Read Iyojwa'ja Chorote 1 Corintios 5 Bible Online

1 Corintios 5 - Iyojwa'ja Chorote bible

1 Corintios 5

¹Ajie'yase ti po' siupa jiwoyeyi ti wuj ti je 'es. Tijwela'ni ti po' siupa ti ijioyijin'ni japa jinia' jik'iemjla. ¡'Yejne'n ijiate, poyeta siunapo ti lajk'iyi paka iwo ti je iyoyi ni inamtik, 'yina je iyo jiwek naka ti wuj ti je 'es, 'wenajliyi ti je yinisi 'ate siupa ti kiak iniwontaja!

²¡Jikiniejliyi siunie jiniwonayi ti jinitonitiejyi'n, jlam'ne ka woyeyi asjwejliye siunie jiwoyeyi ti wuj ti je 'es! ¡Siunie i'nio' ni kiak iyo ni jike', 'esiji ka jotie kisie'e!

³Siuti ya'am, 'wanjliyi ka je yi' aska kiowe'e, 'yina siu'nie isiowe yi' aska kiowe'e. 'yiniye ka ijiatayiji ka yama ti i'niok'i'm ka yi' aska kiowe'e, 'yina ya'am ti Saka'niona ji'lij iwink'i'm ka ijliuye siunie i'nio' ti kiak iniwone, jak je iyoyiji ti kiak awo ti pajk'i ti i'lij ateme ti ajloye. Siuti janitotieyik'i wita'm naka, siunie ijiusik jane'yasap, siunie jijweye ni Saka'niona Jesús ti Sijwajieti kia'iyojliyi jane'yasap.

⁵Sekyi'i ekiajlayi ni sitiejiejwa imosik ka iwo jiwet'iaye ni t'isie'n, jlampet ti jisiak'al janjwa', ka netiejenie'e janak jloma ti ja'nes pi Saka'niona.

⁶Je 'es ka aniwunitie ape'e niwak kia'iyo. Je iyo'ate ka je 'najanayi siunie ti iyo'ate, “Siunie inwakiwa mak ti tilisanaje, 'wanjliyi ka jwamjla'aja ni siunie jijlinkit ka titietajaja, je iyojliyi ti ijliasat pijia'm.”

⁷It'imina ti awo'ate, jotie ts'iji siunie jijlinkit ji'yusie ti naka ti inkajyina, ajwe'el niwa asoski'layis. Sekjane'yi ka woyena'a 'ate iyo jana woye ti ink'ie', ti ink'ie' ni inwakiwa mak ti tilisanaje siojona laj jijlinkitaja', ti tejeye pet jana Judíojos jiliakijnieye Pascua ti yiyetaja. 'Yina kiak jiwoyeyi janaka woye ti ajwe'el, je pa yiyeje ni asosik siunie inwakiwa mak jijlinkit, ti ajwe'el niwa askeyis ti je isis. 'Yina Sijwajieti naka siunie ji'wolepo' jlas ti ji'woma, ti atajietaja janaka Pascua, kajeyepa ti tiliana sitipe'e ka kasts'isisi.

⁸Jak je iyoyiji ti awo'ate, 'esiji ka iyok siliakijniejayeja' ti jayinajaja janak Pascua, ti sa'am ti sikimet, ajwe'el ni awoki ti akiniek'i ni ji'niayi pi Sijwajieti ti 'es. 'Yina je 'es ka iyok'iate iyo janak woye ti jijlinkit yiji, siuniwa sakeyis ti je isis. Jla'm ijiate jla'am ka iyok'iate iyo janak woye ti laj jijlinkitaje', siunie ti awoki ni 'es, siu'neje ni ti si'lij 'es.

⁹Siojo ip'isinikpe'eje ti atate'ase, siukia i'lij ti ajlo'wase ti awo'nase 'ate, “Ká aninajayiji siunapo kiak iniwone, ti 'yuyijk'i'ni napo ijiajwa'yis.”

¹⁰Siuti kia'awoyi, je'ne ka ijwi'il siunapo ti lajk'iyi paka iwoyi, ti je its'iuyi yi' ape'e 'ni ajnat, ti iyoyi naka ti wuj ti je 'es, ti 'yuyijk'i'ni napo ijiajwa'yis, siunapo ijialas kan'we'en niwa wask'i'nelaja, siunapo kajlajnatas, siu'neje napo jitiej iyoma siuniwa iyo jika diosisa'. Siut'itie ka kiak awoyeyi, siunie awoyi nak ajwel'ni, ijiattaja wek jla'am ka atajla'yi siu'nie ajnat.

¹¹Siunie ajwe'el, naka ti je 'es ka aninajayiji ni siunie ti iyo'ate, “Kia'awoyi awoyi ni inamtik”, jlam'ne iyoyi ni jike' ti 'yuyijk'i'ni napo ijiajwa'yis, siu'neje ti iyo naka ti ijialas kan'we'en niwa wask'i'nelaja, siu'neje ti jitiej iyoma siuniwa iyo jika diosisa', siu'neje ni ipichin'ni napo ijia, siu'neje ti 'yata, siu'neje ti kajlajnata. Napoka ti kia'iyo, ja ke inets'e ka akijwanayi siuti ti'yekiunietaja'n.

¹²'Yina je ya'am ka'ye'en siupa kawoyi siunapo ti Sinia' je lis, jan'wenayi jla'am pa Sinia' ti jan'ye'en siupa iyo. Siuti asa'am kiak jiwonayi siunapo yi' aska kiowe'e ti ji'yena' siunie iyoyisi, 'esiji. Kajeyepa ti siuniwa Sinia' jlamtis yiji ni ji'wet iyo'ate, “Siuti po' ni i'nio' yi' aska kiowe'e kiak iyo ti iyoyi ni siunie je 'esk'i, tajlana aska kiowe'e, lenkinayi siupa jikijmaye iyo”.