Read Iyojwa'ja Chorote Romanos 2 Bible Online

Romanos 2 - Iyojwa'ja Chorote bible

Romanos 2

¹Siupet ti a'am, 'ni isiecha ti jiwoyi jitisa' pa akiecha pi k'iejliyi pi iyoyi, kiak jiwoyi ates po' pet, 'wanjliyi ka kia'iwo ka e' poye, ni'ne ka laja eye. Ijiate, siuti kiak jiwone ni akiecha ti jle'ne, 'yina kiak jiwoyi am am pet ti jiwo atesa', kajeyepa ti jiwoyi siunie iyoyisi.

²Ti asa'am ti jiwoye'yijyi 'ate, “Kasts'ajane ti siunie ti Sinia' i'yenata pi jitis iyo pa yi'i pa siunapo jikeyis kia'iyoyi, je niliak tijnajyi ni siunie iyoyi.”

³Siupet ti a'am, 'ni isiecha ti jijwel ka 'ye'en ni jitis iyo ni akiecha, jlam'ne pet ni jiwoyi ti jiniuyeje napoka ni siunie iniwonisi. ¿Jijwelat'e ka injlana ni Sinia' ka kiak iwotajanie'e pet kan'yenta ni jitis iyo ni i'nio?

⁴¿Ent'a ijiate ti je wo lajaye ni siunie Sinia' jikap'ijliuskiye iyo ti je jlase', ti imp'elisi'n, ti wuj ti inilayiti ti its'iuta'ajap? ¿Ni'ne ka je 'najane paka wone ti jla'am ti tajle ni siunie jikap'ijliuskiye ti yinta'm, ka 'nakayeyi ka awo ajosik ink'ieye?

⁵'Yina siuti a'm ti je injlana'ni ti int'o'n ti je wo ka wo ajosik ink'ieye, ijiatjliyi am am ti jitio'n atepe'e siunie jiliayeja' pet ni i'nio' ti ja tisiejek'i ka Sinia' in'yenta na jitis iyo, ti jlam ti tijnajyi siunie jawoyi,

⁶siu'neje ti japakayeyi ti janjwanjlajamk'i'ni ti ja tenaja siupi k'iejlit'iyijpe pet siupa iyoyi jitieyi'i.

⁷Sek jane'yi siojona ji'wasankiye ti laj jlaja, napok janwejna'm pet siunapo iyojyi'n, jla'yi ti yamjliyi pet ti iyoyi ni siunie ti 'es, jla'yi ti iyoyisijyi'n siunie inwunitieye ti tajle ni Sinia'.

⁸'Yina jlampet siunapo ti ijiateje ti je its'iuye, ti ijiut 'niji ni siunie ijiatk'i, jla'yi ti 'yuyisijk'iyi niwa jloski'layis, napoka'ne napo ti Sinia' wujwa ti jiwak jane'ne jla'yi ti jansa'ak'i.

⁹Ja ke jlasiye ni jawo ti janilayitisi, jla'yi ni jijliak'aliye wikie'eyi napoka siunapo ti iyo ni je 'es ti ja wujwa ti a'tiejak'i, ti ja 'nelanjie'aja janapokaye napo Judíojos. 'Yina ja ke napokataja, siunapo je Judíojos kiak jawo.

¹⁰'Yina kiak jawo pit siunapo ti je iliyi ni 'es ti iyoyi, Sinia' janwejna'm ni siunie jiwunitieye ti jlam ti tajle, siu'neje ni jikamankiye. Kiak jawo'ojyi janajnate napo Judíojos, sek jane'yi ka napokayena'aja pet siunapo ti je Judíojos.

¹¹Kajeyepa ti Sinia' je i'ye'en papo ka ne'yi papo ti t'ank'i pijia'm.

¹²Siupapo i'nio' je Judíojos siunie Moisés jika'neyasajnaye je yijap, 'yina ti iyoyisi siunie jloski'la, 'yina paj ka netianana'a wek ti ja ke inejiap kiak Sinia' jikajluniet. Jlampet siunapo Judíojos ti yijap kiak inka'neyasajnaye, 'yina ti iyoyi siunie jloski'la, Sinia' jankiene ni inka'neyasajnaye ti jankajanit sek jane'yi jane'ne ni jitis.

¹³Jlampet siunapo ipi'yayeta siunie inka'neyasajnaye ijwi'il, 'yina je its'iuyisie, napoka pet napo ti 'yaka ti jitis po'. 'Yina jlampet siunapo ti jla'am je ipi'ya jiwek 'yina ti iyoyi siunie 'yijijie'ne, napokaye pet napo ti Sinia' initiajnat pi jitis iyoyi.

¹⁴Siunapo je Judíojos ti je yiji nak inka'neyasajnaye, 'yina siunie iniwonisi wek pet ijyiwiteje siunie iyo ni inka'neyasajnaye iyo ka tiwoki, naka ti awo'ate ti ya'am, jlam jlam ti jika'neyasajnaye siunie iyoyisi.

¹⁵'Yina 'niwak 'yakajanit siuniwa iniwonisi ti siunie Sinia' takajlunie ka tiwoki yiji pet ni jlosik. Jak je iyoyiji ti jitiej yinataja'ni 'ate, nakaye'eje ti 'yakajanit'i ape'e, siunie jitienkiujnieye janwonayina'a 'ate, “Itis po'” ni'ne ka wo'ate, “Laj itisa'” ts'iji jlaja niwa jlomas.

¹⁶Ke iwo pa ti siuti janeyi janak jloma, Sinia' jankajanit'i ape'e wikie'eyi niwa yijits'i niwa jlosikis napo i'nio', Sijwajieti Jesús naka ti titiejkinaja ti jan'ye'en, nak jika'niye ni siunie ajwe'el ti awoyi yamtikie'.

¹⁷¿Tepi jiwo pet ti am ti jiwo'ate, “Judíok'i'm”, ti je inkajla pet siunie jiniwone ti jlejyi ni Moisés jika'neyasajnaye, jla'yi ti jiniwunitiji ni Ana',

¹⁸siu'neje ti intant'ieje ni Sinia' iyo ka woyi? Jlampet siunie jika'neyasajnaye 'neyasa'n pet ka nak aki'me ni siunie ti tijnajyi ka iwoyi.

¹⁹Lapakawo ti je jinijnape'n ti jikajli ka ama ka 'najne'n k'iye napo talojo', jla'yi ti jikajli ti jiwone 'ate iyo siojona kates k'iye siunapo yiji ni ajnaj,

²⁰siu'neje ti jijwel 'najane ti jit'iyasajne'n siunapo ti lajk'iyipa ka jlosik jlasa', jla'yi ti am ti it'imina napoka siunapo ti je itiant'ieje paka 'neyasajnayeja', siu'neje ti je jlape'n ki iyo ni Moisés jika'neyasajnaye, 'yina ti jijwe'el ti ijiatk'i, jla'yi ti naka ti it'imina ti jwajla'a 'najane.

²¹'Yina kiak jiwone ni a'lej ti jinijwe'el, jakajliete ti jit'iyasajne'n napo a'lejwas, jlam'ne jiat'eje ti je jlapi'lia'm ka ni'neyasa'n ti jiwo amtikie'. Jiwo'ate, “Ká akajla'n.” ¿Yot'iyi'ni jiat'eje ti jikajlanaja?

²²Siu'neje ti jiwoyi amtikie' ti je 'es ka 'no'ni pa, ¿yot'iyi'ni jiat'eje ti jit'iu'ni? Siu'neje ti jijwe'el ti ine'wajamk'i siuniwa jitiej iyoma napo ti iyo jika diosisa'. ¿Yot'iyi'ni jiat'eje ti jikajlani'ni siuniwa sekyi'i kiajwe siojona tenaja'a'ni siuniwa ti tonitie?

²³Ijiate ti jiniwuniti nak Moisés jika'neyasajnaye, jlam'ne ni jiwoyi ti je wo lajaye ni Sinia', kajeyepa ti je k'iuye ni iyo niwak jlamtis.

²⁴'Yina jak je iyoyiji ti kiak iyo niwak inamtis ti iyo'ate, “Asa'am ti jit'iminayi ti siunapo kakiujnietas ti iyo jiliakikie' ni Sinia'.”

²⁵Ijiatk'i siunie ti its'iuye naka inka'neyasajnaye, 'esi naka ni siunie tiwonaja ti t'isie'n jiwa tejwak'i. Jlampet ti je k'iuye ka wo lajaye, nak 'yiniye pet ka siunie ajwel'ni ka lajak'iyi paka ine'ya.

²⁶Jlampet ni siunie ti je Judío ti kiak je iniwone ka t'isie'n jiwa tejwak'i, 'yina lapakawo ti iyoyi siunie inka'neyasajnaye iyone, nak 'yiniye pet ka kiak tiwonaja ti t'isie'n jiwa tejwak'i.

²⁷Jlampet ni siunie ti lajk'ipa ka tiwonaja ni t'ajwes ka t'isie'n jiwa tiliena'a, 'yina lapakawo ti iyoyi wek kiwa Sinia' jlamtis, 'yina kiaka ti jant'emi'nase ti astes japoye, ti asa'am Judíojosts'ase'm ti asa'am ti kiak tiwona'ase, ti 'assie'n jijwa'al tejwak'i, siu'neje ti yi'ase niwak Sinia' jlamtis, 'yina ti je woyeyi ni siunie iyo ka woyeyi.

²⁸Siunie ti Judío je nakata ni siunie ti tom pijia'm ka 'nakajanit, jlampet ni siunie ti kiakt'e tiwonajapi ti t'isie'n jiwa tejwak'i, je 'es ka najataja wek t'ajwes ka neyi.

²⁹Jak je iyoyiji ni siunie ijiate ti Judío, ka iyot'e 'ate siunie ti kiak tiwonaja ti t'isie'n jiwa tejwak'i, 'esiji ka ijiatayi ka intajlaja'm ni jikiowe nak Sinia' jikimet jikijmaye pet, 'yina je tajle ni siuniwa inlesajna' t'ipi ti yi'i ni inka'neyasajnaye. Siunie i'nio' ti kia'iyo, Sinia' wuj ti inka'a pet, 'yina je napoka'ne napo i'nio'.