pi iyonisi, ti Pablo iyo jlamtikie' Beréaja, yam'ni'ne ti ijiutisik'iji'n, ti jla'm iyo ka jwesinis papo i'nio' sek yi'i.

¹⁴Jlam yititjliyis japo Pablo ti ijliuyis, ijliuyisie'ne ka ino kiusk'i pa i'niat lajlik'i. 'Yina Silas jla'yi ja Timoteo sek 'wanjliyits'i 'ne jlamis Beréaja.

¹⁵Pablo jla'yis po', je iyo ka leyisk'i, paj ti yiyeyis Aténasse, siojopa isi' wuj. Paj ti yapilieyi ts'iji Beréaja, yamisi siupa ji'lij ja Pablo ti ijliuye ja Silas jla'yi ja Timoteo ti iyo'ate: —Ká apajanitiek'inie'e ka joyek'i.

¹⁶Pablo je t'eki ts'e Aténasse, ti its'iujwink'iye ja Silas jla'yi ja Timoteo. Sekyi'i ti i'wi'in ti 'loj puwa topayis, yi'i japa isi'. Pablo wuj ti jijliak'aliye po' ti i'wi'in.

¹⁷Tempi it'imina ti je iliyi'ni siupuwa Judíojos t'ajla'wetis ti takamtijniene'ni papo Judíojos, siu'neje papo i'nio' ijia ti je iliyi ti ijiunitis pa Sinia'. Jla'yi ti je iliyi'ni japa aj'leje'n siojopa jikiowe'e japa isi', ti takamtijniene pa yi'i pa ti sek i'wi'ne.

¹⁸Siunapo i'nio' 'yijejne'n jle' iyo'ate Epicúreos siu'neje papo Estóicos sek inita'a ti ijioyisi ja Pablo. Tom ts'iji pa iyo'ate, ti iliakiyis: —¿Tempi'ne pi ijwil'ni siunie amtijieta? Iyo'ate papo ijia: —Ijwilt'e ape'e napo i'nio' siupa dios 'wenayi. Ji'lij kia'iyonisi, kajeyepa ti Pablo ti iyoyetaja jlamtikie', ijwil pa Jesús, jla'yi ki iyo ni a'no', ti janapits'i pijia'm siunapo 'yajle'n ti yiji.

¹⁹Pablo tokiji'ni siojopa yi'i papo ijnosikis jiwos, siojopa jle' iyo'ate Areópago. Sek tenajayi'i ti ti'yasa'ni, ti tiwonaja 'ate: —Awoktajank'iye ka kasts'ajane paka iyonaja, siunie i'neyasajnaye jiniamets'e,

²⁰kajeyepa ti 'wena yiji. Awoktajank'iye ka kasts'ajaneje siupa iyoyiyi.

²¹Tepa jawo ka kiak je iwoyisi ti, pakata jla'am ti iyoyisi, papoka Atenas jlele, siu'neje papo jlam pak talk'i'ni, ti its'iuyisijyin'ni ka ink'ieye paka inka'neyasajnayeja' paka impe'yayis, jla'yi ka ink'ieye paka injwelis papo i'nio'.

²²Pablo takasit'ne jikiowe'e japa Areópago, ti iyo'ate: —Asa'am ti jleyejyi jla'a Atenas, a'we'en ti wuj ti jitienkiunieyi, pa k'iejliyi'iji pa dios ti ji'wena'.

²³Ti ekiajli'ni 'naka'a, siu'niwa jininenayi'i'ni ti jiwunitie pa aka dios, altar jlaja a'we'en ti po' niwa inamtis yi' ape'e ti tip'esina ti iyo'ate, “Dios ti Je Titiant'ieki”. 'Yina siunie Dios ti jijwela je intant'iejayi, 'naka ti ajwe'lase'm ti a 'neye.

²⁴“Dios siunie ti 'yotate 'ni ajnat, wikie'eyi niwa wask'i'nelaja siuniwa yi' ape'e, jlam ti poli jla'yi 'na ajnat Jika'niona, ti Sinia'. Je yiji japa 'wuk jiniliakiye ka i'nio' jilisankiye.

²⁵Je isitia'n ka tiniukieje, kajeyepa ti jla'am ti tajle jana in'wasankiye yiyi ni i'nio', jla'yi ni jiyel, siu'neje niwa ijia wask'i'nelaja.

²⁶“Ijwienjli pa i'nio' ilisane ti 'nelanjie'e, 'yina paj ti isajayija'm ape'e 'ni ajnat ti iyo 'weta'. Jlam ti yitineje pa k'ie', jla'yi ti tipayiji k'iye siunie ji'weta'.

²⁷Iyotaja ka tiwokijyin'ni, ka jlam nesi'lieyi ka 'wenis ka kiak inwonisi ka inkiesijyin'ni. Ijiate je tojwatajan sajap pa Sinia'.

²⁸Jlam ti si'wasankiye atajlajaja, jlam ti it'imina ti kaspo', jla'yi ti askiuniek'ijin'ni. Iyot'iyipi siupapo asp'esinawos, ti iyo'ate: Sam ti jilists'e'm pa Sinia' ti atomaja pijia'm.

²⁹“Jakajliete ti sam ti jilists'e'm ti atomaja pijia'm, ja ke inena'a ts'e ka ijwila pa Sinia' ka wo'ate siuniwa topa, ti wikinie maja ti 'najli ni'ne ka wikiniet'aja, ni'ne ka sisaja, siuniwa i'nio' ilisane ti itiajlat jiwa'm, ti jitienkiujnieyejes.

³⁰Ti pajk'i pa Sinia' yine'ate papo i'nio' siupa iniwonisi, 'yaka je wuj kan'ye'en. 'Nakayi je kia'iyo, 'wenajliyi ti iyo ka iwo jlosikis ink'iejyisa', wikie'eyi napo i'nio' yi' ape'e 'ni ajnat.

³¹Kajeyepa ti jla'am ti yitineje k'iye ta'a siojona jloma ti jan'ye'en napo i'nio', jlajma pak ja ke iwonijits'i'ni siuka inetiejenie'e. Kajeyepa ti janjwanjli siunie ja tekiajlaja ti jan'ye'en, ti tijniejieta'a. Naka siunie ti Sinia' iniujwa'n kisie'e ti tajli ni a'no', 'nakayi ti wikie'eyi napo i'nio' ti jan'we'en, ti kiak jawo ti ja ijiatayi.”

³²Ti tipe'yakie ti yiyiji ki iyo na i'nio' ti janapi pijia'm, sekyi'i ti iliakiyeyis'ni. Ijia papo iyo'ate: —'Esiji, je ijiat ka je ipi'yakna'aja ka ekialtaja'ana'aja ka netie'e pa jlomaye.

³³Sekyi'i Pablo tajla'ne yam'ne.

³⁴'Yina ti po' siupapo je 'yakakiuyis pet. I'nio' pa jle' iyo'ate Dionisio, yiji papo ijnosikis jiwos yi'i japa Areópago, siu'neje japa i'nioki jle' iyo'ate Dámaris, siu'neje papo ijia i'nio'.