Read Iyojwa'ja Chorote Romanos 13 Bible Online

Romanos 13 - Iyojwa'ja Chorote bible

Romanos 13

¹Wikie'eyi napo i'nio' yi' ape'e 'ni ajnat ti tijniejieta'a ti je 'es ka je ink'iuye napo anechiyasas. Kajeyepa ti Sinia' jla'am ti yi'nik'i ti iyo anechiyasasa'. Jla'am ti jijweye iwijna'm.

²Jak je iyoyiji ti potie siunie ti teje'yi ilia'm napo anechiyasas, 'yina teje'yi ilia'm siunie Sinia' pajk'i ti ilisane. Siunapo anechiyasas ja jlamayis ti jansa'ak'i.

³Siunapo i'nio' anechiyasas je napoka siunapo isis ka intaye, ka inkelitk'i'ni, 'wenajliyi jla'am siunapo iyoyi siunie je 'es. Jak je iyoyiji siuti jiwo ka akama, jla'yi ti je wo ka k'iejliyeyi paka iwo'naja napok anechiyasas, woyi ni siunie 'es, sek jane'yi ti jan'we'en.

⁴'Yina napok Sinia' jikawos, napoka ti ja 'nesieyi, jlampet siuti jawoyeyi siunie je 'es, nak 'yu'we pet ti ja ke injweyeyi. Kajeyepa ti je ka jla'm intojnin'ni jiwek siunie jikio' jlele. Sinia' jla'am ti yikiajle ni siunie jikijmaye iyo ka insa'a siunapo i'nio' iyoyi ni siunie je 'es.

⁵Jak je iyoyiji ti 'esiji ka k'iuye siunapo i'nio' anechiyasas. Ja ke najataja siunie ti ja ke injweye siunie ti it'imina ti jiwo lajaye, 'yina 'esiji ka akiowe ajojwaniti ni siunie 'es ti jiwoyi.

⁶Nak it'imina 'neje ti jikat'in'ni ape'e niwak inkat'i'nijies, kajeyepa siunapo anechiyasas napoka ti Sinia' jikawos, 'yina nak it'imina ti 'yuyits'i siunie jikijmaye ti yiji.

⁷Jak je iyoyiji ti jijwela' ka 'esieyiji ka akat'inie'yi ape'e pa k'iejliyeyi, 'esiji kat'inie'yi ape'e. Siuti janakaye inkat'i'nijie 'esiji ka akat'inie'yi ape'e. Siuti anechiyas jant'ajla pa k'iejliyi napo i'nio', ke int'onie'yi k'iye, siu'neje ti japoye pa k'iejliyi ti ajwela ka 'esieyiji ka k'iuyeyi, 'esiji k'iuyeyi. Jlampet siunie ti jajwela ka 'esieyiji ka wunitie, 'esiji wunitie.

⁸Je 'es ka 'wenayeyi paka int'emina ka akapia' poyeyi pi akiecha, 'esiji ka nakaye jla'am ni assemijnaye. Kajeyepa siunie i'nio' 'namaja ni jikiecha, nak ijiate wek jla'am ti iyoyi siunie Moisés jika'neyasajnaye.

⁹Iyo'ate nak inka'neyasajnaye t'ipi, “Ká 'o'ni, ká akalanki, ká akajla'n, ke inteliaja pa k'iejli ka ne'yi pa siuniwa jikijmatis ni akiecha.” Jlampet siu'nie iyo'ate, “Emi'n ni akiecha wone'ate jiwone ti jininemi'n”, ijwienjli yi'ne siu'niwa Sinia' jlamtis siu'neje niwa ijia.

¹⁰Ni i'nio' jlemijnaye po' je 'yakajyi'n ni jikiecha. Ijiatjliyi, siuti kia'iyo, yimi'n ni jikiecha, ya'm ape'e siunie inka'neyasajnaye iyot'iyipi.

¹¹Wuj ti 'ejie'nase'm ka woyeyi 'niwaka, 'yina ti 'najanayi pi jiwonayi siu'niwa jlomas 'ni awaki, lapakawo ti yiyi siujlie'e jloma ti 'esiji ka 'oyets'iji'n siuti asa'am ti jimayets'iji'n. Ke iwo pa ti siojona sijwajieti je pa tojwa'a, je iyo'ate ti 'nelanjie'e ti atankiunieje pi Sijwajieti Jesús ti je akakiuk.

¹²Yam'niji siukia ajnaj, majleye pet ilia'm siunie jloma, 'esiji ka iliki siuniwa sakeyis ti tajle pet ni ajnaj. 'Esiji ka yina'ak'i siuniwa sikio' jlele tejeye pet ni inwak awaki ti awaki ni jloma, iyoye'ate ni ijiawo.

¹³'Esiji ka iyoki siunie ts'oniye ti 'es ti awaki ni jloma. 'Yina je awok'iate siunapo i'nio' yiji pet ni ajnaj, siunapo 'yatas, siunapo ti je i'ye'en siojona jiliakijnieye ti ilisanisi ti kijlamiyija'm, siunapo ti ijiate ti je 'es ni iyoyi ayijnies asejnia, siu'neje napo 'yakalk'i pi k'iejliyi ti iyoyi jikeye, siunapo ti iniewite'n, siu'neje napo ti t'elijyi'n.

¹⁴'Yina woye asp'ota' ni Saka'niona Jesús ti Sijwajieti ti jatojmata'yi ilia'm ni inwak. Ká awoye 'weta' siuniwa 'yijijiene ni 'assie'n ka woyeyi.