Read Iyojwa'ja Chorote Hechos 18 Bible Online

Hechos 18 - Iyojwa'ja Chorote bible

Hechos 18

¹Jlampa yama'niji siupa iyoyisi, Pablo tajla'm japa Atenas, ijioye 'niji yi'i japa isi' jle' iyo'ate Corinto.

²Sek i'wi'ne'ne siojo i'nio' Judío jle' iyo'ate Aquila, Ponto jlele, ti 'nesayis'ni. Je pajk'i pet ti 'nes'ni ti tajlis 'niji yi'i jlaja Italia, jla'yiki jlaja jik'iemjla Priscila. Pakayi ti Claudio anechiyas ti wuj Roma jlele ji'lij ka wikie'eyeyi papo Judíojos ka nek'ni. Japoka siojopo Pablo ijioyi.

³'Yina ti Pablo jikijmaye kia'iyoyi, iyo papo ti isimisie'ni puwa 'nejes. Jak je iyoyiji'ni ti sek 'wanjle'e ti iyo ka inoyeje, ti ats'ilka ka inkijme'n.

⁴Yiyi japa jloma ti i'nio 'wanjlijyi'n, ijioyeyi'ijyi japa t'ajla'wet papo Judíojos, ti takamtijniene, siu'neje papo je Judíojos, jlam 'yijijienta'a ka namitis isia'm puwa Sinia' jlamtis.

⁵Silas jla'yi ja Timoteo 'nes'ni 'ne ti tajlis Macedóniaja, sekyi'i ti Pablo iliyeyi ti isima puwa 'nejes, pajataja jla'am ti 'yu'we ti iyoye'ni jlamtikie', ti ijwil pa Jesús, ti pak Injwajieti ti Sinia' jijliujwanik.

⁶Jla'm iliakiyisjli pa Pablo, ti tejeyis ilia'm, jak je iyoyiji'ni ti ipiatits'i puwa ji'wuye, ti 'yakajanit ti wuj ti jitis poyis, sekyi'i iyone'ne 'ate: —Ja asama'yasa'm ti janit'emina ni siunie ti janetiana, je ani'noti 'naka. 'Nak jatiaj'le ti jajioyi siunapo je Judíojos.

⁷Yam'ne ja Pablo ti tajla papo, ijioyeyi pa i'nio' iyoyi pi inamtik, jle' iyo'ate Ticio Justo, ji'wet je tojwape'n japa 'najla'wet.

⁸Crispo siupa tijna'yi japa 'najla'wet, pak iyo jlosik ink'ieye siu'neje papo ji'wet jlele, siu'neje papo Corinto jlele, lapakawo ti ipi'yayis puwa Sinia' jlamtis ti Pablo ijwi'il, sekyi'i tiniejienaja'ne.

⁹Yi'i pa ajnaj Pablo Sinia' ini'wenkijna'm ti iyone'ate: —'Otale t'onit, katate ti jiwo amtikie', ká ak'iu'wate.

¹⁰Kajeyepa ya'am jayi'ajap. Ja lajk'ipa ka tiwona'a ka tiwok akieye, 'loj napo ilis yiji siujlie'e isi'.

¹¹Jak je iyoyiji'ni Pablo ijwienjli pa najkap 'esi'n sekyi'i ijwienjli pi yisitaja'm ti sekyi'i Coríntojo, ti 'yiyasane puwa Sinia' jlamtis papo i'nio' sekyi'i.

¹²Siupuwa jlomas ti siupa anechiyas jle' iyo'ate Galión yi'i japa Acaya, inikiul papo Judíojos ti iyoyeyi ka inkimits'i ja Pablo, ti ijioyisiji siupa tenaja'a'ni siupa ti potie pi jitis.

¹³Tijwelajam'ne pa anechiyas ti tiwonaja 'ate: —Siu'nie i'nio', siunie iyoyi, naka ti 'yakajli napo i'nio' ti ijwijla'm ka tiwunitie pa Sinia', wuj ti teje'yi ilia'm ni saka'neyasajnaye iyoyi.

¹⁴Pablo k'iejli iyotaja ka intamti, ti tamtiye pet pa anechiyas, ti iyone 'ate papo Judíojos: —Siuti jijwela' ka nakaye ni jiniamayi ka inkalankiyeja', ni'ne ka k'iejliyeyi paka je 'esiek'iyi, 'esiji ak'iu'wase'm, ti asa'am ti Judíojosts'ase'm.

¹⁵'Yina ti inamtis jiwekie'e, jla'yi niwa inkeyis, siu'neje niwa aska'neyasajnayejes, it'imina siunie jiwoyeyi ti asamtis 'loj, 'yena'yasa'm. Je ani'noti 'niwaka. ¡Maye'ni!

¹⁷Sekyi'i isimits'i'ne pa Sóstenes, ti tijna'yi japa 'najla'wet, sek yinisi'i yi'i siupa tenaja'a'ni papo ti jitis potie, sekyi'i ti tajak'ni'ne. Galión siupa anechiyas yaka je in'wenata siupi iyoyisi.

¹⁸Pablo 'loj puwa jlomas ti je t'eki Coríntojo, 'yina yit'i'yipe japa jloma ti iyoyeyi ka intajla papo i'nio' sekyi'i, isieja kiojiamk'i ti inijwe'el ti janek'ni. Siujlieja Priscila jla'yi ja Aquila yamisk'i, ti yamat'i'nijpe ti ijioyisi japa kasejkanayis yajap'ejen'ni, jle' iyo'ate Cencrea je tojwape'n japa Corinto. Pablo ti je tisiojmajiamk'iji iyo jika awusieja' ti yine'eyi, ti 'yakajanit ti ijiatk'i siunie iniwone ti inipe'yayi pa Sinia', siupa iniwonisi. Itime ti jiwekie'aja ti yam'ni ti yamk'i japa kasejkana, ti ijio 'niji yi'i jlaja Siria, jla'yis japo Priscila, Aquila 'neje.

¹⁹'Yina ti yiyeyis Éfesojo, Pablo inijwele'ni papo ijia jla'yis, siupapo sek 'wanjle'e. Yam'ne pet ti ijio Judíojos t'ajla'wete, ti takamtijniene papo Judíojos sekyi'i.

²⁰'Yina je iwinis'ne ka jlomas 'nak nojwaja'm ka sek 'wanjliye'e. Pablo je isiujlie'ne papo.

²¹Iyone'ne 'ate, ti inijwelayi: —Je ijiat ka je ini'wenajna'a, ka Sinia' iwotajanie'e ka ijio'wase. Sekyi'i ti tisiojmayejamk'i, tejeye 'niji Cesaréaja.

²²Ti yiyeyis Cesaréaja, sekyi'i ti tejeye'eje 'niji Jerusalenne, ti iyo ka intejwila papo Sinia' jilis sekyi'i. Sekyi'i ti tejeye'eje 'niji yi'i jlaja Antioquía.

²³Jlampa paja'ni seka'a, ti yikiajlayi'iji ti ijioyits'i papo ti ijwienjli tajlap'e, ti iniuyeje papo Sinia' jilis ti 'yakela, siupapo yi'i Galáciaja, siu'neje papo yi'i Frígiaja.

²⁴Japaka siojopa jloma ti 'nes Éfesojo siojo Judío jle' iyo'ate Apolos, ji'wet japa Alejandría, i'nio' ti wuj ti 'yijen ji'liji, itiant'ieje puwa Sinia' jlamtis yi'i ni ji'wet.

²⁵Jlam pajk'i ta'a ti ini'neyasane ni inamtik, ats'ilkaja ti yameje'n niwa Sinia' jlamtis, ti ijwi'il pa Jesús. Ejlo'o wekie'e ti pakata pi iyot'iyipi pa Juan ti iniejiejne'n papo ti 'yijene pi iyone, 'yina 'es ti taka'neyasa'n.

²⁶T'otale t'o'n ti iyo jlamtikie' kiajwe japa Judíojos t'ajla'wet. Aquila jla'yiki jlaja Priscila, ti ipi'yayisie, jlampa iniuyek'i kisie'e, tanisi'ni'ne ti i'nialkit siupi ijioyi'i kisie'e, ti 'yiyasane puwa Sinia' jlamtis siupuwa je ya'me pet pa iyo pa Saka'niona 'niayi.

²⁷Ti Apolos iyoyeyi kajno 'niji yi'i japa Acaya, Sinia' jilis papo sekyi'i iyonisi'ne 'ate, ti inkajats'i: —Wuj ti 'es ni atankiujnieye jiwone. Sekyi'i ti 'yotatayisi ki jip'esinik, ti itiejiete papo Sinia' jilis yi'i Acáyaja, kan'yenits'i ilia'm ja Apolos, ti yama. 'Yina ti 'nesa sekaja Acáyaja, wuj ti iniuyeje siupapo Sinia' iniut'iyejepe, jla'yi ti iyoyis jlosikis ink'iejyisa'.

²⁸Wuj ti ini'net ti teje'yi ilia'm papo Judíojos, jak je iyoyiji'ni ti je ikakiuyis, lapakawo ti tajle niwa Sinia' jlamtis 'yakajanit'i ape'e pa Jesús, ti pak Injwajieti ti Sinia' jijliujwanik ajnat'e.