Read Iyojwa'ja Chorote Hechos 27 Bible Online

Hechos 27 - Iyojwa'ja Chorote bible

Hechos 27

¹Jlampa wakajlayi ti ja kasjlok Rómaja, Pablo tekiajlajayi ja tokis jika anechiyas Capitán Julio. Tokis siupapo tiwonaja'ni 'ate ‘Anechiyas Roma Jlele Jika Tokis’ papok tijna'yi pet. Tijwanaja'a japo ijia inkipijnas.

²Akiniek'i 'ne siujlieja kasejkana, siujlieja tajle pet jlaja yajap'ejen'ni jle' iyo'ate Adramitio, ti awak'i ape'e ti iyo kanek ti yapilie'eje 'niji yi'i siojowa yajap'ek'ijin'ni yi' Ásiaja. Jakayi ti sa'yi ja Aristarco, ji'wet yi' Tesalónicaja, siujlieja yiji pet jlaja Macedonia.

³Jak je iyoyiji siojokia jloma kiecha awakieyi jlaja Sidón. Sek awak'i ti Julio ip'ilisina'ni ja Pablo, jikio' iliena'a kiu wata'a ka ijnoyi japo t'ajajnajwas, ka k'iejliyi pet paka iwoyisi ji'wajieta, ni'ne ka jlaka pa.

⁴Sek atajla'a ti akinieja'ni ti atajla Sidone, ti awak kasejkanaja'. 'Yina ti ataye ilia'm ki jlajwu, kas'manit 'ne jlaja Chipre, ajnat siujlieja i'niat itijwape'n, ti je 'yejents'e'm wata'a ki jlajwu.

⁵Sekyi'i ti alk'ataja'm ja i'niat lajlik'i, anewajla'a siojowa ajnatis jleyis iyo'ate Cilicia siu'neje jlaja Panfilia, awakieyi jlaja isi' jle' iyo'ate Mira, yiji jlaja ajnat Licia.

⁶'Yina ja tokis jika anechiyas i'wina siujlieja jawieki, kasejkana ti tal Alejandríaja ti tejep'ampe 'nijiye Itáliaja, jlajak awakieje'ijyi ti akinie.

⁷'Yina ti je ilijyi ki jlajwu ti yejwuti siukia ataye ilia'm, it'imina'ne ti je ta'a ka i'nisaj'ni, 'wes jiwekie'e ti anewajla'a jlaja isi' jle' iyo'ate Gnido. Mawat je netiank'i ti atayeje ilia'm ki jlajwu, anok jikiusk'i jlaja Salmón, ti anokiajap ts'iji jlaja Creta, siujlieja isi' i'niat iniujwape'n 'neje.

⁸Kastelak'i'nine ki si'niayi, kajeyepa ti tojwe, ti jiwekie'eja ti awaki ja ajnat jle' iyo'ate Buenos Puertos, je tojwape'n siujlieja isi' jle' iyo'ate Lasea.

⁹Paj ti kastasitayi ki si'niayi, kajeyepa ti itioyi'i. Paj ti yama'niji siojokia jloma ti Judíojos ilisa'n, ti iyoyisi jitienkiujnieyejayi ti ijwilis Sinia' initiajnat pa jitis iyo; ti je kastojwata'a na wi'yit, janak siojona jloma ti je 'esiji ka neki' niwa kasejkanayis. It'imina'ne ja Pablo ti iyone'ate japo kasejkanawos:

¹⁰—I'lijwas, 'yaka jet'i 'esiena'a paka yoki ti askiuniek'iji'n, ja kasno'we siuniwa yiji jla'a kasejkana kiak jawoyi, kasejkana 'neje jla'am ti janetia'n.

¹¹Siupa tokis jika anechiyas jakata jla'am i'ye'en ja kasejkanawo, siu'neje ja jikimett'eyijpe jlaja kasejkana, siojo iyone ja jitienkiujnieye. 'Yina ja Pablo yaka je tipe'yak, siukia iyotaja pet ti takajwejlantajam'ni japo.

¹²Je 'esiji jla'am ti je 'ejts'i paka ne'yi jlaja kasejkana ka iyajapa siojokia jloma ti wi'yitip. Po' japo ijia siojopo jiwos jlaja kasejkana, iyo'ate: —Naja'ni wekie'e, jajyijlitaja samk'emna'a ka iwieki jlaja Fenice, ka techajatajanna'a. Fenice jlajak kasejkanayis jlajapa 'wet yiji jlaja isi' jle' iyo'ate Creta, siujlieja i'niat itijwape'n. Tejejia'm wata'a 'niji iniwuki, wikinaja wata'a 'neje.

¹³I'winis ti po' ki jlajwu jlas ti tal 'niji iniwuki, sekyi'i itiliajask'i'ne, ti iyoyits'i 'ate: —'Esieyiji'ni 'nak awokink'iye. Sekyi'i ti 'ekiyejayi'iji ja si'niayi, akinieja'nijne ti ajnaye jayik'i jikiusk'i jlaja Creta.

¹⁴Jlampa majleyeyi ilia'm kiak jlajwu ti tal wikina ti wujwi.

¹⁵'Yumajayi'ni ilia'm jlaja kasejkana, 'yina ti je akajla ilia'm, ejlowekie'e ti yamts'e alekieyi wekie'e ti ajalasata ka naj.

¹⁶Kasjnol 'niji yi'i jlaja ajnat jle' iyo'ate Cauda, siujlieja i'niat itijwape'n, jlajak'ne siujlieja atomajap ji'wechaja ti anewajlak'i, jeye kat'aja ka 'najants'e'm ki jlajwu, sek anokie'e. Paj jiwekie'e ti i'yakanis siujlieja kasejkana jlase' japo siujlieja wuj awaki ti itio'on, jlampa je isisieyi japo ti ijialasista.

¹⁷Itime japo ti yinis pijia'm, sekyi'i isimayisi siu'niwa nejiatio' ti wusk'iji'n, ti tilie'nitieje'ni jlaja kasejkana, ka je int'ekijyits'i jawa jikie'l siojowa t'etajajamk'i. Sekyi'i ti itietayisiaja'm ja i'niat siujlieja tejeye jla'am ti kiak iyoyetaja, 'wanjliyi ka kia'iwo ka jlajwuye pa, ti po' siujlieja itietisiajam'ni, jeye wata'a ka pansajak'i ti jlajwu yame jla'a kasejkana. Kajeyepa ti je ijwiyisi ka 'wanjliyeje siojopa yiyisi siupa jolo' jle' iyo'ate Sirte.

¹⁸'Yina ti je iliyi ki jlajwu ti yejwuti ti yamts'e, sekyi'i siojopo jiwos jlaja kasejkana itietayisi i'niatk'i siukiwa yiji jlaja awaki.

¹⁹Siukia ti jlomaye'eje jawakaye'eje pet jawa jikie'el ti itietisi'ni i'niatk'i, ti iyo ka je kiojietaje jlaja kasejkana.

²⁰Jlampa 'lojwa kiwa jlomas ti kilie' je 'nesi, katese'l kia'iyojliyi ti je 'yakaje. Já aninaye'e ka kas'wasajne'n, kajeyepa ti je iliyi wata'a ki jlajwutiok.

²¹Jlampa kaspaja'a ti je a'yakana ka'yekiunieje'n, sekyi'i Pablo takasit'ne kiowe'e japo i'nio' ti iyo'ate: — I'lijwas, jlam'ne ka k'iuyek'i'm ti 'nelanjie'e siukia awonta'ase, jlam lajtak'i'ne paka iyoki ka siwet'ia poye, ti awotajapi ka sek kas'wanjle'e, kia'iyo lajtak'i 'neje paka anetiajnatajyi siukiwa jitietayi'ni.

²²Je'e, jwajla'aja wata'a paka woyeyi. Ja lajak'ipa ka inetia'n ka inekta isia'm jlaja awaki.

²³Siukia ajnaje injlojwanik poli jlele ini'wenkink'i'm tajle siunie Inia' pet ti ajonit,

²⁴ti iyonk'i 'ate, “'Otale t'onit Pablo. A'm ja'nets'ia siunapo i'nio' a'yis ti ja lajak'i paka woyi, je ijiat ka je ayi ni anechiyas ti ijnokiji, ti janena jitieyi'i. Sinia' janjwajiete ni jota jiliayeja' napo i'nio'.”

²⁵Jak je iyo 'napo i'lijwas, jwajla'aja wata'a paka woyeyi. Je akakiu pa Sinia' ti ja'wina, iyo jla'am ni jijliujwanik poli jlele ti ijwilk'i.

²⁶Jane'yi japa ajnat i'niat jantejwape'n, pa ja kassoti 'ni jlajwu.

²⁷Jlampa saka i'nio 'wanjlijyi'n timesie kiwa awaki, jla'yi ti je iliyi ki jlajwu ti yamts'e. Ti ajnaj kioweja t'ipi awakie kiowe'e siojo i'niat lajlik'i jle' iyo'ate Adriático, itijnisiet'iyijpe japo kasejkanawos ka iwieki pa ajnat.

²⁸I'yenayis ki nojwaja'm ki metro siupa yiyi pa tojwi, 'yina treinta y seis jakia yiyi. Tojk'i'nine ki si'niayi ti yikiajlayisi'iji ti i'yenis, jakayi ti 'ne ti veintisiete jakia yiyi.

²⁹Ti isiwitayisi ka int'owasits'i jlaja awaki jawa sisajas wus yi' i'niati, sekyi'i ti itietayisiaja'm siojowa ijniujlits'i wikijnies ti 'yitk'isia'm, ti itiujmatis jiweje jlaja kasejkana ti yajapajne'n. Yititieyis kia ajnaj, kawojliyi paka jlomaye ta'a.

³⁰Paj ti yinayisi'n jlaja kasejkana jlase' siojopo jiwos, ti iyotaja ka intajlisie siujlieja awaki ti jota inek'ni, ti iyoyits'i 'ate: —Janinena'a'ni jiwekie'e ka itietaja'm ni i'niat siuniwa yit'isia'm jana kasejkana.

³¹Pablo iyone'ne 'ate ja Capitán siu'neje japo jikawos ti ijwile: —Ka inekta'nina'a siunapo jiwos jla'a kasejkana jla'a awaki, 'wanjliyi ja ke 'najanayi paka aniwonayi ka ani'manitie.

³²Siojopo tokis ipi'yayis jiwekie'e ja Pablo ti kia'iyo, yamayisi ja t'ak jlaja kasejkana jlase' ti yisitisia'm, sekyi'i i'niat yame'ne jlajaka.

³³Pablo jloma 'yakaja'n jiwekie'e, ti iyonayi 'ate wikie'eyi siojopo jla'yis ti ijliuye: —Aska 'nio 'wanjlijyi timesie ti je jlejlitajia'm paka k'iejliyeyi, ti jik'iuyetajap ka jloma 'esie wata'a.

³⁴'Yekiuniejyi jiwekie'e, ts'isie'n isitia'n pet ka iwo jijweyeja', 'yina ka woyetajanie'e ka ani'manitie. 'Wanjliyi ja lajak'ipa ka inetia'n, ka niwakaye ji'wole ka netia'n paka injwajlik'i.

³⁵Iyojlitieje ti isimayi jlaja woye, sekyi'i iyoye jinikanitiejaye pi Sinia', ti yine jitieyi'i papo i'nio' jla'yis, sekyi'i its'isajam'ne, itiujwa.

³⁶Sekyi'i siojopo jla'yis, ti i'winisieyiji, itiliajasi'i'ne pet, jiwekie'eja ti ti'yekiujni'n.

³⁷Siukia kasnojwa'm ti awaki jlaja kasejkana doscientos setenta y seis ti kaspajlat.

³⁸Ti itimayi ti ti'yekiujni'n siojopo iyo ka 'yekiujni'n, sekyi'i siojopo jiwos jlaja kasejkana, ti iyo ka je kiojietaje, yamayisi kiwa ipiatatio' t'ejes 'wanjle'e ti itietisi i'niatk'i.

³⁹Jlampa jloma 'yakajajan'ni, siojopo jiwos jlaja kasejkana i'winisietaja ja ajnat. 'Yina ti je ijiat ka 'esieyisijine ka jitiej iname, jakata jla'am ti i'winisi ja jolo' ti 'yakaja. Jaka'ne ti ijialasisi ka i'yakanisi.

⁴⁰Yisitayisits'i siukiwa jikie'el, ti 'yit'isia'm ti iyoyetaja ka inajape'n jlaja kasejkana, ejlowekie'e ti sek iliyisi'i i'niat kiajwe. Ilienayits'i siukiwa t'aka pet siukiwa yajma'n, jikie'l jla'am. Sekyi'i ti yinayis pijia'm siojo lotakinie isaje tejeye pet ni jlajwu, ijiatjliyi jlajwu 'yumajak'i'ne, paj ti yiyeyi siukia jikiujts'i.

⁴¹Jlamp'an'ne yip'anipi ki jolo', jak je iyoyiji'ni 'niji jletiki jlaja kasejkana kiak inian'ne isia'm ti 'yujia'm ki jolo', sek na'ajan'ne. Siukiwa ji'wukijlimpejes ti je lis, ti itie'ni siukia tome pet 'niji jiweje jlaja kasejkana, kiak no'wi'ne ti isiajatk'i.

⁴²Siojopo tokis ti i'wina ti kia'iyo, iyoyetaja ka inlajne'n siojopo inkipijnas, kajeyepa ti isiwitisie ka 'no'ni ka impan'ni.

⁴³'Yina siojo jika anechiyas, jlam iyotaja ka jajataja ja Pablo ka lajak'i paka tiwonaja, istieyeyi'i'ni paka inwonisi, najata'ne jla'am ti ijliuye papo ti iyone 'ate: —Siupa 'yijene ti ipia'an, inekiepe ka impa'an i'niat ji'wechaja.

⁴⁴Siupa je 'yijene ka impa'an, ka iwoyejyinna'a pa jiwatiuye, ni'ne ka inkima niwa jijwa'al jakia kasejkana. Kaspajlat jiwekie'e ti lajk'ipa siwet'iaye ti awakie i'niat ji'wechaja jakayi.