Read Iyojwa'ja Chorote 1 Corintios 14 Bible Online

1 Corintios 14 - Iyojwa'ja Chorote bible

1 Corintios 14

¹Injwesiejayiji'n pet k'iye siunie asemijnaye ka'wena', jwanayi'i siuniwa tajle jana Sinia' jikimet ti iyo ji'wajieta napo. Siunie jijweye ti iwijna'm ni i'nio' janak Sinia' jikimet siunie jikijmaye ni injwejlanik jiwo, nak jota ijiatayiji ka injwesiejayiji'n pet k'iye, jak je iyoyiji ka ajwelayeyipi pet napo as'lejwas siupi iyo janak Sinia' jikimet.

²Jlajmiliet, siunie i'nio' jikijmaye iyo ti itieja'm siuniwa inamtis ti je tipe'yak, je napoka i'nio' ka intajle siunie iyo, 'wenajliyi ti tajleje pi Sinia', kajeyepa ti paka ti takamtijniene. Kajeyepa ti lajk'ipa ka impe'ya siupa ijwi'il ti tamtiyeta. Siupa iyo ti ijwi'il lajk'ipa ka 'najane, kajeyepa japak tajle siojopa Sinia' jikimet.

³'Yina jla'am je iyoyeyi wek jla'am siunie jikijmaye iyoyi ti poyeta pi k'iejliyi pi iyo siojopa Sinia' jikimet, 'yina pak yamayi pet ti ijwijla'm papo ijia. Nak ijiate wek jla'am ti iniuyeje napo ijia siunie iniwonisi ti je 'yakaj, kajeyepa ti 'yijie'ne ka woyi ni siunie 'es, jla'yi ti injloyik'ijin'ni ti k'iejlitieje pa jiwet'ia iyo.

⁴Jlampet siunie jikijmaye pet ti itieja'm siuniwa inamtis ti je tipe'yak, jlajmiwek jla'am ti 'esi siunie iyo. Jlampet siunie ti jikijmaye ti yameje'n siunie iyo japak Sinia' jikimet, ijiate nak wuj pet ti iniuyeje siunapo ijia iyoyi ki inamtik, Sinia' jilis.

⁵Ijiate ti sitilia'ase'm kanta aswa'm siuniwa inamtis ti 'wenayi ti je tipe'yak ti tajle janak Sinia' jikimet. 'Yina siuti ya'am awotaja ka askijmaye kiak iwo naka siunie jikijmaye iyo ni i'nio' ti yameje'n pet siunie iyo janaka Sinia' jikimet. Siu'neje ni i'nio' ti jikijmaye kia'iyo ti ijwil pet siunie iyo janaka Sinia' jikimet jla'm ijiate wek jla'am ti 'yaka'm ape'e siunie ti itieja'm pet siuniwa inamtis ti je tipe'yak, siuti lajk'ipa ka injwelk'i siupi iyo, ka 'esieyi pet napo ijia siupa jlosik.

⁶I'lijwas, siuti kiak jayo ti jayamtiyi pet niwaka inamtis ti je tipe'yak ti jantajle jana Sinia' jikimet, siuti jajio'wase, 'yina jlajmiwek ti jayoyi, jlam'ne ja ke sipe'yaye. ¿Tepat'e jawo ka 'najanayi siunie atajleje ni Sinia' ti si'wenkina, siu'neje ti itiant'iejk'i siunie ijiate ti 'es, siu'neje ni ka ijwi'lase pet siunie inka'niye ti tajle ni Sinia', siu'neje ka 'yiyasanayi niwa jlamtis jla'am?

⁷Ataj enayi'ate siuniwa 'woso'l, siut'itie ka jla'lap injwanjlik'iyi, jayijnapi jiwek siojona sisej, siu'neje jana a'lenta kias ji'wole ti wuj, 'yina je ti'niejenataja paka tiwonaja, ti kia'iyo jleyis ijwienjliyetajamk'i pet niwaka 'woso'l.

⁸Jlampet siunapo yiji ni inwak, siuti pesiejataja siojona 'woso' wakiak'iu', 'yina ti je iyo'ate siupi iyo'ni ti 'nesata'ni papo jitiejiejwas, 'yina ja ke inilesank'i papo tokis, jla'm ijiate ti ipi'yayetajasi siupa iyo'ni ti ijiate ti ijyiwitk'i siupa ti 'nesata'ni papo jitiejiejwas.

⁹'Yina kiak iyoyiyi ti asa'am siuniwa asamtis ti je 'yakajk'ink'iye napo as'lejwas jlam'ne siupa jota woyi. ¿Tepat'e jawoyi ka 'najanisi siupi jijwela'? ¡'Yina jlam jlamtiyets'ijin'ni jiwek!

¹⁰Je pini' siuniwa ji'lija' napo i'nio' yi' ape'e 'ni ajnat, 'yina awo'ate jlam'ne siunapo ji'lij jla'am 'yujwanit'i siunie iyo pit.

¹¹Jlampet ti je ape'ya siupa ajwelta ka 'yakamtijniene, 'yina e'ne ka 'wenayeyi siojopa ajnat tajla'm, siupet ti jla'am kia'iyojliyi yink'i'm ka 'wenayeyi japa ajnat itiajla'm.

¹²Siuti kia'iyo ti jiwoyeyink'iye ka'wena' niwak siuniwa siojona Sinia' jikimet iwijnamk'i napo ti iyo ji'wajieta', 'esiji ka ijiatayiji ka injwesiejayijin pet k'iye niwaka ti ji'wena ti iniuyeje napo as'lejwas, yiji ni Sinia' jikijmaye.

¹³Ijiatjliyi, siuti po' ni yiyi naka ti yamtiyi niwak inamtis ti je tipe'yak, ti siojopa Sinia' jikimet iwijna'm, 'esieyiji ka ijiatayi ka int'al, ka int'ajle pa Sinia' ka 'nakajanitia'm siupi iyo, 'nakayi ti ja 'nakajk'i pet k'iye siunapo ijia, ti Sinia' jilis.

¹⁴'Yina siuti amtiyi siupi in'lej 'wenayi ti je tipe'yak ti tajle siojopa Sinia' jikimet, ti awo 'yejlayeja', siunie ijiusik kia'iyo yamk'i pet ni iyo, 'yina jlampet siunie ka 'nakajk'iji'n ka ijwilik'iji'n, nak je ts'ajane ka kiak iwo.

¹⁵Siuti kia'iyo, ¿tepat'e jayo? Siuti jayo 'yejlayeja', ejlowek ka yine'ni isiowe'e, jla'yi ti jajwiene'e ni 'yejlaye siuti iyo'ni ti 'yakajk'i ti 'yijene napo i'nio'. Kia'iyojliyi ti jayo ka 'yakelisie'n, isiowe'e 'nejie'e jiwek ni awoyi, jla'yi ti jajwienik'i siunie ti ja 'nakajk'i jiwek siunie awoyi ti anikanit'ni k'iye napo i'nio'.

¹⁶Siuti jajwankitk'iyi siunie ti jiwunit pi Sinia' ti jlene'ni akiowe'e, ent'a japoye siunie akiecha, ti je ijiat pet ka 'najane kiwa Sinia' jlamtis, ¿jot'e ka wo'ate, “Amén”, 'yina siuti je 'yijene siupi jiwoyi?

¹⁷Ijiate ti 'esieta siunie jiwoyi ti anikanitieyi jlekiajle pi Sinia', 'yina 'wanjliyi je iniuyeje pi akiecha jlosik.

¹⁸Inikanitieyi ekiajle pi Sinia' ti ya'm ijiate wek ya'am ti aka'm astepe'e ti amtiyi siuniwa inamtis ti je tipe'yak, ti iwink'i'm pet janaka Sinia' jikimet.

¹⁹Siunie aniwone pet ti ayetaja napo Sinia' jilis pet, ijwien sikio' itij'we 'nejie'e wek niwa awoyi niwaka siuniwa tajla'm siunie iyo ti 'yaka ti sitiant'ieje, ka sek ne'yi ka i'neyasanayi pet napo ijia. Jla'm ijiate naka ti 'es. 'Yina siuti ja 'lojwa siupuwa inamtis ti je tipe'yak ti jayamtiyi, nak laj lajayeyi pet.

²⁰I'lijwas, jlampet siunie jawoyeyi ape'e niwaka, ká awoye 'ate iyo napo kia'lis ni iyo ni jlosik. Jlampet siunie je 'es, jla'm ijiate jla'am ka kiak aniwonayiji ni jlosik iyo napo kia'lis. 'Yina siunie asosik wonayi'ate napo isijlijyi'n.

²¹Siuniwa inamtis ti yi'i ni inka'neyasajnaye t'ipi iyo'ate: “Siuti jayamti'yi siu'napo i'nio' jasiene ni siunie ji'lij siunapo i'nio' ti je tipe'yak, siunapo i'nio' tajla'm ni ajnat jikiecha. 'Wanjliyijna'a ka kia'iyone, 'yina ja ke ink'iuyisk'i'm, iyo ni Saka'niona.”

²²Siuti kia'iyo ti 'yaka, niwaka ti tajle janaka Sinia' jikimet, niwa inamtis ti je tipe'yak, napoka jla'am siunapo kakiujnietas ti ti'wenkinaja. 'Yina je ka napokaye siunapo ti iyoyi kiwa Saka'niona jlamtis. Siunie ti po' ni i'nio' ti yameje'n pet ti iyoyi jlamtikie' siupi iyo japa Sinia' jikimet, napok jla'am siunapo Sinia' jilis ti ti'wenkinaja, 'yina je tijna'yi pet napo kakiujnietas.

²³Siunie jawoyi ts'ijiye, ti po' jana jloma ti jinitotiek'i wita'm ti inwikie'eyeyi, ti itiejata aswa'm siuniwa inamtis ti je tipe'yak, tajle jana Sinia' jikimet. 'Yina ja'nes'ni siunapo ti lajk'iyi paka iwo, ti je 'yijene kiwa Saka'niona jlamtis. Siuti jampe'yaye sekjane'yi ka inwonayijna'ase 'ate, “Jitiejt'e je isis”.

²⁴Jlampet ti janakaye siunie iyone jana Sinia' jikimet ti yikiaj'lase, ti jajwelajiamk'i napo as'lejwas siupi iyo janaka Sinia' jikimet siupi iyo ka woyi. 'Yina ja'nes siunie ti je itiant'ieje pi Sinia', siunie kakiujnieta. Jani'yena pet siunie iyo, siuti jampe'yaye siupi iyo japak Sinia' jikimet, je jwel pet ka je 'najwejle pi jike' ti po'.

²⁵'Yina ja lajak'ipa kamp'one pi iyo ni jlosik ti je 'es, sekjane'yi ka t'akosayijna'a kiajwe pi Sinia' ti janwunit, ti jiwekie'ejana'a ka je inkakiuni ti ijiate ti yisajap pi Sinia'.

²⁶I'lijwas, ti jajliasat ape'e, ¿ten siupa jayoki? Siuti anojokietak'i wita'm, 'esiji ka poye siupa janane ask'ioye ka inene pi saka'leja, jlam pa jane'yi pi janteliajayi ka enayi. 'Yina japoye 'neje pi janamtiyi ask'ioye kiwa Sinia' jlamtis, ti ja'neyasanayi. 'Yina japoye 'neje pa janjwe'el ask'ioye siupi Sinia' i'winkina'ase'm, siu'neje pa janamtiyi siuniwa inamtis ti je tipe'yak, ti tajle pet janaka Sinia' jikimet. 'Yina japoye pi jikiecha ti janjwelik'iji'n siupi iyo ti tamti, ti jlam ti ipi'ya. 'Yina siuti kiak jiwoyeyi, ti iniuyeje ni iyo napo as'lejwas ni jlosik, 'esiji ti kia'iyo.

²⁷Siuti po' siunapo ti yamtiyi pi ji'lij ti je tipe'yak, ti iyo ka poye paka injwe'el, ya'am awo'ate 'esiji, 'yina ja timesie wek siunapo jantamti, ni'ne ka najapeja wek. Janjwanjli siupi janane ti jantamti, janteme ka pakaye pet siupa tomik'i, janteme ka pakaye pet siupa tomi pijia'm. 'Yina japoye 'neje siunie ja 'najane ka injwelk'iji'n siupi iyo ti tamti.

²⁸Jlampet ti ja lajak'i paka 'najane ka injwelik'iji'n siupi iyo ti tamti, ajwel siunapo ti Sinia' jikimet iyo 'lijaye, ajwel'ni je 'esiji ka inkasit. Ejlo'owek ka inene'ni jikiowe'e ti jankamtijniene pi Sinia'.

²⁹Jlampet siuti po' siunapo ti iyo ka inkasitk'i ti janjwe'el siupa Sinia' jikimet ijwijla'm, siuti ja timesie ni'ne ka najapeja, jlampet siupapo ijia papok jan'yenis siupi iyo ti ijwi'il.

³⁰Jlampet siuti japoye siunie ti Sinia' jan'wenkina yijin'ni ts'e jikiowe'e papo ijia, 'yina siunie inia'an ti tamti ka inleyi kiu', sekjane'yi ka inenayijna 'ate siupa Sinia' po' pa i'winkina.

³¹Ijiatjliyi, wikie'eyi ti asa'am, ti po' siojona Sinia' jikimet iwi'nase'm, ka ajwelayeyi pijia'm siunie 'es ka woyeyi. Janjwanjlipe pa ka jankasit, paj ka inojwaye'yipe ti ja amtiye, 'nakayi ti jani'neyasanisi pet siupi ijwi'il, jla'yi ti janikelis ti iyoyisi ni 'es.

³²Naka ni siunie ti ijwi'il siunie iyo japak Sinia' jikimet, 'esiji ka inlesaniji siupi ji'lij iyone ti tamtiyeta,

³³kajeyepa ti Sinia' naka ni siunie inkamankiye, naka ni siunie ti je iyojonk'iye ka siunapo jilis jlam pak iwots'i'ni, ka je inka siunie iniwonisi. Siunie iniwone napo Sinia' jilis ti initotietak'i wita'm, nak janekisi pet,

³⁴siunapo asejnia 'esiji ka k'iuk'iate ti yiyetajas 'wuk kiajwe, kajeyepa ti laj ji'niayija' ka inkasit ka intamti pet. 'Esiji kank'iuye napo jijwa'yis, iyo ka tiwoki niwa inamtis yi'i ni ji'wet.

³⁵Siuti k'iejliyi pi iyo ka 'najane, 'esiji ka nene 'wet'e ka 'yase'n ni jik'iemjla, 'yina ti naka ti yi' kiajwe. Lapakawo ti je 'yu'we jana asejnia ka intamti ti kia'iyo initotietak'i wita'm napo Sinia' jilis.

³⁶Je int'ayeyiji'n ti je asa'am ka ananayi ka woyeyi niwak Sinia' jlamtis, jla'yi ti je asamkata ti jikima'yi ilia'm.

³⁷Siuti po' siunie ti ijwi'il Sinia' jikimet japaka ti yamtijie'n, ni'ne ka nijwe'el ka poye siupa Sinia' i'winkina ka injlasate pet papo ijia, ja 'najane'eje pet pa janwone siunie iyo, siu'neje iyo ni ip'isinik naka jikajluniet jla'am pa Saka'niona.

³⁸Siuti jankakiuni ni i'nio', ijiate siunapo i'nio' 'esiji ka je ink'iuyisie pet ti jla'am.

³⁹I'lijwas, 'esiji ka injwesiejayijin pet k'iye ka askijmaye iwo'ate iyo napo ijwile pijia'm jana Sinia' jikimet. Siuti po' ni itieja'm nak ye'li je tipe'yak, 'esiji ka enayi'ate.

⁴⁰'Yina 'najata ajloye'ase'm ka 'otatats'i siunie jiwoyeyi.