Read Iyojwa'ja Chorote Hechos 6 Bible Online

Hechos 6 - Iyojwa'ja Chorote bible

Hechos 6

¹Japak jloma jlampa 'lojwat'ipi papo i'nio' iyoyi pa inamtik. Siupapo tijnats'i pet pa Griego 'lij ti iyo, sek jantaj'le ti iyoyeyi siupi iyo ti iwit'ianayi pa jikijmaye iyone siupapo tijnats'i pet pa Arameo 'lij. Iyoyet'iyispe 'ate: —Je 'esiji siu'napo i'yena ni inak, je ijiate ka 'yenis ilia'm napo ask'ilieki tal pet siwa'm.

²Sekyi'i japo itij'we niwa sikioye times tom'niji injlojwajnas ijiut'nek'i wita'm wikie'eyi papo Sinia' jilis. Iyone'ne 'ate: —Ajwel'ni je 'esiji ka iliki ti awok'ni samtikie', sikio' je ijioyi ka iyoki kajeyepa ti sa'am ti awena siu'nie inak.

³Jak je iyoyiji'ni, 'napo i'lijwas, 'esiji ka ani'yenanie'e, 'yenayijyi'n papo ijwien sikio' itij'we times tom'niji ka akima'yi, ka jlosikis poye, jwajla'a janwoyits'i'ni, jla'yi ti ja Sinia' jikimet ti 'es jampoyijits'i. Papok ajotkinayijna'a ka jikijmayeja'.

⁴Sa'am ka'yukiena'a na ts'ajlaye, jla'yi ti jayok samtikie' niwa Sinia' jlamtis.

⁵'Yina inikiul'ne papo i'nio'. I'nio' pa jle' iyo 'ate Esteban pak isimits'i, i'nio' ti 'es, ti yame pa inamtik ti iyo, jla'yi ti Sinia' jikimet ti 'es tipoyiji. Siojopo jla'yis jleyis iyo'ate Felipe, Prócoro, Nicanor, Timón, Parmenas, siu'neje ja Nicolás Antioquía jlele siojo ti pajk'i ti iniwojwa'n Judíoja'.

⁶Sekyi'i ti yamat'iyijpe ti ijioyisiji japo injlojwajnas, ka t'ajlis ape'e, jla'yi ti jikio' jane'n ape'e.

⁷Jla'am ijliasjlit'ijimpe puwa Sinia' jlamtis, lapakawo ti tikiniejeje'n ti tijwela. Jlam iyomjliyiji papo ijia i'nio' siupapo iyoyi pi inamtik yiji japa Jerusalén. Je papokata, 'loj 'neje siupapo pa'yijis ti isimits'i ilia'm, 'yaka je takakiunisi.

⁸Esteban jla'am wuj ti Sinia' iniuyeje, jla'yi ti iyo jweyeja', it'imina ti 'yakajli siupa iyo ti i'winki'n siupuwa k'iejliyi ti yisi'lietk'i papo i'nio', siu'neje puwa inia'an k'iye siupuwa ja'nakaj ts'ijiye.

⁹Siupapo Judíojos t'ajla'wet jle' iyo'ate “Inkipijnaspe T'ajla'wet”, papok siupapo iniewiti pa Esteban. Cirene jlele, Alejandría jlele, ijia papo tajle siupuwa ajnatis Cilicia, jla'yi japa Asia.

¹⁰'Yina je tomits'i ilia'm pa Esteban, lapakawo ti Sinia' wuj ti iniuyeje, jikimet iwijna'm, it'imina siupa iyo ti tamti, ji'lij 'yijene.

¹¹Iyo kajaye siupapo ijwi'il ka impe'yayis ka ilaki pa Moisés jika'neyasajnaye, jla'yi pa Sinia'.

¹²'Yina siuti kia'iyo, ijwisin'ne papo i'nio', siu'neje papo kijilas t'ipi, jla'yi papo taka'neyasane pa Moisés jika'neyasajnaye. T'ekiyet'iyisijpe pa Esteban, isimits'i'ne ti 'yutits'i a'laja'm. Sekyi'i ti yamayisi ti itiunisi papo jlosikis jiwos, siupapo jlamt'iyijipe.

¹³Ya'asiyet'iyispe siupapo i'nio' ijwil ka impe'ya, ti iyoyits'i 'ate: —Siu'nie i'nio' je iliyiji ti iliaki siujlie'e Sinia' ji'wuk ti 'es, siu'neje ni Moisés jika'neyasajnaye.

¹⁴Ape'yakpe ti ijwi'il pa Jesús Nazaret jlele je ijiat ka je inetiajnate'n siujlie'e ji'wuk pa Sinia', jla'yi ti janetiajnat siunie iyo pet ni Moisés jika'neyasajnaye, ti ja ink'ieye siupa janwone.

¹⁵Wikie'eyi siupapo ijnosikis jiwos, ti i'yenis'ni pa Esteban, i'winis pa jloniye iyo, ti iyo'ate pa injlojwanik poli jlele jloniye.