Read Iyojwa'ja Chorote Hechos 3 Bible Online

Hechos 3 - Iyojwa'ja Chorote bible

Hechos 3

¹Yit'iyipe pa jloma ti siojopa inetitinki najape'e, Pedro jla'yi ja Juan ti ijioyisi jlaja Sinia' ji'wuk, 'yina ti yiyi siojopa ti iyoyis'ni t'ajlayeja'.

²Sekyi'ijin'ni siupi i'nio' jlam kia'iyo ta'a ti k'iejli yiji'n ti je t'on'ni, jlomas je initiajnat ti sek toki'i'ni yi'i jlaja Sinia' ji'wuk, jikiwit'e jla'am siojo jle' iyo'ate 'Es, ti t'alk'i'ni papo siupapo 'yu'ni 'wuk kiajwe, ka tiwok ji'wajieta.

³Ti i'wina ilia'm ja Pedro siu'neje ja Juan ti ijioyi, sekyi'i iyo'ne 'ate: —¿Lajk'iyi pet japa ka k'iejliyeyi ka wenk'i'm?

⁴I'yenat'iyisimpe, sekyi'i Pedro jla'yi ja Juan iyone'ne 'ate: —Kas'yejne'n.

⁵Je iyo ka jitiej inla'ne ja Pedro jla'yi ja Juan ti i'yen'ni, lapakawo ti itijnistieje ka poye japa ka tiwok ji'wajietiye.

⁶Pedro iyone'ne 'ate: —Wikiniet'aj je a'wen pet. Siu'nie a'we'en jawi'na'm. Naka ni tajle ni jijweye pi Jesús jle', Nazaret jlele: ¡Kasit, askiujni'n!

⁷Pedro yiyik'i wekie'e ti kia'iyo, isimat'ipi kio'yi ti itiujmat jijweye, inijienat'ipi pijia'm. 'Yina je paj wata'a ti t'oniet'ik'i puwa jisietis, jisiet ji'wo'l kia'iyojliyi.

⁸Ti takasitiet'ipi, sekyi'i iniuyik'i'ne ti tisiojma pijia'm, 'esp'an ti 'es. Ijwienjliye jla'am ti t'iskiujni'n 'yaka 'es, sekyi'i je ilik'i'ne japo ti 'yuyis kiajwe jlaja Sinia' ji'wuk takatinieyi'ni ti iyunit pi Sinia'.

⁹Wikie'eyi siupapo i'wi'in siupi iyo ti 'esiji ti t'iskiujni'n, siu'neje ti iyunit pa Sinia',

¹⁰jnots'ijnits'i. Jnots'inayijits'i'ni ti itiant'iejayisi ti pak siupa jlomas je initiajnat ti sek yi'i'ni yi'i jlaja Sinia' ji'wuk kiwet jle' iyo'ate 'Es ti t'alk'i'ni papo ka tiwok ji'wajieta'.

¹¹Pedro jla'yi ja Juan yamat'ijne wata'a 'niji yi'i siupa jle' iyo'ate Salomón jika 'wuk kiwet, ti yikiajlisi'ni jlaja Sinia' ji'wuk, yaka titietat'ijiampe papo i'nio' 'yakapajlat'iyisi'ijyi ti i'yenisi pak i'nio', ti jikio' je ilie'ne ja Pedro jla'yi ja Juan.

¹²Pedro, ti i'wina papo ti 'yakapajle, iyone'ne 'ate: —Israel jlele, ¿yot'iyi'ni ti kas'yen'ni? ¿Jijwelt'e ka sama ka ijwiejieta siu'nie i'nio'? ¿Ent'a jijwela' ka sijweye poye, ni'ne ka nakaye ti je aleki ti awunitie pa Sinia', ka nakaye ka int'emina ka injwa'a?

¹³'Yejne'n, Sinia' siukiapo sitise'l Abraham jla'yi pa Isaac siu'neje pa Jacob Jiniayis t'ipi iyunit ni jikawo Jesús, nak ijwiejiet siu'nie i'nio'. Jlekiajlayipi napo i'nio' anechiyasas, Pilato ti anechiyas, jlampe ti iyotaja ka jikio' inla'ne, 'yina je woyeyi asa'm ti askio' alana'yi.

¹⁴Jlam'ne ka 'yasanayi ka tiniujwana kisie'e ti jlam ti 'es ti Sinia' 'yotat, 'wenajliyi pa i'nio' siupa kalankijieta, pak ji'yasanayi ka tiniujwana kisie'e.

¹⁵Jiwoyeyi'iji ka alana siunie in'wasankiye i'nio' iwijna'm. 'Yina Sinia' iniujwa'n kisie'e ti tajla'm pi a'no', sam ti a'wena ti ijiatk'i kiaka.

¹⁶Siunie iniuyeje ti iyo jit'iuniye siu'nie i'nio' ti ji'wena', jla'yi ti intant'iejayi, naka ti je 'yakakiu ni jle' ni Jesús ti jiweye po', 'yina siuti jlam je iyo ti jitiej iyoma, nak it'imina ti tijwa'a. Tijwa'a kalakiyik'i, mejla'ala ka je a'wena, siunie iyo.

¹⁷“I'lijwas, je sit'iayiji'n ti asa'am jla'yi napo aska anechiyasas ti jiwoyeyipi ka alana ki Saka'niona, ijiate ti lajk'iyipa ka awoyeyi ka akiowe awonayi.

¹⁸'Yina Sinia' yame siupa iyont'iyijipi papo jijwejlanawos, ti ijwijla'm puwa jlamtis ti iyo'ate, “Ja'nes ni Injwajieti ti Sinia' janjlo', jlam wuj ti janilayiti ti ja tiliana.”

¹⁹“Ji'yu, 'napo i'lijwas, woye asosikis ink'iejyisa'. Ataj ekiajlayi pi Sinia', 'nakayeyijna'a ka inetiajnat niwa askeyis, janjloyena'ase ni askamankiye ti 'es.

²⁰Sekjane'yi ka injloyena'ase ni asjwajieti, siunie ti pajk'i ti iwiakajlanit ask'ioye, naka ni Jesús.

²¹'Nakayi lapakawo ti 'esiji siunie tiwonaja ka nekiu poliyi, jlampa ka Sinia' intemayijna'a siunie iyo ti ilisank'i siuniwa wask'i'nelaja. 'Yina jlam pak je iyo jiwekie'e ti kia'iyo, kajeyepa ti iyo jla'am niwa jlamtis ti yi'i ni ji'wet iyot'iyipi papo Sinia' jijwejlanawos ti isis ti ijwi'il.

²²Moisés ijwiljijnampe ta'a papo sitise'l ti iyo'ate, “Saka'niona Asna' janwe'nase'm ni jijwejlanik jiwo ti jantal aswa'm jawo'ate awoyi. K'iuyeyijna'a siunie janwo'nase.

²³Siunie janwo, i'niope pa ja ke ink'iuye. Nak ja tinitiajnatajape jikiowe'e napo i'nio'.”

²⁴“Wikie'eyi napo injwejlanawos, tajlape ni Samuel 'yina paj ti yiye 'niji jlaja, ti ijwi'il 'niwak siu'niwa jlomas awaki'.

²⁵Siuniwa Sinia' ijwi'il insisieyi, siu'neje niwa Sinia' iyont'iyijipi papo sitise'l ti ji'lij iwijna'm. Pakayi ti iyone 'ate pa Abraham, “Ja ke jlasiye ni jayone napo i'nio' yi' ape'e 'ni ajnat ti jap'ilisijne'n, lapakawo ti napokaye napo ales ti jant'emina.”

²⁶“'Yina asa'am ti inajnata ti imp'elisina' ti ijliuye ni jlas ti jikawo, ti ijliu'wase ti initiajnat ni siunie iyo niwa askeyis ti wuj ti je isis.”