Read Iyojwa'ja Chorote Romanos 6 Bible Online

Romanos 6 - Iyojwa'ja Chorote bible

Romanos 6

¹¿Tepat'e jayoki? ¿'Est'iyiji ka naja ti jayoki ni soski'la ka 'nakayeyi Sinia' wujwa ka i'wenkints'e'm ni jikap'ijliuskiye?

²¡Jeyi, je 'esiji! Kajeyepa ti masests'e'm jitieyi'i ni inke' jayoyi. Jakajliete, ¿yot'iyi'ni jiat'eje ka 'esieyiji ka jlam inajliyiji ka iyoki naka sake'?

³Inkiwaliyet'i'yi ti siuti ani'nopijietajayiji pit pi Sijwajieti Jesús ti aninajienajape, siliaye iniuk'i wita'm ti ajoki pet ni jiliaye iyo ti tiliana.

⁴Ke iwo pa ti siuti aninajienajape iyot'e 'ate ti kasts'ajle'n sekyi'i titijikie sik'ioye, 'nakayi pet ti janiukk'i kisie'e ti jatiajlaja ni a'no', sekyi'i janiukk'i siunie si'niayi ti ink'ie'. Jawoyena'a 'ate iyo pi Sijwajieti ti kia'iyo ti iniu kisie'e ti tajla'm pi a'no', ka lajak'i siunie Sinia' jiwunitieye ti je jlase' ni jijweye.

⁵Siuti kia'iyo ti siliaye iniuyi wita'm ti kasts'ajle'n pi Sijwajieti, iyo jla'am siukia ti jla'am ti tiliana, 'yina kiak jawoyi si'niayi janjwanjli ka iniukta kisie'e ka itiajlataja ni a'no', jayokiena'a 'ate ti jla'am ti iniu kisie'e.

⁶Kasts'ajane pa awonaja ti siojokia si'wasankiye ti inia'an ti paj jiliaye iniuyi pet wita'm pi Sijwajieti ti tik'iejwata'a japa cruz, 'nakayi pet siuniwa ti kasteliaja ka iyoki ti talts'e ja lajana'a jijweyeja' pet, sek jane'yi ka siunie inke' ja ke iwoyeyijna'a jikipijnasats'e'm.

⁷Kajeyepa ti 'yal pa, 'yina tijwajyi ni siunie jijweye ni inke'.

⁸Siuti kiak iyo ti siliaye iniuyi wita'm pa Sijwajieti ti 'ya'al, 'yina je akakiuk ka kia'iwotajanie'e ti jano kisie'e, si'niayi janjwanjli ti ja kas'wasajne'n.

⁹Kasts'ajane pa awonaja ti siuti Sijwajieti pajk'i ti iniu kisie'e ti tajli pa a'no', ja ke paja ka inekiajle'e ka 'na'al, 'yina siojona 'najlati je ijlien'ni siunie jijweye iyo.

¹⁰Siuti Sijwajieti 'ya'al, pakataja jiwekie'e, jitieyi'i ni inke' je paj ka inekiajle'e'ni ka kiak iwoyi. Jlampet siunie iyo ti 'wasa'n nak tejeye pet ti iniuyeje pa Sinia'.

¹¹'Esiji ka kiak aniwonayiji pet, ataj enayi'ni 'ate ka kiak awoyeyi ka masesie'ase'm jitieyi'i ni inke', 'yina jlampet ti jini'nopijietayiji ni Sijwajieti Jesús, naka pet ti in'wasanajyi'n intajietayi ka noyeyeje ni Sinia' ni jikijmaye.

¹²Naka ti je 'es ka aninenayi 'ate ka awaye kiajwe siunie inke', 'nakayeyi ka woyeyi siunie iyo niwa 'assienis ti je t'o'n ti 'yijijie'nase'm ka woyeyi.

¹³Ke ekiajlayi niwa 'asjwes ni siunie inke' ka 'nakayeyi ka inkiene ni siunie je 'es ka woyeyi. 'Yina jla'm ijiate jla'am siunie jawoyeyi ti janinekiajlayi ni Sinia' ti asa'am siunapo ti pajk'i ti iyo masesie' jitieyi'i ni siunie inke', 'nakayi siuti jlekiajlayi'ijyi ti in'wasanajyi'n. Ekiajlayi ni Sinia' niwa 'assienis, 'nakayi ti jantajieta pet siupa 'es ti jankijmajne'n.

¹⁴Ja 'nakayeyi pet ni siunie inke' ja ke ineyi'ni astepe'e ka k'iejliyeyi siupa kanwo'nase, jlam'ne je jleye kiajwe ni inka'neyasajnaye ni siunie jijweye, 'wenajliyi jla'am ni siunie Sinia' jikap'ijliuskiye ti jleye kiajwe.

¹⁵¿Tepat'e iyo pit ti kia'iyo? Ti je pa awakie kiajwe ni Moisés jika'neyasajnaye, ¿ajwelat'e ka 'esieyi ti awoki ni sake', jlam'ne kasts'ajane pi awonaja ti nak awak kiajwe ni Sinia' jikap'ijliuskiye? ¡Je'e, je 'esiji!

¹⁶Jlam'ne 'najanayi ti siuti jininekiajlayi pa yi'i pa, 'yina jiwoyeyi siupa iyo ka woyeyi, kajeyepa ti jikipinik'ia'm, 'yina ti jik'iuye siupa ijliuye'a'm. 'Yina kiak iyoyiyi pet siu'nie ti jik'iuye naka inke' ijnoyeyiji jana 'najlati, jlam'ne pet ka k'iuyeyi ni Sinia' siunie iyo ka woyi nakata pet ka ijnajietajyi.

¹⁷'Yina inikanitieyi poyi pi Sinia' kajeyepa siuti pajk'i siunie inke' jikipijna'asempe, jlam'ne 'nakayi jlam je woyeyi, jik'iuyeyi siunie Sinia' 'neyasanayi siunie ti jikima'yipe.

¹⁸Jijwayejyi siukia iyo ti jiwoye jikipijnasa' ni siunie inke', 'yina 'nakayi jikipijnastsase'm pet siunie 'es.

¹⁹(Siuniwa amtiyi, ejnape wek, siuniwa wask'i'nelaja kasts'ajane pa awonaja ti sam ti i'niolts'e'm, kajeyepa ti je jitijnisiek'i niwaka ti ajwelta'ase'm.) Jayiyi'ase'ni pet ti asa'am ti pajk'i siuniwa 'assienis ti jlekiajlayi siuniwa inteliajayi ti taj'lase ti ti'niachiki, siu'neje ni siunie je 'es, it'iminayi ti je 'es paka woyeyi. Kiak wonayi ka ninekiajlayi ni siunie 'es, ja'nakayeyijna'a ti jlajma ka awoyeyi ti asa'am ti Sinia' ja'notata.

²⁰Jak je iyoyiji siuti kia'iyo ti je ili'ase nak inke' ti iyo jikipijnasa'ase'm, ijiate ti je jleyejyi siunie jikijmaye iyo naka siunie ti 'esi'n pet.

²¹'Yina ¿tent'ipi siupa 'es ji'wena' ti jiwoyeyi niwaka askeyis ti i'najwejlanatats'i wita'm, ti nakata jla'am ti ijnoyeyiji jana 'najlati?

²²Jlam'ne 'nakayi jijwayejyi ni siunie iyo'nase ni inke' ti inla'nitiejyi'n, jiwoye Sinia' jikawosa' ti jiniuyeyeje ni jikijmaye. 'Yina jla'm ijiate jiwek jla'am ti i'nesieyi, kajeyepa ti nak jitiajlayi ti 'nelanjie'e insisie, yiyi ts'iji Sinia' i'notata, jla'yi ti nakaye pet ti iwi'nase'm jana as'wasankiye ti t'o'n.

²³Jlampet siunie ji'yaka'n ti jiwoyeyi ni aske', janaka pet jana 'najlati. Jlampet siunie Sinia' iyo si'wajieta', janaka pet jana si'wasankiye ti laj jlaja, ti ani'nopijietaja pi Sijwajieti Jesús ti Saka'niona.