Read Iyojwa'ja Chorote 1 Corintios 4 Bible Online

1 Corintios 4 - Iyojwa'ja Chorote bible

1 Corintios 4

¹'Esiji ka kaswone Sijwajieti jikawosa'. Sinia' ijniejiet'e pet ka jikawosa', ka 'neyasane napo i'nio' siuniwa wask'i'nelaja iyo kawoyi, ti je 'yaka'm ape'e siunie iyo.

²Siuti po' ni i'nio' ti k'iejliyi pa jika anechiyas ijliuye kawoyi, je 'esiji ka je 'nakaj, siunie iyo ti isima, ti jlam ti ilisaniji pi jika anechiyas jla'yi ti ilisaniji pi jikijmaye.

³Siuti ya'am ti si'yenayi ka k'iejliyeyi paka iyoyi, yi'i pa ti iyo'ate, “Je 'es ni Pablo”, ni'ne ka napokaye napo i'nio' yi' ape'e 'ni ajnat ka kiak iwonk'iji, 'yina je awoyi ijliak'aliye. Ni'ne ka yama ya'am ka ini'ye'en ka inikajanit itipe'e.

⁴'Wanjliyi lajatak'ipa ka iyine'ni isiowe'e ka je 'esie', 'yina je ajwe'el kats'es, 'yina ijwienjli jla'am pi Saka'niona ti jan'ye'en siupi awoyi.

⁵'Yina naka'ne siunie ti je 'es ka ananejen'ni k'iye pa Saka'niona, je ijiat ka je i'ye'en jla'am napo i'nio' siupi iyoyi siojona jloma ka 'nesta. Ja jlama ti jankajanit'i ape'e ti janejni na jla'al ni jloma wikie'eyi niwa wask'i'nelaja tijwekiek'iji'n yiji ni ajnaj. Sekjane'yi ti jankajanit'iji ape'e napo i'nio' siunie iyo ni yiji ni jlosik. Jiwekie'ejana'a ka Sinia' iwejna'm pa jane'yi siunie ti ja tonitieje, kajeyepa ti 'yakajli.

⁶I'lijwas, ejnapeje jiwek ask'ioye pa Apolos siu'neje ti ya'am, 'yina nak ja 'nesieyi, ja'nakayeyijna'a ka je akama'yi ape'e siuniwa inamtis. Pajk'i ta'a ti yi'i ni ji'wet, jla'yi ti ja lajak'ipa ka ijnonit pi jikiecha siupa ti taka'neyasan'ni, ti kia'iyo yapijne'n pi jikiecha.

⁷¿Ent'a jijwel ka 'a'n ape'e napo a'lejwas? ¿Ten siupa yi'a siupa ti je tajle pa Sinia'? Jlam'ne jla'am ni Sinia' ti iwi'na'm wikie'eyi niwa wask'i'nelaja, 'yina ¿yot'iyi'ni ti jinijnoniti jlam'ne a'wajiet?

⁸¡Ijiatjliyi, 'yijnit'iyi papo ti ijiate ti inkase', ti initaj siuniwa iyo kan'we'en! ¡Ijiate ti jinitewitanayijk'iyi siunapo i'nio' anechiyasas, it'imina ti je kassetia'n ka iniukia'ase'm! ¡'Esp'an ka ijiatayiji ka anechiyasa'ase'm, ka kia'iyoki ka iyok pet anechiyasisa', ka iwiek askiajwe!

⁹Kajeyepa ti sa'am ti injlojwajnasts'e'm, Sinia' kasse'ne siunie je jwajla'a, sa'am ti je kasjlanaja'n. 'Yina wikie'eyi napo i'nio' yi' ape'e 'ni ajnat, siu'neje napo injlojwajnas poli jlele, kas'ye'en iyo ni siunie siwet'ia.

¹⁰Tiwoki 'ne'liasats'e'm ape'e pi Sijwajieti, jlam'ne pet ti asa'am jijwelaye ka ijiatayiji ka 'najanajyi'n ti asa'am ti jikiniets'i pi Sijwajieti. Laj sit'iuniye, jlampet ti asa'am jijwela' ka asjweye poye. Siuti je tiwok sajaye, jlampet ti asa'am tiwok anechiyasa'ase'm.

¹¹Awakieyi 'nijiye ti nel'lia kaslajne'n, na'la kaslajne'n, jla'yi ti laj si'wuyeye, tajak'ni siwa'm, lajk'ipa ka ijiatayiji ka si'weta',

¹²paj ti je kats'isisieyi ti akimak'iji'n ti awokijyi'n paka tiuwa. Siuti takasejlanats'e, je akiujlieje, 'wenajliyi ti ajwelaja'm siunie 'es kawoyisi. Siuti kia'iyo ti je kasp'elisina, akiniejliyi wek ti anilayitieje.

¹³Siuti kia'iyo ti kassamtikieta, akiujliek'i jiwek puwa jlamtis ti ap'elisina. Kaswona 'ate iyo ni jlolimak, awokie 'ate iyo ni siunie k'iejliyi ti 'nachiyisi. Jlomas ti kiak iyonts'e awakieyi 'nijiye.

¹⁴Je ka 'yajwejlanatak'i wita'm, ti kia'iyo ni ajwe'lase'm, 'wenajlitieje ti awo ka 'yiyasanajyi'n ti awo ilisa'ase'm, lapakawo ti wuj ti ts'ama'ase.

¹⁵'Wanjliyi ka je piniye papo ka 'neyasanayi pi iyo pi Sijwajieti ka ne'yasap, 'yina je 'loj siunapo iyo'ate napo asnawot. Ya'am ti asnak'i'm ti kasjwanjliyik'i pa Sijwajieti Jesús, kajeyepa ti yampe ti ato'niase ni siunie inka'niye ti 'es, Sinia' tajle.

¹⁶Nak it'imina ti anip'elisi'niase ka woyeyi siu'nie aniwone pit.

¹⁷It'imina ti ajlo'wase ni Timoteo, ni awoyi yasa, ti kasjwanjliyik'i pa Saka'niona, ti jlam ti je sikiwita ti iyo siunie tijliukieje. Jla'am ti jitiej jajnotk'i ask'ioye siunie aniwone siunie ti akk'i ni Sijwajieti ji'niayi, iyo'ate siunie ti 'eyasajne'n napo Sinia' jilis yijits'i niwa ajnatis ijia.

¹⁸'Ye'en 'nakayi tijwela'ni, po' siunapo ti sijwelis ti ja ke yikiajle'eje ka nak ijiojwi, yamjliyi siunie ti initonitis ti ijwil ka je sijweyi.

¹⁹Jlam'ne pet ni awoyi, siuti Saka'niona janoyijk'i'm ka 'wenayena'a ta'a ijyilia'm. Sekjane'yi ka i'winana'a pet siunapo ijiate ti initoniti'n ka ijiatayi siunie ijwi'il, ka jijweye poyeyis, ent'a napoka siunapo amtijietas jiwek.

²⁰Kajeyepa siunie Sinia' jika anechijiayas je ka inamtisie' wekie'e, naka jijweye pa Sinia'.

²¹'Yina, ¿ten siupa jayo'nase ti nak jajiojwi, jot'e ka yik ka yeja'ni aswa'am, ni'ne ka najataja jla'am ka itiu'niase ni yimijnaye siu'neje ni ikap'ijliuskiye iyo?