Read Iyojwa'ja Chorote Hechos 23 Bible Online

Hechos 23 - Iyojwa'ja Chorote bible

Hechos 23

¹Pablo jitiej itieteje'ni japo ti iyo'ate: —I'lijwas, atalk'i'ni jiwekie'e, atajlap'e ti 'nelanjie'e, awakieyi 'niji ti akama jiwek itieyi'i pa Sinia'. Kajeyepa ti lajk'i wekie'e pa ka iyo ka je 'esie ka itiej wujwayi'ni ka ts'ajwejle.

²Ananías, siojo pa'yijis jika anechiyas, ijliuyetaja siojopo yijape'n ka inkiejes jikiwit'ape'e ja Pablo.

³'Yina Pablo iyone'ne 'ate: —¡Am ja ijiatayi ti ja Sinia' impaj akiwita'm, ti jijwel ka i'nes! Siuti jlejyi'n 'naka'a ti si'yen ti jakajanit itipe'e siupa awoyi, iyo ni Moisés jika'neyasajnaye siunie iyo ka tiwoki, 'yina siuti jiwo ka sipaj wuj ti jiliaki ki inka'neyasajnaye iyoyi.

⁴Siojopo sekyi'i, ti ipi'yayisie, wuj ti jwesis ti iyoyits'i 'ate: —'Wena ka a'lej kiak awone, ti jipechini ni Sinia' jika pa'yijis jika anechiyas.

⁵Pablo isiujlie ti iyo'ate: —'Napo i'lijwas, lapakawo ti je ts'ajane ta'a paka iyone ti pa'yijis jika anechiyas p'an. Jlajmiliet ka ts'ajane ta'a paka iyone, jla'am i'lij je kiak awontaja. Kajeyepa ti Sinia' jlamtis ti yiji ni ji'wet kia'iyo ti iyo'ate, “A'lej 'otata jla'yi ká amasin'ni ni aka anechiyas.”

⁶Ti Pablo itijnisieyi ti Saducéojos siu'neje japo Fariséojos japo yiji japok ijnosikis jiwos, sekyi'i 'yakets'ijiap'ne ti iyo'ate: —I'lijwas, Fariseok'i'm. Fariséojos 'neje napo i'wit jlele. Je akakiuni siunie iyo siunapo 'yajle'n ti yapits'i pijia'm. Naka'ne siunie titiajlatak'i'm.

⁷Ti Pablo itimayi ti kia'iyoyi, siojopo Fariséojos siu'neje japo Saducéojos yapilie jlamk'i wita'm ti iniewitis. Sekyi'i inik'isa'ne japo i'nio'.

⁸Kajeyepa ti Saducéojos ijwil pet ka je inapits'i pijia'm siupapo 'yajle'n, ijwil ka lajak'iyi puwa injlojwajnas poli jleliye, ijwil 'ne'eje ka lajak'i puwa imosela'. Jlampet japo Fariséojos ijwil pet ti je takakiunisi niwaka ti ijiate, ti po'.

⁹Wikie'eyi japo i'nio' ti tamtits'iji'n. Po' siojopo sekyi'i ti taka'neyasane kia Moisés jika'neyasajnaye, ti tajla'm japo Fariséojos, takasitk'i'ne ti iyonisi 'ate japo i'nio': —Siu'nie i'nio' lajk'ipa ka je 'esie, ka k'iejliyeyi kawoyi ka 'winaja. Ajwel'ni insak'aljle pa takamtijniene, ni'ne ka injlojwanik poli jleliye pa.

¹⁰'Yina ti ijiatayiji ti je inilesaniji ti iniewitis papo i'nio', siu'neje ti jlampa iyoyisits'i'ni, tokis jika anechiyas isiwitayi ja Pablo ka ijiatayiji paka tiwonaja ka t'ekiyeje ka tiwok jijwala'. Sekyi'i ijliuye'ne japo jikawos tokis ka intonis kisie'e ka inekiajlisia'm jlaja tokis 'loj ji'wet.

¹¹Ajnaj ti Saka'niona ini'wenkinat'ijiampe ja Pablo, ti iyone'ate: —Pablo, jwajla'a paka wo. Wone'ate ti 'nak jle'yi 'ne yi'i jla'a Jerusalén ti sijwe'el, ka atiejna'a Rómaja.

¹²Jloma ti k'iejli mot, po' siojopo Judíojos ti inikiujlisiap ja Pablo ti iyoyits'i 'ate: —Sak je inkaja ti je a'yakanajli'ijyi 'na Pablo ka iliana, jla'm ijiatena'a ka i'yakana jiwekie'ejana'a ka inkajaja ni sak, jla'yi pa k'iejliyi ka 'yaki.

¹³Ika'm ape'e papo cuarenta siojopo inikiul, ka kiak iniwonisi.

¹⁴Yam'ni'ne ti ijioyisi japo pa'yijis jika anechiyasas, siu'neje japo Judíojos siojopo kijilas ti jleyis po', yiyisi ti iyoyets'i 'ate: —Siunie awoki ti anama'ni, ejlowekie'e ti nel'lia kaslajne'n ti je a'yakanajliyi'ijyi 'na Pablo ka liana.

¹⁵Siuti asa'am, siu'neje napo sosikis jiwos, 'yasajyi'n na tokis jika anechiyas ka name'a ja Pablo. Jlam kelitie'nina'a jiwekie'e ka wonayi 'ate, “Jalisanaja'ni ka'yena siupa jitis iyo.” Jlam'ne ni jayoki ti ja'yenajank'iye siupa jano'we, sek jane'yi ka i'yakanajana'a ka iliana.

¹⁶'Yina siojo ji'yijnia jlas ja Pablo 'yijene wek pi iyone, ta'a'ne ti t'osiyi pa jikilia ti takajwejlane ti yi' tokis 'loj ji'wete siupa iyo japo Judíojos ti iyo ka ilanis ja Pablo.

¹⁷Pablo sekyi'i tanayi ja tokis, ti iyone'ate: —Mayi kiu wata'a siu'nie jwemik, joyiji ja aska anechiyas. Po' siunie iyo ka injwejla'm.

¹⁸Tikinieje'ne ja jwemik ti tokiji ja anechiyas. Iyoni'ne 'ate ti yiyeyi: —Siojo inkipinik Pablo ijliuk'ijme ka 'yunink'i siu'nie jwemik, ti iyo ka ijno'wa, ti pojle siupa iyo ka injwe'la'm

¹⁹Tokis jika anechiyas isim'ne jikio'yi, ijwienkite'n siojo ijioyiji ti i'yase'n, ti iyo'ate: —¿Ten siupa jota ajwelk'i'm?

²⁰Siojo jwemik isiujlie ti iyo'ate: —Siunapo Judíojos wakal ti inikiul ti jajno'wase ti a'am ti anechiyats'a'm, siunie jan'yasanisi naka ti kajlomata ka k'iejli motieta ka akiji ja Pablo ti ijwilis ti janlesanijisi'ni ti jan'yenis siupa jitis iyo.

²¹Jla'm iyoyisi, ká ak'iuyeyijna'a. 'Yejne'n siunapo inikiul ti iyo ka ilanis, 'yaka'm ape'e napo cuarenta napoka ti t'olanisie ja Pablo ka kiak iwonisi, ti jan'yenisink'iye pakaja siupa jano'we ka akinietajana'a. Ijwilis jlak je inkaje ti je i'yakanisjli'ijyi, jlajmi ijiatayi ka in'yakanis ka jiwekie'ejana'a kan'yekiunis jla'yi kan'yayisi paka k'iejliyeyi. 'Yina wakajle siunie iyoyisi, pakata jla'am siupa ti its'iuyisink'iye ka akiujlie ka ajotajanie'e.

²²Itime ti ijliuye ja jwemik, sekyi'i iyone'ne 'ate: —'Esiji, maj. Ká ajwejlamna'a paka ne'yi siukia iyo ki jijwelk'i'm.

²³Siojo tokis jika anechiyas tane'ni japo times jikawos anechiyasas ti iyone 'ate: —Wakajlanitiets'i papo tokis, siupapo jant'ask'i ajnat'e ja dosciéntossa', jlampet siupapo jane' a'lentask'i ape'e ja seténtaja, siupapo janwo jika k'okisa' ja dosciéntossa'. Ajnaj ka akinieye'nina'a ka ajoye Cesaréaja.

²⁴Woyenie'e jiliajwaja' na Pablo, ka ne'yi ape'e. 'Esiji ka'yena ja'nakayeyi ka laja jiwet'iaye, ka netiejenie'e ja anechiyas Félix.

²⁵Siojo jip'esinik ijliuyi ja anechiyas, siojowa jlamtis yi'i iyo'ate:

²⁶“Ampey, anechiyas Félix ti ajweye po'. Ya'am Claudio Lisiask'i'm, wuj ti atejwi'la.

²⁷Je 'wenayi paka ijwi'la'm, 'neyek'i Judíojos isimits'i siu'nie i'nio' ti iyotaja ka inlanis. Je 'esiji pet ti ts'ajanayi pa awone ti Romano, 'yina ak'ne ti a'asi japo jika tokis, sekyi'i a'manit'ne.

²⁸'Yina ti awo ka ts'ajane siupa jitis iyo, it'imina'ne ti ajoyiji japo jlosikis jiwos jlamis.

²⁹'Yina ti jiwekie'aja ti ts'ajane pa awone, ti naka p'an jika'neyasajnaye jlamis ti itiajlatisie. Jlajmi wekie'e ti iyotajas ka inlanis, siu'neje ti iyo ka 'notits'i a'laja'm ti lajk'ipa ka jitis iwo ka ijiatayiji ka je 'esie.

³⁰Ti ts'ajane ta'a pa awone siunie jota iwonisi, ti iyotajasi ka inlanis, it'imina'ne pet ti nak ajlojwi, siu'neje napo ijiutinisi paka jitis inwo ajlok'i, ka ape'ya siupa itiajlatisie. “'Nak nojwaja'm 'niwa yamtis. Ya'am, CLAUDIO LISIASK'I'M.

³¹Jak je iyoyiji'ni siukia ajnaj yama'ni japo tokis ti yamisi ja Pablo, ti ijioyisiji siujlieja isi' jle' iyo'ate Antipatris.

³²Siukia jloma ti k'iejli mot, siojopo tokis t'ask'i ajnat'e yapik'i'ne jlam isia'm, japokataja jla'am siojopo yi' a'lentask'i ape'e ti je yajapk'iji'n ti yamisi ja Pablo ti ijioyisi Cesaréaja.

³³Ti 'nesa'ni, yikiajlayisi ja anechiyas siukia imp'esinik titiunkinieje. Yamtijiena ja anechiyas, itime ti jiwekie'aja ti tekiajlaja ja anechiyas ja Pablo. Sekyi'i ti i'yasayiji'n siojopa ajnat ji'wet yi'i ja Pablo. Ti 'yijenayi ti tal Cilíciaja iyo'ne 'ate siojo anechiyas: —Je ijiat ka je ipi'ya ka 'nesta'nina'a siupapo 'yijene siupa ates iyo. Takajlunieyi ka tokiji siupa anechiyas t'ipi Herodes ji'wet ka sek tena'a, ka wujwa ka ti'yenaja.