Read Iyojwa'ja Chorote Romanos 16 Bible Online

Romanos 16 - Iyojwa'ja Chorote bible

Romanos 16

¹Siujlieja sikiecha Febe, 'esiji ka ijiatayiji pet ka kima'yi ilia'm, siunie iyotaja ka iyoki ti sa'am Sinia' jilists'e'm, jlajak tijna'yi pet ti i'yena japo ijia Sinia' jilis yi' Cencréaja. Ja k'iejliyeyijpe pa jansetia'n 'esiji ka noyeyeje, kajeyepa ti kia'iyoyi je pini' napo iniuyeje'ni pet, je japokata jla'yi ti ya'am wuj ti iniuyijk'i'm.

³Atejwile jlaja Prisca jla'yi ja Aquila, ya'yis'ni ti akimak'iji'n ti anokieje pa Sijwajieti Jesús.

⁴Japoka japo ti je iyo ka ini'maniti'n ti iyo ka si'manitis kia iliaye iyotajapi. Je sijwanjliyi ni inikanitieyi, 'yina je pini' 'neje napo ti kia'iyo iniuyeje, Sinia' jilis ti je Judíojos.

⁵Siu'neje japo si'lijwas ininenisi'ni ji'wet'e japo Prisca siu'neje ja Aquila, ti iyunitis pa Saka'niona, japok atejwile. Siu'neje ja isiecha Epeneto, ti awoyi 'yijejnajwaye, atejwile. Jla'am ti iniane ki inamtik ti iyoyi ti je 'yakakiu pa Sijwajieti, ts'ijiye ajnat Ásiaja.

⁶Atejwile jlaja María, jla'am ti wuj ti isijme'n ti iniuye'asem'ni.

⁷Atejwile ja Andrónico jla'yi jlaja Junias, ti ijwienjli atajla'a pet siojona ajnat si'wet pet, ya'yispe ti awak insat jiweje. Napok 'yakajats'i ti iniuyeje napo injlojwajnas, ti je awojli'ijyi ijiusik ink'ieye, ta'ape jla'am ti iyoyisi ni inamtik ti itienkiunisi pa Sijwajieti.

⁸Atejwile ja Ampliato, yiminik ti eniji ni Sijwajieti jle'.

⁹Siojo Urbano ti kia'iyo yiminik, ti sa'yi'ni ti akimak'iji'n ti anokieje pa Sijwajieti, atejwile, siu'neje ja ti kia'iyo ts'amaja Estaquis.

¹⁰Atejwile 'neje siojo Apeles, jla'am ti ijiate ti je inijweki ti yamk'i pa Sijwajieti. Siu'neje japo ji'wet jlele pet ja Aristóbulo, atejwile.

¹¹Siu'neje ja i'wit ijwienjliyi pet siujlieja ajnat ataj'le jle' iyo'ate Herodión, jla'yi japo Narciso ji'wet jlele pet, ti iyo niwa Saka'niona jlamtis.

¹²Atejwile jlaja Trifena, siu'neje jlaja Trifosa, napo asejnia ti ijiate ti isima niwa Saka'niona jlamtis, siu'neje jlaja sikiecha ti wuj ti kasts'amaja Pérsida, ti kia'iyo wuj ti iniuyeje pa Saka'niona.

¹³Siojo Rufo atejwile, 'yaka ti jla'am ti itienkiuni pa Saka'niona, siu'neje jlaja jlet, jlajaka ti wuj ti i'yenk'i'm ti awoyi teteja'.

¹⁴Atejwile siojopo Síntrico, Flegonte, Hermes, Patrobas, Hermas, siu'neje japo Sinia' jilis sekyi'i pet.

¹⁵Kia'iyojliyi ja Filólogo, siu'neje jlaja Julia, siu'neje ja Nereo, siu'neje jlaja ji'yijnia, siu'neje ja Olimpas, wikie'eyi siojopo Sinia' jilis yijap pet.

¹⁶Siuti jitijwila', nik'iewayi napo a'lejwas, 'yina ti nak 'nakajanitie ti asa'am Sinia' jilists'ase'm, ti kiak jiwoyeyi. Wikie'eyi napo Sinia' jilis ti jlam pak yik'i'ni itijwi'lase pit.

¹⁷I'lijwas, jwajla'a ni jayo'nase ti jayo'ate, ti 'esiji ka joskiyeyi ti iyotaja ka inkajyina'a siuniwa askiojwa'l ti ijwienjlik'i. 'Yina ti iyotaja ka akamajiam'ni siuniwa taka'neyasane, ti 'wenayiji je iyo'ate siunie ti 'nelanjie'e jipe'yaye ti yi'ase: ká aninajayiji napoka.

¹⁸'Yina je iniuyeje ni Saka'niona Sijwajieti, nakata jla'am siuniwa ti jla'am ti itiliajasi ka woyisi. Siuniwa jlamtis je a'tisk'iji'n, jla'yi ti inkasi, ik'emijietk'i siunapo ti je itijnisis ilia'm, ti je 'yijen jwajla'aja.

¹⁹Wikie'eyi napo i'nio' ti 'yijene pi iyone, ti jiwoyeyi niwa Saka'niona jlamtis. Wuj ti ts'ajkaj'ni siuti kia'iyo. 'Yina awotajank'iye ka ijiatayiji ka 'najanajyi'n, 'nakayi ti ja intant'iejayi siunie 'es, jlampet siunie je 'es naka ni siunie ti ja ke aninajayiji.

²⁰'Nakayi ti jla'm iwonayijna'a 'ate siunie, siunie Sinia' ti tajle ni inkamankiye, ka 'neti'nits'e ni sitiejiejwa imosik, sek jane'yi ka inenana'a assatis kiajwe. 'Esiji ka Saka'niona Jesús imp'elisinape.

²¹Timoteo siu'nie iniuyijk'im'ni itijwi'lase pit. Siu'neje 'napo saka ajnat ijwienjli pet, 'ni sikiecha Lucio, siu'neje 'na Jasón, siu'neje 'na Sosipater, 'napoka ti itijwi'lase pit.

²²Kia'iyo pet ti ya'am, Terciok'i'm, ti yam ti 'etitk'iye 'ni Pablo siu'nie jip'esinik, atejwi'lase.

²³Gayo kia'iyojliyi itijwi'lase pet. A ji'wet'e, inineni'i'ni napo Sinia' jilis ti initotisk'i'ni wita'm. Erasto kia'iyojliyi itijwi'lase, siojo wikiniet'awo yi'i jla'ak isi', siu'neje 'ni sikiecha Cuarto, itijwi'lase pit.[2]

²⁵¡Jajnotk'i'ni ti ja tiwunitie ni Sinia', etijnape pa Sijwajieti Jesús ti kia'iyo! 'Yina Sinia' jijweye po' kanoye'ase'm pet, ka wo asjweyeja', iyo siuniwa amtiyi siunie ti ijwi'il pa Sijwajieti Jesús. Nak siunie ti je tak'emisie'n siunie Sinia' ti je paj ka netia'n, je 'yakajanit'i ape'e talk'i'ni ti kia'iyo. 'Yina 'nakayi jiwekie'aja ti yin kisie'e pakayi ti jijliujwajnas jla'am ti yi'ik'i niwa jip'esijna'. 'Yina siunapo i'nio' itiant'ieje, kajeyepa ti Sinia' iyotajank'iye ka tijwelaja wikie'eyi niwa ajnatis, 'nakayi ti ja ke inkakiu jla'yi ti jank'iuye niwa jlamtis. ¡'Esiji ka jiwunitieyi tena'a ni Sinia' ti ijwienjli jla'am ti 'yije'en!