Read Iyojwa'ja Chorote Hechos 26 Bible Online

Hechos 26 - Iyojwa'ja Chorote bible

Hechos 26

¹Agripa iyone'ne 'ate ja Pablo: —Jejlikiame kiu' ka amti, siupa a'lej jawone ti ja amti atepe'e. Sekyi'i Pablo jikioye ijieyek'i pijia'm, ijyijlitayi ti tamti, ti iyo'ate:

²—Ji'yu, 'na ika anechiyas Agripa, 'esiji ti se'nate ti jayamti siu'nie jloma, ja 'nakayeyijna'a pet ka 'najane paka wone, ti jla'm iyo siunapo Judíojos siunie ijwilis ka iyoyi.

³Intant'iejayi wikie'eyi siuniwa jikeyis napo Judíojos, siu'neje niwa wask'i'nelaja ti anitajlataja. It'imina ti anip'elisi'na ka anilayiti kiuwata'a ka k'iuk'i'm siuti jayamti.

⁴“Wikie'eyi siunapo Judíojos ti 'yijene pi iyone siunie aniwone ti ajyi jana 'yaka ajnat Jerusalenne siu'neje ti awo jwemikie'.

⁵Siuniwa jlomas atalk'i'ni ti itiant'iejesk'i, kawo ka sijwelis, ka injwelisie'amna'a ti Fariseok'i'm. Anoyeje siunie saka'neyasajnaye iyo.

⁶'Nakayi siunie iyo ti 'nak soyisi'i ti i'yenis 'ni itis iyo, naka jla'am siunie Sinia' iyont'iyijipi papo saka kijilas mases t'ipi, ti akjliyi'ijyi ti anejejwijyink'iye.

⁷'Yina wikie'eyi siunapo atajlaja pet siunapo itijwa'm sikioye times tom'niji Israel jilis yamjliyi'iji ti inijijwijyink'iye naka, niwa jlomas ajnajas kia'iyojliyi ti ijiunitis ni Sinia'. 'Na 'yaka anechiyas Agripa, 'yina kiak awo'ni pet, it'imina siunie iyonk'iji napo Judíojos.

⁸'Yina awo'ate, ¿yot'iyi'ni ti jikakiuye pa Sinia', ti 'yakajli ti iniujwank'i kisie'e napo 'yajle'n?

⁹“Ajwelp'ampe ka 'esie siukia awoyi ti ata'yi ilia'm siojopo je 'yakakiu pa Jesús Nazaret jlele, siu'neje ti iyoyis jleye.

¹⁰Naka siunie awoyipi ti a' Jerusalenne. Siojopo pa'yijis jika anechiyasas siojopo jlamt'iyijpe, japok atajlijipi ki ip'isinik ti isio' jlele ti 'ajla its'ioye ti 'otiek'i a'laja'm japo Sinia' jilispe. Jak je iyoyiji'ni ti a'wenata ti tilianaja'n, awoyepe 'ate, “'Esiji naka.”

¹¹Je ijwienjliyipi ka je 'yak'aja'n ti yi 'najla'wet'e, ti ajalaskintaja ka inleyisi ti iyoyisi siukia 'es ti iyoyisi. Wuj ti se'wajamk'i. Paj ti ayeyi siuniwa ajnatis ijia, siuniwa 'wenayiji, ti akk'i'ni ti a'yikisanits'i, kajeyepa ti se'wajamk'i.

¹²“Nak it'iminape ti ajoyeja'm siujlieja isi' jle' iyo'ate Damasco, ka lajak'ipe japo pa'yijis jika anechiyasas ti iyo i'niayija' ti awoyeyi ka yik'i'ni japo Sinia' jilispe.

¹³Je 'esiji ti aye 'nayiji, 'ni 'yaka anechiyas, jlampa 'najlikiye p'ampe, jlam nesi'lieyi ti 'yakaja ni jla'al jlaja katespe ti tal poliyi, ti 'yakamt'i ape'e ni jlal ni kilie', yiye sitipe'e siojopo ya'yispe, jlajaka katespe.

¹⁴Kasno'wajnat'e siojopo ya'yis, sekyi'i ti ape'yayeyi ya'am siojo ina'lap tom poliyi ti iyonk'iji 'ate, ti Hebréojos ji'lij isienk'i, “Saulo, Saulo, ¿yot'iyi'ni ti jiwo atajiejwayek'i'm? Am, a'am ti jinilaki, siunie ti jitie'yi ijyilia'm, jiwoye'ate iyo siuniwa wakiajas ti inkijmayewos ti t'as'ni ilia'm siunie t'etajajam'ni ti tétitiejtaja ni jikijmaye.”

¹⁵“'Yina akiujlie'ne pet ti awo'ate, “'Ni 'yaka anechiyas, ¿te'na'm?” Saka'niona iyo'ne 'ate ti isiulk'i'm, “Ya'am Jesúsk'i'm ti jiniajmen'ni ijyik'i ti jiwo atajiejwayek'i'm.

¹⁶Je'é, kasit, lapakawo ti awojonk'iye ka kiak iyo'na, ka iyo ikawoye'a'm, ti jajwele napo i'nio' siunie iyo na ji'we'en, siu'neje niwa kapajatana'a ka yikialta'ana'aja ka ini'wenki'nam'ni.

¹⁷Sipo' ti ja'ye'na'm k'iye napo Judíojos, siu'neje napo i'nio' 'wena 'lij, siupa janjwel kanwo'na, 'yina napok i'nio' awo ka joyi.

¹⁸'Nakayeyijna'a ka 'yiniyijna'a ka 'ajlinitiamk'i niwa jitiete siunie iyo ti yiji na ajnatiok, sekjane'yi ka neyeyisinie'e pet na jloma; jla'yi ti janleyisi ka ineyis kiajwe ni imosik jijweye iyo, 'wenajlitieje jla'am ka neyis kiajwe pa Sinia'; 'nakayijna'a ka initiajnat niwa jikeyis, siu'neje ka ji'niayi poye ka ijnojwa'm siunapo isis Sinia' jilis, ka tiwoktana'a ji'wajietiye, lapakawo ti nakaye jla'am ti jant'emina ti ja ke sakakiuyis”.

¹⁹“Kia'iyo, 'ni 'yaka anechiyas Agripa, ka kia'iyo ka 'yuma ilia'm ki iyo ki a'we'en ti tal poliyi.

²⁰Jak je iyoyiji'ni ta'a'ne ti anajnate siojopo yi' Damáscojo, ti ajoyi ti awo yamtikie', sekyi'i ti atojmatayik'i siojopo yi' Jerusalenne, ti ajoyi. 'Wanjli'ne isia'm napo i'nio' yiji jana Judea, siu'neje napo i'nio' 'wenayi ti je Judíojosata. Jak je iyoyiji ti ayetaja, a'yasa ape'e ti awo'ate, “Woye asosikis ink'iejyisa'. Apilieyi pa Sinia'. 'Wenkinayipe pa akijmayeja' ka in'wenaja ka ijiatayi ti jiwoye asosikis ink'iejyisa'”.

²¹“Kiak it'imink'i'ne ti Judíojos iyoyistaja ka silianis, ti a ts'e yi'i jlaja 'najla'wet wuj, ti isimayisk'i'm.

²²Ka lajak'i jlam pa Sinia' ti yamjliyi'iji ti i'yenk'i'm, siu'nie jloma ti a 'ne, ti ayetaja napo i'nio' ti anechiyasas, siu'neje napo i'nio' lajk'iyi pet paka iwo, ti amtiyi k'iye niwa Sinia' jlamtis. 'Yina je aka'm ape'e ki iyo siuniwa injwejlanawos t'ipi siu'neje pa Moisés iyot'iyipi ti ijwil siupuwa ja 'nakaj ts'iji.

²³Siupa ti iyot'ipi 'ate, “Siunie Injwajieti ti Sinia' jijliujwanik ja wujwa ni jawo ti janilayiti, ts'ijiye ti ja tiliana, 'yina ja jlama ti janan kisie'e ti jano kisie'e ti jantajli pa a'no', naka'ne na jankajwejlane napo Judíojos, siu'neje napo i'nio 'wenayi, ti janjwele siojona jika jloma jana injwajieti ti ja'nakajanit'i ape'e”.”

²⁴Ti Festo ipi'yaye ja Pablo ti kia'iyo, iyo'ne 'ate ti 'yakets'ijiap: —¡Ataj p'an je 'es, Pablo! 'Nakayi jla'am ti je lijape wata'a ti jini'neyasan'ni, it'imina ki iyo ni awet'ia.

²⁵Pablo isiujlie ti iyo'ate: —¡'Yaka anechiyas Festo, jlajmiwo ka itiej je 'esie'! Siunie ajwe'el ejewiteje, jlam je awo ti ijiatk'i.

²⁶Yi 'ne 'na anechiyas Agripa, siu'nie 'yijene pi iyonk'i, siuniwa ajwe'el, it'imina ti je sots'i'n ape'e ti ajwe'el. Je iyo'ate ka je 'nakaj siunie Sinia' iyo ti ilisane, iyo niwa i'wi'in na anechiyas.

²⁷Pablo iyone'ne 'ate ja anechiyas Agripa: —'Na ika anechiyas, ¿je kakiu pet siupapo injwejlanawos iyot'iyipi? Ajwelta ka je akakiu.

²⁸Agripa isiujlie'ne pet ti iyo'ate: —¿Jiwop'antaja ta'a ka iyo Sinia' jlasa'?

²⁹'Yina Pablo iyo'ne 'ate: —Kawo ya'am pa Sinia' ka jla'm iwoni'ni 'ate, ni'ne ka 'wesie paka ajok'i'ni kawo Sinia' jlasa', jla'yi ka je amkataja, siu'neje napo sipe'ya ka wo'ate awoyi, 'yina ka je awo'ate siuniwa iyo 'niwa silie'nitieje.

³⁰Sekyi'i ti anechiyas takasitie, siu'neje ja jikiecha anechiyas, ti jla'yiki jlaja Berenice, wikie'eyi siojopo sekyi'i ti yik'iji'n takasitiek'i.

³¹Yama'ni ti ini'yasis siupa ijioyisi ti iyoyits'i 'ate: —Tepa jawo ka tiliana, ni'ne ka t'otie a'laja'm, siuti lajk'iyipa ka jitis iwo, ka ijiatayiji ka je jwajla'aja.

³²Anechiyas Agripa iyone'ne 'ate ja Festo: —Iniutie kisie'e ka je jlama jla'am ti ti'yasane ka saka anechiyas Roma jlele in'ye'en siupa jiwet'ia iyo.