Read Iyojwa'ja Chorote 1 Corintios 2 Bible Online

1 Corintios 2 - Iyojwa'ja Chorote bible

1 Corintios 2

¹I'lijwas, siuti ajo'wasepi ti ajwe'el ni siunie Sinia' iyo ka iwoyi, ti jlam je iyo, 'yina ka kia'iwopi ka yamtis inkasaje ka inteliajak'i, ni'ne ka instak'iji'n puwa yamtisa'.

²Siuti a' aska kiowe'e, je k'iejliyi paka ijiatayiji paka 'ye'en, najatape jla'am ni siunie ti Sijwajieti Jesús ti tik'iejwata'a pijia'm japa cruz.

³Ka kia'iwopi ka je jlasiye paka ijwiyeja' ka poye jakayik'i, jlam sikititieyi'ni astayi'i ti je sijwejyi.

⁴Siuti amtiye'asempe ti ajwe'lase'm kiwa Sinia' jlamtis, 'yina je akie'nase puwa ka yamtisa' ya'am ka sek ine'yi ka jiwekie'eja ka ikajlajyi, jeyi kat'aja. Janaka jla'am jana Sinia' jikimet 'etsaka 'neje ni jijweye ti yi' ijiap ti awo yamtikie'.

⁵'Nakayi siunie astankiujnieyeja' ti ja 'esie ja ke intajle ni i'nio' jika'najankijnieye, 'wenajliyi ti jantajle ni jijweye ni Sinia'.

⁶Jlampet ti amti'yi napoka ti paja ni jitienkiujnieye ti 'es, akienayiji pet niwak, siunie iyo ni 'najankijnieye. 'Yina je taj'le 'ni ajnat, ni'ne ka intajle niwaka siuniwa injweyejes ti isie' ape'e ti iyo jikimeta' siu'nie ajnat, 'yina ti ja jlaj japoye niwaka.

⁷'Wenajliyi jla'am naka 'najankijnieye ti Sinia' tajle, ti jla'am ti jikimet, siunie ti iyo ka iwoyi. 'Yina je ink'ie', tajlap'e ti 'nelanjie'e ti je wakaljli'ijyi 'ni ajnat, ti jla'am ti ilisane. K'iejliyi ti 'yakaj 'nakayi kajeyepa ti iyotaja pet ka iwents'e'm naka ni siunie iyo ti wuj ti 'es, ni jijweye iyo.

⁸Niwaka ni siuniwa ajwel'ni napo i'nio' ti iyo anechiyasisa' je itiant'ieje. 'Yina siut'itie ka intant'ieje, ka kiak iwoyetaja ka je ink'iejwatits'i japa cruz pi Sijwajieti, ti jla'am ti tajle nak injweye.

⁹Lajk'ipa ka tiwonaja, 'yina ti iyo'ate niwa inamtis t'ipi ti tijwela: “Napoka i'nio' ti 'namaja jla'am ni Sinia', napoka'ne napo ti iwiakajlanit k'iye siuniwa wask'i'nelaja ti je i'winis ka ne'yi japa jlomaye, jla'yi ti je ipi'yayisi, jla'yi ti je ti'wena ka jitiej inenisi'ni 'ate.”

¹⁰'Niwaka'ne siuniwa ti Sinia' iyo ka kastant'ieje, 'yina ijiatjliyi kastant'ieje'ne. Lapakawo ti po' siojona jikimet janaka'ne ti i'ye'en niwaka, wikie'eyi niwa wask'i'nelaja, 'wanjliyi ka kia'iwo ka poye siunie yiyi ni Sinia' ka ijiatayi ka instayiji.

¹¹'Yina awo'ate, ¿tepat'i yi'i pa ti 'yijene iyone napo i'nio' pi yiyi? Ijwienjli jla'am ni jlosik ni i'nio' ti 'yijene pi iyone. 'Yina kiak iyoyiyi pit naka, ti Sinia' jikimet 'yijene pi iyone siuniwa yiyi ni Sinia'.

¹²Jlampet ti sa'am, Sinia' siojona iwints'e'm jikimet, je nak ka intajle ni ajnat, lapakawo ti iyo ka kastant'ieje siunie jikap'ijliuskiye ti wuj ti 'es, jak je iyoyiji ti a'wena niwa wask'i'nelaja.

¹³Jak je iyoyiji siunie iyo niwa samtis ti amtiyejata, 'yina je napoka i'nio' ka intajle siunie iyo ti kasts'ajane, ka ini'neyasanaja, 'wenajliyi jla'am siojona jikimet ti tajle ni Sinia', janak jla'm ijiate jla'am ti janaka ti kasts'eyasa'n ti amtiye. 'Nakayi ti kiak awonayiji'ijyi siunapo Sinia' jikimet yijits'i ti ajwelajamk'i siuniwa tajle pit janaka Sinia' jikimet ti ajwe'el.

¹⁴Jlampet siunapo i'nio' janaka jana Sinia' jikimet ti je yiji, kajeyepa ti je isimits'i ilia'm, je itiant'iejesi. Sekyi'i iyoyets'i 'ate, “Je 'es. Laj lajaye.” Je itijnisisk'i siunie iyoyi, jak je iyoyiji ti ijwi'il kan'yenis, je 'yijenisi paka inwonisi ka injwelis ka inka'yejnajne'n.

¹⁵Jlampet ni i'nio' ti siojona Sinia' jikimet ti yiji, naka pet ti 'yijene pi iyone ti ijliuyeje pa ti k'iejlitieje pa ti iyoyi wikie'eyi niwa wask'i'nelaja, ti je yits'e paka injwel ka k'iejliyeyi paka woyi.

¹⁶Iyo niwa inamtis t'ipi ti iyo'ate: “¿Tempa itiant'ieje pa Sinia' jlosik? ¿Tempa janjwe'el ka 'neyasa'n?” Jlam'ne yits'e ni Sijwajieti jlosik.