Read Iyojwa'ja Chorote 1 Corintios 7 Bible Online

1 Corintios 7 - Iyojwa'ja Chorote bible

1 Corintios 7

¹'Nakayi k'iejliyi ti jasiuj'liase'm, siu'nie jloma, ka 'najanayi ni 'yiyasajnaye. Ak'iuyet kiajwe siukia asp'esinik 'neyek'i. Awo'ate, siuti je iyo k'iemjlaye ni i'nio', 'esiji.

²'Yina ti po' siunie iyo napo i'nio' ti 'yuyi'ni napo ijiajwa'yis ti yi' ape'e 'ni ajnat, naka'ne ti it'imina ti awo'ate, 'esiji ka injwa'yi ni i'nio', jla'yi ka injwankit jana asejnia siojona janeyi. Siojona asejnia kiak jawo, janjwankit siunie ayinie.

³Siuti yiyetajap jana asejnia, asejnia kia'iyojliyi ti yiyetajap ni ayinie, sekjane'yi ka ini'yenayisna'a siunie janiwone ti yiyetajape japa asejnia, asejnia kia'iyojliyi.

⁴Siojona asejnia je kimet ni t'ajwes, siunie ayinie nak jikimet. 'Yina siunie ayinie kia'iyojliyi, je kimet siunie t'ajwes, asejnia janaka ti jikimet.

⁵'Yina ká akawoye siunie iyo ka woyi ni ak'iemjla, siu'neje ti a'am ti asejnia'a'm. Siuti po' jana jloma ti kiak jawoyeyi, ti jawoyeyi ni asts'ajlaye, 'esiji ka ijnojlie wita'm, ent'a jawoye 'ate, “'Esiji ka anilayiti kiu wata'a ka je akienk'i'm, kiak jayo'ojyi pet ti ya'am, kajeyepa ti jayoki ni ts'ajlaye, jla'm ijiate ka pajata wata'a.” Jlampet ti 'wenayi siunie jiwoyeyi, ijiate je sitiana' ka kiak awoyeyi, ti jinikiujlie'ni ape'e. Ijiatjliyi siuti yamata 'niji siunie ti it'imina ti kiak jiniwonayi, sekjane'yi ka ekiajla'ayijna'a siunie jiniwonayi ti 'nelanjie'e, iyo napo jijwa'yis po'. 'Lojwinie'e ka sitiejiejwa imosik inkajla', siuti kiak jawoyeyi, ti ja ke alesanayik'iyi siunie jiwoyeyi ti ajwa'yis po', sek jantaj'le ka awayeyinie'e siunie aske'.

⁶Siunie awoyi ti ajwe'lase'm, 'yiniye ka jla'm ip'ilisijnajyi'n jiwek, 'yina je ka ijiatayiji ka wo'ate siunie ti tijliukie'a'm ka woyi, ka je akama'yi ape'e.

⁷Eminta ka kiak iwoyi napo i'nio', ka wo'ate awoyi. 'Yina siuti Sinia' je ijwienkitk'i siu'nie iwints'e'm; po' napo ti Sinia' iyo ka injwa'yits'iji'n, po' 'neje siunapo je iyo jwa'yisa'.

⁸Jlampet siunapo asejnia ti ijwienjlik'iji'n, siu'neje napo ask'ilieki, naka ti ajloye pet, ti je 'esiji ka ilek'i siunie Sinia' iwijna'm, iyo'ate awoyi.

⁹Jlampet ti ja ke intomits'i ilia'm siunie t'isie'n iyo kanwoyi, 'esiji kanjwa'yi, 'nakayi ti jitienkiujnieye ja ke inilankini jiwek.

¹⁰Jlam pet siunapo ti jijwa'yis po', jayikiajle siuniwa Saka'niona jlamtis, siunie ti je ya'am ka yamtisa', ti iyo'ate, “Siuti a'am asejnia'a'm, je 'esiji ka leyi ni ak'iemjla”.

¹¹Jlampet siuti iyo kanleyi, 'esiji ka je inwojyi'n pi jikiecha, ni'ne ka inapili wita'm pa ayinie. Siunie ayinie kia'iyojliyi, je 'esiji ka inwo kanleyi jana asejnia.

¹²Jlampet siunapo 'wenayi, siunie jayo'naseje nak i'lij pet ti jawi'nase'm, je ka Saka'niona jlamtisa'. Ajwel siunapo iyoyi ki inamtik ti jijwa'yis siunapo ti je iyoyi pet siukia inamtik, 'yina ti itiliaja ka ineyi siupa yijap, 'yina nak i'nio' je 'esiji ka ileyi japa asejnia.

¹³Jlampet siojona asejnia ti iyo kiwa Saka'niona jlamtis, ti ijyiwiteje siunie ti je iyoyi pit kiwa Saka'niona jlamtis, 'yina ti itiliaja japa asejnia ka inejiap, je 'esiji pet janaka asejnia ka ileyi ni ayinie.

¹⁴Kajeyepa ti siunie i'nio' ti je iyoyi kiwa Saka'niona jlamtis, ijiate ti 'esi jana jik'iemjla ti iyoyi jla'am kiwa Saka'niona jlamtis. 'Yina japaka jla'am siojopa asejnia ti 'es jla'am, jak je iyoyiji'ni pet pi i'nio' ti Sinia' ilisa'n. 'Yina siojona asejnia ti je iyoyi ki inamtik, kia'iyo iyo pa i'nio' ti 'esi japa jik'iemjla ti iyoyi jla'am ki 'es. 'Esi pet pi jik'iemjla ti iyoyi ki 'es, kia'iyoye'ijyi pet japak asejnia, Sinia' ilisa'n. Siut'itie ka kiak je iwo, siunapo asles jawo'ate siunapo jilis napo i'nio' ti Sinia' je lis, ti je isis, 'yina 'nakayi siunapo asles Sinia' kia'iyo ilisajne'n pet.

¹⁵Jlampet siunie ti je iyoyi kiwa Saka'niona jlamtis, siu'neje jana i'nioki ti je iyoyi ki inamtik, ti iyo ka inleyi japa jik'iemjla, pi jik'iemjla janaka pet jana asejnia, siunapo jijwa'yis ti iyoyi ki inamtik, enayi wek'iate ka leyi. Jak je iyoyiji siunie ti iyoyi ki inamtik, siojona asejnia ti iyoyi ki inamtik, ka sek jlaja'ana'a ti iyoyi jijliak'aliye naka, sekjane'yi ka inkamajana'a, 'yina nak it'imina ti Sinia' ta'nase ka akamaja.

¹⁶Kajeyepa ti siuti a'am ti asejnia'a'm, ¿'najant'iyipi jiwone, ti ts'ijiye jajwajiet ni ak'iemjla? Siu'neje ti a'am ti ayinie'a'm, je 'najane paka awone ti ts'ijiye ja ajwajiet jana ak'iemjla.

¹⁷Siuti 'nelanjie'e tana'a pa Sinia', siunie ijniejiet'a'm pet, 'yina kasjwanjlajamk'i'ni naka, ka 'esieyiji ka je ilik'i pet. Nak i'lij pet siunie ti 'esiji kanwoyi napoka Sinia' jilis, ka ne'yi japa ajnat ji'weta'.

¹⁸Siuti Sinia' tane, siunie ti po' siunie tiwonat'iyipi ti iyo kia'leja', ti t'isie'n jiwa tejwak'i, je 'es ka injwek pet naka. Jlampet ti Sinia' tane siunie ti lajk'ipa ka neyi naka, tiwonat'iyijipi papo kia'lis, 'esiji pet ka je jwesiejayijink'iye ka kiak tiwonaja.

¹⁹Siunie ti jla'm ijiate jla'am ti laja po', je ka nakaye siunie tiwonaja napo kia'lis ti t'isienis jijwal tejwak'iji'n, ni'neje ka lajak'ipa ka ineyi. Jla'm ijiatayi jla'am siunie ti tik'iukie ni Sinia' ni siunie iyo kawoyi.

²⁰Jlajmiliet, siunie Sinia' i'nio' iyone ti 'nelanjie'e i'nio' tane, naka'ne siunie ti je 'es ka intajla'n ni i'nio'.

²¹Siuti inkipinik'ia'm ti Sinia' tanat'i'yapi, 'esiji ka je awo ajlak'aliye ti je t'ikijyi naka. 'Yina ka ne'yi wat japa ka jlomaye ka imp'elisi'n siupa aka anechiyas, amk'emtie ka jikio' inla'na'm, sekjane'yi ka akamajana'a ka woyi siunie 'es.

²²Kajeyepa siunie i'nio' ti je t'ekijyi siunie ti iyo inkipinikie' ti Sinia' tanat'iyipi, nak 'yiniye pet ka je inkipinikie', siunie ti iyoyi niwa Sinia' jlamtis, kajeyepa Sinia' ijwiejiete. Jlampet siunie ti je yi' kiajwe paka jika anechiyasa', ti Saka'niona tanat'iyipi, Sijwajieti iyo pet jikipinikie'.

²³Wuj siojona asja ti Saka'niona takat'i'n astepe'e. Ká aninena'yi 'ate k'iye siunapo i'nio' iyo ka iwo jikipijnasa'ase'm.

²⁴Kiak iyoyi napo i'lijwas naka, 'esiji ka kiak awoyeyi, ja ke paja pet ka leyets'i naka jitieyi'i pi Sinia'.

²⁵Jlampet siunapo ijwienjlik'iji'n, nak Saka'niona je ijwilk'i'm siupa ka ijiatayi ka 'esie ka iniwonisi. 'Yina ajwejla'm siunie ti ya'am ti itienkiujnieye, lapakawo ti jitiej iyomk'i'm napo i'nio' siunie iyo ti wuj ti ap'elisi'n, it'imina ti anoyeje, 'yina ti kia'awo pet ts'esi ni jikap'ijliuskiye ti iwink'i'm ni Sinia'.

²⁶Ya'am ajwelta, siuti a'wena ti istie' siunie si'niayi ape'e 'ni ajnat, 'estieje ka je injwa'yi ni i'nio', ka je inijnalaskine naka.

²⁷Siuti ak'iemjla po', ká aleyi. Siuti laj ak'iemjlaye, ká awojyi'n japa asejnia.

²⁸Siuti jijwa'yi je ajoski'la ni jiwoyi. Siojona asejnia ti tijwa'yi, je jloski'la ni iyoyi, jlampet siunapo jijwa'yis po' je jlase' siunie jawoyi ni jijliak'aliye. Naka'ne ni siunie ti ajoskijietaja'ase'm.

²⁹I'lijwas, siunie 'esiji ka wujwa ka i'yena, naka ti je pi itioyeyi sik'ioye, siojona jloma ti Saka'niona ja'nesi. Jak je iyoyiji ti kiak awo'nase ti asa'am ti asjwa'yis po', 'esiji ka je nakaye siunapo asjwa'yis ka int'onitie'yi.

³⁰Jlampet siunapo ti jika ameyik po', ni'ne ka k'iejliyeyi pa ka jiwet'iaye ti iyo jijliak'aliye, 'esiji ka aniwonayi 'ate iyo ti inkasatieje'n. Jlampet siunapo ti inkase'n jiwek jlamis, 'esiji ka aniwonayi 'ate ti potie pa jiwet'ia ti yiyi ti a'tiek'i. Jlampet siunapo ti tik'iajwajyi'n, siuniwa yamisi, janwonisi pet 'ate ti je jikimet niwa yamisi.

³¹Jlampet siunapo ti yamjliyi pet ti ijiut wita'm siuniwa wask'i'nelaja yi' ape'e 'ni ajnat, janwonayisi pet 'ate ti lajk'iyipa ka in'yakanisi siuniwa wask'i'nelaja ijiut wita'm, kajeyepa ti siu'nie ajnat 'ni awak'i jano'we.

³²Ya'am je awotajank'iye ka awoye astankiujnieyeja' paka k'iejliyeyi. Siunie i'nio' ijwienjleje'n, jitiejli'yi pet siuniwa wask'i'nelaja yiyi ni Saka'niona, 'yina ti iyo ka inkanit'ni.

³³Jlampet ni i'nio' ti jik'iemjla po', jitiejli'yi pet siuniwa wask'i'nelaja yi'i 'ni ajnat, ti iyo ka jik'iemjla inkaja'a.

³⁴Jak je iyoyiji siunie jitienkiujnieye je ijwienjlik'i. 'Yina kia'iyo siojona asejnia ti laj jik'iemjlaye, siu'neje jana jlosie ti je iyojyi'n pa ayinieja', najata jla'am ti jitiejli'yi pet siuniwa wask'i'nelaja yiyi ni Saka'niona, ti isis jitieyi'i pa Sinia', it'imina'ne ti ilisaniji siuniwa t'ajwes siu'neje ni jlosik. Jlampet siojona asejnia ti jik'iemjla po', jitiejli'yi pet siuniwa wask'i'nelaja yi'i 'ni ajnat, ti iyo ka jik'iemjla inkaja'a.

³⁵Siuti i'lij kiak awone, je ka itiumayi'ni asek'i siunie jiwoyeyi, 'wenajlitieje ti anotieje'ase'm jiwek pet ka woyeyi siunie 'es ni janiwonayiji, jla'yi ti ja lajak'ipa ka int'onitie'yi ti jinijijwiyejyink'iye pi Saka'niona.

³⁶Siunie jwemik ti po' siojona initemini'ni, ti initeme ti janeyi, siuti jitiej yajma'm ti ja ke into'm ilia'm siunie iyo ni t'isie'n, siu'neje ti inikiwit ka je 'esie paka iwoyi ts'ijiye, ya'am awo'ate, 'esiji ka jla'm iwone'ni 'ate ka neyi siojopa initeme ti janeyi, 'yina je jloski'la siunie jawoyi.

³⁷Ja jlama pet ti japoye siunie ti iyo'ate, “Ijiate poyeta siojona anitemini'ni, 'wanjliyi ja ke iyiyi”. 'Yina 'esiji siunie jitienkiujnieye iyone, je yits'e paka ine'yi paka ijnalaskine siupa ka woyi, lapakawo ti to'm ilia'm jla'am siunie t'ajka iyo ni ts'isie'n. 'Yina awo'ate wuj ti 'es siunie jitienkiujnieye iyone, 'esiji ka ileyi siojona jlosie ti jota ineyi.

³⁸Ijiatjliyi, siunie i'nio' ti iyo ka injwa'yi, 'esiji. Jlampet ti po' siunie ti je iyo ka injwa'yi, nak jla'm ijiate jla'am ti 'es.

³⁹Siojona asejnia ti jik'iemjla po', janak 'yiniye ka inila'niti wita'm ni jik'iemjla siuti 'wanjle'e. Jlampet ti 'ya'al siupa jik'iemjlata, ijiate siojopa i'nioki lajak'iyi pa ka intomik'i'ni ti jla'am siuti iyo ka ink'iuyet'e pi jik'iemjla masa, 'esiji 'yina ja 'yenijyi'n siunie i'nio' iyo niwa Sinia' jlamtis.

⁴⁰Ya'am ajwelta ka 'esieyiji ka je inwojyi'n pi jikiechaye pi ayinieja. I'lijwas kiak iyo siu'nie isiowe peyit ti ya'am, ajwel'ni kia'awo peyit yik'i siojona Sinia' jikimet.