Read Iyojwa'ja Chorote Romanos 15 Bible Online

Romanos 15 - Iyojwa'ja Chorote bible

Romanos 15

¹Siuti sa'am ti jwamjla'a ni awoki, ti sijweye t'onik'i siunie sitienkiujnieye ti 'es, 'esiji ka initojmataja sa'am siuniwa 'najwes t'a'ti, ka yina sa'am sitipe'e, napoka ti kasjwanjliyik'i ti awoki siunie ti atankiunieje pa Sijwajieti. 'Yina je 'esiji ka ijwienkitak'iyi siunie ti sa'am ti kasteliaja ka iyoki.

²Siuti sa'am, 'esiji ka iyoki siunie ti ja 'esieyi ni sikiecha, 'nakayi ti janoyeje pet ka je inetiajnat siunie jitienkiujnieye ti 'es.

³Janiwone 'ate siunie iniwont'iyijipi pa Sijwajieti ti je iyojyi'n siupa ka 'esieyi ti jla'am, 'wenajlit'iyijpe ti jla'am ti it'imina ti 'yakajak'iyi siuniwa Sinia' jlamtis ti iyo'ate, “'Yaka'niona, siuniwa jikalakijnieye napoka i'nio' atajiejwas ti inlaki, yi' itipe'e.”

⁴Wikie'eyi siuniwa Sinia' jlamtis yi'i ni ji'wet jla'am je tilisanaja jiwek, 'yina ti sa'am ti kastajietajapeje, 'nakayi ti jani'neyasanaja, siu'neje ti naka ti ja kasts'et pijia'm, sijweye jantajle ti jla'am, siu'neje ti 'yakajanit ti sinijijwiye po'.

⁵Siunie Sinia' ti naka ti 'netiets'i pijia'm, jla'yi ti iyo asjweyeja', 'esiji ka inoye'ase'm, 'nakayi ti jajnojlie wita'm siunie astankiujnieye iyo, jawo'ate iyot'iyipi pa Sijwajieti Jesús.

⁶Sek jane'yi ti asa'lap janjwanjli ti jawunitie pa Jinia' pa Saka'niona Jesús ti Sijwajieti.

⁷Kiak niwonayi, ká anikawona, 'nakayi ti siunie Sinia' ja tiwunitie, woye'ate pa Sijwajieti ti je 'yakawona aselia'm.

⁸'Yina naka ni siunie ajwe'lase'm, ti Sijwajieti 'nesat'ipi, jla'am iniwojwa'n Judíojos jikawoye, lapakawo ti iyo ka 'nakajanitk'i ti ijiatk'i siupa Sinia' iyont'iyijipi papo jitise'l t'ipi. 'Yina i'winkina ti jla'am je paj ka inkiwaliyi'i siupa ijwijla'm.

⁹Je nakata, 'yina Sijwajieti iyojonk'iye siunapo i'nio' je Judíojos ka iwunitis pet pa Sinia' ti takap'ijliuski, iyo niwa jlamtis ti iyo'ate: “Nak it'imina ti jayunit ka yitie jikiowe'e napok i'nio' je Judíojos, jla'yi ti jayoyi 'yaka'leja' ni E'.”

¹⁰Siuniwa ijia inamtis iyo'neje 'ate: “¡Asa'am ti je Judíojosts'ase'm, niwomayi napo Sinia' jika kia'lis pet, nikanitiejyi'n pet!”

¹¹Siunie jikiecha iyo'ate: “¡Asa'am ti je Judíojosts'ase'm, inwikie'eyeyi siu'neje napo i'nio' yi' ape'e 'ni ajnat, wunitie ni Saka'niona!”

¹²Isaías kiakjini iyopi'iji pet: “Ja'nes siunie Isaí[1] jilis siunapo tomik'i pijia'm jika kia'le, ti jawo anechiyasa' k'iye napoka i'nio' ti je Judíojos, jla'yi ti pak jant'emina ti japoye siupa jinijijwiye.”

¹³'Esiji ka Sinia' siunie ti iyo sinijijwiyeja' ka imponit'i aswa'am siunie asnikanitieyi, siu'neje ni askamankiye, lapakawo ti naka jla'am siunie astankiujnieye ti 'es, ja 'nakayeyi ti siojona Sinia' jikimet ti 'es ti jijweye po', ja'nets'akanit ni asnejejwijiyeja'.

¹⁴I'lijwas, awo'ate: 'yakaja'ase'm ti lajk'ipa ka k'iejliyeyi ka je 'esie ka ne'yase, lajayi'ni ni ji'weta' ni siunie ti 'najanajyi'n, jla'yi ti 'najanayi ti jinijloyeyik'ijin'ni ka woyeyi siunie ijnosik ti 'es.

¹⁵'Yina siu'nie ip'isinik po' siuniwa yiji ni it'imina ti i'lij je jnechi pijia'm ti ajwe'el, ja'nakayeyi ti ja ke inkiwaliyeyi'i. 'Yina ka lajak'i ni iyo ni Sinia' jikap'ijliuskiye ti iwink'i'm, it'imina ni awoyi ti akajli,

¹⁶siunie ti siwojwa'n Sijwajieti jikawoyek'i'm, 'nakayi ti janiuyeje siunapo i'nio' ti je Judíojos. Awoye 'ate siunie pa'yi ti ajwe'el siunie Sinia' jika'niye, 'nakayi ti janiwojwa'nate siunie Sinia' ji'wajiet ti ikanit'ni, siu'neje ti siojona Sinia' jikimet ti 'es ja'notat.

¹⁷Ti ya'am ti ajiap ni Sijwajieti Jesús, ts'ajka'a ni isijmaye ti anoyeje ni Sinia'.

¹⁸'Yina i'lij jnechi pet pijia'm ka k'iejliyeyi paka ijwi'il, 'wenajliyi jla'am siunie ti Sijwajieti siwojwa'n jiwoye, 'nakayi ti siunapo i'nio' je Judíojos janwoyi niwa Sinia' jlamtis. Siunie ti 'yakajak'iyi jakayi ti awo yamtikie', siu'neje kia ti isijmaye iyo,

¹⁹siu'neje niwa ti 'yakelitk'i'ni napo i'nio' ti i'winatajas, siu'neje niwa 'yaka ti i'wi'n ilia'm puwa k'iejliyi, ti janaka jla'am siojona Sinia' jikimet ti 'es ti jijweye po'. Ti atajlap 'niji yi'i jlaja Jerusalén, ti atejwits'i niwa ji'wetis napo i'nio', paj ti ayeyi siujlieja ajnat Iliria. 'Yina atejwits'i siuniwa ajnatis ti ajoyits'i ti awo yamtikie' ti amtiyi ni Sinia' jika'niye ti ijwi'il pa Sijwajieti.

²⁰'Yina je awojonk'iye ka ipi'ya papo ka wo'ate, “Pablo ijwil ka jlama ka inteme siukia jikimet, jlam'ne japoka jla'am siojopo iniane ti isima.” Tempi it'imina ti ajalas ka iyo yamtikie' ka ijwi'il ni Sijwajieti, ti a'yi siunie ajnat ti lajk'ipa ka ijnoyi ka iwo jlamtikie' ka injwe'el siunie Sinia' jika'niye.

²¹'Yina jlam'ne iyo'ate niwa Sinia' jlamtis: “Jan'we'en siunapo ti je t'ijieyiji, siu'neje napo ti je ipi'yayi pet jampe'ya'ne pet.”

²²Ni siuniwa ajwe'el niwak it'imina ti je a'yaka'n ka ijio'wase. 'Yina je pa sik'iejeyi'i ti awota ka ijio'wase.

²³'Nakayi atemayi'ne siu'nie isijmaye 'ne yi'i siu'niwa ajnatis, siunie awo ti ajwel ti 'loj kiwa najkapis ti je ajo'wase.

²⁴'Nakayi siu'nie isiowe awone awo'ate, “Ka ijiotajna'a Espáñaja, 'nakt'e ja'yakajli'ni ka ijiuti astepe'e ka ijioyi japo yi' Rómaja.” 'Yina siuti kia'iyo awojonk'iye ka yi' aska kiowe'e, ajwel'ni ja'yenak'i'm siupa jasitia'n ka sek itialta'ana'a.

²⁵Siu'nie ti jayik jatiuni japo si'lijwas yi'i Jerusalenne siujlie'e ji'wajietiyis.

²⁶Siojopo si'lijwas Sinia' jilis pet yiji niwa ajnatis Macedonia siu'neje jlaja Acaya, napoka ti jlosikis po', ti 'yina po' jla'a ijiutis wita'm, sekyi'i ijliuyeyisi'ijyi siunapo si'lijwas p'ijliusis pet yiji jana ajnat Jerusalén.

²⁷Ijiate ti yiminis ti kiak iniwonisi, 'esiji ti kiak iyo. 'Yina kia'iyo ti po' papo Judíojos t'ipi ti itis siupapo je Judíojos siupa ka 'esieyi pet puwa jlosikis. Jak je iyoyiji ti kiak awo ti ajwe'el napoka ti je Judíojos pet, ti 'esiji ka kia'iwo ka noyeje pet napok Judíojos ti Sinia' jilis, ka iwejna'm siupi k'iejliyi ti i'wi'in.

²⁸'Yina siuti jatimeje siu'nie awoyi, ajwe'el ka yikialtajanie'e siujlie'e ji'wajietiyis, sek jane'yi ka yikiena'a ti jajio 'nijiye Espáñaja. Sek jane'yi ka ijiutieyijna'a astepe'e ni jiwaye'yi pet.

²⁹Jak je iyoyiji siuka yita'ase, ja ke jlasiye siunie Sijwajieti jantajle ti 'es ti jatiu'niase.

³⁰I'lijwas, etijnape pa Saka'niona Jesús ti Sijwajieti, siu'neje ni semijnaye ti Sinia' jikimet ti 'es iwints'e'm, 'ejie'nase'm pet ka ni'nopijietak'i siu'nie ti anila'an, jla'yi ka ts'ajlanayi pa Sinia'.

³¹'Nakayi ti ja lajak'i paka iwonk'iji siunapo i'nio' kakiujnietas yi' Judéaja. Jak je iyoyiji siuka yitajanie'e siunapo si'lijwas yi' Jerusalenne, wuj ti ja inkasaja'n ka yikialtajanie'e siujlie'e ji'wajietiyis.

³²Ka Sinia' iwotajanie'e ka 'wenayena'a ijyilia'm, 'yina ja ke jlasiye ni jayo ti jats'ajkaj'ni ka ni'wenajta, 'yina janinop'it kiu wat ti jayi'asap.

³³'Esiji ka Sinia' siunie tajle ni inkamankiye jane'yasap apejlanit'i astepe'e. Amén.