Read Iyojwa'ja Chorote Hechos 7 Bible Online

Hechos 7 - Iyojwa'ja Chorote bible

Hechos 7

¹Pa'yijis jika anechiyas siupa jlamt'iyijpe iyone'ne 'ate pa Esteban ti i'yase'n: —¿Ma ijiatt'iyiji ti a'am ti a'lej siunie iyo napo i'nio' ti injwe'el?

²Esteban isiujlie ti iyo'ate: —I'lijwas, k'iuyek'i'm, jla'yi ti asa'am ti kijilasts'ase'm. Sinia', ti ijnonisik, ini'wenkinat'ijiampe pa sitis Abraham ti yi'i japa ajnat jle' iyo'ate Mesopotamia, ti je yamjli'ijyi ka ne'yi japa Harán, ka iwo 'weta'.

³Sinia' iyone'ne 'ate pa Abraham, “Taj'lena'a siujlie'e ajnat jle'yi, siunapo a'nayi ijwienjliyi leyijna'a, maj joyi siunie ajnat ja'winki'na'm.”

⁴Abraham taj'le'ne siojopa ajnat yiji Caldea, ijioyeyi siojopa ji'weta Harán. Ti 'yalat'ipi pi jinia', sekyi'i Sinia' ijliasat'ne 'nekiu, siujlie'e ajnat jleye'yi.

⁵Sinia' je iwijna'm paka jiwaja paka ajnata, ka ne'yiyi, je tiwet'ianataja ka pakataja ka isiet ine'ne ka wejna'm, 'yina ijwijla'm jiwekie'e ti janekiajle, jloma ti janetia'n pa Abraham jilis jikimita siupapo jantomik'i pijia'm.

⁶“Sinia' iyone 'neje 'ate, “Siupapo ales jantomik'i pijia'm janeyits'i siunie ajnat ti je 'wet, ti ja tiwoki inkipijnasa', jla'yi ti ja tiliakik, paj ka jika najkapis cuatrociéntosjana'a puwa janejyi ti kiak jawo ti janilayitisi.

⁷Siupapo i'nio' jawo jikipijnasa'ase'm ti ya'am jasie'ek'i pet. Ka nekie'nina'a ti jantaj'le pak ajnat, ti jantayismet'ne siujlie'e ajnat ti ja siwunitis.”

⁸“Sinia' ijliuye'ne pa Abraham ka woyi siupa ti k'iejli yiyetaja'n pa kia'le, ka t'isie'n jlase' tejwak'i, kajeyepa ti wakal siupa iyo ti inipe'yayis. Abraham iyoyi'ni pa Sinia' iyone, it'imina ti kiak iyone pa jlas Isaac ti k'iejli yiyeje'n ti ijwien sikio' itij'we najape tom'niji puwa jlomas. Siupa jlas pet Jacob kiak iyojliyi, kiak iyone Jacob siupapo jilis itijwa'm niwa sikioye times tom'niji, siupapo sitise'l t'ipi pet, 'wena je iyone.

⁹“Papoka siupapo Jacob jilis ti sitise'l t'ipi, a'tiejam'ni'ne pa ji'yinijis José. Iwinat'iyispe ti iwijna'm papo i'nio' tal Egíptojo. 'Yina José Sinia' yijap,

¹⁰ijwiejiete pi jiwet'ia iyo. 'Najankijnieye iwijna'm, iniuyeje ka 'naja'n jitieyi'i pa anechiyas yiji japa Egipto, it'imina'ne pa anechiyas ti iyo jleye ti iyojwa'n pet anechiyasa' kan'yena siupa ji'wet siu'neje pa jika ajnat.

¹¹“Ti nel'lia pa t'ipi yi'i japa Egipto, ti itijwi'ni, iyoye'ate japa Canaán, kajeyepa ti je iyo piniye. Wuj ti jijliak'ali po' papo i'nio', siupapo sitise'l t'ipi lajk'ipa ka intowis.

¹²'Yina siuti poye pa ipiatatiok t'ejes 'wanjle'e yi'i japa Egipto, Jacob ti t'ijieyeyi ijliuyet'ipi papo jilis, siupapo sitise'l, pakayi'ne siupa ti k'iejli ijioyeyisia'm japa Egipto.

¹³Ti yikiajlat'iyisi'iji ti ijioyisi, sekyi'i ti José inijwejla'm papo jikiliawot, ijiatjliyi pa anechiyas ti jiwekie'aja ti 'yijene pa iyone siupapo tajla'm.

¹⁴Jlampa pajat'i'nijpe ape'e José takajlunieyi pa jinia' Jacob ka tikiniejeje, ts'e yi'i japa Egipto, tijwanaja'a siupapo ji'wet jlele jla'am, setenta y cinco.

¹⁵Kiakjini iyoyipi pa Jacob, ti ijliasayi japa Egipto, jleli sek yi'i, wikie'eyi siupapo sitise'l t'ipi sek t'o' yi'i.

¹⁶Sekyi'i ti tijliasatajat'ipi puwa jleli yi'i japa ajnat jle' iyo'ate Siquem, tokiji siupa a'no', Abraham t'ipi yamt'iyijpe, ti tajleje papo Hamor jilis.

¹⁷“Jlampa je tojwa'a siojopa jloma, siojopa ti Sinia' iyont'iyijipi pa Abraham ti ijwijla'm. Jlam yamjlijyi'n papo i'nio' Israel jika kia'lis ape'e japa ajnat Egipto.

¹⁸Pakat'iyik'ipe ti isijme'n siupa anechiyas ink'ie' yi'i japa Egipto, 'yina paka anechiyas je itiant'ieje pa jikijmaye iyo pa José.

¹⁹Paka siupa anechiyas ti wuj ti iliaki papo sitiselt'ipi ti isie'yik'i; sekyi'i wuj ti 'yijijie'nik'i papo sitise'l ka leyi'ni papo jilis sajmela'aja'n, ti iyo ka netiajnat.

²⁰Pak siupa jloma ti Moisés poyet'ipi, wuj ti 'es pa Moisés ti samjlie'e. Jika we'lajas najape ti jiniewot i'yena.

²¹Ti iyoyetaja ka inleyisi, siojopa anechiyas jlase', ti i'winat'ipi, isima'ne, sekyi'i iyo'ne jlasa' paj ti itioyitie.

²²Moisés t'eyasanaja wikie'eyi siupuwa iyo papo Egipto jlele t'ajankijnieye. Jak je iyoyiji ka jijweye je poyeyi ti tamti, jla'yi ti isimts'e.

²³“Moisés ti jika najkapis cuaréntaja itienkiuniet'i'nijpe kajnoyi siupapo ji'lij ijwienjliyik'i pet Israel jika kia'lis.

²⁴Ti yiyet'iyipi, i'winaja'ne siupa Egipto jlele ti inilane pa jikiecha jla'am pa Moisés. Moisés ip'ilisin'ne sekyi'i ti iniuyeyeje, ilian'ne pa Egipto jlele.

²⁵Kajeyepa ti iyotajank'iye papo ijia ka intejnisisieje ti jla'am ti Sinia' ijliu', ti ijliuyi ka noyeje, 'yina ka pakayeyi ka intejnisisie.

²⁶“Yit'i'yipe pa jloma, Moisés i'winaja papo Israel jika kia'lis ti inilajne'n ti 'najlik'i wita'm. Yamat'itiejepi ti ilientak'i'ni wita'm, ti iyo'ate, “¡Ká anilanajyi'n! ¿Yot'iyi'ni ti jinilanajyi'n ti je 'wena'ase'm?”

²⁷“Siupa tajleyi ti iyotaja ka ila'an pi jikiecha 'yuma'ne pa Moisés, sekyi'i iyonat'iyijpe 'ate, “¿Tempa inwojwa'n saka anechiyasa'a'm ka kas'ye'en?

²⁸¿Jiwot'itieje ka siwone'ate siukia Egipto jlele ti jilia'an no'oti?”

²⁹“Moisés ipi'ya wekie'e ti yiyiji paka, sekyi'i yamat'ipi ti i'yilta'n yi'i japa ajnat Madián, yiji siupapo je ijiat ka ijiaja. 'Yina sek tijwa'yi'yi'ne, paj ti jilis timesie.

³⁰Jlampa yama'niji puwa cuarenta najkapis, Moisés ti injlojwanik poli jlele ini'wenkinat'ijiampe yi'i pa ajnat laj i'nioye'e, je tojwape'n japa tikijnaki jle' iyo'ate Sinaí. Siupa injlojwanik poli jlele yiji pa jwat jla'al, yiji pet japa a'la' ti tak'ayi'ni.

³¹Kawojlit'ijinipi pa Moisés ti i'wina siupa iyo ti ti'wenkinaja, sekyi'i ti ijliasat'iyi'nijpe ti iyotaja ka 'weneje siupi iyo, ipi'yayet'iyipi siupa jla'lap pa Saka'niona, ti iyo'ate,

³²“Ya'am, ti atese'l Jiniak'i'm. Ya'am ti Abraham Jiniak'i'm, Isaac Jiniak'i'm, jla'yi pa Jacob Jiniak'i'm.” “Moisés kititiyeyi'ni kajeyepa ti jnots'ijni ti ipi'yayeyi pak ina'lap, je 'yakajli ka ijiatayi kan'yen'nine siupa iyoyi.

³³Sinia' iyone'ne 'ate ti ijliuye, “Lajnits'i niwa asati, 'yina siunie ajnat 'nak k'ie'e jit'iats'e t'otata ti 'es.

³⁴Jajwi'la'm ti a'wene napo ika kia'lis ti wuj ti p'ijliusis ti yiji jana Egipto. Siu'nie pesiejap'e niwa jlajlas ti ape'yayi, ana'm ajnat'e ti awo ka niuyeje. It'imina ti a'na, ti jajliu' Egíptojo.”

³⁵“Ejlot'ipi wekie'e ti iyo'ate papo ti je iyoyis lajaye, “¿Tempa inwojwa'n saka anechiyasa'a'm, ka kas'ye'en?” Jlam'ne Sinia' ijliu' pa Moisés ka'yena papo i'nio', siu'neje ka noyeje, pakayi ti injlojwanik poli jlele ini'wenkijna'm ti yiji pa jwat tak'ayi'ni ti yiji japa a'la'.

³⁶Jla'am pa Moisés ti yame papo sitiselt'ipi ti tajlajna'm japa Egipto, jla'yi ti iyoyi siupuwa wask'i'nelaja ti yisi'lietk'i papo i'nio', siu'neje puwa iniank'iye puwa ja'nakaj ts'ijiye yi'i japa Egipto, siu'neje ti yiyet'ipi 'niji siupa I'niat Lajlik'i Isiati, siu'neje ti yi' ajnat laj i'nioye'yi cuarenta puwa najkapis.

³⁷Jla'am pa Moisés siupa ti iyont'iyijpe 'ate papo Israel jika kia'lis, “Sinia' jantajlat aswa'm siupa jijwejlanik jiwo ti jawo'ate awoyi.”

³⁸“Siu'neje ti yiji siupapo nojwisiji, yi'i pa ajnat laj i'nioye'e, ijiok'i'ni ti yijap papo sitiselt'ipi, siu'neje ti injlojwanik poli jlele tane yi'i japa tikijnaki Sinaí. Jla'am 'neje ti isimt'ipi ilia'm siuniwa inamtis ti in'wasankiye, sekyi'i ti ijliasatats'i pet 'nakayi.

³⁹“Siupapo sitiselt'ipi je its'iuyisie, je isimits'i ilia'm, 'wenajliyi ti iyo ka inapilisi japa Egipto.

⁴⁰Ijliuyet'iyisijpe pa Aarón, Moisés jikilia, ti iyonisi 'ate, “Lesane sik'ioye puwa saka diosisa', ka najne'n sik'ioye. Je 'esiji 'na Moisés, je kasts'ajane tent'ipa iyo, ti jla'am ti namts'e.”

⁴¹“Sekyi'i ti ilisanat'iyijpe puwa jika topa, ijyiwitanisik'i ni wakia jlas. Iliajne'n puwa jiliajwas ti ijioyiji, lapakawo ti jitienkiujnieye 'yine puwak jilisajna', iyoyet'iyispe jiliakijnieyeja' ape'e.

⁴²Naka ti it'imina ti Sinia' tajla papo i'nio', sekyi'i yine 'ate ti iyunitis puwa katese'l, 'yaka kiakjini iyojinipi papo injwejlanawos, 'ate: Asa'am ti Israel jika kia'lits'ase'm: Siuti paj ti cuaréntaja puwa najkapis ti jleye'yi pa ajnat laj i'nioye'e, ¿mi yamt'ipi ti siwunitie? ¿siu'neje jiliana its'ioye niwa k'iejliyi ti jiwunie? Jeyi.

⁴³'Wenajliyi ti jitijliajajyi'n 'ni siunie aska dios Molok ji'wet, siu'neje jana dios Refán jika kates jipe'el. Siuniwa jilisanayi ti jiwoye aska diosisa' ti je ijiate, atankiujnieye jlena'yi. Nak it'imina ti ja ijioyeyi ts'ijiye, Babilonia 'wechaja.”

⁴⁴Esteban iyoyet'ipi'iji 'ate: —'Yejne'n siojopa tiwoki 'wukie pa Sinia', yit'ijiappe papo sitise'l t'ipi, ti yiyits'i siupa ajnat laj i'nioye'e. Iyo'ate siojopa Sinia' ijliuyeje pa Moisés ka lesane, 'nejesjimpe japaka, ijliuyeje ka wona 'ate siojopa ti'wenkinaja.

⁴⁵Sekyi'i papo sitise'l yikiajlat'iyipi papo jilis japak Sinia' tiwonaja ji'wukie ti paja. Japaka'ne siojopa je iliyisijin'ni ti yamisk'i pa Josué, pakayi ti jika ajnat ijiale papo i'nio' siupapo Sinia' jla'am yokios k'iye ti yiyetaja, ijiok'i'ni ti kia'iyo. Paj ti yiyeyi siupuwa jlomas yiji pet pa David.

⁴⁶'Yina David itiliaja siupa Sinia' iyone ti ip'ilisi'n, sekyi'i t'ajle pa Sinia' ka lesane japa ji'wuk pa Sinia', ka japakaye ka Israel jika kia'lis ininenisi'i'ni ka wunitis pa Sinia'.

⁴⁷David je jlam'ne ka lesane siojopa t'ajle, 'wenajliyi pa anechiyas Salomón ilisane ti paja.

⁴⁸“Kajeyepa ti Sinia', ti lajk'ipa ka into'm ilia'm, iyo napo jijwejlanawos ti je yiji siuniwa i'nio' jilisajna': “Siunie poli janak i'wit ti 'es, jlampet ni ajnat isiet e'ne'ni. ¿Tepat'e ja k'iejliyeyi japa i'yuk ja lesanayi its'ioye?”, iyo pa Saka'niona. “¿Tepat'e jayi'i siuti janinop'it? Awo ka yamjliye ilisajnaye wikie'eyi siu'niwa wask'i'nelaja.”

⁴⁹

⁵⁰

⁵¹Esteban jlam yinjliyi ape'e ti iyo'ate: —¡Wuj wata'a ti int'onie! ¡Ask'iote poyeta ti je wo ka k'iuyeyi pa Sinia'! ¡Asosik iyo'ate siunapo i'nio' je itiant'ieje pa Sinia'! ¡Jitieye'yi ilia'm japa Sinia' jikimet ti 'es, 'wena je jloye'yi papo asnawot t'ipi!

⁵²¿Tepa yi'i papo injwejlanawos t'ipi aska kijilas je iyo wet'iaye? Lajk'iyi pa ka nayisi'i kiapo injwejlanawos ti ilianisi'n, siupapo inianta k'iye siupa ijiate ti 'es. Jlajmiliet ti 'nesa, jlekiajlaye, sekyi'i ti jilianaye.

⁵³Asa'am ti tiwena'ase'm niwa Sinia' jlamtis ti injlojwanik poli jlele yikiaj'lase, ¡'yina je k'iuyeyi!

⁵⁴Pak itiajlat ti kia'iyo ti jwesis, jikinte yasa' kajeyepa ti jiwak tipoyijits'i papo i'nio', jiwak yinits'i pa Esteban.

⁵⁵'Yina Esteban Sinia' jikimet ti 'es tipoyiji pet, i'yenat'ipi poliyi, sekyi'i i'wine pa jloniye iyo ti 'es, i'wine pa Jesús ti takasiti'n jijweyeje pa Sinia'.

⁵⁶Sekyi'i ti iyoyet'ipi 'ate: —¡'Yenayi! A'we'en ni poli ti 'ajla'm, a'we'en ni Sinia' jlas ti takasitiape'n jijweyeje.

⁵⁷Ip'ionat'iyispe ape'e puwa jik'iote, sekyi'i ti tanat'iyisijpe ape'e pa Esteban ti nojwits'i ape'e ti t'ekiyeyisi.

⁵⁸Tokiet'iyijpe kisie'e ti titiajlanaja'm japa isi', sek tenaja'a'ne ti sisajas titietajaja'n. 'Yina ti yiyet'iyisipi siupa ijioyisiji, siupapo ijiutkinisi paka jitis iwo ji'wuye tilienat'ijyits'ipe. Ijiutkinisi pet siupa jwemik jle' iyo'ate Saulo kan'yena.

⁵⁹'Yina ti sisajas titietajajan'ni pa Esteban, jlam iyojli t'ajlayeja', ti iyo'ate: —'Yaka'niona Jesús, ki'm ilia'm ni isiak'al.

⁶⁰Sekyi'i ti t'akosjlete'l itiyeyiji'n, 'yakets'ijiap ti iyo'ate: —'Yaka'niona, ká atajlatajna'a siunie iyo ni jike'. Yiyik'i ti kia'iyo, sekyi'i ti 'yala.