Read Iyojwa'ja Chorote Hechos 25 Bible Online

Hechos 25 - Iyojwa'ja Chorote bible

Hechos 25

¹Najape kiwa jlomas yam'niji ti Festo jlampa yiye'e ti iyo anechiyasa' yam'ne ti tajla'm jlaja Cesarea, ti ijioyi jlaja isi' Jerusalén.

²Ti 'nesa, pa'yijis jika anechiyasas siu'neje papo Judíojos ti jleyis pope ta'a ti yiyisijink'iye ti ijwilisia'm siupa ijwil ka jitis iwo ja Pablo,

³ti iyoyits'i 'ate: —'Yaka anechiyas, siu'nie awoktaja ka iyoki, ka ekialmet ja Pablo 'ne Jerusalenne, 'yina po' siunie ti awoktaja ka 'nakaja. Jlam'ne siunie jota iwoyisi ti iyotaja ka inenisi 'nayiji ka inlanis.

⁴Festo iyo'ne 'ate ti isiujlie papo: —Ya'am ajwel'ni je'e, kajeyepa ti Pablo inkio' je tilienajli'yiji, ti yi' Cesaréaja, 'yina sek jayapijli'ijyi ka pajata wata'a.

⁵Jla'm ijiattaja napo aska anechiyasas ka ina'm ijyik'i ka yiktiejna'a, 'yina siuti japoye paka jitisa' ka sek inenayisijinie'e ka injwelis.

⁶Ni'ne t'ipi ka ijwienjli sikio' itij'we kiwa jlomas ti Festo yi' Jerusalenne, ti yapilie'eje Cesaréaja. Siukia ti jlomaye'eje yama ti ijioyi siojo yi'i'ni napo ti k'iejlitieje pa jitis iyo ti ti'yena, sekyi'i yiyeje'n. Takajlunieyi ja Pablo ka tikiniejeje, ti iyoyeyi kan'ye'en pa jitis iyo.

⁷Ti Pablo yiyeyi, siojopo Judíojos ti tal Jerusalenne 'loj siupuwa ijwil ka iwo ja Pablo, ka puwakaye ka intajlatisie, 'yina je 'yijenisi paka iwonisi ka tik'iukie siupuwa ijwilistajam'ni pa anechiyas, kajeyepa ti jla'am ijiutkinistaja'ni jiwekie'e.

⁸Pablo iyo'ne 'ate: —Ya'am laj itisa'. Ka itis poye pa, ti je ata'yi ilia'm ni Moisés jika'neyasajnaye, tiwet'ianaja ka itie 'neje jiwek ilia'm jana 'najla'wet yi' Jerusalenne, ni'ne ka nakaye ni saka anechiyas ni Roma jlele ka itie'yi ilia'm, jeyi kat'aja.

⁹'Yina ja Festo ti iyojonk'iye ka 'esieyi wita'm japo Judíojos, it'imina'ne ti i'yase'n ja Pablo ti iyo'ate: —¿Ma jiwoyi ka ajo Jerusalenne, ka'ye'en sekaja siupa ates iyo?

¹⁰Pablo isiujlie ti iyo'ate: —Je'e, je awoyi, kajeyepa ti ajyi kiojyi napo saka anechiyas jikawos, napok jan'yenis siupa itist'i iyo. Ni'ne ka itiet'ilia'm napo Judíojos, mejla'ala ka je 'najane ti lajk'iyi paka itis neyi ilia'm.

¹¹Siuti je jwajla'a t'e pa awo, ni'ne ka poye paka iyot'iyipi ka wujwa ka je 'esie. Ka puwakaye'ne ka titiajlataja ti tilianajata pa, 'wanjliyi 'esiji je anite'n, ka siliana. 'Yina jla'm ijiatayi pet ka je ijiatatak'i siunie ijwilis ka iyoyi, kia'iyoyi je 'esk'i'neje ka poye paka injwel ka sekial jikiojia'm ti jlamis. It'imina ti awo'ate, 'esiji ka jlama jla'am ka si'ye'n na saka anechiyas Roma jlele.

¹²Festo ini'yase siojopo ini'yene'ni, ti iyo'ate: —¿Tepi jiwoyeyi pet ti asa'am? Ti itimayi ti ini'yasis, sekyi'i iyonisi'ne 'ate ja Pablo: —Ijiatp'ane, 'esiji ti a'am ti ji'yasane ka saka anechiyas Roma jlele kan'ye'en, je ijiat ka je ijliu' Rómaja.

¹³Jlomas 'nak nojwaja'am kiwa yam'niji, anechiyas Agripa[13] jla'yiki jlaja ji'yijnia jle' iyo'ate Berenice yam'ni ti ijioyis Cesaréaja ti itijwilisi ja Festo.

¹⁴'Yina ti pajan'ni sekaja japo Agripa, it'imina'ne ja Festo ti jlam 'wesi ti ijwijla'm ja Agripa siupa jiwet'ia iyo ja Pablo, ti iyo'ate: —Po' ni yi'ne i'nio', ti Félix sek iliyi'i wekie'e insat jiweje.

¹⁵Ti a ts'iji Jerusalenne, siojopo pa'yijis jika anechiyasas siu'neje japo kijilas ti jleyis po' ijioyisk'i ti ijwilisk'i'm siuniwa titiajlataja nak i'nio'. 'Yina siunie si'yasisiji'n naka ti ijliuyistajak'i'm ka k'iejliyeyi paka iyone ka ijiutkina pa ka jitis iwo.

¹⁶Ti akiujlieyi awope 'ate, “Ti sa'am ti Roma jlelets'e'm, je sake' ka kassesi'lie'yi ka iyoki ka iliana pa, ti je inipe'yayi siupapo ijwi'il. 'Esiji ti jlam pet ti ipi'ya ti iyoyetaja ka intamti ni i'nio', ti iyo ka ini'manit.”

¹⁷Siuti 'nak ijioyits'ipe, je awo'ni ka ipiejeniti, jak je iyoyi siukia ti jlomaye akie ti ajoyi siojo tenaja'a'ni napo ti kia'iyo jitis poyeta, ti ti'yena, sekyi'i ti a'yenata. Akajlunieyi ka tikinieje jak i'nio' ka tiniamajak'i.

¹⁸Yiyi siojopo ijwi'il, 'yina je ijlieneje siunie iyonisi ti ijwilis ka intajlatisie, atejnisp'antaja ka ijiatayiji paka inwonisi, ka inenisi kiu'ujwe ape'e siukia iyonisi. Ajwelp'an ka ijiatayiji ka je jwajla'aja paka iwoyi, kiak siukia enta'a ya'am.

¹⁹Najata jla'am siunie jika'neyasajnayejes iyo ti yiyisiji ti ijwil ka intajlatisie, ti ijwi'il siupa Jesús t'ipi ti 'ya'al, 'yina Pablo ijwi'il ti 'wasa'n paka 'nakayi. Kiajata jla'am itiajlatisie ja Pablo.

²⁰Sekyi'i a'yasen'ne ja Pablo ka iwo ka ijno Jerusalenne, ka sek iyiniji ka yama ka'ye'en, kajeyepa ti je ts'ajane paka iyone ni iyoyisi.

²¹Jlam jla'am ti ti'yasane ka tilisanajaje ka ti'yena, jla'yi ka siunie saka anechiyas Roma jlele i'ye'en pa jitis iyo. 'Yina akajlunieyi ka tekiajla kiu'ujwe 'wuk kiajwe, ti lajli'ijyi ji'niayija' ka toki Rómaja.

²²Yiyik'i ja Festo ti tamti, Agripa iyo'ne 'ate: —Kia'awo awotaja pet ka ipi'ya pak i'nio'. Festo isiujlie ja Agripa ti iyo'ate: —'Esiji, je ijiat ka je ape'ya ka jlomata.

²³Ijiatjliyi, siojokia jloma kiecha, 'nesa'ni japo Agripa jla'yiki jlaja ji'yijnia Berenice. 'Yina siojopo sek yi'i i'nio' ti i'winayis ilia'm, iyoyis lajaye, yamitisie k'ioyi jlaja 'wuk yiyis kiajwe, ininenisi'i'ni ti anechiyasas 'najli. Tokis jika anechiyasas napo sekyi'i, siu'neje japo jlamt'iyijpe anechiyasas yiji jlaja Cesarea. Sekyi'i Festo takajluni'ni ka tikinieje ja Pablo, ka tokiji siojo yiyits'i.

²⁴Ti ti'nisajayi ja Pablo, Festo iyo'ne 'ate: —Anechiyas Agripa, siu'neje ti asa'am ti jleye 'ne ti jiniojwayits'e, ji'wena' siu'nie i'nio' yi'ne. 'Naka 'ni Judíojos je ijwienjliyiji ka je injwelistak'im'ni pa jiwet'ia iyo ti a ts'iji Jerusalenne, siu'neje ti a 'ne jleye'yi, siujlie'e Cesarea. Ti ijwilis je jwajla'a pa iyo pa jitis. Yiyeyisi 'niji siunie iyoyisi ti ijliuyistak'im'ni ka ikajlunie ka tiliana, tiwet'ianaja ka je intanisiji'ni wat ape'e.

²⁵Yam je e'ne ka poye paka woyi ka je 'esie ka pakaye ka int'emina ka tiliana. 'Yina ti jlam ti ti'yasane ka saka anechiyas in'ye'en siunie jiwet'ia iyo, jak je iyoyi atankiu'ni'ne ti awo'ate jajliuyinie'e.

²⁶'Yina ti lajk'iyi paka 'esiejene ka yi'ne pa imp'esinikie' ka ijliuyi ja saka anechiyas, it'imina'ne ti 'nak aname'e ti ene astayi'i inwikie'eyeyi ti 'nak jiwaye'yi. 'Esiji ti a'am ti jape'ya, anechiyas Agripa, siupa janwo ti jantamti, ja 'nakayeyijna'a ti jats'esijin pet siupuwa jayamtisa' ka ilisantaja.

²⁷Kajeyepa ajwel'ni je 'esiji ka jlam tijliuk jiwekie'e paka kia'iwo ti inkipinik, siuti je 'yakaj pak jitis janwo.