Read Iyojwa'ja Chorote 2 Corintios 13 Bible Online

2 Corintios 13 - Iyojwa'ja Chorote bible

2 Corintios 13

¹'Nak ja najapajayiji ti jajio'wase. Siuniwa Sinia' jlamtis yi'i ni ji'wet iyo'ate, “Ti ja najapeja, ni'ne ka timesie wek ti janjwe'el kajeyepa ti i'winaja pa k'iejliyi, wikie'eyi napo kia'iyo nak ijiate ja lajak'ipa ka intomik'i'ni.”

²Jlampet siupapo ti iyoyi ni jloski'la, jakayik'i ti nak ajojwi ti timesieyi siukia awonepi ti ajloye, i'lij 'etiapk'i, ekiajlayi'i ti kiak awo'nase. 'Wanjliyi sitiojwataja 'ni a'yi ti awo 'ate siu'neje japo 'wenayi pet, “Ka yiktiejna'aja, 'wanjliyi je ap'elisinajyi'n.”

³'Yina ti jiwoyejyi'n paka k'iejliyi ka pakaye ka inikajanit ka ijiatayiji ka pakaye Sijwajieti ka jlamtisa' siuniwa yamtis. 'Yejne'n Sijwajieti je ka i'nio' jiniliakie, Sijwajieti jijweye po' kan'ye'en siuniwa jiwoyeyi.

⁴Ijiate, siuti tik'iejwata'a jakia cruz iyoye 'ate siuti ijiateje ti laj jijweyeja' pa, 'yina siuti 'wasa'n je 'wena pet paka 'esieyi naka Sinia' jijweye. 'Yina nak kiak iyoyi, 'wena je ajok'i siuti jla'am ti kiak iyoyi ti 'yaka ijiatayi ka jijweyejayi, 'yina siupet ti kia'iyo ti ani'nopijietaja nak ja kasts'esi pet ni jijweye ni Sinia', ti jayi' aska kiowe'e ti jayoyi niwa jlamtis.

⁵Ni'yena, siu'neje ti ja askiowe ja amtijiena. ¿Ijiatt'iyiji ti je ink'asayi pijia'm siunie astankiujnieye ti 'es? ¿Mi 'najanayi pi jiwonayi ti Sijwajieti Jesús yiye aswa'm siuti kiak jawoyi? ¿Tempa ja'nesieyi?

⁶Siuti kiak jawo jani'yenajyi'n, 'yina kiak jawo'ojyi pet ti sa'am ja kas'yena'ajyi pet, sek jane'yi ka intant'iejats'ena'a ti injlojwajnasts'e'm ti sa'm ijiate wek sa'am.

⁷Sa'am 'ajlana'ase'ni pa Sinia', ka je awoyeyi ni siunie je 'es. Je ajwel ka sam ijiatayi ka 'esiet'iyi siukia awonajapi ti akimak'iji'n ti awak askiowe'e, 'wenajlitieje jla'am ti awoktajank'iye ka awoyeyi ni siunie 'es, ejlo'owek ti ijiate ti lajata ijwiyeja'.

⁸Ke iwo pa ti je 'es ka itieye ilia'm niwa Sinia' jlamtis ti ijiatk'i, 'wenajliyi ti ja'yukik'i siunie iyoyi.

⁹Jak je iyoyi siuti kiak awoki, ti laj sijweyeja', sekyi'i ti anikanitie'ajak'i wita'm, jlam'ne pet ni jiwoyeyi ti int'oniejyi'n. 'Yina ja ke iliki ti ja'yejlanayi'ni pa Sinia', paj ka ijiatayijijna'a ka insisie ts'ijiye.

¹⁰'Yina lapakawo 'ni iyo 'ni ip'isinik ni awo'nase ti anajnat its'ioye, kajeyepa ti siuti nak jajiojwi ja ke k'iejliyeyi paka int'emina ka kiak iyo'nase ka je a'tiejak'i siupa i'lij jayone ka winta'asemna'a. 'Yina siunie Saka'niona ji'lij yikialk'i ti awoyi pet ijwiyeja', je ka intaye ka ikajyi'n paka ne'yi pa ti asa'am, 'wenajlitieje ti ka noye'ase'm ka inek siunie jiniwonayi, jiwonayi ni asosik.

¹¹Siunie jikiecha nak jayin jlaja, japo i'lijwas. Awojonk'iye pet ka akamaja. Jalasa pit ka ijiatayiji ka insisie, ni'netie pet. 'Esiji ka ijnol wita'm siunie jiwoyeyi ki iyo niwa asosikis, jla'yi ka ena'yasap ni askamankiye. 'Yina Sinia' ti jla'am ti tajle nak inkamankiye jla'am ti jane'yasap.

¹²Nikiyek'i wita'm. 'Esiji ka anik'iewapi, janikajanitieyi siunie ti asa'am ti jilists'ase'm pi Sinia'.

¹³Wikie'eyi napo Sinia' jilis pet kia'iyo itijwi'lase.

¹⁴'Esiji ka Saka'niona Jesús ti Sijwajieti jikap'ijliuskiye, siu'neje ni Sinia' jlemijnaye, siu'neje ni iyo jana Sinia' jikimet ti 'es ti kassotk'i wita'm, ja wikie'eyeyi kane'yasap.