Read Iyojwa'ja Chorote Romanos 8 Bible Online

Romanos 8 - Iyojwa'ja Chorote bible

Romanos 8

¹Siunapo i'nio' napo ini'nopijieteje ni Sijwajieti Jesús, napok 'yaka pet ti laj jitisa'.

²Kajeyepa ti siojona Sinia' jikimet, ti jikijmaye ti iyo si'wasankiyejayi siupa ti iyot'iyipi pa Sijwajieti Jesús, kasjwajiete siunie jikijmaye iyo ni inke', siu'neje ni inlaye.

³Sinia' jla'am ti 'yijene pi iyone siunie Moisés jika'neyasajnaye t'ipi je 'yijene paka iwone, kajeyepa ti tajle ti sa'am ti i'niolts'e'm nak it'imina. Pakayi ti ijliu' pa jlas ti t'oniye kiak iyone iyo ni i'nio' ti inke' jilianik, jla'am ti ininekiaj'l ape'e ni i'nio' ti tejeyi jana 'najlati. Jak je iyoyiji siuti iyoyi kiaka, sekyi'i itietayi isia'm siunie jijweye pet naka inke'.

⁴Sinia' jla'am ti kiak iyone, lapakawo ti iyota ka iyoki siunie inka'neyasajnaye iyotaja ka iyoki. Ijiatjliyi ja ke iyok'ne 'ate ti awoki siunie iyo ti sa'am ti i'niolts'e'm, 'yina jayoki'ni siunie yimink'i ka iyoki siojona Sinia' jikimet.

⁵Siunapo i'nio' ti iyoyi jijliak'aliye siuniwa ti tajle ni i'nio', niwaka jlampet siuniwa ti itiliajasi ti iyoyisi jitienkiujnieyeja'. Jlampet siunapo ti yimi'n ti its'iuye janak Sinia' jikimet, niwakata pet siuniwa tajle pit naka ti iyoyi jitienkiujnieyeja'.

⁶Jlampet ti 'o'we' siuniwa ti ya'am emink'i ka iyoyi, niwak soyiji jana 'najlati. Jlampet ti janiwakaye siuniwa ti tajle janak Sinia' jikimet ti jayoyi itienkiujnieyeja', nak iyo i'wiesankiyeja', jla'yi ti iyo ikamankiyeja'.

⁷Jlampet siunapo ti i'nialkitk'i siunie ti itiliajask'i ka woyisi, napoka napo ti teje'yi ilia'm ni Sinia', kajeyepa ti tiwet'ianaja ka iwoyisi, jla'yi ti je its'iuyisie ki iyo nak Sinia' jika'neyasajnaye.

⁸Jak je iyoyiji napoka siunapo ti iyo siunie ti jlamis ti itiliajasi, ijiate je 'yijene pet paka iwonisi ka inkanit'ni ni Sinia'.

⁹Jlampet ti asa'am ti jiliyeyi siunie ti jiwoyeyi siunie ti inteliajayi kajeyepa ti janakata siojona Sinia' jikimet ti it'imina ti jik'iuyeyi siunie iyo ka woyi, siuti ja ijiatayi ka siojona Sinia' jikimet ine'yasap. Siunie ti lajk'ipa siojona Sinia' jikimet ka inejyi je naka Sijwajieti Jesús ka intajle.

¹⁰Jlampet ti Sijwajieti jane'yi aswa'm, siojona Sinia' jikimet janak iyo as'wasankiyeja' pet, kajeyepa ti Sinia' pajk'i ti inlesanajyi'n, 'wanjliyi niwakatajata siuniwa askeyis ti ijioyiji niwa 'assienis jana 'najlati, naka ti jlaj yi'i.

¹¹Siuti siojona Sinia' jikimet siojona ti iniujwa'n kisie'e pa Jesús jane aswa'm, janaka'ne jana ti janekial pijia'm niwak 'assienis ti je t'o'n, kajeyepa ti janakaye jla'am siojona Sinia' jikimet ti yi' aswa'm.

¹²Kiak iyo, 'napo i'lijwas, po' siunie ti t'ejejyinats'e'm ka iyoki, 'yina je niwaka siuniwa ti kasteliaja ka iyoki ti sa'am.

¹³Siuti mawat je liyeyiji niwak askeyis, jijwelt'e ka in'wasanajyi'n; jlampet ti janak Sinia' jikimet jakienayi ka tejwa'yi 'yina ja i'wasanajyi'n pet.

¹⁴Wikie'eyi siunapo ti janaka Sinia' jikimet ti i'winkina siunie iyoyisi, napoka Sinia' jilis.

¹⁵Kajeyepa ti siojona Sinia' iwi'nase'm, je ka iwo'nase jikipijnasa' ka sek ine'yi ka ekiajlayi'ijyi ka je injweyejyi'n. 'Yina janak siojona Sinia' jikimet ti inwojwana Sinia' jilisa', 'yina janak awoki si'niayija' ti awok'iate ti a'yasaja, “Inia', Inia'.”

¹⁶'Yina janak Sinia' jikimet ji'wet ijwienkit siuniwa sosikis, sekyi'i ti ijwilts'e'm pet ti iyo'ate, “Ijiate ti am ti Sinia' jlajts'a'm.”

¹⁷Ijiatjliyi, siuti sa'am ti jilists'e'm ja kasjwanaja'a pa Sijwajieti ti ja tiwenats'e'm siunie ti sikimet naka ni pajk'i ti ijwilts'e'm ni Sinia'. Siu'neje ti ja ijiatayi ti siliaye janoj wita'm pa Sijwajieti ni jijliak'ali iyo ka 'nakayeyi pet, siunie jiwunitieye ti 'es ka nesajap.

¹⁸Awo'ate, siuniwa iyo siuniwa sijliak'aliyis siu'niwa jlomas siunie janwoyi pet siunie ts'oniye ts'ijiye, je ijlien'ni siuka 'yenajap, kajeyepa ti jla'm ijiate ti 'es.

¹⁹'Yina wikie'eyi siuniwa Sinia' jilisajna' yitit ka neyi siojona jloma Sinia' yijni, pakayi ti jan'wenkina napoka siunapo ti jilis.

²⁰Kajeyepa ti jla'am pi Sinia' ti iyo jitisa' puwak jilisajna' t'ipi sekyi'i laj lajaye, 'yina je ka jlamayis jla'am ka kiak iniwonisi, 'yina jla'am jla'am pa Sinia' ti jitienkiujnieye ka kiak iwone. Jak je iyoyiji 'wanjliyi wek ka jiwet'ia kia'iwo, 'yina jinijijwiye po wek.

²¹Japakayeyi ti Sinia' janlanits'i puwa t'aka, siu'neje ti janjwajiete siupa jota iwo ti jota inetiajnate'n. Ti kiak jawo pit janejyi siupa t'oniye jawo ti ijiate ti 'es, papok Sinia' jilis ti kiak janwone.

²²Kasts'ajane pa awonaja siunie Sinia' jilisanik, yamjliyi ti ijliak'al'ni, iyo'ate jana i'nioki ti k'iejli jlas janejyi'n.

²³'Yina je nakata siunie Sinia' jilisanik, ka kiak iwo'ate jana asejnia ti ijliak'al'ni, ti sa'am pet ti po' siojona Sinia' jikimet ti yits'e ti janak iniajnatts'e ta'a, ti tajle janak siojona janwents'e'm ka netiejenie'e janak jloma. 'Yina a'tiek'i siunie iyo ti anilayitieje, lapakawo ti anejejwiyejenk'iye ka ijiatayiji pa Sinia' ka iwo jilisats'eme, jla'yi ka injwajiete'n 'niwa ts'isienis.

²⁴Pajk'i ti ajwaye, 'yina nakataja wek jla'am ti anejejwiyejenk'iye siojona jloma ka netiejenie'e. Jlampet ti intate i'wi'in siunie tinijijwikink'iye, nak je kiak awonaja ka inejejwijiyeja', kajeyepa ti siunie intate i'wi'in je sitia'n ka anejejwijyi'n k'iye.

²⁵Siunie anejejwiyejen k'iye naka pet ni siunie ti sitiete je i'winjli'ijyi naka ni siunie 'yu'we ka je ilikiape ka inijijwiyejen k'iye.

²⁶'Yina kiak iyoyi pet janak Sinia' jikimet iniuyits'e'm siuti kia'iyo laj sijweyeja'. Kajeyepa ti je kasts'ajane ni siunie ts'ajlaye ka iyoki, siunie ti ijiatt'iyiji ti 'esi'n, 'yina siojona Sinia' jikimet jlama'aja pet ti inip'elisine pa Sinia' sitipe'e, ti iyoyi siupuwa jlamtis ti je yits'e ka ne'yi paka kiak iwo puwa jlamtisa'.

²⁷'Yina Sinia', ti 'yijene pi iyone siunie jik'ioyi ni sosik, itiant'ieje jla'yi ti 'yijene pi iyone siunie jitienkiujnieye janaka Sinia' jikimet. Kajeyepa siojona Sinia' jikimet siunie iyoyi ti 'yejla'n napo Sinia' jilis, je jlam pak je iyo wek iyoyi ni siunie Sinia' yimink'i.

²⁸Kasts'ajane 'neje ti siunapo yimi'n ni Sinia', sa'am ti Sinia' tants'e ti itiliaja jla'am kawoyi, wikie'eyi k'iejliyi pa yits'e, jla'am ti itime ta'a pi iyone, 'yina naka'ne ni siunie kasts'isisi ti iniuyits'e'm.

²⁹Sa'am ti Sinia' pajk'i ti kast'ajats'i, pajk'i ta'a ti iwiakajlanit ti 'nelanjie'e siunie jawoyi, ti iyo kawonts'e 'ate iyo ni jlas, sek jane'yi ni siunie jlas janakaye ti jankijli ti janejyi papo ji'niayi ijwienjliyik'i.

³⁰Siuti kia'iyo ti iwiakajlanit ta'a ti 'nelanjie'e siunie jawonts'eje, sekyi'i ti tanats'iji. Jak je iyoyiji siuti sa'am ti tants'e kia'iyo kaslesanaja 'neje. Siuti kaslesajne'n, sekyi'i ti iwinats'e'm siunie jiwunitieye ti 'es.

³¹Siuti kia'iyo niwa ajwe'el, ¿tepat'e si'lij ja iyonaja'ijyi? Siuti Sinia' yisajap, ¿tempapo janta selia'm? ¡Lajk'i papo!

³²Jlam'ne Sinia' je yints'e'm ki jlas, sekyi'i yikiajle ni jiliaye iyo ti tiliana 'nakayi ti ja kasts'isisi. 'Yina siuti kia'iyo, ¿tepa jawo ka je iwents'e'm wikie'eyi niwa wask'i'nelaja?

³³'Yina ¿tempa jankajli ka iwo'ate, “Siunapo Sinia' isi'mik'i je isis”? ¡Lajk'ipa! Kajeyepa ti Sinia' jla'am ti kaslesajne'n.

³⁴¿Tempa jankajli 'neje ka iwo'ate, “Po' ni jitis napoka”? ¡Lajk'ipa! Sijwajieti Jesús jla'am ti initiajnat ki sitis iyoyi pakayeyi ti 'ya'al, siu'neje ti iniu kisie'e ti tajli pa a'no', 'nakayi ti yi 'niji yi'i pa Sinia' ti tom 'niji jijweyeje, jlama pet ti kasts'ajlane'ni pa Sinia'.

³⁵Ijiatjliyi, ¿tempa ka kaskajli ka ijiutie 'nijiye siunie Sijwajieti jlemijnaye? ¡Lajk'ipa! 'Wanjliyi ka nakaye sijliak'ali, ni'ne ka nakaye siunie ti istie' ni si'niayi iyo, ni'ne ka nakaye siunie ti teje selia'm napo i'nio', siunie ti kasnel'lianataja'n, ni'ne ka nakaye siunie ti lajata si'wuye, siunie ti siliaye poyeta, ni'ne ka nakaye siunie ti ja kasts'ajle'n.

³⁶Iyo niwa inamtis ti iyo'ate: “Ti sa'am ti akinieje siunie jiwoyi jlomas ti inijijwijyi'n sik'ioye siojona siliaye. Iyoye'ate niwa sontas 'wolepo' ti tokiji ni siunie tenaja'a'ni ti tilianaja'n, siunie tiwonats'eje.”

³⁷'Yina 'wanjliyi ka poye puwa ka kia'iwo, 'yina 'anak'i pijia'm ti je wata'a je lajk'i ni siunie 'namats'e ti kasts'isisi.

³⁸Itiej awoma ti 'yaka ti lajk'ipa ka kasjlan'ni pet, ka kaslane wita'm ni siunie Sinia' jlemijnaye, 'wanjliyi ka janakaye siliaye, ni'ne ka jakaye jana in'wasankiye, ka napokaye injlojwajnas poli jlele, ni'ne ka niwakaye imose'l, ni'ne ka niwakaye siuniwa jijweye iyo niwa yiji pet ni poli, ni'ne ka niwakaye siuniwa wask'i'nelaja yiji siu'niwa jlomas, ni'ne ka niwakaye siuniwa janejyi ts'ijiye,

³⁹ni'ne ka niwakaye siuniwa yi pijia'm, ni'ne ka niwakaye siuniwa yi' ajnat kiajwe, ni'ne ka ne'yi pa siuniwa Sinia' jilisajna'. ¡Ja lajk'ipa ka kaskajle ka kaslane wita'm ni Sinia' jlemijnaye ti yints'e'm, je lajk'i pi iyo pi Sijwajieti Jesús ti Saka'niona!